ၵေႃလိၵ်ႈလၢႆး လႄႈ ၾိင်ႈငႄႈတႆး ၸႄႈဝဵင်း ၵျွၵ်ႉမႄး ၸတ်းႁဵတ်း ပၢင်ၵုမ်လူင် ၶွပ်ႈၶူပ်ႇ ဝၢင်ႈၽႅၼ် ၵၢၼ်မိူဝ်းၼႃႈ ၽူႈၶဝ်ႈႁူမ်ႈ ၼပ်ႉႁူဝ်ပၢၵ်ႇ ။

မိူဝ်ႈ ဝၼ်းတီႈ 22/8/2015 ယၢမ်းၵၢင်ၼႂ် 10 မူင်း ၼၼ်ႉ ၵေႃလိၵ်ႈလၢႆး လႄႈ ၾိင်ႈငႄႈတႆး ၸႄႈဝဵင်းၵျွၵ်ႉမႄး ၸတ်းႁဵတ်း ပၢင်ၵုမ်လူင် ၶွပ်ႈၶူပ်ႇ တီႈ ဝတ်ႉၵျွင်းယွတ်ႈ ပွၵ်ႉ (7) ဝဵင်း ၵျွၵ်ႉမႄး ။ မီးၽူႈယႂ်ႇၵူၼ်းလူင် လႄႈ မေႃသွၼ် ၵူႈဝၢၼ်ႈ ၶဝ်ႈႁူမ်ႈ 200 ၵေႃႉပၢႆသေ ၸုမ်းပွင်ၵၢၼ် 2014-2016 ဢုပ်ႇဢူဝ်း သပ်းလႅင်း တၢင်ႇလၢတ်ႈ ၼႄၼႃႈၵၢၼ် ၊ လွင်ႈတူင်ႉၼိုင် ဢၼ်လႆႈ ႁဵတ်းသၢင်ႈမႃး ၼႂ်းပီ 2014-2015 ။


ၸဝ်ႈၶူး ၵလျႃႇၼ ဝံသ ဝတ်ႉၵျွင်းယွတ်ႈ ပၼ်ၶေႃႈသင်ႇ ပွၼ်ႈဢွၼ်လီ ဝႃႈ - “ ယိူင်းမၢႆႁဝ်း မီးသင် ၶတ်းၸႂ် ႁဵတ်းၸွမ်း ယိူင်းမၢႆ ပၵ်းပိူင် ၊ ပေႃးဢမ်ႇမီး ယိူင်းမၢႆ ပၵ်းပိူင် တေဢမ်ႇ ယိုၼ်းယၢဝ်းလႆႈ ၊ တမ်းၽႅၼ်ၵၢၼ် လီလီသေ ႁဵတ်းသၢင်ႈၵႂႃႇ ၊ ၵၢၼ် ၵေႃလိၵ်ႈလၢႆး ဢၼ်ဝႃႈၼၼ်ႉ ဢမ်ႇမီး ငိုၼ်းလိူၼ်သင် ယွၼ်ႉၼၼ် တေလႆႈတူၺ်း ယၢဝ်းယၢဝ်း လီလႆႈ မေႃဝႆႉဝၢင်းၸႂ် တေႃႇၵၼ် ႁဵတ်းၵၢၼ် ႁႂ်ႈမၼ်း တဵမ်ထူၼ်ႈ ႁႂ်ႈမၼ်း ၶႅမ်ႉလႅပ်ႈၵႂႃႇမိူဝ်းၼႃႈ ” ဝႃႈၼႆ ။


ၽူႈတႅၼ်း ၸႄႈမိူင်း ၸၢႆးၶမ်းၵျေႃႇ မွၵ်ႇလၢတ်ႈ ၶေႃႈၵႂၢမ်းၵႂႃႇ ဝႃႈ - “ ၵေႃလိၵ်ႈလၢႆး လႄႈ ၾိင်ႈငႄႈတႆးၼႆႉ လမ်ႇလွင်ႈ တႄႉတႄႉ ၊ ႁဝ်းၸၢင်ႈ သွၼ်ပၼ် တၢင်းႁူႉ တၢင်းႁၼ် လိၵ်ႈလၢႆး သေ ၸိူဝ်ႉၶိူဝ်း ဝၢၼ်ႈမိူင်းၵေႃႈ တေၶိုၼ်ႈယႂ်ႇမႃး ။


ႁူဝ်ပဝ်ႈလူင် ၵေႃလိၵ်ႈလၢႆး လႄႈ ၾိင်ႈငႄႈတႆး ၸႄႈဝဵင်း ၵျွၵ်ႉမႄး လုင်းၸၢႆးပႃႉ ၵၢဝ်ႇလၢတ်ႈ ၶေႃႈၵႂၢမ်း သပ်းလႅင်းၼႄ ဝႃႈ “ ပၢင်ၵုမ်လူင် ၶွပ်ႈၶူပ်ႇၼႆႉ တီႈတႄႉမၼ်း ၸတ်းႁဵတ်း ၸဵမ်မိူဝ်ႈလိူၼ် March ယဝ်ႉ ၵူၺ်းၵႃႈ ယွၼ်ႉသၢႆမၢႆ ၵူႈလွင်ႈလွင်ႈ ပႆႇတႅတ်ႈၼႅတ်ႈ လႄႈတိုၵ်ႉလႆႈ ၸတ်းႁဵတ်း ဝၼ်းမိူဝ်ႈၼႆႉ ၊ တွၼ်ႈတႃႇ တေသွၼ်လိၵ်ႈတႆး ၼႂ်းႁူင်းႁဵၼ်း လူင်ပွင်ၸိုင်ႈ ၼၼ်ႉ ယၢမ်းလဵဝ် လႆႈပၼ်ပုၼ်ႈၽွၼ်း ယဝ်ႉၵႂႃႇ ၸုပ်ႈၼိုင်ႈ မီး 33 ၵေႃႉ ၊ တေသိုပ်ႇ ပၼ်ပုၼ်ႈၽွၼ်း မေႃသွၼ် လိၵ်ႈတႆး ၵႂႃႇထႅင်ႈ ၸုပ်ႈသွင် ” ဝႃႈၼႆ ။


ၵႅမ်ႁူဝ်ပဝ်ႈ (2) ၵေႃလိၵ်ႈလၢႆး လႄႈ ၾိင်ႈငႄႈတႆး ၸႄႈဝဵင်း ၵျွၵ်ႉမႄး လုင်းၸၢႆးလႅင်းႁၢၼ် သပ်းလႅင်းၼႄ ပိူင်ၶွတ်ႇၽွတ်ႈ / လွင်ႈယိူင်းဢၢၼ်း / လွင်ႈမၢႆမီႈ ပၵ်းပိူင် ၵေႃလိၵ်ႈလၢႆး လႄႈၾိင်ႈငႄႈတႆး ၸႄႈဝဵင်းၵျွၵ်ႉမႄး ၊ လွင်ႈတူင်ႉၼိုင် ၸုမ်းပွင်ၵၢၼ် ၵေႃလိၵ်ႈလၢႆး (2014-2016) ၊ လွင်ႈသွၼ်လိၵ်ႈတႆး ၼႂ်းႁူင်းႁဵၼ်း လူင်ပွင်ၸိုင်ႈ ၊ လွင်ႈပၢင်သွၼ်လိၵ်ႈတႆး ၶၢဝ်းမႆႈ ၊ လွင်ႈၶွင်ႈၶမ် လွင်ႈယၢပ်ႇၽိုတ်ႇ ဢၼ်လႆႈထူပ်းၺႃး ၸိူဝ်းၼၼ်ႉ ။


ထိုင်မႃး တွၼ်ႈပၼ် တၢင်းႁၼ်ထိုင် လႄႈတွင်ႈထၢမ်ၼၼ်ႉ ႁပ်ႉထွမ်ႇဢဝ် တၢင်းၶႆႈၸႂ် တၢင်းႁၼ်ထိုင် တီႈၽူႈယႂ်ႇ ၵူၼ်းလူင်ယဝ်ႉသေ လုင်းၸၢႆးလႅင်းႁၢၼ် လႆႈတွပ်ႇၵႄႈ ပၼ်ၶိုၼ်း ၶေႃႈထၢမ် ၵူႈလွင်ႈလွင်ႈ ၊ လုင်းသြႃႇဢွင်ႇၶမ်း ၶိုၼ်းၵၢဝ်ႇလၢတ်ႈ ၶေႃႈၵႂၢမ်း လူပ်းလင်သေ ယၢမ်းဝၢႆးဝၼ်း 4 မူင်း ၼၼ်ႉ ပၢင်ၵုမ်လူင် ၶွပ်ႈၶူပ်ႇ ၵေႃလိၵ်ႈလၢႆး လႄႈ ၾိင်ႈငႄႈတႆး ၸႄႈဝဵင်းၵျွၵ်ႉမႄး ယဝ်ႉတူဝ်ႈလီငၢမ်း ။


ပူၼ်ႉမႃးမိူဝ်ႈ ဝၼ်းတီႈ 23/3/2014 ၼၼ်ႉ ၵေႃလိၵ်ႈလၢႆး လႄႈ ၾိင်ႈငႄႈတႆး ၸႄႈဝဵင်းၵျွၵ်ႉမႄး လႆႈၸတ်းႁဵတ်းပၢင်ၵုမ်လူင် တီႈဝတ်ႉၵျွင်းယွတ်ႈ သေ လိူၵ်ႈတင်ႈၸုမ်းတီႈ ၵိူဝ်းၵုမ မႃး 3 ၵေႃႉ ၊ ၸုမ်းပွင်ၵၢၼ်မႂ်ႇ 21 ၵေႃႉ တွၼ်ႈတႃႇ ႁၢပ်ႇၵၢၼ် ၵေႃလိၵ်ႈလၢႆး လႄႈ ၾိင်ႈငႄႈတႆး ၸႄႈဝဵင်းၵျွၵ်ႉမႄး ပီ (2014-2016) ။