RCSS/SSA လူင်းႁူပ်ႉထူပ်းၵူၼ်းမိူင်း တီႈဝတ်ႉရတ်ႉၸထၢၼ်လူင် ဝၢၼ်ႈလူင်(ဝၢၼ်ႈသိူဝ်ၶမ်း) ဢိူင်ႇႁွင်ႈလိုၵ်ႉ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ၊ သပ်းလႅင်းလၢတ်ႈၼႄၵူၼ်းမိူင်း လွင်ႈငမ်းယဵၼ်၊ လွင်ႈယႃႈမဝ်းၵမ်လႄႈ လွင်ႈၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး(CSSU) ၸဵမ်ၸိူဝ်းၼႆႉ ။

ဝၼ်းတီႈ 22/07/2015 ၶၢဝ်းယၢမ်း 9:00 ထိုင် 11:00 မူင်း RCSS/SSA လူင်းႁူပ်ႉထူပ်းၵူၼ်းမိူင်း တီႈဝတ်ႉရတ်ႉၸထၢၼ်လူင် ဝၢၼ်ႈလူင်(ဝၢၼ်ႈသိူဝ်ၶမ်း) ဢိူင်ႇႁွင်ႈလိုၵ်ႉ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ လႆႈပွင်ႇလႅင်းၸႅင်ႈၼႄ  လွင်ႈငမ်းယဵၼ် ဢၼ်လူင်ပွင်ၸိုင်ႈလႄႈ RCSS/SSA လႆႈလူင်းလၢႆးမိုဝ်းမႃးထိုင်ၶၵ်ႉတွၼ်ႈလႂ်ယဝ်ႉ၊ လိူဝ်ၼၼ်ႉ လွင်ႈယႃႈမဝ်းၵမ် တေႁဵတ်းႁိုဝ်သေ ႁွမ်းမိုဝ်းၵၼ်ႁႄႉႁၢမ်ႈၵႅတ်ႇၶႄ ၽဵဝ်ႈမူၺ်ႈၵႂႃႇၸိူင်ႉႁိုဝ်။ လွင်ႈၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး တႄႇတင်ႈမႃးမိူဝ်ႈပီလႂ် ၸဵမ်ၸိူဝ်းၼႆႉ။

ၽူႈပွင်ၵၢၼ်ၼႂ်း RCSS/SSA ၵေႃႉၼိုင်ႈလၢတ်ႈၼႄၸုမ်းၶၢဝ်ႇၽူႈတွႆႈႁွၵ်ႈဝႃႈ ၸုမ်းႁဝ်းၶႃႈ တေပွင်ႇလႅင်းၸီႉၸႅင်ႈၼႄ  1. ၵၢပ်းၵၢႆႇလူၺ်ႈ လွင်ႈငမ်းယဵၼ် RCSS/SSA လႄႈလူင်ပွင်ၸိုင်ႈ လႆႈဢုပ်ႇဢူဝ်းၵၼ်မႃးထိုင်ၶၵ်ႉတွၼ်ႈလႂ်ယဝ်ႉ ႁႂ်ႈၵူၼ်းမိူင်းပေႃးလႆႈႁူႉၸွမ်း၊ 2. လွင်ႈယႃႈမဝ်းၵမ် ႁဝ်းၶႃႈတေႁဵတ်းႁိုဝ်သေ ႁွမ်းမိုဝ်းၵၼ်ၵႅတ်ႇၶႄၵႂႃႇ။  ၶွင်ႇသီႇဢဝ်ၶိုၼ်းၸိုင်ႈတႆးၵေႃႈမီးၽႅၼ်ၵၢၼ် တႃႇၽဵဝ်ႈမူၺ်ႉယႃႈမဝ်းၵမ် ၶေႃႈတူၵ်းလူင်းတၢင်းလူင်ပွင်ၸိုင်ႈၵေႃႈ ပႃးဝႆႉၶေႃႈၼိုင်ႈယူႇ  ၵွပ်ႈၼႆ ၵူၼ်းမိူင်းလႄႈတၢင်းႁဝ်းၶႃႈတေႁဵတ်းႁိုဝ်ၵွင်ႉသၢၼ်ၵၼ်ၽဵဝ်ႈမူၺ်ႈၵႂႃႇ၊ 3. လွင်ႈၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး(cssu)  ၸိူဝ်းၼႆႉ။

ပၢင်ႁူပ်ႉထူပ်းၵူၼ်းမိူင်းတၢင်းပွတ်းဢွၵ်ႇၶူင်းၼႆႉ ဢၼ်ဢွၼ်ႁူဝ်ဢဝ်ပုၼ်ႈၽွၼ်း လူင်းႁူပ်ႉထူပ်းၵူၼ်းမိူင်း မီးၸၢႆးသႅင်ႁၢၼ်၊ ၸၢႆးၵျေႃႇလႄႈၸၢႆးၶမ်းၸၢမ်ႇ လႆႈၽႄၼႃႈတီႈၵၼ် ၼိုင်ႈၸုမ်းလႂ် 10 ၵေႃႉ လူင်းႁူပ်ႉထူပ်းၵူၼ်းမိူင်း ဝႃႈၼႆ။

ပူၼ်ႉမႃးမိူဝ်ႈဝၼ်းတီႈ 18/07/2015 လႆႈလူင်းႁူပ်ႉထူပ်းၵူၼ်းမိူင်းတီႈဝဵင်းၵဵင်းတုင် ႁူင်းႁေႃးတႆးလိုဝ်ႉ ပွၵ်ႉ 3 ဝၢၼ်ႈၼွင်ႉၶမ်း မီးၵူၼ်းၶဝ်ႈႁူမ်ႈမွၵ်ႈ 300 ၵေႃႉ။