လူင်ပွင်ၸိုင်ႈ မိူင်းတႆး ႁွင်ႉပၢင်ၵုမ် သၽႃး တႃႇ 2 ဝၼ်း ၊ ဢုပ်ႇၵုမ်လွင်ႈ ၽေးၼမ်ႉထူမ်ႈ လႄႈ တႃႇၵႄႈလိတ်ႈ ၵမ်ႉၸွႆႈ ၵူၼ်းထူပ်း ၽေးၼမ်ႉထူမ်ႈ ၼႂ်းၸိုင်ႈတႆး လၢႆလၢႆၸႄႈဝဵင်း ၊ တမ်းဝၢင်းငိုၼ်း ၼပ်ႉႁူဝ်ႁဵင်သႅၼ်။

ဝၼ်းတီႈ 18-19/08/2015 ၼႆႉ လူင်ပွင်ၸိုင်ႈမိူင်းတႆး ႁွင်ႉပၢင်ၵုမ် သၽႃးမိူင်းတႆး တီႈဝဵင်းတူၼ်ႈတီးသေ ဢုပ်ႇၵုမ်လွင်ႈၽေး ၼမ်ႉထူမ်ႈ။ ၵွပ်ႈဝႃႈ ၽွင်းႁၢင်လိူၼ်ၵျူႊလၢႆႊပူၼ်ႉမႃးလႄႈ ႁူဝ်လိူၼ်ဢေႃႊၵတ်ႊသ်ၼႆႉ ၼႂ်းၸိုင်ႈတႆး လၢႆလၢႆတီႈ လၢႆလၢႆၸႄႈဝဵင်း ၾူၼ်တူၵ်းႁႅင်းသေ ၵူၼ်းဝၢၼ်ႈ ၵူၼ်းမိူင်း ထူပ်းၽေး ၼမ်ႉထူမ်ႈ ၊ လႆႈလူႉသုမ်း ၵႃႈၶၼ်ငိုၼ်း ဢၢၼ်ႇႁူဝ်ႁဵင်မၼ်း- ၸွမ်ၽူင်းလူင် မိူင်းတႆးလၢတ်ႈ။


ၼႂ်းၸိုင်ႈတႆး ဢၼ်လႆႈထူပ်းၽေး သိင်ႇဝႅတ်ႉလွမ်ႉ (သၽႃႇဝ) ၼမ်ႉထူမ်ႈၼႆႉ မီးယူႇ 22 ၸႄႈဝဵင်း ၊ လင်ႁိူၼ်းၵူၼ်းမီး 1,008 လင် ၊ ႁူဝ်ၵူၼ်းမီး 5,224 ၵေႃႉ။ ၵူၼ်းတၢႆမီး 9 ၵေႃႉ ၊ ၼႂ်းၸႄႈဝဵင်းသီႇပေႃႉ 5 ၵေႃႉ ၊ ၼႂ်းၸႄႈတွၼ်ႈတႃႈၶီႈလဵၵ်း 4 ၵေႃႉ။ ၼႃႈႁိူၼ်း ဢၼ်ထူပ်းၺႃး ၽေးၼမ်ႉႁၢဝ်ႈႁႅင်း မီး 208 လင်ႁိူၼ်း ၊ ႁူဝ်ၵူၼ်း 1,636 ၵေႃႉ ၊ ၼႂ်းၼႆႉ ဢၼ်လႆႈယူႇၶိုၼ်းႁိူၼ်း တူဝ်ၵဝ်ႇၶိုၼ်းလီငၢမ်း မီး 519 ၵေႃႉ ၊ ဢၼ်တိုၵ်ႉမီးယူႇ တီႈပၢင်သဝ်း ၵူၼ်းပၢႆႈၽေး မီး 1,119 ၵေႃႉ။


ၼႂ်းၸႄႈတွၼ်ႈ တႃႈၶီႈလဵၵ်း မီးလွင်ႈလူႉသုမ်း ၼမ်သုတ်း။ လင်ႁိူၼ်းၵူၼ်း လႆႈလူႉၵွႆၵႂႃႇ 168 လင် ၊ ႁူင်းႁဵၼ်း 2 လင် ၊ တူင်ႈႁႆႈတူင်းၼႃး 2,528.8 ဢေႊၵႃႊ ၊ လင်ႁိူၼ်းၵူၼ်း ဢၼ်ၵူၼ်ႇပင်းၵႂႃႇ မီး 4 လင် ၊ ၾၢႆၵူၼ်ႇပင်း 2 ဢၼ် ၊ ၶူဝ် 23 လင် ၊ သဵၼ်ႈတၢင်း 6 သဵၼ်ႈ ၊ ၵႃႈၶၼ်ၶူဝ်းၶွင် ဢၼ်လူႉၵွႆၵႂႃႇ မွၵ်ႈငိုၼ်း 1,982.49 လၢၼ်ႉ။


ၼႂ်းမိူင်းတႆးၼႆႉ ပေႃးမႃး ႁူမ်ႈၵၼ်သေ ထတ်းတူၺ်း ၵႃႈၶၼ်ငိုၼ်း ဢၼ်လႆႈလူႉသုမ်းၵႂႃႇ ၸွမ်းၼမ်ႉထူမ်ႈ ပွၵ်ႈၵမ်းၼႆႉ မီးယူႇ 2,544.936 လၢၼ်ႉၵျၢတ်ႈ။


ယွၼ်ႉပိူဝ်ႈ ၵူၼ်းဝၢၼ်ႈ ၵူၼ်းသူၼ် ထူပ်းၽေးၼမ်ႉ ထူမ်ႈလႄႈ ႁႆႈၼႃးဢၼ်လူႉ ၵွႆၵႂႃႇၼၼ်ႉ ၼင်ႇႁိုဝ် ပေႃးတေလႆႈၶေႃႈမုလ်း ဢၼ်ထုၵ်ႇမႅၼ်ႈသေ လႆႈတၢင်းၵမ်ႉၸွႆႈၼၼ်ႉ ယူႇတီႈ လူင်ပွင်ၸိုင်ႈ မိူင်းတႆး လႆႈပၼ်ပုၼ်ႈၽွၼ်းလူင်းမႃး ပဵၼ်ၸၼ်ႉပဵၼ်ၸၼ်ႉ တေႃႇပေႃးထိုင်ပိုၼ်ႉတီႈ ၊ ႁႂ်ႈၵူတ်ႇထတ်းတူၺ်းလွင်ႈ လူႉသုမ်းတႅတ်ႈၼႅတ်ႈဝႃႈ လူႉသုမ်းၵႃႈႁိုဝ်တႄႉတႄႉ ၊ ပိူဝ်ႈတႃႇႁႂ်ႈ ၵူၼ်းဝၢၼ်ႈ ၵူၼ်းမိူင်း ပေႃးတေလႆႈၶိုၼ်း လွင်ႈၵမ်ႉၸွႆႈ ယႃႇႁႂ်ႈတူၵ်းႁူင်ႈတူၵ်းႁၢႆ- ၼႆယဝ်ႉ။


မိူၼ်ၼင်ႇတီႈ ဝဵင်းသီႇပေႃႉ ၶူဝ်ၼမ်ႉပေႃႉ ထုၵ်ႇၼမ်ႉၼွင်းလေႃႇတွင်ႈသေ ဢဝ်ၵူၼ်ႇပင်းၵႂႃႇၼၼ်ႉ ပိူဝ်ႈတႃႇမႄးၶိုၼ်းၼၼ်ႉ လႆႈငိုၼ်းၵွင်ၵၢင် 400 သႅၼ်ၵျၢတ်ႈ (ပျႃး) ၊ မိူဝ်ႈလဵဝ် မႄးယဝ်ႉတူဝ်ႈၵႂႃႇ  80% ။ ၵူၼ်းဝၢၼ်ႈၵူၼ်းမိူင်း ၸိူဝ်းထူပ်းၽေးၼမ်ႉထူမ်ႈၸိူဝ်းၼႆႉ ၼိုင်ႈႁူဝ်ႁိူၼ်း တေၵမ်ႉၸွႆႈပၼ် ဢမ်ႇႁႂ်ႈမၼ်းယွမ်း 3 မိုၼ်ႇၵျၢတ်ႈ။ ႁူင်းႁဵၼ်းတင်းဝတ်ႉ/ၵျွင်းမုၼ်ၸဝ်ႈၼႆႉ ၼိုင်ႈလင် 1 သႅၼ်ၵျၢတ်ႈ။ ၼႃးၼိုင်ႈဢေႊၵႃႊ 1 မိုၼ်ႇၵျၢတ်ႈ ၊ ၸိူဝ်းၼႆႉ ယူႇတီႈလူင်ပွင်ၸိုင်ႈမိူင်းတႆးသေ တေၵမ်ႉၸွႆႈပၼ်ၵႂႃႇ- ၼႆယဝ်ႉ။


ၵွပ်ႈၼႆ ပၢင်ၵုမ်လူင် သၽႃးမိူင်းတႆး ပွၵ်ႈၵမ်းၼႆႉ ပဵၼ်ပၢင်ၵုမ်ၶိုၵ်ႉၶၵ်ႉ တွၼ်ႈတႃႇၵူၼ်း ထူပ်းၽေးၼမ်ႉ ၽေးသိင်ႇဝႅတ်ႉလွမ်ႉ (သၽႃဝ)။ ၶူဝ်းၶွင်ၵူႈၸိူဝ်ႉၵူႈလွင်ႈ ဢၼ်ယူႇတီႈၽူႈမီးၼမ်ႉၸႂ် ၸေႇတၼႃႇၶဝ်မႃး ၸွႆႈလႄႈ လူင်ပွင်ၸိုင်ႈမိူင်းတႆး လႆႈႁပ်ႉသေ ဢဝ်ၵႂႃႇၸွႆႈပၼ်ၼၼ်ႉ မီးယူႇမွၵ်ႈ ၵႃႈၶၼ်ငိုၼ်း 500 လၢၼ်ႉၵျၢတ်ႈ- ၼႆယဝ်ႉ။