ပႃႊတီႊသိူဝ်ၽိူၵ်ႇ (SNDP) ႁၢင်ႈႁႅၼ်းပၢင်လိူၵ်ႈတင်ႈ ဝႆႉယဝ်ႉၸိူင်ႉႁိုဝ်၊ လွင်ႈႁပ်ႉႁွင်းၼိူဝ်ၵၢၼ်မိူင်း ၵၢၼ်ၽွမ်ႉႁူမ်ႈမီးၸိူင်ႉႁိုဝ်၊ ၼႆႉၵေႃႈ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ႁူဝ်ပဝ်ႈ ပႃႊတီႊသိူဝ်ၽိူၵ်ႇ လုင်းၸၢႆးဢၢႆႈပဝ်း ဝႆႉၼင်ႇၼႆ။

ႁူဝ်ပဝ်ႈလူင် ပႃႊတီႊသိူဝ်ၽိူၵ်ႇ လုင်းၸၢႆးဢၢႆႈပဝ်း

ထၢမ်-ဢေႃႈၶႃႈ၊ ပိူဝ်ႈတႃႇတေၶဝ်ႈလိူၵ်ႈတင်ႈၼႆႉ ယူႇတီႈပႃႊတီႊသိူဝ်ၽိူၵ်ႇသေ ႁၢင်ႈႁႅၼ်းဝႆႉၸိူင်ႉႁိုဝ်ၶႃႈ ? ။

တွပ်ႇ-မိူင်းၶၢင် ႁဝ်းတေၶဝ်ႈ 9 ဝဵင်း၊ တိူင်းၸၵၢႆး (ၸႄႈၵႅင်ႇ) 5 ဝဵင်း၊ တိူင်းမၼ်းတလေး (ဝဵင်းတႃႈလိူဝ်ႇ) 3 ဝဵင်း၊ မိူင်းတႆး 43 ဝဵင်း၊ မိူင်းယၢင်းလႅင် 5 ဝဵင်း။

ထၢမ်-ပေႃးၼႆ ၼေႃႇတႅၼ်းၽွင်းၵေႃႈ တူဝ်ႈတၼ်းဝႆႉယဝ်ႉၶႃႈႁႃႉ ? ။

တွပ်ႇ-တူဝ်ႈတၼ်းမူတ်းယဝ်ႉ၊ တႅၼ်းၽွင်းတင်းသဵင်ႈမီး 200 ပၢႆ။

ထၢမ်-ၶွမ်ႊမသျိၼ်ႊၵၢၼ်လိူၵ်ႈတင်ႈၸႄႈဝဵင်း ဢၼ်ပိုၼ်ၽၢဝ်ႇဝႆႉသဵၼ်ႈမၢႆ ၽူႈမီးသုၼ်ႇလႆႈ ပိူဝ်ႈတႃႇတွတ်ႈၶႅပ်းၵၢင်ၸႂ်ၼၼ်ႉ လႆႈႁၼ်ဝႃႈၽိတ်းပိူင်ႈဝႆႉၼမ်၊ လွင်ႈဝၼ်းၵိူတ်ႇ ၸိုဝ်ႈသဵင်ၸိူဝ်းၼႆႉ ၶႃႈဢေႃႈ။ လွင်ႈၸိူဝ်းၼႆႉၶႃႈလူး ယူႇတီႈပႃႊတီႊသိူဝ်ၽိူၵ်ႇသေ တေၵႄႈလိတ်ႈပၼ်သင်ၶႃႈ? ။

တွပ်ႇ-မၢင်ၸိူဝ်းၵေႃႈဢမ်ႇပႃး၊ သၢႆမၢႆၽိတ်းၸိူဝ်းၼႆႉၵေႃႈမီး။ ၵူႈဝၢၼ်ႈၵူႈသူၼ်ယဝ်ႉ 24-25 ဝၼ်းၼႆႉ ႁဝ်းႁွင်ႉၼေႃႇတႅၼ်းၽွင်းႁဝ်း မႃးတီႈတူၼ်ႈတီး၊ ပေႃးယဝ်ႉႁဝ်းတေသပ်းလႅင်းၼႄၶဝ်၊ ၶဝ်ၵေႃႈတေလူင်းၵႂႃႇတိၵ်းတိၵ်း၊ ၶဝ်တေလူင်းၵႂႃႇမႄးၵႄႈလိတ်ႈ။ ၵမ်းၼႆႉတႄႉ ဢမ်ႇမိူၼ်မိူဝ်ႈဢွၼ်တၢင်းယဝ်ႉ၊ မႄးလႆႈတေႃႇထိုင်ပိူၼ်ႈပေႃးတွတ်ႈၶႅပ်းၵၢင်ၸႂ်ပၢတ်ႈၼိုင်ႈ။

ဢၼ်ၸိူဝ်းတႃႇတေတွတ်ႈၶႅပ်းၵၢင်ၸႂ် (တွတ်ႈမႄး)ၼႆႉ ဢမ်ႇမီးဝႂ်ၵပ်းတူဝ် (မၢတ်ႈပူင်ႇတိၼ်ႇ)ၵေႃႈလႆႈ၊ လႆႈၸိူင်ႉႁိုဝ်ၼႆ ပိူင်တႅၵ်ႈမၼ်း ၸၢႆး………….. ၵိူတ်ႇဝၢၼ်ႈၼႆႉဝၢၼ်ႈၼၼ်ႉ ၵိူတ်ႇဝၢၼ်ႈၸၢမ်လဝ်းၼႆ (ဢူၵ်ႉၶျူၵ်ႉယႄးမူးႁေ)၊ ၽူႈၵွၼ်းသိပ်းႁိူၼ်း၊ ပူႇၵႄႇပူႇၵၢင်ႉၶဝ်ႁပ်ႉႁွင်းဝႃႈ မၼ်းၵိူတ်ႇဝၢၼ်ႈၼၼ်ႉဝၢၼ်ႈၼႆႉ မၼ်းဢမ်ႇမီးဝႂ်ၵပ်းတူဝ်ၵေႃႈ ပေႃးဢႃယု 18 ၶိုၼ်ႈၼိူဝ် တေလႆႈပႃးၼႂ်းသၢႆမၢႆတွတ်ႈၶႅပ်းၵၢင်ၸႂ်။ ၶႅပ်းၵၢင်ၸႂ်လူင်ႈၼႃႈ (ၵျူဝ်ႇတိၼ်ႇမႄး)ၵေႃႈ သၢႆမၢႆမၼ်း တေလႆႈႁူႉတႅတ်ႈၼႅတ်ႈ၊ ၶႅပ်းၵၢင်ၸႂ်လူင်ႈၼႃႈၼႆႉ မီး 50 ၵေႃႉၵေႃႈ လႆႈ 50 ၵေႃႉၵူၺ်း။

ထၢမ်- ပေႃးၼႆ ဢၼ်တေႁူပ်ႉၵၼ်တီႈ ဝဵင်းတူၼ်ႈတီး ဝၼ်းတီႈ 24-25 ၼႆႉ သမ်ႉတေပဵၼ်လွင်ႈသင်ၶႃႈ ? ။

တွပ်ႇ-ၼေႃႇတႅၼ်းၽွင်းႁဝ်း ႁူပ်ႉၵၼ်ယဝ်ႉသေ ႁဝ်းတေပၼ်ၾွမ်ႊၶဝ် မိူဝ်းၵႂႃႇဝဵင်းၽႂ်ဝဵင်းမၼ်း၊ သေ သမ်ႉလူဝ်ႇလႆႈၵႂႃႇတၢင်းတီႈၸႄႈတွၼ်ႈ။

ထၢမ်-ၶဵတ်ႇလိူၵ်ႈတင်ႈ ပႃႊတီႊသိူဝ်ၽိူၵ်ႇ ဢၼ်လိူဝ်မႃးထႅင်ႈၼၼ်ႉ သမ်ႉပဵၼ်တီႈလႂ်လၢႆလၢႆၶႃႈ? ။

တွပ်ႇ-လွၵ်ႈၸွၵ်ႇ၊ ၾၢႆၶုၼ်ႇ၊ တီႈမိူင်းဝႃႉ ႁူဝ်ပၢင်ႇ။ မိူင်းယၢင်းလႅင်ၵေႃႈ ႁဝ်းတေၶဝ်ႈၶေႉၶဵင်ႇ၊ ပေႃးႁဝ်းၼမ်မီး 5 ဝဵင်းယဝ်ႉ မိူင်းယၢင်းလႅင်ၼႆႉ။

ထၢမ်-ပေႃးၼၼ် တႃႇၵၢၼ်ၽွမ်ႉႁူမ်ႈ တင်းပႃႊတီႊတႆးၶႃႈလူး မီးၸိူင်ႉႁိုဝ်ၶႃႈ? ။

တွပ်ႇ-ၶၢဝ်းယၢမ်းမၼ်းဢမ်ႇမီးယဝ်ႉ ၸၢႆး……….၊ ၵိုတ်းထႅင်ႈ 3 လိူၼ်ၵူၺ်းယဝ်ႉ၊ ပေႃးထႅင်ႈ 4-5 ဝၼ်းမႃးၼႆႉ လႆႈတၢင်ႇသၢႆမၢႆၼေႃႇတႅၼ်းၽွင်းယဝ်ႉ။ လွင်ႈငူပ်ႉငီႉၼႆႉ ပိူဝ်ႈတႃႇငူပ်ႉငီႉပႃႊတီႊတႆး ဢမ်ႇငူပ်ႉငီႉၼႆၼႃႇ။ တေတင်း ၼူၵ်ႉယုင်းၵူၺ်း တေငူပ်ႉငီႉၵၼ်၊ ဢိူဝ်ႈ ႁဝ်းသမ်ႉတေႁဵတ်းႁိုဝ် ၸွႆႈဢွၵ်ႇပၼ်သဵင်မၼ်းႁႅင်းႁႅင်းဢိတ်းၼိုင်ႈ ႁႂ်ႈပီႈၼွင်ႉတႆး တင်းၵမ်ႇၽႃႇ ပေႃးလႆႈႁူႉလွင်ႈၼႆႉ။
ထၢမ်-ဢေႃႈၶႃႈ၊ ပေႃးၼႆ လွင်ႈၽွမ်ႉႁူမ်ႈ 2 ပႃႊတီႊတႆး ပႆႇၸၢင်ႈမုင်ႈမွင်းၼႆတႄႉ ပႃႊတီႊသိူဝ်ၽိူၵ်ႇသမ်ႉ မီးဢီႈသင်တွၼ်းလိူဝ် ပႃႊတီႊႁူဝ်သိူဝ်ၶႃႈ? ။

တွပ်ႇ-ႁဝ်းၶႂ်ႈႁဵတ်းၽွၼ်းလီပၼ်ၵူၼ်းမိူင်း၊ ႁဝ်းၶႂ်ႈၶတ်းၸႂ်ႁႂ်ႈပဵၼ် လူင်ပွင်ၸိုင်ႈမိူင်းတႆး၊ လူင်ပွင်ၸိုင်ႈမိူင်းတႆး ၵူၺ်းဢမ်ႇၵႃး ဢၢၼ်းပဵၼ်ပႃးလူင်ပွင်ၸိုင်ႈမိူင်းၶၢင် မိူင်းယၢင်းလႅင် (ၵယႃး)ၵွၼ်ႇ။

ထၢမ်-ဢေႃႈၶႃႈ ၵမ်းလိုၼ်းၶႂ်ႈမွၵ်ႇလၢတ်ႈသင်ထႅင်ႈၶႃႈ? ။

တွပ်ႇ-ႁဝ်းၶႂ်ႈမွၵ်ႇပၼ် ပေႃႈမႄႈပီႈၼွင်ႉၵူၼ်းမိူင်း၊ ၸၢဝ်းၶိူဝ်းတႆးႁဝ်း ယူႇတီႈၼႂ်းသိုင်ႇတိူင်းမိူင်းႁူမ်ႈတုမ်တင်းသဵင်ႈ ယႃႇပေၵႂင်ပေၵႃး၊ ပေႃးဝႃႈပၢင်ပွႆးလိူၵ်ႈတင်ႈမႃးၼႆ ၶႅၼ်းတေႃႈတွတ်ႈၶႅပ်းၵၢင်ၸႂ်ပၼ် ပႃႊတီႊသိူဝ်ၽိူၵ်ႇႁဝ်းၶႃႈသေၵမ်းၶႃႈ၊ ႁဝ်းၶႃႈဢမ်ႇၸႂ်ႈလုၵ်ႈၼွင်ႉၽႂ်၊ ႁဝ်းၶႃႈပဵၼ်လုၵ်ႈၼွင်ႉတႆးၵူၺ်း၊ လုၵ်ႈၼွင်ႉၸၢဝ်းၶိူဝ်းတႆးၵူၺ်းၼႃ။