သိုၵ်းမၢၼ်ႈဢၼ်ပၵ်းတီႈလွႆၼၢႆး တင်း တပ်ႉသိုၵ်းၸိုင်ႈတႆး (SSPP/SSA) ပဵၼ်ပၢင်တိုၵ်းၵၼ် တီႈလွႆရသေး ဢိူင်ႇလွႆၼၢႆး ၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်း။

တပ်ႉသိုၵ်းၸိုင်ႈတႆး (SSPP/SSA)

မိူဝ်ႈဝၼ်းတီႈ 21/07/2015 ယွၼ်ႉသိုၵ်းမၢၼ်ႈ တပ်ႉၶမယ 569 ၊ ဢၼ်ပၵ်းတီႈလွႆၼၢႆး (ၸဵင်ႇႁွင်ႇဝၼ်းတူၵ်း ဝၢၼ်ႈၼႃးၵွၼ်) ၽူႈဢွၼ်ႁူဝ် မူဝ်းဝိၼ်းၼႅင်ႇ ဢၼ်ယူႇၾၢႆႇတႂ်ႈၵၢၼ်ၵုမ်းၵမ် တိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) ပူၼ်ႉၶဝ်ႈၼႂ်း ပိုၼ်ႉတီႈၼႃႈလိၼ် တပ်ႉသိုၵ်းၸိုင်ႈတႆး (SSPP/SSA) ၵုမ်းၵမ်သေ သွင်ၾၢႆႇ လႆႈပဵၼ်ပၢင်တိုၵ်းၵၼ် ႁၢဝ်ႈႁႅင်း။ ပဵၼ်ပၢင်တိုၵ်းၵၼ် တင်ႈတႄႇယၢမ်းၵၢင်ဝၼ်း 12:30 မူင်း တေႃႇပေႃးထိုင်ဝၢႆးဝၼ်းႁူဝ်ၶမ်ႈ မွၵ်ႈ 5 မူင်း- ၼႆယဝ်ႉ။

ဝၼ်းတီႈ 22/07/2015 ၶၢဝ်းယၢမ်း 6 မူင်းၵၢင်ၼႂ် ယွၼ်ႉသိုၵ်းမၢၼ်ႈၶိုၼ်ႈယိုဝ်း ၾၢႆႇသိုၵ်းတႆးလႄႈ လႆႈသိုပ်ႇပဵၼ်ပၢင်တိုၵ်းၵၼ်ထႅင်ႈ။ ပၢင်တိုၵ်းၵၼ်ပွၵ်ႈၼႆႉ သွင်ၾၢႆႇမီးၵၢၼ်ထႅမ်ႁႅင်းသိုၵ်းၼင်ႇၵၼ်လႄႈ လႅပ်ႈတေပဵၼ်ပၢင်တိုၵ်းၵၼ်ၶၢဝ်းယၢဝ်းၵေႃႈ ၸၢင်ႈပဵၼ်လႆႈ- ၼႆယူႇ။

ပၢင်တိုၵ်းပွၵ်ႈၼႆႉ လွင်ႈဝၢတ်ႇၸဵပ်းလူႉတၢႆၾၢႆႇသိုၵ်းမၢၼ်ႈၼၼ်ႉ ဢမ်ႇလႆႈႁူႉ ယွၼ်ႉယူႇတီႈၽႂ်တီႈမၼ်းၵူၺ်း။ ၾၢႆႇသိုၵ်းတႆးတႄႉ လွင်ႈဝၢတ်ႇၸဵပ်းလႄႈ လွင်ႈလူႉတၢႆဢမ်ႇမီး- ၽူႈမီးၸၼ်ႉၼႂ်း SSPP/SSA ၵေႃႉၼိုင်ႈလၢတ်ႈ။

ဝၼ်းတီႈ 22/07/2015 ၼင်ႇၵဝ်ႇ ယၢမ်း 17:30 မူင်း၊ တပ်ႉသိုၵ်းၸိုင်ႈတႆး SSPP/SSA တင်းသိုၵ်းမၢၼ်ႈ ပဵၼ်ပၢင်တိုၵ်းၵၼ် တီႈလွႆၶီႈဝူဝ်းႁႄႈ ၼႂ်းၵႄႈၵၢင်လွႆၼၢႆးလႄႈမိူင်းသူႈ၊ ရူတ်ႉၵႃးသိုၵ်းမၢၼ်ႈ ၺႃးမၢၵ်ႇ 2 လမ်း၊ တႃႇလမ်းၼိုင်ႈပိၼ်ႈၵွႆမူတ်း- လႆႈႁူႉၼင်ႇၼႆ။

ၽွင်းယၢမ်း ၽူႈတၢင်တူဝ်ၸုမ်းယိပ်းၵွင်ႈၵၢင်ႇ ၵူႈၸၢဝ်းၶိူဝ်း တိုၵ်ႉၶတ်းၸႂ် တႃႇလူင်းလၢႆးမိုဝ်းၵိုတ်းယိုဝ်း ပတ်းပိုၼ်ႉၸိုင်ႈမိူင်းၼႆႉ တၢင်းၾၢႆႇသိုၵ်းလူင်ပွင်ၸိုင်ႈ သမ်ႉပိုတ်ႇၼႃႈသိုၵ်းတေႃႇ ၸုမ်းၸၢဝ်းၶိူဝ်း တၢင်းၼိုင်ႈယဝ်ႉတၢင်းၼိုင်ႈ၊ လွင်ႈၼႆႉ ၸၢင်ႈတုမ်ႉတိူဝ်ႉပႃး လွင်ႈၶတ်းၸႂ်သၢင်ႈလွင်ႈငမ်းယဵၼ်။

ၽူႈလဵပ်ႈႁဵၼ်းၵၢၼ်မိူင်းၶဝ် ထတ်းသၢင်ႈဝႃႈ - ၵၢၼ်ငမ်းယဵၼ်ၼႆႉ လူင်ပွင်ၸိုင်ႈမၢၼ်ႈ တိုၼ်းဢမ်ႇၶႂ်ႈသၢင်ႈ ဢမ်ႇၶႂ်ႈပဵၼ်ၶႂ်ႈမီး၊ ပၢင်လိူၵ်ႈတင်ႈ ဢၼ်တေၸတ်းႁဵတ်း ၼႂ်းလိူၼ်ၼူဝ်ႊဝႅမ်ႊၿိူဝ်ႊၼၼ်ႉၵေႃႈ ယင်းဢမ်ႇၶႂ်ႈႁႂ်ႈမၼ်းပဵၼ်လူးၵွၼ်ႇ- ဝႃႈၼႆ။