ၶွင်ႊသီႊ ဢဝ်ၶိုၼ်းၸိုင်ႈတႆး (RCSS) တင်းၸုမ်းယၢင်း 3 ၸုမ်း  KNU, DKBA, KNU-KNLA(PC) ဢုပ်ႇဢူဝ်း တူၵ်းလူင်း လႆႈၸႂ်ၵၼ် တေလူင်းလၢႆးမိုဝ်း ၵိုတ်းယိုဝ်းပတ်းပိုၼ်ႉ တူဝ်ႈမိူင်း (NCA) ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 17/08/2015 ၶွင်ႊသီႊ ဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) တင်းၸုမ်းယၢင်း 3 ၸုမ်း မိူၼ်ၼင်ႇ ႁူမ်ႈတုမ် ၸိူဝ်ႉၸၢတ်ႈယၢင်းၽိူၵ်ႇ (KNU) တပ်ႉသိုၵ်းယၢင်းပုတ်ႉထ (DKBA) ၊  KNU-KNLA ၶဝ် ႁဵတ်းပၢင်ၵုမ်ၵၼ်သေ လႆႈၸႂ်ၵၼ် ဢွၵ်ႇၶေႃႈ ပိုၼ်ၽၢဝ်ႇဝႃႈ- တေလူင်းလၢႆးမိုဝ်း ၵိုတ်းယိုဝ်းပတ်းပိုၼ်ႉ တူဝ်ႈမိူင်း (NCA) ယဝ်ႉ- ဝႃႈၼႆ။


လွင်ႈဢၼ် တေလူင်းလၢႆးမိုဝ်းၼႆႉ တင်း 4 မူႇၸုမ်း မုင်ႈမွင်းဝႃႈ ပေႃးဝႃႈ လူင်းလၢႆးမိုဝ်း ၵိုတ်းယိုဝ်း ပတ်းပိုၼ်ႉတူဝ်ႈမိူင်းၵၼ်ယဝ်ႉ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၼႆႉ တေလႆႈယိပ်းၵွင်ႈၵၢင်ႇ ၸဝ်ႈၵဝ်ႇဝႆႉ (ဢမ်ႇဝၢင်းၶိူင်ႈသေ) တေလႆႈသိုပ်ႇ ၵႅတ်ႇၵင်ႈသုၼ်ႇလႆႈ ၸၢဝ်းၶိူဝ်း ၸဝ်ႈၵဝ်ႇ။ တေထုၵ်ႇ ပူတ်းဢွၵ်ႇၼႂ်းမတ်ႉတႃ 17/1 ဢၼ်ဝႃႈ ပဵၼ်ၸုမ်းၼွၵ်ႈမၢႆမီႈ။ မိူဝ်ႈၽွင်း ဢုပ်ႇဢူဝ်း ၵၢၼ်မိူင်းယူႇၵေႃႈ တေၵႅတ်ႇၵင်ႈလႆႈပၼ်ႁႃ ဢၼ်ၸၢင်ႈၵိူတ်ႇၶိုၼ်ႈ။ ယုမ်ႇယမ်ဝႃႈ တေႁဵတ်းၵၢၼ် ၽွၼ်းလီပၼ် ၵူၼ်းဝၢၼ်ႈ ၵူၼ်းမိူင်း လႆႈလိူဝ်ၵဝ်ႇ ၸိူဝ်းၼႆႉသေ ၸင်ႇလႆႈတႅပ်းတတ်း တႃႇတေ လူင်းလၢႆးမိုဝ်း NCA ၸွမ်းၼင်ႇ ဢၼ်လူင်ပွင်ၸိုင်ႈ တႅမ်ႈမွၵ်ႇမႃးၼၼ်ႉ- ၼႆယဝ်ႉ။


ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင် ၸၢႆးလႃႉ လၢတ်ႈဝႃႈ- ႁဝ်းၶႃႈဢၼ်လီ ႁပ်ႉတွၼ်ႈ ဢၼ်လူင်ပွင်ၸိုင်ႈ ႁွင်ႇမွၵ်ႇမႃး ပိူဝ်ႈတႃႇႁႂ်ႈၵႂႃႇ လူင်းလၢႆးမိုဝ်း။ ၵွပ်ႈၼၼ်လႄႈ ႁဝ်းၶႃႈၸင်ႇလႆႈၸႂ်ၵၼ် တႅပ်းတတ်းဝႃႈ တေလူင်း လၢႆးမိုဝ်း။ မိူဝ်ႈလဵဝ် တႃႇတေလူင်းလၢႆးမိုဝ်းၼႆႉ တူဝ်ႈတၼ်းယဝ်ႉ၊ ၵူၺ်းၵႃႈ တေလူင်းလၢႆးမိုဝ်း ဝၼ်းလႂ်တႄႉတႄႉၼၼ်ႉ ပႆႇၸၢင်ႈဝႃႈ- ဝႃႈၼႆ။


ယူႇတီႈၸုမ်းယၢင်း တင်း RCSS လႆႈၸႂ်ၵၼ် တေသိုပ်ႇၶတ်းၸႂ် ႁဵတ်းႁႂ်ႈ 6 ၸုမ်း ဢၼ်လူင်ပွင်ၸိုင်ႈ ဢမ်ႇႁပ်ႉၸိုဝ်ႈၶဝ်ဝႆႉ ပိူဝ်ႈတႃႇလူင်းလၢႆးမိုဝ်း ၼႂ်းၶၵ်ႉၵၢၼ် လွင်ႈငမ်းယဵၼ်ၼၼ်ႉ ႁႂ်ႈလႆႈၶဝ်ႈပႃး လူင်းလၢႆးမိုဝ်း။ ၼွၵ်ႈသေၼၼ်ႉ တၢင်ႇမူႇတၢင်ႇၸုမ်း ဢၼ်ပႆႇတႅပ်းတတ်း တႃႇတေၵႂႃႇ လူင်းလၢႆးမိုဝ်းၼၼ်ႉၵေႃႈ ၼင်ႇႁိုဝ်ၶဝ်ပေႃးတေ တႅပ်းတတ်းသေ မႃးလူင်းလၢႆးမိုဝ်း ၵမ်းၸုမ်းၸုမ်းၼၼ်ႉၵေႃႈ ယူႇတီႈ RCSS သေ တေၶတ်းၸႂ် ႁူမ်ႈႁဵတ်းသၢင်ႈၵႂႃႇ- ၼႆယဝ်ႉ။


ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တင်းၸုမ်းယၢင်း 3 ၸုမ်း မိူၼ်ၼင်ႇ KNU, DKBA, KNU-KNLA(PC) ၸိူဝ်းၼႆႉ ပဵၼ်ၸုမ်း ယိပ်းၵွင်ႈၵၢင်ႇ ဢၼ်ၵႂႃႇ လူင်းလၢႆးမိုဝ်းၸွမ်း ပႃႊတီႊ ၵၢၼ်မိူင်း ၸိူဝ်းဢၼ်ႁၼ်လီ ၵမ်ႉထႅမ် တႃႇတေလူင်းလၢႆးမိုဝ်း ၵိုတ်းယိုဝ်း ပတ်းပိုၼ်ႉတူဝ်ႈမိူင်းသေ လူင်းလၢႆးမိုဝ်း မိူဝ်ႈဝၼ်းမိူင်းႁူမ်ႈတုမ် (12/02/2015)ၼၼ်ႉ။


ၼွၵ်ႈသေၼၼ်ႉ 4 ၸုမ်းၼႆႉ မိူဝ်ႈၽွင်း ၾၢႆႇၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း (SD) ၶဝ်ႁူပ်ႉထူပ်း ဢုပ်ႇဢူဝ်းၵၼ်တင်း ၸုမ်းၶိုင်ပွင် လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) တီႈတႃႈၵုင်ႈ ၽွင်းႁူဝ်လိူၼ်ၼႆႉၵေႃႈ ၵႂႃႇႁူပ်ႉဢုပ်ႇၸွမ် ၸိုင်ႈတဵင်းၸဵင်ႇ လႄႈ ၽူႈၵွၼ်းသိုၵ်း သုင်သုတ်းမၢၼ်ႈ ၸွမ်သိုၵ်းလူင် မိၼ်းဢွင်ႇလၢႆႇ ႁင်းၵူၺ်း။ 4 ၸုမ်းၼႆႉ ပဵၼ်ၸုမ်းဢၼ်ႁၼ်လီ ဢၼ်လူင်ပွင်ၸိုင်ႈ ယိုၼ်ႈမိုဝ်းႁႂ်ႈၵိုတ်းယိုဝ်း ပတ်းပိုၼ်ႉတူဝ်ႈမိူင်း။