ၸဝ်ႈၼႃႈတီႈ ပလိၵ်ႈၾၢႆႇ ဢုပ်ႉပိူင်ႇထႆး တီႉၺွပ်း ၵူၼ်းဢမ်ႇမီး ဝတ်းဝႂ် တီႈၸႄႈတွၼ်ႈ ၼၶွၼ်ႊပထူမ်ႊ ၸိုင်ႈထႆး ပွတ်းၵၢင် ။

မိူဝ်ႈဝၼ်းတီႈ 22/08/2015 ASTV ပိုၼ်ၽၢဝ်ႇဝႃႈ - ၸဝ်ႈၼႃႈတီႈ ၶဝ်ႈၵူတ်ႇထတ်း လၢၼ်ႉ ၶၢႆၶဝ်ႈၽၵ်း လႄႈ ႁူင်းလဵင်ႉပဵတ်း ဢၼ်ၸဝ်ႈၶွင် မၼ်းပဵၼ် ၸၢႆးဝိရႃႊ သႄႉၸၼ်ႊ ။ တီႈၼၼ်ႈၼၼ်ႉ မီးႁိူၼ်း တႃႇၵူၼ်းႁဵတ်းၵၢၼ် ယူႇသဝ်း 12 လင် မီးႁႅင်းၵၢၼ် ယၢၼ်မိူင်း ဢၼ်ဢမ်ႇမီး ဝတ်းဝႂ် ႁဵတ်းၵၢၼ် ၽိတ်းမၢႆမီႈ ယူႇတၢင်းၼမ် ဝၢႆးသေ ၶဝ်ႁၼ် ၸဝ်ႈၼႃႈတီႈၵေႃႈ ဢွၼ်ၵၼ် လႅၼ်ႈပၢႆႈ ၊ ၵူၺ်းၵႃႈ ၸဝ်ႈၼႃႈတီႈ ၵေႃႈလမ်း ၸွမ်းသေ တီႉၺွပ်း လႆႈတႃႇ 13 ၵေႃႉ ၊ ၸိူဝ်းၼၼ်ႉပႃး ၵူၼ်းမိူင်းမၢၼ်ႈ တင်း ၵူၼ်းမိူင်းလၢဝ်း ၼႆယဝ်ႉ ။


ႁႅင်းၵၢၼ် ၸိူဝ်းၼၼ်ႉ တင်းၸဝ်ႈႁိူၼ်း ၺႃးတီႉၺွပ်းသေ သူင်ႇႁူင်းပလိၵ်ႈ ပိူဝ်ႈပၼ်တူတ်ႈ တၢမ်ႇၸွမ်းၼင်ႇ ပၵ်းပိူင် မၢႆမီႈ ၸိုင်ႈမိူင်း မီးၵႂႃႇဝႃႈၼႆ ။


လိူဝ်ၼၼ်ႉ ၾၢႆႇၸဝ်ႈၼႃႈတီႈ ၶဝ်ႈၵူတ်ႇ ထတ်းထႅင်ႈ တၢင်ႇဢွင်ႈတီႈ ၼႂ်းၸႄႈတွၼ်ႈ ၼၶွၼ်ႊပထူမ်ႊသေ တီႉလႆႈ ၵူၼ်းႁဵတ်းၵၢၼ် ၽိတ်းမၢႆမီႈ ဢၢၼ်ႇသိပ်းထႅင်ႈ ဝႃႈၼႆ ။


ၵဵဝ်ႇလူၺ်ႈ လွင်ႈပၼ်ႁႃ ၵူၼ်းလၵ်ႉၶဝ်ႈ မိူင်းၼႆႉ ၼင်ႇႁိုဝ် ႁႂ်ႈပေႃး တေထုၵ်ႇ ၸွမ်းမၢႆမီႈ ဝၢၼ်ႈမိူင်းၼႆသေ လူင်ပွင်ၸိုင်ႈ သိုၵ်းထႆး (ၶေႃႊသေႃႊၶျေႃႊ) မီးၶေႃႈသင်ႇ ႁႂ်ႈပိုတ်ႇ ႁဵတ်းပၼ် ဝႂ်ႁႅင်းၵၢၼ် 3 ၸိုင်ႈမိူင်း မိူၼ်ၼင်ႇ မိူင်းမၢၼ်ႈ ၊ လၢဝ်း ၊ ၵမ်ႊၿူဝ်ႊၻီႊယိူဝ်ႊ ၼႆယဝ်ႉ ။ ၸိူင်ႉႁိုဝ် ၵေႃႈလီ တေႃႇထိုင် မိူဝ်ႈလဵဝ် ပၼ်ႁႃ ၵူၼ်းလၵ်ႉ ၶဝ်ႈမိူင်း ၊ ၵူၼ်းႁဵတ်းၵၢၼ် ၽိတ်းမၢႆမီႈ ယင်းတိုၵ်ႉမီးယူႇ ၶိူဝ်းယႂ်း ။