ၽူႈၶၢၼ်ပၢၵ်ႇ ၶွင်ႊသီႊဢဝ်ၶိုၼ်း ၸိုင်ႈတႆး (RCSS) ၸဝ်ႈသိုၵ်းလူင် ၸၢႆးလႃႉ တွပ်ႇလၢတ်ႈလွင်ႈ ၸုမ်းတႆး တင်းၸုမ်းယၢင်း ႁူမ်ႈၵၼ်ၵႂႃႇ ႁူပ်ႉထူပ်းဢုပ်ႇဢူဝ်း ၸွမ်ၸိုင်ႈတဵင်းၸဵင်ႇ။ ငဝ်းလၢႆးပဵၼ်ၸိူင်ႉႁိုဝ်ၼၼ်ႉ တၢင်းၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆ။

ထၢမ်- မိူဝ်ႈဝႃးၼႆႉ လႆႈငိၼ်းဝႃႈႁူပ်ႉၸွမ်ၸိုင်ႈၼႆၶႃႈဢေႃႈ။ လွင်ႈၼႆႉ ႁဵတ်းႁိုဝ်လႄႈပဵၼ်ႁူပ်ႉၵၼ်တင်း ၸွမ်ၸိုင်ႈၶႃႈ ? ။

တွပ်ႇ- တင်း KNU (ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ) ၊ DKBA (တပ်ႉသိုၵ်းယၢင်းပုတ်ႉထ) ၊ ၸုမ်း KNU-PC ၊ RCSS (ၶွင်ႊသီႊဢဝ်ၶိုၼ်းၸိုင်ႈတႆး) သေ ပဵၼ်ၸုမ်းဢၼ်ႁူမ်ႈၵၼ်လူင်းလၢႆးမိုဝ်း (ပၼ်ၵႂၢမ်းပတိၺၢၼ်ႇ၊ ပိူဝ်ႈတႃႇသၢင်ႈလွင်ႈငမ်းယဵၼ်လႄႈ လွင်ႈၶိုၼ်းမႄးလီၵၼ်ၼႂ်းၸိူဝ်ႉၸၢတ်ႈ) Deed of commitment ၸွမ်းၸွမ်ၸိုင်ႈလႄႈ ၽွင်းလူင်ၼႂ်းလူင်ပွင်ၸိုင်ႈ တင်းပႃႊတီႊၵၢၼ်မိူင်းၶဝ် ပူၼ်ႉမႃးမိူဝ်ႈဝၼ်းတီႈ 12 ၼႂ်းဝၼ်းမိူင်းႁူမ်ႈတုမ် 12/02/2015 ၼၼ်ႉ၊ ၶိုၼ်းသိုပ်ႇၼၼ်ႉ ႁဝ်းၶိုၼ်းမႃးႁူပ်ႉထူပ်း ပုၼ်ႈတႃႇၵိုတ်းတိုၵ်း တင်းၸိုင်ႈမိူင်း ႁႂ်ႈပေႃးၸဵဝ်းယဝ်ႉတူဝ်ႈသေ ၼႄၼမ်ႉၼႄတူဝ်ၵႂႃႇလႆႈၼၼ်ႉ ၶဝ်မႃးဢုပ်ႇဢူဝ်းငူပ်ႉငီႉၵၼ်ၶႃႈဢေႃႈ။

ထၢမ်-ၾၢႆႇၸွမ်ၸိုင်ႈ သမ်ႉဝႃႈႁိုဝ်တီႈ RCSS  လၢတ်ႈသင်ၶႃႈ? ။

တွပ်ႇ-ၼႂ်းပၢင်ႁူပ်ႉထူပ်းဢုပ်ႇဢူဝ်းၵၼ် တင်းမူတ်းၼၼ်ႉ မၼ်းၸဝ်ႈလၢတ်ႈၵႂႃႇတႄႉဝႃႈ-ၵၢၼ်ၵိုတ်းတိုၵ်း တူဝ်ႈမိူင်းၼႆႉ ၶႂ်ႈႁႂ်ႈၸဵဝ်းႁဵတ်း ႁႂ်ႈမၼ်းယဝ်ႉတူဝ်ႈ။ ႁႂ်ႈယဝ်ႉတူဝ်ႈၵွၼ်ႇ ၵၢၼ်လိူၵ်ႈတင်ႈၼႆႉ၊ ႁႂ်ႈပေႃးလႆႈလူင်းလၢႆးမိုဝ်းၵၼ် ၽႂ်းၽႂ်းၼၼ်ႉ ၶႂ်ႈႁဵတ်းၵႂႃႇယူႇ၊ ၶတ်းၸႂ်ႁဵတ်းမႃးၵေႃႈႁိုင်ယဝ်ႉ၊ ၵူၺ်းၵႃႈ ဢမ်ႇႁၼ်ၼမ်ႉႁၼ်တူဝ်မၼ်း၊ ၵၢတ်ႈၸိူင်ႉယူႇတေႃႇထိုင်ဝၼ်းမိူဝ်ႈၼႆႉ။ ၵမ်းႁူပ်ႉထူပ်းၵၼ် ပွၵ်ႈၵမ်း 9 ၼႂ်းဝူင်ႈၵၢင် SD လႄႈ UPWC ၼၼ်ႉ ၶႂ်ႈႁႂ်ႈလိၵ်ႈၵိၼ်ၵႅၼ်ႇ ဢၼ်ႁဵတ်းႁူမ်ႈၵၼ်မႃးၼႂ်းၶၢဝ်းတၢင်း 18-19 လိူၼ်ၼၼ်ႉ ႁႂ်ႈမၼ်းယဝ်ႉတူဝ်ႈသေ။

ထၢမ်-ၾၢႆႇၶွင်ႊသီႊဢဝ်ၶိုၼ်းၸိုင်ႈတႆးၶႃႈလူး၊ ဢၼ်လႆႈၵႂႃႇလၢတ်ႈ သမ်ႉမီးသင်လၢႆလၢႆၽွင်ႈၶႃႈ? ။

တွပ်ႇ-ဢၼ်ႁဝ်းၶႃႈလၢတ်ႈတႄႉ ႁဝ်းၶႃႈၼႄၼမ်ႉၸႂ်ဝႃႈ ႁဝ်းၶႃႈၶႂ်ႈသၢင်ႈလွင်ႈငမ်းယဵၼ် ၸွမ်းလူၺ်ႈၵၢင်ၸႂ်ၵူၼ်းမိူင်းႁဝ်း တုၵ်းယွၼ်းယူႇ၊ ႁႂ်ႈဝၢၼ်ႈမိူင်းႁဝ်းၶႃႈၵတ်းယဵၼ်။ ယဝ်ႉၵေႃႈ ႁႂ်ႈႁဝ်းၶႃႈၸဵဝ်းလႆႈဢုပ်ႇဢူဝ်းၵၢၼ်မိူင်းသေ ၸဵဝ်းလႆႈၵႄႈၶႆပၼ်ႁႃၵၢၼ်မိူင်းၵၼ်ၼၼ်ႉ ႁဝ်းၶႃႈထုၵ်ႇလႆႈ ႁဵတ်းသၢင်ႈၽႂ်းၽႂ်းယူႇ၊ တႃႇတေႁဵတ်းသၢင်ႈၽႂ်းၽႂ်းၼၼ်ႉၵေႃႈ ႁဝ်းၶႃႈ ၶွင်ႊသီႊဢဝ်ၶိုၼ်းၸိုင်ႈတႆးၼႆႉ တူဝ်ႈတၼ်းဝႆႉယူႇ ၼႆၼၼ်ႉၶႃႈယဝ်ႉ။ ယဝ်ႉၵေႃႈ တေၶတ်းၸႂ်ႁူမ်ႈမိုဝ်းတင်း ၵူႈၾၢႆႇၵူႈတၢင်းသေ ၶတ်းၸႂ်ၵႂႃႇယူႇ၊ ႁဝ်းၶႃႈလႆႈလၢတ်ႈၼႄ ၸွမ်းၼင်ႇၵၢင်ၸႂ်ႁဝ်းၶႃႈမီးၼၼ်ႉ ၶႃႈဢေႃႈ။

ထၢမ်-ဢမ်ႇႁိုင်ဢမ်ႇၼၢၼ်းၼႆႉ SD တင်း UPWC တေႁူပ်ႉၵၼ်ယဝ်ႉ။ KNU တင်း RCSS  တေၶဝ်ႈပႃးၼႂ်းၶၵ်ႉတွၼ်ႈၸိူင်ႉႁိုဝ်ၶႃႈ ? ။

တွပ်ႇ-ၸွမ်းလူၺ်ႈ ၾၢႆႇလူင်ပွင်ၸိုင်ႈၶဝ်ၸဝ်ႈတႄႉ ၶဝ်ဝႃႈ ၵၢၼ်ႁူပ်ႉထူပ်းၵၼ်သေ ဢုပ်ႇဢူဝ်းၶဵၼ်ႇတႅမ်ႈ လိၵ်ႈၵိၼ်ၵႅၼ်ႇ NCA ဢၼ်ၵိုတ်းတိုၵ်း တင်းၸိုင်ႈမိူင်းၼႆႉ တေၶတ်းၸႂ်ႁဵတ်းႁႂ်ႈမၼ်းယဝ်ႉ ၵမ်းၼႆႉ။ ပေႃးဝႃႈယဝ်ႉယဝ်ႉၼႆၾၢႆႇတၢင်းလူင်ပွင်ၸိုင်ႈ တေဢဝ်ပိုၼ်ၽၢဝ်ႇၵႂႃႇ၊ ၸွမ်ၸိုင်ႈတေဝွၵ်ႇၽူႈၵဵဝ်ႇၶွင်ႈတင်းမူတ်း မႃးႁူပ်ႉၵၼ်လူင်းလၢႆးမိုဝ်း ဝႃႈၸိူင်ႉၼၼ်ၶႃႈဢေႃႈ။ ပေႃးဝႃႈမႃးပိုၼ်ၽၢဝ်ႇ လူင်းလၢႆးမိုဝ်းၼႆ ႁဝ်းၶႃႈၵေႃႈတေၶဝ်ႈပႃးႁဵတ်းသၢင်ႈယူႇ၊ ၵူၺ်းၵႃႈ ႁဝ်းၶႃႈလႆႈလၢတ်ႈၵႂႃႇဝႃႈ- ပေႃးဝႃႈမီးႁဝ်းၶႃႈ 4 ၸုမ်းၵူၺ်းတႄႉ မၼ်းၵေႃႈတေပႆႇသၢင်ႇတေႃႇ၊ ၶႂ်ႈႁႂ်ႈၵူၼ်းတင်းမူတ်း (ၵူႈမူႇၵူႈၸုမ်း) ၶဝ်ႈပႃးသေ လူင်းလၢႆးမိုဝ်းၵိုတ်းတိုၵ်း တင်းၸိုင်ႈမိူင်းၸွမ်းယူႇ၊ ၽူႈၵဵဝ်ႇၶွင်ႈ ဢၼ်ယိပ်းၵွင်ႈၵၢင်ႇၵူႈၸုမ်းၸုမ်း၊ ပေႃးဢမ်ႇၸႂ်ႈၵေႃႈ ၶႂ်ႈႁႂ်ႈၸုမ်းတင်းၼမ်ၶဝ်ႈပႃးသေ ႁဵတ်းသၢင်ႈလူင်းလၢႆးမိုဝ်းၵႂႃႇၼၼ်ႉ မၼ်းၵေႃႈတေသၢင်ႇထုၵ်ႇလႄႈ ႁဝ်းၶႃႈမုင်ႈမွင်းၸိူင်ႉၼၼ်၊ ႁဝ်းၶႃႈလႆႈတၢင်ႇလၢတ်ႈၸိူင်ႉၼႆပႃးသေ တေႁဵတ်းသၢင်ႈတူင်ႉၼိုင်ႈၸွမ်း တွၼ်ႈတီႈလူင်းလၢႆးမိုဝ်းၼၼ်ႉ ၶႃႈဢေႃႈ။

ထၢမ်-ပေႃးဝႃႈႁဝ်းၶႃႈတူၺ်းၼႆ ၾၢႆႇ SD ဝႃႈ ၶႂ်ႈႁႂ်ႈၸုမ်းယိပ်းၵွင်ႈ ၶဝ်ႈပႃးလူင်းလၢႆးမိုဝ်းၵူႈမူႇၵူႈၸုမ်း ဢၼ်ဝႃႈၼၼ်ႉလူး ၸွင်ႇလူင်ပွင်ၸိုင်ႈလႅပ်ႈႁပ်ႉ၊ ပေႃးဢမ်ႇႁပ်ႉ ၸွင်ႇတေပဵၼ်လႆႈၶႃႈႁႃႉ တႃႇတေၵိုတ်းတိုၵ်းပတ်းပိုၼ်ႉတူဝ်ႈမိူင်း ၼႆၼၼ်ႉ? ။

တွပ်ႇ-လႆႈႁူႉၵၢင်ၸႂ်ၾၢႆႇလူင်ပွင်ၸိုင်ႈ မီးဝႆႉဝႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းတင်းမူတ်းၼႆႉ ဢၼ်မီးၸိုဝ်ႈသဵင်ဝႆႉယူႇၼႆႉ မီး 21 ၸုမ်း။ 21 ၸုမ်းၼႆႉ ဢၼ်လူင်ပွင်ၸိုင်ႈ ပႆႇမၵ်းမၼ်ႈႁႂ်ႈၶဝ်ႈပႃးၼႂ်း CNA ၵွပ်ႈၶဝ်ဢမ်ႇမီးၼႃႈတီႈ (ပိုၼ်ႉတီႈၼႃႈလိၼ်)၊ ဢမ်ႇမီးတပ်ႉသိုၵ်း၊ ၼႂ်းၽႅၼ်ၵၢၼ်တိုၵ်းသိုၵ်း ၶွင်လူင်ပွင်ၸိုင်ႈၵေႃႈ ဢမ်ႇမီးၽႅၼ်ၵၢၼ်တႃႇတေတိုၵ်းပႃးၶဝ်၊ ယဝ်ႉၵေႃႈဢမ်ႇလႆႈတိုၵ်းပႃးၶဝ်သေပွၵ်ႈ။ ၵွပ်ႈၼၼ် ၶဝ်ၵေႃႈဢမ်ႇၸမ်ပဵၼ် တေလႆႈလူင်းလၢႆးမိုဝ်း ၵိုတ်းတိုၵ်းတင်းၸိုင်ႈမိူင်း၊ မိူၼ်ၼင်ႇၸုမ်း LDU, ANC, WNO ၸိူဝ်းၼႆႉ မၼ်းဢမ်ႇၸမ်ပဵၼ် တေလႆႈလူင်းလၢႆးမိုဝ်း NCA ယဝ်ႉ။ ၵူၺ်းၵႃႈ ဢမ်ႇလႆႈလူင်းလၢႆးမိုဝ်း NCA ၵေႃႈ ႁဝ်းတေတိုၵ်း  ပႅတ်ႈၶဝ်ဢမ်ႇၸႂ်ႈ၊ ပေႃးဝႃႈၶဵၼ်ႇတႅမ်ႈ Framework လႄႈသင်၊ ဢုပ်ႇဢူဝ်းၵၢၼ်မိူင်းၸိူဝ်းၼႆႉ တေႁွင်ႉၶဝ်ၶဝ်ႈပႃးၼႂ်းၶၵ်ႉတွၼ်ႈၼိုင်ႈၵႂႃႇ။

ပေႃးမိူၼ်ၼင်ႇၸုမ်းၵူဝ်းၵၢင်ႉၼႆတႄႉ လူင်ပွင်ၸိုင်ႈၶဝ်မီးပေႃႇလသီႇဝႃႈ တေလႆႈၶိုၼ်းမႄးဢုပ်ႇဢူဝ်း ၵၼ်တင်းၼမ်၊ ႁႂ်ႈပေႃးၸၢင်ႈလႆႈၵိုတ်းတိုၵ်းၵၼ်ၶိုၼ်း။ ၼၼ်ႉတႄႉၶၵ်ႉတွၼ်ႈမၼ်းၼမ်၊ ၵွပ်ႈလႆႈတိုၵ်းၵၼ်မႃး၊ ၶဝ်ၵေႃႈတႄႇမႃးဢွၼ်တၢင်း။ ၼၼ်ႉတႄႉ တေပႆႇၸၢင်ႈၶဝ်ႈပႃးၼႂ်း NCA ဝႃႈၸိူင်ႉၼႆၶႃႈ။

ယဝ်ႉၵေႃႈတွၼ်ႈ AA ၼႆႉ ဢဝ်ၵူၼ်းၵႂႃႇၶုတ်းသႅင်ၽႃၵၢၼ်ႉသေ ၶွတ်ႇၽွတ်ႈဝႆႉ ယူႇၸွမ်း KIA မႃးၵူၺ်း၊ မၼ်းတိုၼ်းၵိုၵ်းဝႆႉၸွမ်း KIA,KIO ။ ပေႃးဝႃႈ KIO လူင်းလၢႆးမိုဝ်း မၼ်းၵေႃႈတေႁူမ်ႈၵၼ် ၵႂႃႇပႃးၼႂ်း KIO ယဝ်ႉ၊ ၼႆႉၵေႃႈတေဢမ်ႇပဵၼ်ပၼ်ႁႃသင်။ သမ်ႉထႅင်ႈဢၼ်ၼိုင်ႈ မိူၼ်ၼင်ႇ TNLA ၼႆႉ ၶဝ်ပႆႇလႆႈလူင်းလၢႆးမိုဝ်း ၸၼ်ႉမိူင်းႁူမ်ႈတုမ်၊ ၵွပ်ႈၼၼ် ပေႃးဝႃႈထုၵ်ႇလႆႈၶဝ်ႈပႃးၼႂ်း NCA ဢၼ်လူင်းလၢႆးမိုဝ်း ၵိုတ်းတိုၵ်းတင်း ၸိုင်ႈမိူင်းၼၼ်ႉ ႁႂ်ႈဢုပ်ႇဢူဝ်းငူပ်ႉငီႉၵၼ်သေ မႃးလူင်းလၢႆးမိုဝ်း ၵိုတ်းတိုၵ်းၸၼ်ႉၸိုင်ႈမိူင်း ႁူမ်ႈတုမ်သေၵွၼ်ႇ ၸင်ႇၵွႆႈၶဝ်ႈမႃးၼႂ်း NCA ဝႃႈၼႆၶႃႈဢေႃႈ။

တွၼ်ႈတီႈမိူၼ်ၼင်ႇ ၵိုတ်း 14 ၸုမ်း ႁူမ်ႈတင်း 1 ၸုမ်း တင်းၵိုတ်းဝႆႉ 15 ၸုမ်းၼႆႉ။ တႃႇ 6 ၸုမ်းတႄႉ လႆႈႁူႉၵၢင်ၸႂ်လူင်ပွင်ၸိုင်ႈ ၸိူင်ႉၼႆယဝ်ႉ။ ၵဵဝ်ႇၵပ်းလူၺ်ႈ ၵိုတ်း 14 ၸုမ်းႁူမ်ႈတင်း 1 ၸုမ်း ABSDF ၼႆႉ 14 ၸုမ်းၼႆႉ မၼ်းပႃးဝႆႉတီႈပၢင်သၢင်း လႄႈတီႈမိူင်းလႃး၊ 2 ၸုမ်းၼႆႉၵေႃႈ လူင်ပွင်ၸိုင်ႈမိုတ်ႈၵိုဝ်း ၸမ်ၸႂ်ၶဝ်ယူႇ၊ တေပွႆႇၵူၼ်းသေၵႂႃႇဢုပ်ႇဢူဝ်းငူပ်ႉငီႉၶဝ် ႁႂ်ႈၶဝ်ႈပႃးၼႂ်း NCA ယူႇ ဝႃႈၸိူင်ႉၼႆ။ ၵိုင်ႉၵၢင်ႉ ဢမ်ႇၶဝ်ႈပႃးၵမ်းလဵဝ်ၵေႃႈ ႁႂ်ႈလႆႈၶဝ်ႈမႃးၵမ်းလိုၼ်း၊ တေပိုတ်ႇပပ်ႉဝႆႉပၼ်ယူႇ ဝႃႈၸိူင်ႉၼႆၶႃႈ။

ထၢမ်-  ပေႃးမိူၼ်ၸိူင်ႉၼၼ် ၸွင်ႇလႅပ်ႈတေ ပဵၼ်မႃးငၢႆႈငၢႆႈယူႇၶႃႈႁႃႉ၊ ၶၵ်ႉၵၢၼ်လွင်ႈငမ်းယဵၼ်ၼႆႉ ဢၼ်တင်းမိူင်းမုင်ႈမွင်းၼႆႉၶႃႈ? ။

တွပ်ႇ- ဢၼ်ႁဝ်းၶႃႈတၢင်ႇလၢတ်ႈၵႂႃႇၼႆႉ မၼ်းၵိုတ်း 12 ၸုမ်း ႁူမ်ႈတင်း 1 ၸုမ်း ဢၼ်ပဵၼ် ABSDF ။ ပွင်ႇဝႃႈၵိုတ်း 13 ၸုမ်း ဢၼ်လူင်ပွင်ၸိုင်ႈၶဝ် တူၺ်းႁၼ်ဝႆႉဝႃႈ ႁႂ်ႈလူင်းလၢႆးမိုဝ်း NCA ၵမ်းလဵဝ်။ ပွင်ႇဝႃႈၼႂ်း 13 ၸုမ်းၼႆႉ တီႈၸွမ်ၸိုင်ႈတႄႉ လႆႈပၼ်ပေႃႇလသီႇဝႆႉမိူဝ်ႈဝႃး (03/08/2015)ၵႂႃႇဝႃႈ ပေႃးမီးၶိုင်ႈၼိုင်ႈ လူင်းလၢႆးမိုဝ်း၊ ဢမ်ႇၼၼ်မီး 3 ပုၼ်ႈ 2 ပုၼ်ႈလူင်းလၢႆးမိုဝ်းၸိုင် တူဝ်မၼ်းၸဝ်ႈတေၵေႃႉမႃး လူင်းလၢႆးမိုဝ်းၵိုတ်းတိုၵ်းတင်းၸိုင်ႈမိူင်းသေ တႄႇႁဵတ်းသၢင်ႈၵၢၼ်ၵိုတ်းတိုၵ်းတင်းၸိုင်ႈမိူင်းၵႂႃႇလႄႈ ၵၢၼ်ပိုတ်ႇပပ်ႉ၊ ၸုမ်းပႆႇတူဝ်ႈတၼ်းၵေႃႈ ႁႂ်ႈမႃးလူင်းၵႂႃႇၵမ်းလွႆးလွႆး တၢင်းလင်၊ မီးဝႆႉၶေႃႈယိူင်းဢၢၼ်းၸိူင်ႉၼႆ - မၼ်းၸဝ်ႈလႆႈသပ်းလႅင်း ၼႄႁဝ်းၶႃႈၸိူင်ႉၼႆၶႃႈဢေႃႈ။

ထၢမ်-ပေႃးဝႆႉသေၸုမ်းၸုမ်း၊ ဢမ်ႇၸႂ်ႈပၢင်ၵိုတ်းတိုၵ်းတင်းမိူင်းယဝ်ႉၶႃႈလူး၊ ပေႃးၼၼ် ၸွင်ႇမိူၼ်ၼင်ႇပိုတ်ႇတၢင်း ႁႂ်ႈပဵၼ်ပၢင်တိုၵ်းထႅင်ႈယူႇၶႃႈႁႃႉ ? ။

တွပ်ႇ-ဢၼ်ၼႆႉ မၼ်းယူႇတီႈၵၢင်ၸႂ် ၽူႈၵဵဝ်ႇၶွင်ႈၶဝ်ၵမ်းသိုဝ်ႈၵူၺ်းၶႃႈ။ ၶဝ်တေႁၼ်ထိုင်ၸိူင်ႉႁိုဝ်၊ တေယွမ်းႁပ်ႉၵၼ်ၸိူင်ႉႁိုဝ်ၼႆ မၼ်းယူႇတီႈလွင်ႈယွမ်းႁပ်ႉ ၸုမ်းလႂ်ၸုမ်းၼၼ်ႉ တၢင်းႁၼ်ထိုင်ၶႃႈ မီးၸိူင်ႉၼၼ်ၶႃႈ။

ထၢမ်-ၵမ်ႈၽွင်ႈဝႃႈ RCSS တင်း KNU ၺႃးလူင်ပွင်ၸိုင်ႈမၢၼ်ႈ ႁူၺ်းလႆႈၵႂႃႇ ဝႃႈၼႆဢေႃႈ။ ပဵၼ်လၢႆးၽႃႇထႅၵ်ႇၸႅၵ်ႇၸၢဝ်းၶိူဝ်းၵူၺ်း၊ လွင်ႈၼႆႉ ၶႂ်ႈလၢတ်ႈၸိူင်ႉႁိုဝ်ၶႃႈ ? ။

တွပ်ႇ-မိူဝ်ႈဝၼ်းမိူင်းႁူမ်ႈတုမ် ဝၼ်းတီႈ 12 ၼႂ်းပီ 2015 ၼႆႉႁဝ်းၶႃႈလႆႈလူင်းလၢႆးမိုဝ်း ပၼ်ၵႂၢမ်းမၼ်ႈဝႃႈ ၼႂ်း Deed of commitment ဢၼ်ဝႃႈ တေၶိုၼ်းမႄးသၢင်ႈ လွင်ႈထုၵ်ႇမေႃပေႃးၵႂၢမ်းၵၼ် ၼႂ်းၸိူဝ်ႉၸၢတ်ႈ သၢင်ႈလွင်ႈငမ်းယဵၼ်ၵႂႃႇၼႆ ႁဝ်းၶႃႈလႆႈပၼ်ၵႂၢမ်းမၼ်ႈၵႅၼ်ႇၵၼ် ၸိူင်ႉၼၼ်။ ၵွပ်ႈၸိူင်ႉၼၼ်လႄႈ ဢၼ်ၼႆႉၵေႃႈ မၼ်းမႅၼ်ႈၸွမ်းၵၢင်ၸႂ်ၵူၼ်းမိူင်းႁဝ်း၊ ၵူၼ်းမိူင်းႁဝ်းၶႃႈၵေႃႈ ၶႂ်ႈလႆႈလွင်ႈငမ်းယဵၼ်၊ ၶႂ်ႈသၢင်ႈလွင်ႈထုၵ်ႇမေႃပေႃးၵႂၢမ်းၵၼ် ၼႂ်းၸိူဝ်ႉၸၢတ်ႈၶိုၼ်းလႄႈ ႁဝ်းၶႃႈႁဵတ်းၸွမ်းၵၢင်ၸႂ် ၵူၼ်းမိူင်းႁဝ်းၶႃႈၵူၺ်း။ ယဝ်ႉၵေႃႈ ၼင်ႇႁိုဝ်တေပဵၼ်မႃး လွင်ႈထုၵ်ႇမေႃပေႃးၵႂၢမ်းၵၼ် ၼႂ်းၸိူဝ်ႉၸၢတ်ႈလႄႈသင်၊ သၢင်ႈလႆႈလွင်ႈငမ်းယဵၼ်ၼၼ်ႉလႄႈသင်၊ ၵူႈၾၢႆႇၾၢႆႇထုၵ်ႇလႆႈႁူပ်ႉထူပ်း ဢုပ်ႇဢူဝ်းၵၼ်။ ၵွပ်ႈၸိူင်ႉၼၼ်လႄႈ ႁဝ်းၶႃႈမႃးဢုပ်ႇဢူဝ်းတင်းလူင်ပွင်ၸိုင်ႈသေ တိုၵ်းသူၼ်းလူင်ပွင်ၸိုင်ႈ ႁႂ်ႈၸဵဝ်းႁဵတ်းလႆႈလွင်ႈငမ်းယဵၼ်၊ လွင်ႈၵိုတ်းတိုၵ်းတင်းၸိုင်ႈမိူင်း လႄႈသၢင်ႈလႆႈလွင်ႈထုၵ်ႇမေႃပေႃးၵႂၢမ်းၵၼ် ၼႂ်းၸိူဝ်ႉၸၢတ်ႈၵႂႃႇဝႆးဝႆးၼၼ်ႉၵူၺ်း ၶႃႈဢေႃႈ။

ထၢမ်- လွင်ႈထုၵ်ႇမေႃပေႃးၵႂၢမ်းၵၼ် ၼႂ်းတႆးႁဝ်းၶႃႈလူး ထိုင်ဝႆႉၶၵ်ႉတွၼ်ႈလႂ်ၶႃႈ ? ။

တွပ်ႇ-သၢင်ႈဝႆႉတေႃႇထိုင်ၶၼ်ႉဢၼ်ဝႃႈ ႁဝ်းၶႃႈၵေႃႇတင်ႈၶွတ်ႇၽွတ်ႈဝႆႉ ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး CSSU ၊ ဢၼ်ၼႆႉၵေႃႈ လႆႈႁူႉဝႃႈၽူႈယႂ်ႇၵူၼ်းလူင်ႁဝ်းၶႃႈ လၢႆၾၢႆႇၵေႃႈဢုပ်ႇဢူဝ်းၵၼ်သေ ၶတ်းၸႂ်သၢင်ႈဝႆႉယူႇၼႆ မွၵ်ႈၼၼ်ႉၵူၺ်းၶႃႈ။ ႁႂ်ႈမၼ်းပေႃးယဝ်ႉတူဝ်ႈၼႆတႄႉ တေပႆႇယဝ်ႉ၊ ၵွပ်ႈမၼ်းမႃးႁူပ်ႉသႂ်ႇ ၽွင်းၵၢၼ်သုၵ်ႉမၢင်ႉၸွမ်း ၵၢၼ်လိူၵ်ႈတင်ႈလႄႈ ဢဝ်ၵၢၼ်ႁဝ်းၶႃႈၵူႈၾၢႆႇၾၢႆႇၼႆႉ ယိုတ်းၵႂႃႇၸူဝ်ႈၵႅပ်ႉ၊ ပေႃးဝၢႆးၵၢၼ်လိူၵ်ႈတင်ႈယဝ်ႉ တေသိုပ်ႇႁဵတ်းသၢင်ႈၵႂႃႇ ႁႂ်ႈမၼ်းပေႃးပဵၼ်မႃးၵၢၼ်ၽွမ်ႉႁူမ်ႈ ၼႂ်းတႆးႁဝ်းၶႃႈဢွၼ်တၢင်း၊ ထိုင်ဝႆႉၸၼ်ႉၼႆႉၶႃႈဢေႃႈ။

ထၢမ်-ၵမ်းလိုၼ်းသုတ်း မီးသင် ၶႂ်ႈလၢတ်ႈထႅင်ႈၶႃႈ ? ။

တွပ်ႇ-ႁဝ်းၶႃႈၵေႃႈၶတ်းၸႂ် ႁႂ်ႈပေႃးပဵၼ်ၸွမ်းၼင်ႇ ၵၢင်ၸႂ်ၵူၼ်းမိူင်းတႆးႁဝ်းၶႃႈယူႇ၊ ယဝ်ႉၵေႃႈ တေၶတ်းၸႂ်ႁဵတ်းၸွမ်း ၵၢင်ၸႂ်ၵူၼ်းမိူင်းတႆး။ ၵူၼ်းမိူင်းတႆးႁဝ်းၶႃႈၶႂ်ႈပဵၼ် ၶႂ်ႈမီးၸိူင်ႉႁိုဝ်ၼႆၵေႃႈ တူဝ်တေႃႇတူဝ်ႁူပ်ႉထူပ်းလႄႈသင်၊ မႃးဢုပ်ႇဢူဝ်း ဢမ်ႇၼၼ် တႅမ်ႈလိၵ်ႈပၼ်တၢင်းႁၼ်ထိုင်လႄႈသင်ၼႆ ယူႇတီႈမုၵ်ႉၸုမ်းႁဝ်းၶႃႈ ႁပ်ႉတွၼ်ႈယူႇၵူႈယၢမ်း ၶႂ်ႈလၢတ်ႈမီးၼင်ႇၼႆၶႃႈဢေႃႈ။