ၶဝ်ႈဝႃႇသႃ ပီ 2558 ဝၼ်းတီႈ 30 ၼႆႉ ၵေႃလိၵ်ႈလၢႆး ၾိင်ႈငႄႈတႆး ၵဵင်းမႆႇ တေလူင်းၾွၼ်ႉလိၵ်ႈတႆး သႂ်ႇပၼ်ၶိူင်ႈၾူၼ်ႊ မိုဝ်းထိုဝ်လႄႈ ၶွမ်ႊ Notebook  ပီႈၼွင်ႉၸိူဝ်းမႃးၶဝ်ႈႁူမ်ႈ လူႇတၢၼ်း ၼႂ်းဝၼ်းၶဝ်ႈဝႃႇသႃ တီႈဝတ်ႉၵူႇတဝ်ႈ။

ပိူဝ်ႈတႃႇၵၢၼ်လိၵ်ႈလၢႆးတႆးႁဝ်း တေၽႄႈမၢၵ်ႈလၢႆလႄႈ ပဵၼ်ၵၢၼ်ယုၵ်ႉယွင်ႈလိၵ်ႈလၢႆး ဢၼ်ပဵၼ်သၢႆၸႂ်ၸိူဝ်ႉၸၢတ်ႈ ၵူၼ်းၶိူဝ်းတႆးႁဝ်းၵႂႃႇမိူဝ်းၼႃႈၼၼ်ႉ ဢိင်လူၺ်ႈတိုဝ်ႉတၢင်းဝၼ်း တူဝ်ႈတၼ်းလိုဝ်ႈၵၢၼ် ပီႈၼွင်ႉတႆးႁဝ်း တေၶဝ်ႈဝတ်ႉ ၶဝ်ႈဝႃး မႃးလူႇမႃးတၢၼ်း ၸွမ်းၼင်ႇ ၾိင်ႈႁိတ်ႈႁွႆးၵၢၼ်ၼပ်ႉထိုဝ်ၵိူဝ်းယမ်သႃသၼႃ ဢၼ်ပူႇဢွၼ်ႁဵတ်းမႃး ယႃႈႁဵတ်းဝႆႉၼၼ်ႉသေ တၢင်းၾၢႆႇဢၢႆႊထီႊ (IT) ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ တေမႃးလူင်းပၼ် ၾွၼ်ႉ လိၵ်ႈတႆးၼႂ်းမိုဝ်းထိုဝ်ပၼ် တီႈၼႃႈႁွင်ႈၵၢၼ် (လုမ်း) ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၼႂ်းဝတ်ႉၵူႇတဝ်ႈ ၼႆယဝ်ႉ။

ဢဵၼ်းဢၢၼ်းပိူင်လူင် ပိူဝ်ႈတႃႇႁႂ်ႈပီႈၼွင်ႉတႆးႁဝ်းတေၸၢင်ႈတႅမ်ႈ/ဢၢၼ်ႇ လိၵ်ႈတႆးလႆႈၼႂ်းမိုဝ်းထိုဝ် ႁႂ်ႈၽႄႈတိုၼ်း ဢိၵ်ႇတင်း ပဵၼ်ၵၢၼ်ယုၵ်ႉယွင်ႈမႅတ်ႇပႅင်းပႂ်ႉႁၵ်ႉသႃယုၵ်ႉယွင်ႈ သၢႆၸႂ်ၸိူဝ်ႉၸၢတ်ႈၵူၼ်းၶိူဝ်းတႆး ႁႂ်ႈၸၵ်းမၼ်ႈ ယူႇယိုၼ်းၵိုၵ်းလူၵ်ႈလူင်ၼႆႉၵႂႃႇ - ၼႆယဝ်ႉ။

ယွၼ်ႉၼၼ်လႄႈဝၼ်းတီႈ 30/07/2015 ဝၼ်းၶဝ်ႈဝႃႇသႃ 2558 ပီသႃသၼႃၼႆႉ တင်ႈတႄႇ 09.00 မူင်း ၵၢင်ၼႂ် တေတႄႇလူင်းၾွၼ်ႉတႆးပၼ်ၵႂႃႇတေႃႇဝၢႆးဝၼ်း 16.00 မူင်း။ လိူဝ်ၼၼ်ႉ ၵုမ်ႇသၢဝ်သၢဝ်ၼၢင်းယိင်းတႆးႁဝ်းလႄႈ ၵေႃလိၵ်ႈလၢႆးၾိင်ႈငႄႈတႆးၵဵင်းမႆႇ ယင်းတေမီးတၢင်းလီတႃႇၼ ၼႃးမုၼ်ၸႃႇၵ ၶဝ်ႈသဵၼ်ႈၶဝ်ႈသွႆးတႆး ပီႈၼွင်ႉ ၸိူဝ်းမႃးၶဝ်ႈႁူမ်ႈလူႇတၢၼ်းလႄႈ ဢဝ်ၶိူင်ႈၾူၼ်ႊ မိုဝ်းထိုဝ် ၊ ၶွမ်ႊ Notebook မႃးလူင်းၾွၼ်ႉလိၵ်ႈတႆး - ၼႆယဝ်ႉ။