ပႃႊတီႊၵွင်ၸႆး (ၵဵင်းတုင်) လႆႈႁၢင်ႈႁႅၼ်းဝႆႉ ပိူဝ်ႈတႃႇၵၢၼ်လိူၵ်ႈတင်ႈ ၸိူင်ႉႁိုဝ်ၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ တိတ်းတေႃႇတွင်ႈထၢမ် ၵႅမ်ႁူဝ်ပဝ်ႈ လုင်းသၢမ်တိပ်ႉသိူဝ် ဝႆႉၼင်ႇၼႆ။

ၵႅမ်ႁူဝ်ပဝ်ႈ ပႃႊတီႊၵွင်တႆး လုင်းသၢမ်တိပ်ႉသိူဝ်

ထၢမ်-တႃႇၶဝ်ႈပၢင်လိူၵ်ႈတင်ႈၼႆႉ မိူဝ်ႈလဵဝ် ပႃႊတီႊၵွင်ၸႆး ႁၢင်ႈႁႅၼ်းဝႆႉၸိူင်ႉႁိုဝ်၊ ထိုင်တီႈလႂ်ယဝ်ႉၶႃႈ ?။

တွပ်ႇ-တႃႇၵၢၼ်လိူၵ်ႈတင်ႈၼႆႉ မိူဝ်ႈလဵဝ် လူင်းသူၼ်းတုမ်ၵူႈဝၼ်းၵူႈဝၼ်း။

ထၢမ်- ၽွင်းတႅၼ်းၶႃႈလူး လိူၵ်ႈယဝ်ႉႁႃႉ၊ တေၶဝ်ႈလိူၵ်ႈတင်ႈ လၢႆတီႈၶႃႈ?။

တွပ်ႇ- ပႆႇလိူၵ်ႈယဝ်ႉ၊ တေၶဝ်ႈ 4 တီႈၵူၺ်းၶႃႈ၊ မၼ်းတူၵ်းလိုၼ်းႁႅင်းယဝ်ႉ၊ ဢမ်ႇမီးၶၢဝ်းယၢမ်းယဝ်ႉ၊ တေၶဝ်ႈလိူၵ်ႈၼႂ်းဝဵင်းၵဵင်းတုင် ၵူၺ်း။

ထၢမ်-ၼႂ်းၵၢၼ်လူင်းႁႃသဵင်သူၼ်းတုမ် ၼင်ႇႁိုဝ်တေပေႉၼႆႉ ပႃႊတီႊၵွင်ၸႆး မီးၵႂၢမ်းၶႂၼ်ၸိူင်ႉႁိုဝ်ၶႃႈ ?။

တွပ်ႇ-ဢဝ်ၵၢၼ်ၸိူဝ်ႉၸၢတ်ႈ ၵၢၼ်လိၵ်ႈလၢႆးပဵၼ်ယႂ်ႇ၊ တႃႇႁဵတ်းႁႂ်ႈဝၢၼ်ႈမိူင်းႁဝ်းႁုၼ်ႈမုၼ်း (ပူၵ်းပွင် ၶိုၼ်ႈယႂ်ႇမႂ်ႇသုင်)။

ထၢမ်-မိူဝ်ႈလဵဝ် လူင်းသူၼ်းတုမ်ပွတ်းလႂ်လၢႆလၢႆၶႃႈ ?။

တွပ်ႇ-လူင်းသူၼ်းတုမ် တီႈၼႂ်းဝဵင်း (ၵဵင်းတုင်) တင်းသဵင်ႈ တင်းဝၢၼ်ႈၼွၵ်ႈ။

ထၢမ်-လုမ်းၶႃႈလူး ပိုတ်ႇယဝ်ႉယဝ်ႉၶႃႈႁႃႉ ?။

တွပ်ႇ- လုမ်းတႄႉ တေပိုတ်ႇဝၼ်းတီႈ 27 လိူၼ်ၼႆႉ။

ထၢမ်-တေႃႈလဵဝ်ၼႆႉ ၵူၼ်းၶဝ်ႈပႃႊတီႊၶႃႈလူး တဵမ်ယဝ်ႉၶႃႈႁႃႉႁႃႈပၢၵ်ႇ (500) ဢမ်ႇၼၼ်ၵေႃႈ ၼိုင်ႈႁဵင် (1,000) ?။

တွပ်ႇ- တဵမ်ယဝ်ႉ၊ ႁဝ်းၵေႃႈတေယင်ႉယဝ်ႉ၊ ၵွပ်ႈမၼ်းတဵမ်ယဝ်ႉ။

ထၢမ်- ပေႃႇလသီႇ ဢၼ်ဝႆႉၼိူဝ်တၢင်ႇၸၢဝ်းၶိူဝ်း ၼႂ်းၵဵင်းတုင်ၶႃႈလူး မီးၸိူင်ႉႁိုဝ်ၶႃႈ ?။

တွပ်ႇ-ၵွပ်ႈမၼ်းပဵၼ်ၵၢၼ်လီၵူၺ်းလႄႈ တႃႇၸၢဝ်းၶိူဝ်းတင်းသဵင်ႈၵေႃႈ လႆႈသူၼ်းတုမ်လွင်ႈလီၵူၺ်း။

ထၢမ်-ယူႇတီႈပႃႊတီႊၵွင်ၸႆးသေ ၼင်ႇႁိုဝ်တေပေႉၼၼ်ႉ ၶႂ်ႈလၢတ်ႈၸိူင်ႉႁိုဝ်ၶႃႈ၊ ႁဝ်းၶႃႈတေပွႆႇသဵင်ပၼ် ?။

တွပ်ႇ-တႃႇၵွင်ၸႆးၼႆႉတႄႉ မိူၼ်ၼင်ႇပၢင်လိူၵ်ႈတင်ႈပီ 2015 ၼႆႉတႄႉ မၼ်းတူၵ်းလိုၼ်းႁႅင်းယဝ်ႉ၊ တေၶဝ်ႈလိူၵ်ႈတီႈ ၵဵင်းတုင်ၼႆႉၵူၺ်း။ သင်ၸိူဝ်ႉဝႃႈ ဝၼ်းၼိုင်ႈမႃး ဢဵၼ်ႁႅင်းယႂ်ႇမႃးလွႆးလွႆးၵေႃႈ မၼ်းၸၢင်ႈပဵၼ်ပႃႊတီႊယႂ်ႇ ပႃႊတီႊလူင်မႃး တႃႇၸၢဝ်းၶိူဝ်းတႆး။ မိူဝ်ႈလဵဝ်ၼႆႉ ၵွပ်ႈမၼ်းပဵၼ်ပႃႊတီႊပိုၼ်ႉမိူင်းလႄႈ ၵူၼ်းမိူင်းၵေႃႈႁပ်ႉႁူမ်ၸူမ်းတွၼ်ႈ၊ ႁဝ်းၵေႃႈယုမ်ႇယမ်ဝႃႈ ပႃႊတီႊၵွင်ၸႆးၼႆႉ ပၢင်လိူၵ်ႈတင်ႈပီ 2015 ၼႆႉ တေဢၢၼ်းပေႉ။ ယိူင်းဢၢၼ်းၸိူင်ႉၼႆဝႆႉယူႇ၊ ၵွပ်ႈဝႃႈ မၼ်းပဵၼ်ပႃႊတီႊပိုၼ်ႉမိူင်းလႄႈ ၸၢဝ်းၶိူဝ်းၵူႈၶိူဝ်းၶိူဝ်းၵေႃႈ ပႃးတီႈၼႂ်းပႃႊတီႊၼႆႉသဵင်ႈသဵင်ႈ။

ထၢမ်-တေႃႈလဵဝ်ၼႆႉ လွင်ႈၽွမ်ႉႁူမ်ႈၼႂ်းပႃႊတီႊတႆးႁဝ်းၶႃႈလူး မီးၸိူင်ႉႁိုဝ်ၶႃႈ?။

တွပ်ႇ-မိူၼ်ႁၼ်ယူႇ ငိၼ်းယူႇၵူႈၵေႃႉၵူႈၵူၼ်းၼၼ်ႉၼႃႇ။ ပႃႊတီႊႁူဝ်သိူဝ်တင်းသိူဝ်ၽိူၵ်ႇၼႆႉၵေႃႈ မၼ်းဢမ်ႇႁူမ်ႈၵၼ်လႆႈယဝ်ႉလူး၊ ၶဝ်ၵေႃႈတေလိူၵ်ႈႁင်းၽႂ်ႁင်းမၼ်းၼၼ်ႉၼႃႇ။ ဢၼ်ၼႆႉ မၼ်းၵေႃႈယၢပ်ႇၸႂ်တႃႇတႆးတင်းသဵင်ႈယူႇ၊ ဢမ်ႇႁဵတ်းလႆႈလီလီၵေႃႈ ၸၢင်ႉၵၢၼ်ႉပိူၼ်ႈ။

ထၢမ်-ယူႇတီႈပႃႊတီႊၵွင်ၸႆးသေ တႃႇတေသၢၼ်မိုဝ်းၵၼ် ႁဵတ်းၵၢၼ်ၼႂ်းပိုၼ်ႉတီႈၼႆႉ မီးၸိူင်ႉႁိုဝ်ၶႃႈ?။

တွပ်ႇ-ႁဝ်းပဵၼ်ပႃႊတီႊလဵၵ်ႉလူး၊ ႁဝ်းယိုၼ်ႈမိုဝ်းႁပ်ႉတုင်းၶဝ်ယူႇ၊ လၢတ်ႈတႄႉလၢတ်ႈယူႇ ႁဝ်းတေႁူမ်ႈၶဝ်၊ ၵူၺ်းၵႃႈ ၽႂ်ၵေႃႈဢမ်ႇတွပ်ႇသင်မႃးလူး။ မိူဝ်ႈဢွၼ်တၢင်း ပႃႊတီႊႁူဝ်သိူဝ်ၵေႃႈ လႆႈလၢတ်ႈၵၼ်ဝႆႉယူႇ၊ ႁၢၼ်ႉတေႃႇမိူဝ်ႈလဵဝ်ၵေႃႈ ၵၢၼ်ၶဝ်ၵေႃႈၼမ်၊ ၶဝ်ၵေႃႈၶဝ်ႈလိူၵ်ႈတင်ႈတင်းမိူင်းယူႇ။

ထၢမ်-ယူႇတီႈၵႅမ်ႁူဝ်ပဝ်ႈသေ ၵမ်းလိုၼ်းသုတ်း ၶႂ်ႈလၢတ်ႈသင်ထႅင်ႈၶႃႈ?။

တွပ်ႇ- ဢၼ်ၶႂ်ႈလၢတ်ႈတႄႉ တႆးၵူႈၵေႃႉတႆးၵူႈၵူၼ်းၼႆႉ မၼ်းလူဝ်ႇႁဵတ်းၵၢၼ်တႃႇၸိူဝ်ႉၸၢတ်ႈ ဢၼ်ၼႆႉၵူၺ်း။ ၵၢၼ်ၸိူဝ်ႉၸၢတ်ႈတႆးၼႆႉ ပေႃးတႆးဢမ်ႇႁဵတ်း ဢမ်ႇမီးၽႂ်မႃးႁဵတ်းပၼ်။ ၵၢၼ်ၼႆႉ တႆးၵူႈၵေႃႉၵူႈၵူၼ်း ထုၵ်ႇလႆႈပွင်ႇၸႂ်တႄႉတႄႉ။ ႁဝ်းၵူႈၵေႃႉ ဢၼ်ႁဵတ်းၵၢၼ်ပၢႆးမိူင်းယူႇၼႆႉ ပဵၼ်ၽူႈႁၵ်ႉၸိူဝ်ႉႁၵ်ႉၸၢတ်ႈ တင်းသဵင်ႈ၊ မၼ်းလူဝ်ႇမေႃႁူမ်ႈၵၼ်၊ ပေႃးဢမ်ႇႁူမ်ႈၵၼ် ႁဝ်းဢမ်ႇပေႉပိူၼ်ႈလႆႈ။ ယူႇတီႈပႃႊတီႊၵေႃႈလီ ယူႇတီႈပုၵ်ႉၵလၵေႃႈလီ၊ ဢမ်ႇၸႂ်ႈဝႃႈၶႂ်ႈၸႅၵ်ႇၽႄ ဢွၵ်ႇတႂ်ႈတႂ်ႈၼိူဝ်ၼိူဝ် မၼ်းဢမ်ႇမီး၊ တႃႇတေႁဵတ်းႁႂ်ႈဝၢၼ်ႈမိူင်းၶိုၼ်ႈယႂ်ႇၵူၺ်း။ တႃႇတေႁဵတ်းႁႂ်ႈဝၢၼ်ႈမိူင်းၶိုၼ်ႈယႂ်ႇၼႆႉ ႁဝ်းလူဝ်ႇႁဵတ်းပိူဝ်ႈတႃႇတူဝ်ႁဝ်း တႃႇၸိူဝ်ႉၸၢတ်ႈႁဝ်းဢွၼ်တၢင်း ၶႂ်ႈလၢတ်ႈမီးၼင်ႇၼႆ။