ပႃႊတီႊ သိူဝ်ၽိူၵ်ႇ (SNDP) ၸတ်းႁဵတ်းပၢင်သွၼ် ၵဵဝ်ႇၵပ်းတၢင်းႁူႉ လွင်ႈၵၢၼ်လိူၵ်ႈတင်ႈ။ မီးၽွင်းတႅၼ်းလႄႈ ၽူႈတၢင်တူဝ်ၽွင်းတႅၼ်း ၶဝ်ႈႁူမ်ႈလဵပ်ႈႁဵၼ်း တင်းၼမ်။

ပူၼ်ႉမႃး မိူဝ်ႈဝၼ်းတီႈ 14-15-16/08/2015 (ၶၢဝ်းတၢင်း 3 ဝၼ်း) ယူႇတီႈ ၻီႊမူဝ်ႊၶရႅတ်ႊတိၵ်ႊ ပႃႊတီႊ ၸၢဝ်းၶိူဝ်းတႆး ႁိုဝ် ပႃႊတီႊသိူဝ်ၽိူၵ်ႇ (SNDP) လႆႈၸတ်းႁဵတ်းပၢင်သွၼ် ၵဵဝ်ႇၵပ်းတၢင်းႁူႉ လွင်ႈၵၢၼ်လိူၵ်ႈတင်ႈ တီႈငဝ်ႈငုၼ်း ပႃႊတီႊသိူဝ်ၽိူၵ်ႇ တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း။


ပၢင်သွၼ်ၼႆႉ ၽူႈလူင်ႉလႅၼ်ႇ ဢၼ်မႃးပၼ်တၢင်းႁူႉ ပဵၼ်ၸုမ်းၼွၵ်ႈမိူင်း လႄႈ တင်းၽူႈသိုဝ်ႇၶၢဝ်ႇ။ မီးၵၢၼ်သွၼ်ပၼ် လွၵ်းလၢႆး သူၼ်းတုမ် ၵူၼ်းမိူင်း၊ လွၵ်းလၢႆးဢဝ်ၶၢဝ်ႇငၢဝ်း ၊ ၵၢၼ်တိတ်းတေႃႇၵပ်းသိုပ်ႇ။ ၵၢၼ်လိူၵ်ႈတင်ႈၼႆႉ လွၵ်းလၢႆးမိူင်းၼွၵ်ႈ ႁဵတ်းၸိူင်ႉႁိုဝ် ၊ လွၵ်းလၢႆး ၼႂ်းမိူင်းႁဵတ်းၸိူင်ႉႁိုဝ် ၊ မၼ်းပႅၵ်ႇပိူင်ႈၵၼ် ၸိူင်ႉႁိုဝ် ၊ ႁဝ်းပဵၼ်ၸိူင်ႉႁိုဝ် ပိူၼ်ႈပဵၼ်ၸိူင်ႉႁိုဝ် ၸိူဝ်းၼႆႉ။


ပၢင်သွၼ်ၼႆႉ ၸိူဝ်းမႃးၶိုၼ်ႈႁွတ်ႈ ၶဝ်ႈႁူမ်ႈ မီးၽွင်းတႅၼ်း လႄႈ ၽူႈတၢင်တူဝ်ၽွင်းတႅၼ်း ၼႂ်းမိူင်းတႆး ၊ ၸႄႈမိူင်းၶၢင် ၊ ၸႄႈမိူင်းယၢင်းၽိူၵ်ႇ ၊ တိူင်းၸၵၢႆး ၊ တိူင်းမၼ်းတလေး (ဝဵင်းတႃႈလိူဝ်ႇ)ၸိူဝ်းၼႆႉ ႁူမ်ႈတင်းမူတ်း 200 ပၢႆ- ၼႆယဝ်ႉ။


ၸုမ်းၼွၵ်ႈမိူင်းၼႆႉ လႆႈႁူႉဝႃႈပဵၼ်ၸုမ်း MNEC ၊ ၸုမ်းၼႆႉ ၵႂႃႇပၼ်ပၢင်သွၼ် ၵဵဝ်ႇၵပ်းၵၢၼ်လိူၵ်ႈတင်ႈ မိူင်းၼိုင်ႈယဝ်ႉမိူင်းၼိုင်ႈ။ ၸုမ်းၶၢဝ်ႇ ပဵၼ်ၸုမ်းၶၢဝ်ႇ ၼႂ်းမိူင်းမၢၼ်ႈ ဢၼ်ၶဝ်လႆႈၵႂႃႇ လဵပ်ႈႁဵၼ်းလွၵ်းလၢႆး လိူၵ်ႈတင်ႈ တၢင်ႇဝၢၼ်ႈ တၢင်ႇမိူင်း မိူၼ်ၼင်ႇ ၼႂ်းမိူင်းထႆး ၊ မိူင်းဢိၼ်ႊၻီႊယိူဝ်ႊ ၊ မိူင်းလၢဝ်း ၸိူဝ်းၼႆႉ။ မိူၼ်ၼင်ႇမိူင်းၸိူဝ်းၼႆႉ လွၵ်းလၢႆးလိူၵ်ႈတင်ႈပဵၼ်ႁိုဝ် ၊ တၢင်းမိူင်းႁဝ်းသမ်ႉ ပဵၼ်ႁိုဝ် ၊ ၸွင်ႇမီးလွင်ႈ ႁူမ်ႇလူမ်ႈ လွတ်ႈၽေးယူႇႁႃႉ သပ်းလႅင်းၼႄၸိူဝ်းၼႆႉ-  လုၵ်ႈၸုမ်းပႃႊတီႊသိူဝ်ၽိူၵ်ႇ ၵေႃႉၼိုင်ႈလၢတ်ႈ။