ပႃၼႂ်းၼမ်ႉၼွင်တုင် တၢႆၼမ် ယွၼ်ႉလႅတ်ႇမႆႈ ၾူၼ်ၵေႃႈဢမ်ႇတူၵ်း ၼမ်ႉတူႇမဵၼ်ၼဝ်ႈလႄႈ ပႃဢၼ်ယူႇၼႂ်းၼွင် ဢမ်ႇလႆႈလူမ်းထူၺ်ႈၸႂ် ႁဵတ်းႁႂ်ႈ ပႃတၢႆတင်းၼမ် ။

ပူၼ်ႉမႃးၼႂ်းၶၢဝ်းတၢင်း 2-3 ဝၼ်း ၼႂ်းလိူၼ်ၼႆႉ ႁဵတ်းႁႂ်ႈပႃၼႂ်းၼမ်ႉၼွင်တုင် ဝဵင်းၵဵင်းတုင် တၢႆၼမ် ၵွပ်ႈလႅတ်ႇမႆႈႁႅင်း၊ ၾူၼ်ဢမ်ႇတူၵ်း၊ ၼမ်ႉတူႇမဵၼ်ၼဝ်ႈ တၢင်းတႂ်ႈပိုၼ်ႉၼမ်ႉ ဢမ်ႇမီးလူမ်းဢွၵ်ႉသီႊၸိၼ်ႊထူၺ်ႈၸႂ် လႄႈႁဵတ်းႁႂ်ႈပႃ လုၺ်းၶိုၼ်ႈမႃးထူၺ်ႈၸႂ်ၼိူဝ်ၼမ်ႉ၊ ၼမ်ႉၼႂ်းၼွင်ၵေႃႈႁႅင်ႈ တိုၼ်ႈ ႁႅင်းပူၼ်ႉတီႈ ။


ၵူၼ်းမိူင်းဢၼ်ယူႇႁိမ်းၸမ် ၼွင်တုင်လၢတ်ႈဝႃႈ ၵဵဝ်ႇလူၺ်ႈ ပႃတၢႆၼႆႉ ၵႆႉၵႆႉပဵၼ်ယူႇ 2-3 ပီၼိုင်ႈပွၵ်ႈ ယွၼ်ႉဝႃႈ ၼမ်ႉၵေႃႈလိူတ်ႇမႆႈႁႅင်း၊ တီႈတႂ်ႈပိုၼ်ႉၼမ်ႉသမ်ႉ ဢမ်ႇမီး(ဢွၵ်ႉသီႊၸိၼ်ႊ) ပႃဢၼ်ယူႇၼႂ်းၼွင် ၸင်ႇလႆႈလုၺ်းၶိုၼ်ႈမႃး ထူၺ်ႈၸႂ်ၼိူဝ်ၽိဝႅၼမ်ႉ။ ၼွၵ်ႈလိူဝ်သေၼၼ်ႉ ၼွင်တုင်ၼႆႉ ဢမ်ႇလႆႈလၢင်းမႃးႁိုင်ယၢဝ်ႈယဝ်ႉ၊ ၵႃႈၸူဝ်ႈလုင်းယူႇမႃး 50 ပီပၢႆၼႆႉ ႁၼ်ၸဝ်ႈၼႃႈတီႈၶဝ်လၢင်းၼႂ်းမၼ်း ပွၵ်ႈၼိုင်ႈၵူၺ်း။ လိူဝ်ၼၼ်ႉၵေႃႈ ဢမ်ႇႁၼ်မႃးလၢင်းထႅင်ႈသေပွၵ်ႈ ၾူၼ်သမ်ႉဢမ်ႇတူၵ်း လႅတ်ႇၵေႃႈမႆႈႁႅင်းပူၼ်ႉတီႈသေၼမ်ႉၼႂ်းၼွင်ၵေႃႈႁႅင်ႈတိုၼ်ႈႁႅင်းတႄႉတႄႉ ပၢႆတူႇမဵၼ်ၼဝ်ႈၶႅဝ်း။ ႁဵတ်းႁႂ်ႈပႃယူႇယၢပ်ႇ ဢမ်ႇမီးလူမ်းထူၺ်ႈၸႂ်လႆႈ ၸင်ႇဝႃႈပႃလႆႈတၢႆၼမ် ဝႃႈၼႆ။

ပႃၼႂ်းၼွင်တုင် ၵမ်ႈၼမ်ပဵၼ်ပႃၼိၼ်းလႄႈဢၼ်တၢႆၼၼ်ႉၵေႃႈ ပဵၼ်သႅၼ်းတူဝ်လဵၵ်ႉ။

ၼွင်တုင်ၼႆႉ ယူႇၼႂ်းၶဵတ်ႇ(ပွၵ်ႉ) 5 ပဵၼ်ၼွင်ဢၼ်မီးၸိုဝ်ႈသဵင်ယႂ်ႇၵိုၵ်းဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ။