ၸုမ်း ၶႅၵ်ႇလီ ပၢင်ၸႃႉ ၼမ်ႉၶူင်း ဝဵင်းတူၼ်ႈတီး ၵႂႃႇၸွႆႈထႅမ် ၶူဝ်းၸႂ်ႉသွႆလႄႈ ၶွင်ၵိၼ်ယႅမ်ႉ ၵူၼ်းထူပ်းၽေး ၼမ်ႉထူမ်ႈ လႄႈ ၵူၼ်းထူပ်း ၽေးသိုၵ်း တၢင်းပွတ်းတွၼ်ႈ ၸႄႈမိူင်းၶၢင် ၊ ၸႄးမိူင်းၶျၢင်း ။

ဝၼ်းတီႈ 23/08/2015 ၶၢဝ်းယၢမ်း 11.00-15.00 မူင်း  ႁူဝ်ပဝ်ႈ လုင်းထုၼ်ႉမျႃႉ လႆႈဢွၼ်ႁူဝ် လုၵ်ႈၸုမ်း ၶႅၵ်ႇလီပၢင်ၸႃႉ ၼမ်ႉၶူင်း ဝဵင်းတူၼ်ႈတီး ၵႂႃႇၸွႆႈထႅမ် ၵူၼ်းထူပ်း ၽေးၼမ်ႉထူမ်ႈ လႄႈ ၵူၼ်းထူပ်းၽေးသိုၵ်း သွင်တီႈ ဝၼ်းလဵဝ်ၵၼ် ၼႂ်းၸႄးမိူင်းၶျၢင်း လႄႈ ၸႄႈမိူင်းၶၢင် ပိူဝ်ႈတႃႇ ၵူၼ်းထူပ်းၽေး တေလႆႈႁပ်ႉ ၶူဝ်းၸႂ်ႉသွႆ ၊ ၶွင်ၵိၼ်ယႅမ်ႉလႄႈ ယူတ်းယႃ ႁႂ်ႈထိုင် မိုဝ်းၵူၼ်းမိူင်း ၵူၼ်းထူပ်းၽေး ၵမ်းသိုဝ်ႈ။ ၵွပ်ႈဝႃႈ တေႃႇထိုင် ယၢမ်းလဵဝ် သိုၵ်းၶၢင် လႄႈမၢၼ်ႈ တိုၵ်ႉပဵၼ် ပၢင်တိုၵ်းၵၼ် ပႆႇၵိုတ်း ပႆႇလိုဝ်ႈ ၵူၼ်းထူပ်း ၽေးသိုၵ်းၵေႃႈ ယင်းတိုၵ်ႉမီးၵၢၼ် ပၢႆႈဢွၵ်ႇယၢၼ် ႁိူၼ်းယေးမႃး တေႃႇႁၢၼ်ႉၼႆႉ 4 ပီပၢႆယဝ်ႉ။


ၸုမ်း ၶႅၵ်ႇလီပၢင်ၸႃႉ ၼမ်ႉၶူင်း လႆႈၸွႆႈထႅမ် ပၼ်ၵူၼ်းထူပ်း ၽေးသိုၵ်း  တီႈဝတ်ႉ တႃႈယေးတေႃး ဝဵင်းမႂ်ႇ(ဝၢႆးမေႃႇ) ၸႄႈမိူင်းၶျၢင်း ပဵၼ်ပီႈၼွင်ႉတႆး ဢၼ်ပၢႆႈၽေးသိုၵ်း ႁူဝ်ၵူၼ်းမီးမွၵ်ႈ 478 ၵေႃႉပၢႆ 11 ဝၢၼ်ႈ ၶၢဝ်းတၢင်း လႆႈပၢႆႈမႃးမီး 4 ပီပၢႆလႄႈ လႆႈၵႂႃႇၸွႆႈထႅမ်ပၼ် ၶူဝ်းၶွင် ၶဝ်ႈသၢၼ် 10 ထူင် ၊ ၶူဝ်းၼၢင်းယိင်း 10 ထူင် ၊ ၶူဝ်းၵူၼ်းၸၢႆး 10 ထူင် ၊ ၵိူဝ် 5 ထူင် ၊ တဵၼ်း 200 ႁေႃႇ ။


သိုပ်ႇၵႂႃႇထႅင်ႈ ဢွင်ႈတီႈ ၵူၼ်းပၢႆႈၽေးသိုၵ်း ၸၢဝ်းၶိူဝ်းၶၢင် တီႈၸၼ်ႇမၢႆးၵွင်ႇ ဝဵင်းမိတ်ႉၵျီးၼႃး ၸႄႈမိူင်းၶၢင် တင်းမူတ်း ၵူၼ်းထူပ်းၽေး ဢမ်ႇယွမ်း 500 ၵေႃႉ ၊ 13 ဝၢၼ်ႈ ၊ တႄႇပၢႆႈမႃး မိူဝ်ႈဝၼ်းတီႈ 15/06/2011 ထိုင်ယၢမ်းလဵဝ် ၼႆႈၵေႃႈ 4 ပီပၢႆယဝ်ႉ ၊ ၸုမ်းၶႅၵ်ႇလီပၢင်ၸႃႉ ၼမ်ႉၶူင်း လႆႈၸွႆႈထႅမ် ၶဝ်ႈသၢၼ် 14 ထူင် ၊ ၵိူဝ် 12 ထူင် ၊ ၶူဝ်းလဵင်း 3 ထူင် ၊ ထူဝ်ႇလိူင် 2 ထူင် ၸဵမ်ၸိူဝ်ႉၼႆ ၸၢႆးမၢဝ်ႇသူၺ်ႇပီႇ ၽူႈၵပ်းသၢၼ် ၸုမ်း ၶႅၵ်ႇလီပၢင်ၸႃႉ ၼမ်ႉၶူင်း ပွတ်းၸၢၼ်းလၢတ်ႈ။


မိူဝ်ႈၼႆႉ ဝၼ်းတီႈ 24/08/2015 သမ်ႉ ၸုမ်းၶႅၵ်ႇလီပၢင်ၸႃႉ ၼမ်ႉၶူင်း  70 ၵေႃႉ သိုပ်ႇၵႂႃႇ ၸွႆႈၵူၼ်းထူပ်း ၽေးၼမ်ႉထူမ်ႈ တၢင်းပွတ်း ဢိင်းတေႃႇၵျီး ၸႄႈမိူင်းၶၢင် ။


ၸုမ်း ၶႅၵ်ႇလီပၢင်ၸႃႉ ၼမ်ႉၶူင်း ဝဵင်းတူၼ်ႈတီး လႆႈႁၢင်ႈႁႅၼ်း ၸွႆႈထႅမ် ၵူၼ်းထူပ်း ၽေးၼမ်ႉထူမ်ႈ မိူင်းမၢၼ်ႈ ပွတ်းၼိူဝ် ၼႂ်းၸႄႈမိူင်း ၸၢဝ်းၶိူဝ်းလႄႈ တိူင်း ၸိူဝ်းၼႆႉ လႆႈႁၢင်ႈႁႅၼ်း ၶူဝ်းၸႂ်ႉသွႆ ၶွင်ၵိၼ်ယႅမ်ႉလႄႈ ယႃႈယႃ ၊ ဝႅၼ်ႈတႃ (မၢၼ်ႇတႃ) မေႃယႃ ၾၢႆႇၶဵဝ်ႈ ၊ မေႃယႃၾၢႆႇတႃ လႄႈမေႃယႃ ၵူႈလွင်ႈလွင်ႈ ၸိူဝ်းၼႆႉ။


ၸုမ်းၶႅၵ်ႇလီပၢင်ၸႃႉ ၼမ်ႉၶူင်း ဝဵင်းတူၼ်ႈတီး ဢွၵ်ႇၶၢဝ်းတၢင်းၵႂႃႇ မိူဝ်ႈဝၼ်းတီႈ 17/08/2015 ထိုင် မိူဝ်ႈၼႆႉ ၶၢဝ်းတၢင်း 7 ဝၼ်း ၼႆယဝ်ႉ။