ဢိင်ၼိူဝ်ၾူၼ်တူၵ်း မႄႈၼမ်ႉၵႆးၼွင်းသေ ထူမ်ႈဝၢၼ်ႈၵႆး ဢၼ်လႆၶဝ်ႈၸူးၼမ်ႉၶွင် ဢိူင်ႇၵဵင်းလၢပ်ႈ ၸႄႈတွၼ်ႈတႃႈၶီႈလဵၵ်း။ လင်ႁိူၼ်းၵူၼ်း ဢၼ်ယူႇၸွမ်းၾင်ႇၼမ်ႉ ထုၵ်ႇၼမ်ႉပတ်ႉလွင်ႈၵႂႃႇ၊ ၵူၼ်းၵေႃႈတၢႆ/ႁၢႆ လၢႆၵေႃႉ။
ၵဵဝ်ႇၵပ်းလွင်ႈၼႆႉ မိူဝ်ႈၵၢင်ၼႂ်ၸဝ်ႉ ဝၼ်းတီႈ 04/08/2015 ယၢမ်းမွၵ်ႈ 5 မူင်း မႄႈၼမ်ႉၵႆး ၼွင်းမႃးသေထူမ်ႈဝၢၼ်ႈၼမ်ႉၵႆး ဢိူင်ႇၵဵင်းလၢပ်ႈ (ပႃႇလႅဝ်း-ၵဵင်းလၢပ်ႈ) ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ လင်ႁိူၼ်းၵူၼ်းဝၢၼ်ႈ ဢၼ်ယူႇႁိမ်းသၢပ်ႇ ၼမ်ႉၵႆး မွၵ်ႈ 5-6 လင် ပႃးၵႂႃႇၸွမ်းၼမ်ႉ။ ႁိူၼ်းၵမ်ႈၽွင်ႈၵေႃႈ ၼမ်ႉပတ်ႉသေ ဢဝ်ၵိူင်းလူမ်ႉၵႂႃႇၵေႃႈမီး- ၼႆယဝ်ႉ။

ၾၢႆႇ ႁႃသဵင်(သူၼ်းတုမ်) ပႃႊတီႊႁူဝ်သိူဝ် (SNLD) ၸၢႆးဢေး လၢတ်ႈဝႃႈ- လွင်ႈလူႉသုမ်း ယွၼ်ႉၽေးၼမ်ႉၼွင်း တီႈဝၢၼ်ႈၵႆးၼႆႉ လႆႈႁူႉဝႃႈ- လုၵ်ႈဢွၼ်ႇၸၢႆး 7 ၶူပ်ႇၵေႃႉၼိုင်ႈ၊ ၵူၼ်းထဝ်ႈယိင်းဢႃယု 70 ၵေႃႉၼိုင်ႈ၊ မႄႈလုၵ်ႈဢွၼ်ႇ 1 ၵေႃႉ၊ လုၵ်ႈဢွၼ်ႇယိင်း 1 ၵေႃႉ၊ ၼၢင်းယိင်း 3 ၵေႃႉ၊ လုၵ်ႈဢွၼ်ႇၸၢႆးထႅင်ႈၵေႃႉၼိုင်ႈ လႆႈလွင်ႈလႆၸွမ်းၼမ်ႉၵႂႃႇ- ဝႃႈၼႆ။

ယွၼ်ႉၼမ်ႉၼွင်းပတ်ႉသေ ၶူဝ်ဢွၼ်ႇၶူဝ်လူင်လူႉၵွႆ 6 တီႈ/လင်။ ၶူဝ်လူင် ပဵၼ်ၶူဝ်ၼမ်ႉၶိုမ်းတီႈၼိုင်ႈ။ လွင်ႈမႄးၶူဝ်ၼႆႉ ၸဝ်ႈၼႃႈတီႈမၢၼ်ႈၶဝ်ၵေႃႈ ၶဝ်ႈၵႂႃႇၶၢၼ်းၵူၼ်းဝၢၼ်ႈ မႆႉၼိုင်ႈႁိူၼ်း 1-2 လႅမ်ႈသေ မႃးၵၢႆႇဝႆႉ- ၼႆယဝ်ႉ။

ဢၼ်ထုၵ်ႇၼမ်ႉထူမ်ႈပွၵ်ႈၵမ်းၼႆႉ ဢၼ်လိူဝ်ႁႅင်း မီး 2 ဝၢၼ်ႈ၊ ပဵၼ်ဝၢၼ်ႈၼမ်ႉၵႆး တင်း ဝၢၼ်ႈၵေႃၵေႃႉ။ ဝၢၼ်ႈၼမ်ႉၵႆး လင်ႁိူၼ်းၵူၼ်းမီးမွၵ်ႈ 80 လင်၊ ဝၢၼ်ႈၵေႃၵေႃႉၼႆႉ လင်ႁိူၼ်းၵူၼ်းမီး 100 လင်ပၢႆ။

မိူဝ်ႈလဵဝ် ၵူၼ်းဝၢၼ်ႈၵေႃႈ တိုၵ်ႉယူႇသဝ်းပိုင်ႈဢိင် တီႈဝတ်ႉမုၼ်ၸဝ်ႈ ဝၢၼ်ႈၼမ်ႉၵႆးၼၼ်ႉယူႇ။ ဢိင်ၼိူဝ်ၼမ်ႉယွမ်းလူင်းၵႂႃႇသေ ၵူၼ်းဝၢၼ်ႈၶဝ် တိုၵ်ႉဢွၼ်ၵၼ်ႁႃၵူၼ်းႁၢႆယူႇ။ ၵူၼ်းၸိူဝ်းတၢႆၼၼ်ႉတႄႉ ႁၼ်ယဝ်ႉ- လႆႈႁူႉၼင်ႇၼႆ။

လွင်ႈၵူၼ်းဝၢၼ်ႈထူပ်းၽေးၼမ်ႉထူမ်ႈၼႆႉ မီးပႃႊတီႊၵူႈၸုမ်းၸုမ်း ဢွၼ်ၵၼ်ၵႂႃႇၸွႆႈ၊ မိူၼ်ၼင်ႇပႃႊတီႊသိူဝ်ၽိူၵ်ႇ၊ ႁူဝ်သိူဝ်၊ ၼူၵ်ႉယုင်း၊ သၢင်ႇသီႈ ၸိူဝ်းၼႆႉၵေႃႈ ၵႂႃႇၸွႆႈထႅမ်၊ ၾၢႆႇတပ်ႉသိုၵ်း၊ ၾၢႆႇလူင်ပွင်ၸိုင်ႈ ၸိူဝ်းၼႆႉၵေႃႈ ၵႂႃႇၸွႆႈလုမ်းလႃး တူၺ်းပၼ်ယူႇ။

မိူဝ်ႈလဵဝ် ပႃႊတီႊႁူဝ်သိူဝ်ၵေႃႈ ၵႂႃႇလူလွမ်တူၺ်း ၵူၼ်းထူပ်းၽေးၼမ်ႉထူမ်ႈၶဝ်ယူႇ၊ ဢဝ်ၶဝ်ႈၼမ်ႉတၢင်းၵိၼ်ၵႂႃႇၵူၺ်း၊ ၵႂႃႇလဵပ်ႈႁဵၼ်းတူၺ်းၵွၼ်ႇ။ ၵူၼ်းဝၢၼ်ႈၶဝ် ၶႂ်ႈလႆႈတၢင်းၸွႆႈထႅမ်သင် ၶဝ်ႈၼမ်ႉတၢင်းၵိၼ်၊ ၶူဝ်းလဵင်း ၽႃႈႁူမ်ႇၶူဝ်းၼွၼ်း၊ ယႃႈယႃၸိူဝ်းၼႆႉ ၼင်ႇဢၼ်ႁႅင်းႁဝ်းတေႁႃလႆႈၵႃႈႁိုဝ်ၼၼ်ႉ တေဢုပ်ႇၵၼ်ၶမ်ႈၼႆႉ- ၸၢႆးဢေး ၾၢႆႇသူၼ်းတုမ်ပႃႊတီႊႁူဝ်သိူဝ် လၢတ်ႈ။

ပွတ်းတွၼ်ႈၼႆႉ တူင်ႈၼႃးၵေႃႈ ယွၼ်ႉတူၼ်ႈမႆႉတူၼ်ႈတွၵ်ႇ ႁိၼ်သၢႆးၸိူဝ်းၼႆႉ လႆလူင်းမႃးထူမ်ႈသေ လူႉၵွႆၵႂႃႇၼမ်- ၼႆယဝ်ႉ။