ပႃႊတီႊမႂ်ႇသုင် ၻီႊမူဝ်ႊၶရေႊတိတ်ႉ မိူင်းတႆးပွတ်းဢွၵ်ႇ (ပႃႊတီႊၵွင်ၸႆး) တေၶဝ်ႈလိူၵ်ႈတင်ႈ ၶေႉၶဵင်ႇ ၼႂ်းပီ 2015 4 တီႈၼင်ႈ။

ပၢင်လိူၵ်ႈတင်ႈဝၼ်းတီႈ 08/11/2015 ၼႂ်းမိူင်းႁူမ်ႈတုမ်မိူင်းမၢၼ်ႈ ၼႆႉ ပႃႊတီႊၵွင်ၸႆး တင်းပွတ်းဢွၵ်ႇၶူင်းၸိုင်ႈတႆး တေၶဝ်ႈလိူၵ်ႈတင်ႈ 4 တီႈၼင်ႈယွၼ်ႉဝႃႈ ၶၢဝ်းယၢမ်းဢမ်ႇမီး တေၶဝ်ႈလိူၵ်ႈၼႂ်းၸႄႈတွၼ်ႈၵဵင်းတုင် ဢၼ်လဵဝ်ၼင်ႇႁိုဝ် ပီႈၼွင်ႉၵူၼ်းမိူင်း တၢင်းပွတ်းဢွၵ်ႇၶူင်း ပေႃးတေမီးသုၼ်ႇတွတ်ႈၶႅပ်းၵၢင်ၸႂ်ပၼ် ပႃႊတီႊၵွင်ၸႆးၼၼ်ႉ ၽူႈပွင်ၵၢၼ်ၼႂ်းပႃႊတီႊ လႆႈဢွၼ်ၵၼ် လူင်းသူၼ်းတုမ်ႁႃသဵင် တီႈၵူၼ်းမိူင်း။

ၵႅမ်ႁူဝ်ပဝ်ႈ 1 လုင်းသၢမ်တိပ်ႉသိူဝ် လၢတ်ႈဝႃႈ ပႃႊတီႊႁဝ်းၶႃႈၼႆႉ တေၶဝ်ႈလိူၵ်ႈတင်ႈ 4 တီႈၼင်ႈ 1. ၽွင်းတႅၼ်းၸိူဝ်ႉၸၢတ်ႈ လုင်းသၢမ်တိပ်ႉ(ၶေမရၢတ်ႉ)၊ ၽွင်းတႅၼ်းၵူၼ်းမိူင်းလုင်းႁွင်ၶမ်း၊ ၽွင်းတႅၼ်းသၽႃးၸႄႈမိူင်းၸၢႆးလူင်၊ ၼၢင်းပုၵ်းၶမ်းဝႃႈၼႆ။

သိုပ်ႇလၢတ်ႈထႅင်ႈဝႃႈ ၼႂ်း 4 တီႈၼၼ်ႉ 1. ဝဵင်းၵဵင်းတုင်၊ 2. ဝဵင်းမိူင်းပဵင်း၊ 3. ဝဵင်းမိူင်းၶၢၵ်ႇ၊ 4. ဝဵင်းမိူင်းယၢင်း။ မိူဝ်ႈလဵဝ် ၶၢဝ်းယၢမ်းဢမ်ႇမီးယဝ်ႉလႄႈတေၶဝ်ႈလိူၵ်ႈတင်းပွတ်းတွၼ်ႈၼႆႉၵွၼ်ႇ မီးၽႅၼ်ဝႆႉယူႇတႃႇတေပိုတ်ႇလုမ်းထႅင်းဝႃႈၼႆ။

လုမ်းပႃႊတီႊၵွင်ၸႆးၼၼ်ႉ ပိုတ်ႇဝႆႉတီႈ ဝၢၼ်ႈၵဵင်းၸၢမ်ဝဵင်းၵဵင်းတုင် ။ တေႃႇလဵဝ်ၾၢႆႇၶွမ်ႊမသျိၼ်ႊ ပၢင်လိူၵ်ႈတင်ႈ ဢွၵ်ႇၶေႃႇပိုၼ်ၽၢဝ်ႇမိူဝ်ႈဝၼ်းတီႈ 03/08/2015 ဝႃႈ တေသိုပ်ႇသုတ်ႉယိုတ်ႈဝၼ်း ၽူႈတေလူင်းလိူၵ်ႈၽူႈတႅၼ်းထႅင်ႈ ၼႂ်းဝၼ်းတီႈ 08/08/2015 ၶၢႆႉပဵၼ်ဝၼ်းတီႈ 14/08/2015 ပဵၼ်ဝၼ်းလိုၼ်းသုတ်း ဝႃႈၼႆ။