ႁူင်း ပွႆႇသဵင် MAP Radio ဢၼ်ပဵၼ် ႁူင်းပွႆႇသဵင် တႃႇ ပီႈၼွင်ႉ ႁႅင်းၵၢၼ် ယၢၼ်မိူင်းၼၼ်ႉ ပိုတ်ႇပွႆႇ သဵင်ၶိုၼ်းယဝ်ႉ မိူဝ်ႈဝႃး ( ဝၼ်းတီႈ 26/08/2015 ) ။

ႁူင်း ပွႆႇသဵင် MAP Radio ၼႆႉ လႆႈထုၵ်ႇသင်ႇ ၵိုတ်းပႅတ်ႈ မိူဝ်ႈ လူင်ပွင်ၸိုင်ႈ သိုၵ်းယိုတ်း ဢႃႇၼႃႇ ဝၼ်းတီႈ 22 လိူၼ်မေႊ 2014 မိူဝ်ႈ ပီၵၢႆ ပူၼ်ႉမႃး ။


ႁူင်း ပွႆႇသဵင် MAP ၼႆႉ ပိုတ်ႇဝႆႉ သွင်တီႈ ပိုၼ်ႉတီႈ မႄႈသွတ်ႇ ၸႄႈတွၼ်ႈ တၢၵ်ႇ လႄႈ ပိုၼ်ႉတီႈ ၸႄႈတွၼ်ႈ ၵဵင်းမႆႇ ၊ ပဵၼ် ႁူင်းပွႆႇသဵင် ဢၼ်ပိုၼ်ၽၢဝ်ႇ ၶေႃးမုလ်း ၵဵဝ်ႇၵပ်း သုၼ်ႇလႆႈ သုၼ်ႇပဵၼ် ႁႅင်းၵၢၼ် ယၢၼ်မိူင်း လႄႈ တၢင်းႁူႉ ၵႅမ်တူဝ် ၵူႈလွင်ႈလွင်ႈ ။


ၸၢႆးသႅင်မိူင်း ၽူႈၵွၼ်း ႁွင်ႈၵၢၼ် MAP Radio လၢတ်ႈဝႃႈ - ၼင်ႇႁိုဝ် ပေႃးတေလႆႈ ပိုတ်ႇၶိုၼ်းၼၼ်ႉ ႁဝ်းၶႃႈ ၶတ်းၸႂ်မႃး ယူႇၵူႈမိုဝ်ႉ ၵူႈဝၼ်း ၶႃႈယဝ်ႉ ။ ပိူင်လူင်မၼ်း ၼင်ႇႁိုဝ် ပီႈၼွင်ႉတႆး လႄႈ ၵူႈၸၢဝ်းၶိူဝ်းႁႂ်ႈလႆႈ ႁပ်ႉထွမ်ႇ လႄႈ ၸႂ်ႉၽွၼ်းလီ ႁူင်းပွႆႇသဵင် ၼၼ်ႉၶႃႈယဝ်ႉ ။


ၸၢႆးသႅင်မိူင်း ယင်းလၢတ်ႈ ထႅင်ႈဝႃႈ - ႁူင်းပွႆႇသဵင် MAP Radio ၼႆႉ ဢမ်ႇၸႂ်ႈ ၶွင်ၽႂ် ၊ ဢမ်ႇၸႂ်ႈ ၶွင်ၸုမ်းလႂ် ၸုမ်းၼိုင်ႈၶႃႈ ။ ၵူႈၵေႃႉ ၊ ၵူႈၸုမ်းၼႆႉ မီးသုၼ်ႇလႆႈ တႃႇတေ ပူၵ်းပွင် ၊ လူလွမ်ပႂ်ႉပႃး လႄႈၸႂ်ႉႁွင်ႈ ၵၢၼ်ပွႆႇသဵင် ၊ ၵွပ်ႈၼၼ်လႄႈ ႁႂ်ႈပီႈၼွင်ႉ ၽူႈထွမ်ႇငိၼ်းႁဝ်း ႁၼ်ထိုင် ဝႃႈၼင်ႇႁိုဝ် ႁႂ်ႈပေႃးမီး ၽွၼ်းလီ ဢမ်ႇဝႃႇလွင်ႈ ပိုၼ်ၽၢဝ်ႇ ၶၢဝ်ႇငၢဝ်း ၊ တၢင်းႁူႉ တၢင်းႁၼ် ၊ လွင်ႈလိၵ်ႈလၢႆး ၸိူဝ်းၼႆႉ ယူႇတီႈၸုမ်း MAP Radio ပၼ်တိုဝ်ႉတၢင်း လႄႈ ႁပ်ႉတွၼ်ႈယူႇ တႃႇသေႇၶႃႈ ” ။


ႁူင်း ပွႆႇသဵင် MAP Radio FM 99.0 MHz ၼႆႉၵေႃႇ တင်ႈမႃး မိူဝ်ႈ ဝၼ်းတီႈ 23 လိူၼ် ၾႅပ်ႊၿိဝ်ႊရီႊ 2004 မိူဝ်ႈၼၼ်ႉ မီးၽူႈၸတ်းလၢႆး မိူၼ်ၼင်ႇ ၸၢႆးသႅင်မိူင်း ၊ ၸၢႆးတုမ်ႇမွၵ်ႇႁၢၼ် ၊ ၼၢင်းၶမ်းဢိင်ႇလႆႈၵႂႃႇႁူမ်ႈ ၸတ်းတီႈ ႁူင်းပွႆႇသဵင် FM 99.0 MHz ဢၼ် ဢႃးၸၢၼ်ဢူႊထႆႊ ဝၼ်ႊပဵၼ်ၸဝ်ႈၶွင်ဝႆႉ ။


ထိုင်မႃး ပီ 2007 ၵေႃႈလႆႈသိုဝ်ႉဢဝ် ႁူင်းပွႆႇသဵင်သေ ပဵၼ်မႃး ႁူင်းပွႆႇသဵင် MAP Radio မႃး တေႃႇထိုင် ယၢမ်းလဵဝ် ။ ႁူင်းပွႆႇသဵင်ၼႆႉ ႁပ်ႉထွမ်ႇလႆႈ ၼႂ်းတၢင်းၵႆ 30 ၵီႊလူဝ်ႊ ပၼ်ႇမူၼ်း ။