ၵေႃၵပ်းသၢၼ်ၵူၼ်းၼုမ်ႇတႆး ဢွၼ်ႁူဝ်လုၵ်ႈႁဵၼ်း ပၢင်သွၼ်လၢတ်ႈၵႂၢမ်း ဢိင်းၵလဵတ်ႈ ၼပ်ႉႁူဝ်ပၢၵ်ႇ တီႇၽဵဝ်ႈ ႁဵတ်းလွင်ႈမူတ်းသႂ် တီႈလွႆမူပ်ႇ ပႃႈႁဵဝ်ႈၸဝ်ႈၾႃႉ မိူင်းဢုင်းပွင်ႇ သီႇပေႃႉ။

မိူဝ်ႈဝၼ်းၸၼ်တီႈ 20/07/2015 ၊ ယၢမ်းၵၢင်ၼႂ် 6 မူင်းတေႃႇထိုင် 11 မူင်း၊ ၵေႃၵပ်းသၢၼ်ၵူၼ်းၼုမ်ႇတႆး (SYN) ဢွၼ်ႁူဝ်လုၵ်ႈႁဵၼ်း ပၢင်သွၼ်လၢတ်ႈၵႂၢမ်းဢိင်းၵလဵတ်ႈ (English Speaking) ပွၵ်ႈၵမ်း 3 မွၵ်ႈ 300 ၵေႃႉ၊ ၶိုၼ်ႈႁဵတ်းလွင်ႈမူတ်းသႂ် တီႈၼိူဝ်လွႆမူပ်ႇ ဢၼ်ပဵၼ်ပႃႇႁဵဝ်ႈၶုမ်ၵုတ်း (သၢႆသိုပ်ႇၶိူဝ်းၸဝ်ႈၾႃႉ မိူင်းဢုင်းပွင်ႇသီႇပေႃႉ) ၵူႈပၢၼ်ပၢၼ် ။

ၵဵဝ်ႇၵပ်းလွင်ႈၼႆႉ ၵေႃႉဢၼ်ပဵၼ်သၢႆသိုပ်ႇ ၶိူဝ်းၸဝ်ႈၾႃႉသီႇပေႃႉ ၵမ်းလိုၼ်းသုတ်း ၸဝ်ႈမူၼ်းသႅင်ၸိုၼ်ႈ ဢွၼ်ႁူဝ်လုၵ်ႈႁဵၼ်း မွၵ်ႈ 300 ၵေႃႉသေ တီႇၽဵဝ်ႈႁဵတ်းလွင်ႈမူတ်းသႂ်ၵႂႃႇ။ တင်ႈတႄႇယၢမ်းၵၢင်ၼႂ်ၸဝ်ႉ 5 မူင်း ဢွၼ်ၵၼ်ပႆ လုၵ်ႉဢဝ်တီႈဝတ်ႉႁူမ်ႈယဵၼ်တူၼ်ႈတီး ထိုင်ၼိူဝ်လွႆမူပ်ႇ ႁဵတ်းလွင်ႈမူတ်းသႂ် ထိုင်ယၢမ်း 7 မူင်း။ သိုပ်ႇၼၼ်ႉ ဢွၼ်ၵၼ်ၵိၼ်ၶဝ်ႈၼႂ် တီႈၼိူဝ်လွႆယဝ်ႉ ၶိုၼ်းသိုပ်ႇႁဵတ်းလွင်ႈမူတ်းသႂ်ၵႂႃႇ တေႃႇထိုင် 11 မူင်း၊ ၸင်ႇဢွၼ်ၵၼ်ပွၵ်ႈဝၢႆႇၶိုၼ်းၸူး ဝတ်ႉႁူမ်ႈယဵၼ် တူၼ်ႈတီး ။

ယိူင်းဢၢၼ်း ဢၼ်လႆႈဢွၼ်ၵၼ်ႁဵတ်းသၢင်ႈ လွင်ႈမူတ်းသႂ်ၼႆႉ ယွၼ်ႉၶႂ်ႈႁႂ်ႈၵူၼ်းၼုမ်ႇတႆးႁဝ်း ႁူႉၸၵ်းမေႃဝႆႉၵႃႈၶၼ်ၶူဝ်းၵဝ်ႇၶွင်မွၼ် ပၢၼ်သိုပ်ႇပၢၼ် ဢၼ်ၵိုၵ်းၸိူဝ်ႉၶိူဝ်းတႆးႁဝ်း ။

ၵဵဝ်ႇၵပ်းလူၺ်ႈလွင်ႈၼႆႉ လုၵ်ႈႁဵၼ်းၵေႃႉၼိုင်ႈလၢတ်ႈဝႃႈ- “ႁဝ်းၶႃႈ သိူဝ်းၸႂ်တႄႉၶႃႈဢေႃႈ၊ ၵႃႈပူၼ်ႉမႃးပႃႇႁဵဝ်ႈၸဝ်ႈၾႃႉၼႆႉ ယင်းဢမ်ႇယၢမ်ႈႁၼ်ၵွၼ်ႇၶႃႈ။ ၵွပ်ႈၼႆ လႆႈပတ်းၽဵဝ်ႈၸိူင်ႉၼႆ ႁိူဝ်ႉမွႆႈသေတႃႉၵေႃႈ မီးတၢင်းသိူဝ်းယူႇၶႃႈ”- ဝႃႈၼႆ။


မေႃသွၼ်လူင် ပႃႈယိင်းသီႇတႃႇ လၢတ်ႈ- “ၼႆႉတႄႉ ၵွပ်ႈၶႂ်ႈႁႂ်ႈၶဝ်ပွင်ႇၸႂ်ၼိူဝ်ပိုၼ်းလႄႈ ၵႃႈၶၼ်ၶူဝ်းၵဝ်ႇၶူဝ်းမွၼ် ဢၼ်ၵိုၵ်းၸိူဝ်ႉၶိူဝ်းႁဝ်းၼၼ်ႉၶႃႈယဝ်ႉ၊ မိူဝ်းၼႃႈမႃးၵေႃႈ တေသိုပ်ႇပတ်းၽဵဝ်ႈ ၵႂႃႇယူႇၶႃႈ၊ သင်ဝႃႈၽႅဝ်ထိုင်ၼႂ်းလိူၼ်ႁႃႈမႃးၵေႃႈ တေဢွၼ်ႁူဝ်ၸုမ်းလုၵ်ႈႁဵၼ်း ႁဝ်းၶဝ်သေ ႁဵတ်းသၢင်ႈၵႂႃႇထႅင်ႈယူႇ”- ဝႃႈၼင်ႇၼႆ။


ၵေႃၵပ်းသၢၼ်ၵူၼ်းၼုမ်ႇတႆး (SYN) ၼႆႉ တႄႇၶွတ်ႇၽွတ်ႈမႃးၼႂ်းႁၢင်ႈပီ 2014 သေ တူင်ႉၼိုင်ပိုတ်ႇပၢင်သွၼ် လၢတ်ႈၵႂၢမ်းဢိင်းၵလဵတ်ႈ (English Speaking) ထူၼ်ႈထိုင်မႃး ပွၵ်ႈၵမ်း 3 ပွၵ်ႈၼႆႉ။ ယိူင်းဢၢၼ်းမီး 5 ၶေႃႈ၊ တႃမုင်ႈႁၼ် (Vision) မီးဝႆႉဝႃႈ- “တႃႇဢဝ်လိၵ်ႈႁဝ်းတၢင်ႇႁူဝ်-ဢဝ်လိၵ်ႈပိူၼ်ႈၵၢႆႇၶူဝ် ၸူးလူၵ်ႈလုမ်ႈၾႃႉ” ။