ထႆး - မၢၼ်ႈ တူၵ်းလူင်းလႆႈၸႂ်ၵၼ် ဢမ်ႇတၢပ်ႈယွၼ်း ဝီႊသႃႊ (ဝႂ်ၶဝ်ႈမိူင်း) သေၶဝ်ႈဢွၵ်ႇၵႂႃႇမႃး လႆႈတၢင်းႁိူဝ်းမိၼ် ပဵၼ်တၢင်းၵၢၼ်။ လႆႈဢၼုယၢတ်ႈ ဢႅဝ်ႇယဵမ်ႈယူႇသဝ်း ႁိုင် 2 ဝူင်ႈ( 14) ဝၼ်း။

ဝၼ်းတီႈ 27 – 28 လိူၼ်ၵျူႊလၢႆႊ 2015 ၵေႃၵမ်ၵၢၼ်ၵပ်းသၢၼ်ႁူမ်ႈမိုဝ်း ထႆး - မၢၼ်ႈ (JC)  ၸတ်းႁဵတ်းပၢင်ၵုမ် ပွၵ်ႈၵမ်း8 တီႈဝဵင်းၵဵင်းမႂ်ႇ ၸိုင်ႈထႆး။

ၼႂ်းပၢင်ၵုမ်ၼႆႉ မီးၸွမ်သိုၵ်းလူင် ထၼသၵ်ႊ ပၻီႊမပရႃႊၵွၼ်ႊ ၵႅမ်ၽွင်းလူင်ၾၢႆႇၼွၵ်ႈ မိူင်းဢွၼ်ႁူဝ်ၸုမ်းၽူႈတႅၼ်းထႆး လႄႈ ဢူးဝၼ်ႊၼမွင်ႇလုၼ်ႇ ၽွင်းလူင်ၽွင်းတၢင်မိူင်း မၢၼ်ႈ ဢွၼ်ႁူဝ်ၸုမ်းၽူႈတႅၼ်းမၢၼ်ႈ ဢိၵ်ႇၸဝ်ႈၼႃႈတီႈ လၢႆႁွင်ႈၵၢၼ် တင်းသွင်ၾၢႆႇ ၶဝ်ႈႁူမ်ႈပၢင်ၵုမ်သေ တူၵ်းလူင်းလႆႈၸႂ်ၵၼ်ဝႃႈ ၵူၼ်း 2 မိူင်းၵႂႃႇမႃးသူႇၸႂ်ႈၵၼ် ဢမ်ႇပဵၼ်ၵၢၼ်သဵင်ႈငိုၼ်း ယွၼ်းဝီႊသႃႊ (ဝႂ်ၶဝ်ႈမိူင်း) ၊ တႄႇၶဝ်ႈဢွၵ်ႇဢႅဝ်ႇယဵမ်ႈ ၵႂႃႇမႃးႁႃၵၼ်လႆႈ တင်ႈတႄႇ ဝၼ်းတီႈ 11 လိူၼ်ဢေႃႊၵတ်ႉသ် 2015 ၼႆႉၵႂႃႇ ဝႃႈၼႆ။

ၶေႃႈမုလ်းတီႈ Nation News