ဝၼ်းတီႈ 21 - 24/8/2015 ၶၢဝ်းတၢင်း 4 ဝၼ်း ပၢင်ၵုမ်လူင် သႅၼ်းၽူႈၼမ်း ၸုမ်းယိပ်းၵွင်ႈ 15 ၸုမ်း ၸတ်းႁဵတ်း တီႈဝဵင်း ၻွႆးသၵဵတ်း မိူင်းၵဵင်းမႂ်ႇ ၸိုင်ႈထႆး - ဢုပ်ႇဢူဝ်း တႅပ်းတတ်း ႁႂ်ႈၵူႈမူႇ ၵူႈၸုမ်း လႆႈၶဝ်ႈပႃး ၼႂ်းပၢင် ၵိုတ်းတိုၵ်း ပတ်းပိုၼ်ႉ တူဝ်ႈမိူင်း သေဢမ်ႇၵႃး လႆႈႁူႉဝႃႈ  မီးၶေႃႈ တႅပ်းတတ်း 11 ၶေႃႈ ။

(1) တႅပ်းတတ်း မၵ်းမၼ်ႈ - ၶေႃႈတၢင်ႇယိုၼ်ႈ ထိုင်ပၢင်ၵုမ်လူင် ဢၼ်ၸုမ်း သႅၼ်းၽူႈၼမ်း တူဝ်တႅၼ်း ဢုပ်ႇဢူဝ်း ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်း တိုတ်ႉတႅမ်ႈမႃး ။


(2) တႅပ်းတတ်း မၵ်းမၼ်ႈ - ၶေႃႈႁွမ်တွမ်တႅမ်ႈ ဢၼ် ၸုမ်းၵမ်ႉၸွႆႈ လွၵ်းလၢႆးပၢႆးႁူႉ  (ၸုမ်းၸွႆႈထႅမ် လွၵ်းလၢႆးပၢႆးႁူႉ တီႈ SD တင်း UPWC)  တၢင်ႇလၢတ်ႈၼႂ်း ပၢင်ၵုမ် ၵဵဝ်ႇၵပ်းယုၵ်းယၢင်ႇ လိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်း ၶေႃႈတီႈ 30 ၼၼ်ႉ ႁႂ်ႈပဵၼ် ၶေႃႈဢၢင်ႈဢိင် ၵႂႃႇ ။


(3) တႅပ်းတတ်း မၵ်းမၼ်ႈ - ၼႂ်းယုၵ်းယၢင်ႇ ၶေႃႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်း ၼၼ်ႉ ၼွၵ်ႈသေ ၼႃႈၵၢၼ် ဢၼ်ၵဵဝ်ႇၵပ်း ၸုမ်းမႅၵ်ႇၵွင်ႈ လုၵ်ႉၽိုၼ်ႉတင်းသဵင်ႈ ၸိူဝ်းတေလူင်းလၢႆးမိုဝ်း ၼၼ်ႉ လႆႈၸႂ်ႁပ်ႉႁွင်း တင်းသဵင်ႈ ။


(4) တႅပ်းတတ်း မၵ်းမၼ်ႈ - ပၢင်ၵုမ်လူင် ဢၼ်ၸတ်းႁဵတ်းတီႈ မိူင်းၵဵင်းမႂ်ႇ ဝၼ်းတီႈ 21-24 လိူၼ်ဢေႃႊၵတ်သ်ႊ 2015 ၼႆႉ ပဵၼ်ပၢင်ၵုမ်လူင် ဢၼ်မီး ဢမ်းၼတ်ႈ (ဢႃႇၼႃႇ) သုင်သုတ်း ၸုမ်းယိပ်းၵွင်ႈလုၵ်ႉၽိုၼ်ႉ ၸိူင်ႉၼင်ႇ ဢမ်ႇယၢမ်ႈ ၸတ်းႁဵတ်းမႃးတီႈ လၢႆသႃႊ တင်း လေႃႇၶီးလႃႇ ။


(5) တႅပ်းတတ်း မၵ်းမၼ်ႈ - တႃႇလူင်းလၢႆးမိုဝ်း လိၵ်ႈၵိၼ်ၵႅၼ်ႇ ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်း NCA ၼၼ်ႉ ႁပ်ႉႁွင်းပိူင် ၶဝ်ႈပႃး လူင်းလၢႆးမိုဝ်း ၵူႈမူႇ ၵူႈၸုမ်း သေ လူင်းမိုဝ်းႁဵတ်းသၢင်ႈ ၼႄၼမ်ႉၼႄတူဝ်ၵႂႃႇ ။


(6) တႅပ်းတတ်း မၵ်းမၼ်ႈ - ယုၵ်းယၢင်ႇ ၽႅၼ်ၵၢၼ် ႁႂ်ႈၸဵဝ်းပဵၼ် ပၢင်ၵိုတ်းတိုၵ်း ပတ်းပိုၼ်ႉ တူဝ်ႈမိူင်း NCA  ဢၼ် ၽူႈၼမ်း ၸုမ်းယႂ်ႇ (5 ၸုမ်း) 5 ၵေႃႉတင်း SD  ယိုၼ်ႈတၢင်ႇမႃး ။


(7) တႅပ်းတတ်း မၵ်ႈမၼ်ႈ - ၽူႈၼမ်း 5 ၵေႃႉ ၼႂ်းၸုမ်း ယိပ်းၵွင်ႈၵၢင် လုၵ်ႉၽိုၼ်ႉ EAO တင်း ၽူႈၼမ်း ၼႂ်း SD သၢမ်ၵေႃႉ ႁူမ်ႈ 8 ၵေႃႉ ႁႂ်ႈၶပ်းၶိုင် ၸဵဝ်းလႆႈၵႂႃႇႁူပ်ႉ လူင်ပွင်ၸိုင်ႈ ၊ သိုၵ်းမၢၼ်ႈ ။


(8) တႅပ်းတတ်း မၵ်းမၼ်ႈ - ၽူႈၼမ်း ၼႂ်း 5  ၸုမ်း တင်း ၽူႈၼမ်း ၼႂ်းၸုမ်း SD ၵႂႃႇၶိုင်သၢင်ႈ ႁႂ်ႈၸဵဝ်းပဵၼ် ပၢင်ၵိုတ်းတိုၵ်း ပတ်းပိုၼ်ႉ တူဝ်ႈမိူင်း NCA ။


1. ႁူဝ်ပဝ်ႈ - ႁူမ်ႈတုမ် ၸိူဝ်ႉၸၢတ်ႈ ယၢင်းၽိူၵ်ႇ KNU

2. ၵႅမ်ႁူဝ်ပဝ်ႈ - ၸုမ်းလွတ်ႈလႅဝ်း ၶၢင် KIO

3. ႁူဝ်ပဝ်ႈ - ပႃႇတီႇ မိူင်းမွၼ်းမႂ်ႇ NMSP

4. ၽူႈၼမ်းၼႃႈ - ပႃႇတီႇ မႂ်ႇသုင် ၸိုင်ႈတႆး SSPP

5. ႁူဝ်ပဝ်ႈ - ပႃႇတီႇ မႂ်ႇသုင် ၸိူဝ်ႉၸၢတ်ႈ ယၢင်းလႅင် KNPP

6. ႁူဝ်ပဝ်ႈ - ၽူႈၼမ်း တူဝ်တႅၼ်း ဢုပ်ႇဢူဝ်း ၵၢၼ်ၵိုတ်းတိုၵ်း SD

7. ၵႅမ်ႁူဝ်ပဝ်ႈ (1) - ၽူႈၼမ်း တူဝ်တႅၼ်း ဢုပ်ႇဢူဝ်း ၵၢၼ်ၵိုတ်းတိုၵ်း SD

8. ၵႅမ်ႁူဝ်ပဝ်ႈ(2) - ၽူႈၼမ်း တူဝ်တႅၼ်း ဢုပ်ႇဢူဝ်း ၵၢၼ်ၵိုတ်းတိုၵ်း SD


(9) တႅပ်းတတ်း မၵ်းမၼ်ႈ - ၽူႈၼမ်း 8 ၸဝ်ႈ ဢၼ်တေၵႂႃႇ ၶိုင်သၢင်ႈ ႁႂ်ႈၸဵဝ်းပဵၼ်ပၢင် NCA ၼၼ်ႉ ႁႂ်ႈလႆႈပႃး ၵူၼ်းၵမ်ႉၸွႆႈၵႂႃႇ ၵေႃႉလႂ် 2 ၵေႃႉ ၊ လိူဝ်ၼၼ်ႉ ႁႂ်ႈလႆႈပႃး ၵူၼ်းၾၢႆႇ ၵၢၼ်လုမ်း ၶွင်ၸုမ်း SD ၵႂႃႇၸွမ်း ။


(10) တႅပ်းတတ်း မၵ်းမၼ်ႈ - ႁႂ်ႈၸုမ်း ႁူမ်ႈသၢင် ၵၢၼ်ၵိုတ်းတိုၵ်း ပတ်းပိုၼ်ႉ တူဝ်ႈမိူင်း သိုပ်ႇႁပ်ႉ ပုၼ်ႈၽွၼ်း တိုတ်ႉတႅမ်ႈ ယုၵ်းယၢင်ႇ ယူင်ႉၶၢပ်ႇ ၵၢၼ်မိူင်း FPD ၊ ပိူင်တိုဝ်းၵမ်သိုၵ်း CoC ၊ ၶွမ်ႊမတီႊႁူမ်ႈၵၼ်ပႂ်ႉတူၺ်း ၵၢၼ်ၵိုတ်းတိုၵ်း JMC ၵႂႃႇ ။


(11) တႅပ်းတတ်းမၵ်းမၼ်ႈ - ၶေႃႈလႆႈၸႂ် တႃႇပိုၼ်ၽၢဝ်ႇ လွင်ႈပၢင်ၵုမ်လူင် သႅၼ်းၽူႈၼမ်း ၸုမ်းယိပ်း ၵွင်ႈၵၢင်ႇ ၸၢဝ်းၶိူဝ်း - ၸဵမ်ၸိူဝ်းၼႆႉ ။


လႆႈႁူႉဝႃႈ ၶေႃႈလႆႈၸႂ် တင်းသဵင်ႈၼႆႉ ၸိူဝ်းပဵၼ်ၽူႈ ၼင်ႈၸိုင်ႈ - ၸွမ်သိုၵ်းလူင် မူတူးသေးၽူဝ်း ႁူဝ်ပဝ်ႈ ႁူမ်ႈတုမ်ၸိူဝ်ႉ ၸၢတ်ႈယၢင်းၽိူၵ်ႇ KNU ၊ ၸွမ်သိုၵ်းလူင် ဢႅၼ်ႊပၢၼ်းလ ၵႅမ်ႁူဝ်ပဝ်ႈ ၸုမ်း လွတ်ႈလႅဝ်း ၶၢင် KIO ၊ ၶုၼ်းဢေႊလ်ၿႄႊလ်တုၺ်ႉ ႁူဝ်ပဝ်ႈ ပႃႇတီႇ မႂ်ႇသုင် ၸိူဝ်ႉၸၢတ်ႈ ယၢင်းလႅင် KNPP  ၸိူဝ်းၼႆႉ လူင်းလၢႆးမိုဝ်း မၵ်းမၼ်ႈ ။


ပိူဝ်ႈတႃႇ လႆႈၵႂႃႇႁူပ်ႉ ၸွမ်ၸိုင်ႈ တဵင်းၸဵင်ႇ ၊ ၸွမ်ပွင်သိုၵ်းမၢၼ်ႈ ၸွမ်သိုၵ်းလူင် မိၼ်းဢွင်ႇလၢႆႇ သေ ၸဵဝ်းၶိုင်သၢင်ႈလႆႈ ပၢင်ၵိုတ်းတိုၵ်း ပတ်းပိုၼ်ႉတူဝ်ႈမိူင်း ၼၼ်ႉ ၸုမ်း SD သိုပ်ႇႁဵတ်း ပၢင်ၵုမ်ၵၼ် ဝၼ်းတီႈ 25/8/2015 ။ ဝၢႆးၼၼ်ႉၵေႃႈ ယင်းတေ ႁူပ်ႉဢုပ်ႇ ၽူႈမီးပုၼ်ႈၽွၼ်း လုမ်း သုၼ်ငမ်းယဵၼ် မၢၼ်ႈ MPC ပႃးလူးၵွၼ်ႇ - ဝႃႈၼႆ ။