ဝၢႆႇၽိုၼ်ႉသၢၼ်ၶတ်း လွင်ႈဢမ်ႇတြႃး ၼိူဝ်ႁႅင်းၵၢၼ် လူလွမ်ပႂ်ႉပႃး သုၼ်ႇလႆႈသုၼ်ႇပဵၼ်ႁႅင်း ၵၢၼ်ၽဵင်ႇပဵင်း သေႁႅင်းၵၢၼ်ၽွမ်ႉႁူမ်ႈ ၸတ်းႁဵတ်းပၢင်ၶွပ်ႈၶူပ်ႇ 8 ပီ မီးၽူႈယႂ်ႇၵူၼ်းလူင်၊ မုၵ်ႉၸုမ်းတႆး ၶဝ်ႈႁူမ်ႈတင်းၼမ်။

ဝၼ်းတီႈ 19 လိူၼ်ၵျူႊလၢႆႊ 2015 ၸုမ်းႁႅင်းၵၢၼ်ၽွမ်ႉႁူမ်ႈ Workers Solidarity Association (WSA) လႆႈၸတ်းႁဵတ်းဝၼ်းၶွပ်ႈၶူပ်ႇတဵမ် 8 ပီ မီးၽူႈယႂ်ႇၵူၼ်းလူင် မုၵ်ႉၸုမ်းတႆး 30 ၸုမ်းပၢႆ ဢိၵ်ႇၽူႈသူၼ်ၸႂ်ၶဝ်ႈႁူမ်ႈပၼ်ႁႅင်းလႄႈပၼ်တၢင်ႁၼ်ထိုင်ၵႂႃႇ ဢွင်ႈတီႈၸတ်းႁဵတ်းႁွင်ႈႁေႃးလ် Uniserv ၼႂ်းၸၼ်ႉၸွမ်ၵဵင်းမႆႇ ၸိုင်ႈထႆး။

ၼႂ်းပၢင်ၵႅဝ်ႈၼႆႉ ၽူႈၶဝ်ႈႁူမ်ႈဢွၼ်ၵၼ်တႆႈတဵၼ်းၵႃႇရဝ ၼပ်ႉယမ်ၸဝ်ႈမုၼ်ယႂ်ႇၶုၼ် ႁေႃၶမ်းၼၢင်းႁေႃၶမ်း ၸိုင်ႈထႆး။ ၸုမ်းႁႅင်းၵၢၼ်ၽွမ်ႉႁူမ်ႈႁွင်ႉၽဵင်းၵႂၢမ်း ၸုမ်းပိုတ်ႇပၢင်။  ၼႄၸိူင်း ပွတ်းၵဵဝ်ႇလူၺ်ႈ လွင်ႈႁႅင်းၵၢၼ် ၊ ၼုမ်ႇႁၢႆးၸၢႆးယိင်း ၸုမ်းႁႅင်း ၵၢၼ်ၽွမ်ႉႁူမ်ႈ  ႁွင်ႉၽဵင်းၵႂၢမ်းလဝ်ႇမူၼ်ႈတၢင်းၵႃႈတႆး။

ၼၢင်းမူၺ်လႅင်း ႁူဝ်ပဝ်ႈၸုမ်းႁႅင်းၵၢၼ်ၽွမ်ႉႁူမ်ႈ  မွၵ်ႇလၢတ်ႈၶေႃႈၵႂၢမ်း- “ယိၼ်းၸူမ်းၶွပ်ႈၸႂ်ထိုင် ၵူႈမူႇၸုမ်း ၵူႈၵေႃႉၵူႈၵူၼ်းတီႈမႃးပၼ်ႁႅင်း ၼႂ်းဝၼ်းၶွပ်ႇၶူပ်ႇတဵမ် 8 ပီ ႁႅင်း ၵၢၼ်ၽွမ်ႉႁူမ်ႈ ဢိၵ်ႇပႃးယိၼ်းၸူမ်ႈထိုင်ၸုမ်း Map တီႈလႆႈၵမ်ႉထႅမ်ႁဝ်းၶႃႈမႃးတႃႇ သေႇႁဵတ်းႁႂ်ႈ ၸုမ်းမႃး ထိုင်ဝၼ်းမိူဝ်ႈၼႆႉလႆႈ။ ဢိၵ်ႇပႃးၵေႃပွင်ၵၢၼ် ၵဝ်ႇ ၊ မႂ်ႇ ပေႃးမိူဝ်းၼႃႈ မႃးတွၼ်ႈတႃႇႁႅင်း ၵၢၼ်ယၢၼ် မိူင်းႁဝ်းၼၼ်ႉ ႁဝ်းၶႃႈတေၶတ်းၸႂ်လိူဝ်သေၼႆႉယူႇၶႃႈ။”

ထွင်းၶမ်း ၽူႈၵိူဝ်းၵုမ် ၸုမ်းႁႅင်းၵၢၼ်ၽွမ်ႉႁူမ်ႈ လၢတ်ႈဝႃႈ- “ ႁႅင်းၵၢၼ်ၵမ်ႈၼမ် ထူပ်း တၢင်းယၢပ်ႇၽိုတ်ႇ မိူၼ်မိူဝ်ႈယူႇဢမ်ႇလီၵိၼ်ဢမ်ႇဝၢၼ် ဢမ်ႇမီးပီႈၼွင်ႉ၊ ႁဵတ်းၵၢၼ် ဢမ်ႇလႆႈငိုၼ်း၊ လွင်ႈၵႃႈႁႅင်း ၶၼ်ႉတႅမ်ႇၸဵမ်ၸိူဝ်းၼႆႉၵေႃႈတၢင်းၾၢႆႇၸုမ်းႁဝ်းၶႃႈလႆႈပၼ် လွင်ႈတိူင်ႇပၢင်ႇ တၢင်းၶႆႈၸႂ်ၸွႆႈထႅမ်ၵႂႃႇယူႇ” ။


သိုပ်ႇလၢတ်ႈထႅင်ႈဝႃႈ “ ဢၼ်ၵေႃႇတင်ႈၸုမ်းမႃးၼႆႉ ဢမ်ႇၸႂ်ႈတွၼ်ႈတႃႇပီႈၼွင်ႉတႆးၵူၺ်း။ ပီႈၼွင်ႉၵူႈၸၢဝ်းၶိူဝ်း သင်ဝႃႈသူၼ်ၸႂ်ၸိုင် ၶဝ်ႈမႃးပဵၼ်လုၵ်ႈၸုမ်းလႆႈ။  မႃးပဵၼ် ၵေႃဢၼ် လဵဝ်ၵၼ်။ ယႃႇပေယူႇၵေႃႉလဵဝ်၊ မႃးၽွမ်ႉသဵင်ပဵင်းပၢၵ်ႇၵၼ်ၼင်ႇ ႁိုဝ်ႁဝ်းၶႃႈ မီးလွင်ႈသင်ၵေႃႈ ၸွႆႈထႅမ်ၵၼ်ၵႂႃႇ။

လိူဝ်ၼၼ်ႉသင်ႇဝႃႈ ဢွၼ်ႇယိင်းဢွၼ်ႇၸၢႆး မီးဝႃႇသၼႃႇ ၶႂ်ႈမႃးၵႃႈဝႅၼ်ၼင်ႇႁိုဝ်ၾိင်ႈငႄႈ ႁဝ်းတေဢမ်ႇႁၢႆၼၼ်ႉၵေႃႈယိၼ်းလီႁပ်ႉတွၼ်ႈယူႇၶႃႈ။”


ၸုမ်းႁႅင်းၵၢၼ်ၽွမ်ႉႁူမ်ႈၼႆႉ ၵေႃႇတင်ႈမႃးမိူဝ်ႈဝၼ်းတီႈ 22 လိူၼ်ၵျူႊလၢႆႊ 2007 ယိူင်းဢၢၼ်းလူင် မီး 3 ၶေႃႈ -
(1)    ဝၢႆႇၽိုၼ်ႉသၢၼ်ၶတ်းလွင်ႈဢမ်ႇတြႃးၼိူဝ်ႁႅင်းၵၢၼ်သေ လူလွမ်ပႂ်ႉပႃးသုၼ်ႇလႆႈသုၼ်ႇပဵၼ် ႁႅင်းၵၢၼ်ၽဵင်ႇပဵင်း။
(2)    ၶပ်းၶိုင်တုၵ်းယွၼ်း ႁႂ်ႈမီးလွင်ႈႁူမ်ႇလူမ်ႈလွတ်ႈၽေး လႄႈႁႂ်ႈမီးၽွၼ်းလီၵဵဝ်ႇလူၺ်ႈ သၽႃႇဝ ႁွပ်ႈတူဝ်
(3)    ၵမ်ႉထႅမ်ႁႂ်ႈမီးလွင်ႈမိုတ်းၵိုဝ်းၸမ်ၸႂ်ၵၼ် ၼႂ်းၵႄႈလုၵ်ႈလဵင်ႉလႄႈပေႃႈလဵင်ႉ ၊ ဢိၵ်ႇတင်း လုၵ်ႈလဵင်ႉတေႃႇလုၵ်ႈလင်ႉ။
လိူဝ်ၼၼ်ႉ ယင်းတူင်ႉၼိုင်ပႃးလွင်ႈပၢႆးယူႇလီ ၊ လွင်ႈၾိင်ႈငႄႈၾိင်ႈထုင်းၸဵမ်ၸိူဝ်းၼႆႉ ဝႃႈၼႆ။