သင်ၶတႆး လုၵ်ႈႁဵၼ်း ၸၼ်ႉၸွမ် မိူင်းၵွၵ်ႇ ဢွၼ်ႁူဝ် ပီႈၼွင်ႉတႆး ၼႂ်းမိူင်းၵွၵ်ႇ ၸတ်းႁဵတ်း ပၢင်ပွႆးႁပ်ႉတွၼ်ႈ လုၵ်ႈႁဵၼ်းသင်ၶ ၼွင်ႉမႂ်ႇ။ ငိုၼ်းဢၼ်လႆႈ မႃးတီႈ လူင်းၾွၼ်ႊတႆး တေဢဝ် မိူဝ်းၸွႆႈ ၵူၼ်းထူပ်းၽေး ၼမ်ႉထူမ်ႈ ၼႂ်းမိူင်းတႆး။

မိူဝ်ႈဝၼ်းထီႉ 23/08/2015 သင်ၶတႆး လုၵ်ႈႁဵၼ်း ၸၼ်ႉၸွမ် မိူင်းၵွၵ်ႇ ဢွၼ်ႁူဝ် ပေႃႈဢွၵ်ႇ မႄႈဢွၵ်ႇ ၊ ပီႈၼွင်ႉတႆး ၽူႈမီး ၸႂ်သတ်ႉထႃႇ ၼႂ်းမိူင်းၵွၵ်ႇ ၸတ်းႁဵတ်း ပၢင်ပွႆးႁပ်ႉတွၼ်ႈ လုၵ်ႈႁဵၼ်း သင်ႇၶၸဝ်ႈ ၸိူဝ်းမႃးမႂ်ႇ ၊ ၸိူဝ်းတေမႃး ၶိုၼ်ႈႁဵၼ်း တီႈၼႂ်းၸၼ်ၸွမ် လၢႆတီႈ ၼႂ်းမိူင်းထႆး - ၼႆယဝ်ႉ။


ပၢင်ပွႆးၼႆႉ လုၵ်ႈႁဵၼ်း သင်ၶတႆး ၸတ်းႁဵတ်းမႃး ၵူႈပီပီ ၊ ပီႈၼႆႉ ထူၼ်ႈထိုင်ပီ ထူၼ်ႈတီႈ 11 သေ ၸတ်းႁဵတ်း ယဝ်ႉတူဝ်ႈၵႂႃႇ လီငၢမ်း။ သင်ၶ လုၵ်ႈႁဵၼ်းမႂ်ႇ ပီၼႆႉ ၸၼ်ႉ Ph.D မီး 2 တူၼ် ၊ ၸၼ်ႉ M.A မီး 5 တူၼ် ၊ ၸၼ်ႉ B.A.မီးယူႇ 30 တူၼ် ၊ ႁူမ်ႈတင်းမူတ်းမီး 37  တူၼ်။


သင်ႇၶၸဝ်ႈ ဢၼ်လုၵ်ႉတီႈ မိူင်းႁဝ်း မႃးၶိုၼ်ႈႁဵၼ်းယူႇ ၼႂ်းၸၼ်ႉၸွမ် မိူင်းထႆးၼႆႉ လႆႈဝႃႈ ၼမ်မႃး တႄႉတႄႉ။ ဢၼ်ပဵၼ် ပီႈၼွင်ႉတႆး တၵႃႇသတ်ႉထႃး ၸိူဝ်းယူႇၼႂ်း မိူင်းၵွၵ်ႇၵေႃႈ မီးၸေႇတၼႃႇ သတ်ႉထႃႇယႂ်ႇ ႁႅင်းသေ ပၢင်ပွႆး ႁပ်ႉတွၼ်ႈ ၼွင်ႉမႂ်ႇ ႁဝ်းၶႃႈလႄႈသင် ၊ ပၢင်ပွႆး ႁပ်ႉၸုမ်ႈၶူး တီႈၸၼ်ႉၸွမ် မႁႃႇၸူႇလႃး ၸိူဝ်းၼၼ်ႉလႄႈသင် ၊ ဢွၼ်ၵၼ်ၵႂႃႇၸႃၵ လဵင်ႉလူ ႁဵတ်းၵၢၼ်လီ ၵူႉသူလ်ၵၼ် မႃးၼမ်တႄႉတႄႉ - ပီႈၼွင်ႉတႆး တီႈမိူင်းၵွၵ်ႇ ဢၼ်ၶဝ်ႈႁူမ်ႈ ပၢင်ႁပ်ႉတွၼ်ႈ သင်ၶ ၼွင်ႉမႂ်ႇ လၢတ်ႈၼင်ႇၼႆ။


သိုပ်ႇလၢတ်ႈဝႃႈ - ၼႂ်းပၢင်ႁပ်ႉတွၼ်ႈ ၼွင်ႉမႂ်ႇပီၼႆႉ ဢၼ်မီး ၵၢၼ်သႂ်ႇၾွၼ်ႉ လိၵ်ႈတႆး ၼႂ်းၾူၼ်ႊ (မိုဝ်းထိုဝ်) ၊  ၼႂ်းၶွမ်ႊ ၽိဝ်ႊတိူဝ်ႊ ၸိူဝ်းၼႆႉသေ တမ်းတိူၵ်ႈႁပ်ႉ တၢၼ်းငိုၼ်း (လူႇၶၢမ်ႇ) ဢဝ် ၸေႇတၼႃႇဝႃႈ ၊ ငိုၼ်းဢၼ်လႆႈ မႃးၼၼ်ႉၵေႃႈ ပဵၼ်ပိူဝ်ႈတႃႇ ဢဝ်မိူဝ်းၸွႆႈထႅမ် ၵူၼ်းထူပ်း ၽေးၼမ်ႉထူမ်ႈ တၢင်း ပႃႇလႅဝ်း ၵဵင်းလၢပ်ႈ ဝၼ်းထီႉ 27/08/2015 ၼႆႉ- ဝႃႈၼႆ။