ၶွမ်ႊမသျိၼ်ႊၵၢၼ်လိူၵ်ႈတင်ႈ ပိုၼ်ၽၢဝ်ႇဝႃႈ ၼႂ်းလိူၼ်ၼူဝ်ႊဝႅမ်ႊၿိူဝ်ႊၼႆႉ တေမီးပၢင်လိူၵ်ႈတင်ႈ ပတ်းပိုၼ်ႉၸိုင်ႈမိူင်းၼႆလႄႈ ပႃႊတီႊတႆး ဢၼ်တေတၢင်တူဝ်ပီႈၼွင်ႉတႆးၵေႃႈ ဢွၼ်ၵၼ်ႁၢင်ႈႁႅၼ်း တႃႇၶဝ်ႈလိူၵ်ႈတင်ႈ၊ လွၵ်းၸုၵ်းပႃႊတီႊတႆး မီးၸိူင်ႉႁိုဝ်ၽွင်ႈၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ် ၽူႈၼမ်းၼႂ်းၵူႈလွင်ႈလွင်ႈ ပႃႊတီႊႁူဝ်သိူဝ် (SNLD) ၸၢႆးၼုတ်း ဝႆႉၼင်ႇၼႆ။

ၽူႈၼမ်းၼႂ်းလူင် ပႃႊတီႊႁူဝ်သိူဝ် ၸၢႆးၼုတ်း

ထၢမ်-လႆႈငိၼ်းဝႃႈ ပႃႊတီႊႁူဝ်သိူဝ် (SNLD) တႅပ်းတတ်းဝႃႈ တေၶဝ်ႈလိူၵ်ႈတင်ႈ၊ လွင်ႈၼႆႉ တႅပ်းတတ်းၸိူင်ႉႁိုဝ်ၶႃႈ ? ။

တွပ်ႇ-ဝၼ်းတီႈ 14/07/2015 ၼႆႉ ႁဝ်းၶႃႈၸတ်းပၢင်ၵုမ်လူင်ငဝ်ႈငုၼ်း CEC ၊ CEC တႅပ်းတတ်း တႃႇၶဝ်ႈၵၢၼ်လိူၵ်ႈတင်ႈ။ CEC မီး 17 ၵေႃႉၼႆႉ မႃးၶိုၼ်ႈ 10 ၵေႃႉ၊ တင်း 10 ၵေႃႉၵမ်ႉထႅမ်သေ လႆႈၶေႃႈတႅပ်းတတ်း တေၶဝ်ႈပၢင်လိူၵ်ႈတင်ႈ။ ယဝ်ႉသေ ဝၼ်းတီႈ 16 မႃးတၢင်ႇတီႈၼႂ်း ၶွမ်ႊမတီႊငဝ်ႈငုၼ်းဝႃႈ- မီးၵူၼ်း 50 ၊ လိူဝ်သေၼၼ်ႉၵေႃႈ ၶိုၼ်းဢုပ်ႇၵၼ်သေ လႆႈတႅပ်းတတ်း တေၶဝ်ႈပၢင်လိူၵ်ႈတင်ႈ ဢၼ်ဝႃႈၼၼ်ႉ လႆႈမၵ်းမၼ်ႈႁပ်ႉႁွင်းၵႂႃႇယဝ်ႉ။

ထၢမ်-မိူဝ်ႈၵွၼ်ႇၼႆႉ ယၢမ်ႈငိၼ်းဝႃႈ ႁူဝ်သိူဝ်တေဢမ်ႇၶဝ်ႈလိူၵ်ႈတင်ႈ၊ ပေႃးဢမ်ႇမူၼ်ႉမႄး ပိူင်ငဝ်ႈပိုင်းမိူင်း 2008 ၊ ယၢမ်းၼႆႉ သမ်ႉတေဝႃႈမႄးယဝ်ႉၶႃႈႁႃႉ၊ ၵွပ်ႈၼၼ်လႄႈ ႁူဝ်သိူဝ်ၸင်ႇတႅပ်းတတ်း ၶဝ်ႈလိူၵ်ႈတင်ႈ ? ။

တွပ်ႇ-မၼ်းမီးသၢႆငၢႆႈၵူႈလွင်ႈလွင်ႈၶႃႈဢေႃႈ၊ တႃႇတေမူၼ်ႉမႄး တႅမ်ႈမႂ်ႇ ပိူင်ငဝ်ႈပိုင်းမိူင်း (လၵ်းမိူင်း)ၼႆႉတႄႉ ႁဝ်းႁဵတ်း (လုတ်ႉတေႃႇပျိၼ်ႇပ) ၾၢႆႇၼွၵ်ႈသၽႃး၊ ႁဝ်းမီးဝႆႉယဝ်ႉ၊ သိုပ်ႇၵေႃႈသိုပ်ႇၵႂႃႇယူႇယဝ်ႉ။ ၼႂ်းသၽႃးၼႆႉတႄႉ တႃႇတေႁဵတ်း (တၢင်း)ၵူၼ်းမိူင်းတႆးသေ မၢႆမီႈပႃႈတႂ်ႈပိူင်ငဝ်ႈပိုင်းမိူင်း 2008 ဢၼ်မႃးတဵၵ်းတဵင်ၼိူဝ်ၵူၼ်းမိူင်း၊ မႃးၵဝ်းတီႈၵူၼ်းမိူင်း မၢႆမီႈၸိူဝ်းၼႆႉၵေႃႈ ႁဝ်းၶႃႈ သင်ဝႃႈႁဝ်းမီးၼႂ်းသၽႃးၼႆ ႁဝ်းႁႄႉၵင်ႈလႆႈ၊ ႁဝ်းၶႃႈမုင်ႈမွင်းၸိူင်ႉၼၼ်သေ လႆႈတႅပ်းတတ်းၵႂႃႇၸိူင်ႉၼၼ်ၶႃႈ။

ထၢမ်- ယၢမ်းလဵဝ် မီးၶၢဝ်ႇဢွၵ်ႇမႃးဝႃႈ ပႃႊတီႊႁူဝ်သိူဝ်လႄႈ ပႃႊတီႊၼူၵ်ႉယုင်း ဢၼ်ၼၢင်းဢွင်ႇသၢၼ်းၸုၵျီႇဢွၼ်ႁူဝ်ၼၼ်ႉ တူၵ်းလူင်းၵၼ်ဝႆႉၽွင်ႈ ဝႃႈၼႆဢေႃႈ၊ တူၵ်းလူင်းဢီႈသင်ၵၼ်ၶႃႈ ? ။

တွပ်ႇ-လႆႈၸႂ်ၵၼ်ဝႆႉ ႁူဝ်ပဝ်ႈလူင်ၶုၼ်ထုၼ်းဢူး တေၶဝ်ႈတီႈလႂ်၊ ၶဝ်တေဢမ်ႇၶဝ်ႈၶႄႉၶႅင်ႇၵၼ်တင်းႁဝ်းၼႆလႄႈ ၶဝ်မႃးလၢတ်ႈႁဝ်း။ မိူဝ်းၼႃႈၵေႃႈ ပေႃးလူဝ်ႇသင်ၸိူဝ်းၼႆႉ တင်းၶဝ်တင်းႁဝ်း တေဢုပ်ႇဢူဝ်းငူပ်ႉငီႉၵၼ်သေ သိုပ်ႇႁဵတ်းၵႂႃႇ၊ ႁဝ်းၶႃႈလႆႈၸႂ်ၵၼ်ဝႆႉ မွၵ်ႈၼၼ်ႉၶႃႈ။

ထၢမ်-တီႈၼႂ်းၶၢဝ်ႇႁၼ်ဝႃႈ ႁူဝ်ပဝ်ႈလူင် ၸဝ်ႈၶုၼ်ထုၼ်းဢူး လၢတ်ႈဝႃႈ- လွင်ႈတၢင်းပႃႊတီႊ ဢွင်ႇသၢၼ်းၸုၵျီႇတႄႉ မီးလွင်ႈႁူပ်ႉထူပ်းဢုပ်ႇဢူဝ်းၵၼ်ၽွင်ႈ၊ ၵူၺ်းၵႃႈ တႃႇတေဢုပ်ႇဢူဝ်းတင်း ပႃႊတီႊတႆးတႄႉဢမ်ႇမီး ဝႃႈၼႆၶႃႈဢေႃႈ။ ၵွပ်ႈၼႆ လွင်ႈၼႆႉ ၼင်ႇႁိုဝ်ၵူၼ်းမိူင်းပေႃးတေလႆႈႁူႉတႅၵ်ႇလႅင်းထႅင်ႈဢိတ်းၼိုင်ႈ လၢတ်ႈၼႄပၼ်ၽွင်ႈၶႃႈ ? ။

တွပ်ႇ-ၼႆႉၵေႃႈမႅၼ်ႈဢေႃႈ၊ မိူဝ်ႈလဵဝ်ၼႆႉ ႁဝ်းၶႃႈၵေႃႈ တႃႇတေဢုပ်ႇၵၼ်ၼႆႉ မီးတၢင်းယၢပ်ႇၽိုတ်ႇၶႃႈ။ မိူဝ်ႈလဵဝ်ၼႆႉ ၾၢႆႇပုၼ်ႉၼႆႉ ဢၼ်ႁဝ်းၶႃႈဢုပ်ႇၵၼ် တႃႇလွင်ႈၽွမ်ႉႁူမ်ႈတီႈမိူင်းၵွၵ်ႇ ပဵၼ်ပၢင်ၵုမ်လပ်ႉလပ်ႉ။ ဢၼ်ၼၼ်ႉ ၶဝ်ၶိုၼ်းထတ်းၶိုၼ်း ၶေႃႈၵႂၢမ်းဢၼ်ႁဝ်းၶႃႈဢုပ်ႇၵၼ် တတ်းဢဝ်ဢၼ်ၶဝ်လၢတ်ႈလီ၊ သမ်ႉလိူၵ်ႈဢဝ်သဵင် ဢၼ်ၾၢႆႇႁဝ်းၶႃႈလၢတ်ႈၶႅင်လၢတ်ႈႁၢႆႉ၊ ဢၼ်ၶဝ်ဝႃႈလီၸိူဝ်းၼၼ်ႉသေ ဢၼ်ႁဝ်းဝႃႈႁၢႆႉၸိူဝ်းၼၼ်ႉ ၶဝ်ၶိုၼ်းႁဵတ်းၶႅပ်း CD မွၵ်ႈႁဵင်သေ ပိုၼ်ၼႂ်းမိူင်းတႆး၊ ၼႆႉယႃႉၸိုဝ်ႈယႃႉသဵင်ၵၼ် တႃႇၵၢၼ်ၽွမ်ႉႁူမ်ႈလူး။ လွင်ႈၼႆႉ ၼႂ်းၵႄႈမၼ်း မီးတၢင်းယၢပ်ႇၽိုတ်ႇၵႂႃႇတႄႉတႄႉဝႃႈဝႃႈ။ မႃးႁဵတ်းၸိူင်ႉၼၼ်ၼႆႉ တႃႇတေငူပ်ႉငီႉၵၼ် တႃႇတေဢုပ်ႇဢူဝ်းၵၼ်ၵႂႃႇၼႆႉ မၼ်းမီးတၢင်းယၢပ်ႇၽိုတ်ႇ။

ထၢမ်-ဢေႃႈၶႃႈ၊ ၵမ်းလိုၼ်း သမ်ႉၶႂ်ႈလၢတ်ႈထႅင်ႈ ၸိူင်ႉႁိုဝ်ၶႃႈ ? ။

တွပ်ႇ-ဢေႃႈၶႃႈ ပီႈၼွင်ႉမိူင်းတႆးႁဝ်း လူဝ်ႇၵႅတ်ႇၶႄ ႁူႉၶၼ်ပႃႊတီႊၼႆ တေပဵၼ်ၽွၼ်းလီ တႃႇမိူင်းတႆး တႃႇၸိူဝ်ႉၸၢတ်ႈတႆးၼႆ လူဝ်ႇမေႃလိူၵ်ႈၼႆ ၶႂ်ႈလၢတ်ႈၸိူင်ႉၼႆၶႃႈ။