ဢိင်ၼိူဝ်ၾူၼ်တူၵ်းႁႅင်း ထပ်းၵၼ်သေမႄႈၼမ်ႉၵႆးၼွင်းယိုင်ႈၶိုၼ်ႈ ထူမ်ႈဝၢၼ်ႈၼမ်ႉၵႆး ဢိူင်ႇၵဵင်းလၢပ်ႈ ၸႄႈတွၼ်ႈတႃႈၶီႈလဵၵ်းၸိုင်ႈတႆး ပွတ်းဢွၵ်ႇ။ ႁဵတ်းႁႂ်ႈၵူၼ်းဝၢၼ်ႈၼမ်ႉၵႆး ထူပ်းတၢင်းယၢပ်ႇၽိုတ်ႇ ။

တင်ႈတႄႇဝၼ်းတီႈ 04/08/2015 ၼႂ်းၵႄႈ ၶၢဝ်းယၢမ်း 4-5 မူင်းၵၢင်ၼႂ်ၼၼ်ႉ ၾူၼ်တူၵ်းႁႅင်း ထပ်းၵၼ်မႃးလၢႆဝၼ်းလႄႈ ႁဵတ်းႁႂ်ႈမႄႈၼမ်ႉၵႆး ယိုင်ႈၶိုၼ်ႈၼွင်းထူမ်ႈဝၢၼ်ႈၼမ်ႉၵႆး ဢိူင်ႇၵဵင်းလၢပ်ႈ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ၵူၼ်းဝၢၼ်ႈၼမ်ႉၵႆးလၢႆပၢၵ်ႇၵေႃႉ ထူပ်းတၢင်းယၢပ်ႇၽိုတ်ႇ။ မိူဝ်ႈလဵဝ် ၸုမ်းတူင်ႉၼိုင် ၼႂ်းတူင်ႇဝူင်းတႆးလၢႆလၢႆၸုမ်း ႁူမ်ႈၵၼ်ၶဝ်ႈၸွႆႈ ၶဝ်ႈၼမ်ႉတၢင်းၵိၼ် ၸိူင်ႉၼင်ႇ ၶဝ်ႈၼမ်ႉတၢင်းၵိၼ်လႄႈ ၶူဝ်းၸႂ်ႉသွႆ ၼႃႈႁိူၼ်းၸိူဝ်းၼႆႉ - ၼႆယဝ်ႉ။


ၸုမ်းပၢႆးမွၼ်းတႆး တၢင်းပွတ်းမႄႈသၢႆၸိုင်ႈထႆး ၸၢႆးမိူင်းၶမ်းလၢတ်ႈဝႃႈ ဝၼ်းတီႈ 11/08/2015 ၶၢဝ်းယၢမ်းမွၵ်ႈ 08:00 မူင်း ၸုမ်းထႆးမူလၼိထိသယၢမ်ရူမ်ႊၸႂ် (ပူႇဢိၼ်း) မႄႈသၢႆ (มูลนิธิสยามรวมใจ(ปู่อินทร์)  แม่สาย လႄႈၸုမ်းပၢႆးမွၼ်းတႆးတႃႈၶီႈလဵၵ်း ႁူမ်ႈၵၼ်ႁႃငိုၼ်းၵွင်ၵၢင် တႃႇၸွႆႈလိူဝ် ၵူၼ်းထူပ်းၽေးၼမ်ႉထူမ်ႈ တၢင်းပွတ်းပႃႇလႅဝ်းၵဵင်းလၢပ်ႈ ၼပ်ႉႁူဝ်ပၢၵ်ႇၵေႃႉသေ ၸုမ်းႁဝ်းၶႃႈတေသိုဝ်ႉၶူဝ်းၶွင် ၸႂ်ႉတိုဝ်းလႄႈၶွင်ၵိၼ်ယမ်ႉ တႃႇငိုၼ်း36,000 ဝၢတ်ႇ - ဝႃႈၼႆ။

ၼၢင်းၼူၼ်းမူဝ် ၽူႈပွင်ၵၢၼ်ၼႂ်းၸုမ်းၶႅၵ်ႇလီပၢင်ၸႃႉတႆး ၼမ်ႉၶူင်း ဝဵင်းတူၼ်ႈတီးၵေႃႈ မီးၽႅၼ်ၵၢၼ် တေမႃးၸွႆႈပီႈၼွင်ႉၵူၼ်းထူပ်းၽေး တၢင်းပွတ်းဢွၵ်ႇၶူင်း ။

ၸၢႆးဢေး ၽူႈသူၼ်းတုမ်ပႃႊတီႊႁူဝ်သိူဝ် ဝဵင်းတႃႈၶီႈလဵၵ်းလၢတ်ႈဝႃႈ တေႃႈလဵဝ်ၼႆႉမီးပီႈၼွင်ႉၽူႈၸွႆႈထႅမ်ၶဝ် ၵပ်းသိုပ်ႇမႃးတီႈႁဝ်းၵေႃႈ မီးလၢႆလၢႆၸုမ်းဝႆႉ မိူၼ်ၸုမ်းၵေႃလိၵ်ႈလၢႆးလႄႈၾိင်ႈငႄႈတႆး တၢင်းပွတ်းႁွင်ႇၵေႃႈ ၵပ်းသိုပ်ႇမႃး ၸုမ်းဝၢၼ်ႈႁႆးၵေႃႈ ၵပ်းသိုပ်ႇမႃး ၸုမ်းၶႅၵ်ႇလီပၢင်ၸႃႉ တႆးၼမ်ႉၶူင်းဝဵင်းတူၼ်ႈတီးၵေႃႈ ၵပ်းသိုပ်ႇမႃး။ လိူဝ်ၼၼ်ႉ ယင်းမီးသုၼ်ႇတူဝ် ၽႂ်မၼ်းသေၵပ်းသိုပ်ႇမႃးၵေႃႈမီး။ သင်ဝႃႈမီးပီႈၼွင်ႉႁဝ်းၶႃႈ တေၶႂ်ႈလူင်းပိုၼ်ႉတီႈၵႂႃႇၸွမ်းႁဝ်းၶႃႈၵေႃႈၶႅၼ်းလီ ဝႃႈၼႆ။


ၼမ်ႉထူမ်ႈဝၢၼ်ႈၼမ်ႉၵႆး ဢိူင်ႇၵဵင်းလၢပ်ႈ ၸႄႈတွၼ်ႈတႃႈၶီႈလဵၵ်းၼႆႉ လင်ႁိူၼ်း ၼႂ်းဝၢၼ်ႈၼမ်ႉၵႆးတင်းမူတ်း မီး 106 လင်ႁိူၼ်းထုၵ်ႇၼမ်ႉလုပ်ႇၵႂႃႇ 20 လင် ႁိူၼ်းဢၼ်ယူႇလႆႈသမ်ႉမီး 2 လင် ဢၼ်ၵိုတ်းၸိူဝ်းၼၼ်ႉၵေႃႈ ယူႇဢမ်ႇလႆႈ ၵွပ်ႈဝႃႈ သဝ်ႁိူၼ်းမၼ်းၵိူင်းမူတ်းယဝ်ႉ။ တေႃႈလဵဝ် ၵူၼ်းဝၢၼ်ႈ ဢွၼ်ၵၼ်ၵႂႃႇယူႇဝႆႉတီႈ ဝတ်ႉၼမ်ႉၵႆး ၼပ်ႉႁူဝ်ပၢၵ်ႇ ၼႆယဝ်ႉ။