ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႊတီႊႁူဝ်သိူဝ် (SNLD) ဢဝ်ၶေႃႈတႅပ်းတတ်း ၶွမ်ႊမတီႊငဝ်ႈငုၼ်းသေ ၸီႉသင်ႇႁႂ်ႈၶွမ်ႊမတီႊၸႄႈဝဵင်း ၼမ်ႉၶမ်း ၵိုတ်းယင်ႉၼႃႈၵၢၼ် ပုၼ်ႈၽွၼ်းတင်းသဵင်ႈ။ ယွၼ်ႉဢဝ်ၵၢင်ၸႂ်ၸဝ်ႈၵဝ်ႇသေ တႅပ်းတတ်း ဢမ်ႇၶဝ်ႈပၢင်လိူၵ်ႈတင်ႈ။

ဢိင်ၼိူဝ် လုၵ်ႈၸုမ်းပႃႊတီႊႁူဝ်သိူဝ် တီႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ တႅပ်းတတ်းဝႃႈ- တီႈမိူင်း ၼမ်ႉၶမ်းၼႆႉ ထုၵ်ႇလႆႈမီးပႃႊတီႊဢၼ်လဵဝ် တႅပ်းတတ်းဢမ်ႇၶဝ်ႈ လိူၵ်ႈတင်ႈ။ တေၵမ်ႉထႅမ်ပႃႊတီႊသိူဝ်ၽိူၵ်ႇ ၼႂ်းၵၢၼ်လိူၵ်ႈတင်ႈ။ လွင်ႈၼႆႉ ထိုင်မႃးဝၼ်းတီႈ 14-16/07/2015 ၶွမ်ႊမတီႊငဝ်ႈငုၼ်း ပႃႊတီႊႁူဝ်သိူဝ် (SNLD) ၸတ်းႁဵတ်းပၢင်ၵုမ်လူင် တီႈဝဵင်းတႃႈၵုင်ႈ။ ဝၼ်းတီႈ 15 လႆႈတႅပ်းတတ်းဝႃႈ ဢိင်ၼိူဝ်ပႃႊတီႊႁူဝ်သိူဝ် တႅပ်းတတ်းၶဝ်ႈလိူၵ်ႈတင်ႈသေ တီႈၼမ်ႉၶမ်းၵေႃႈ တေၶဝ်ႈလိူၵ်ႈတင်ႈ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈၼမ်းၼႂ်းၵူႈလွင်ႈလွင်ႈ SNLD ၸၢႆးၼုတ်း လၢတ်ႈဝႃႈ- ဝၼ်းတီႈ 14 ထိုင် 16 ၼႆႉ ႁဝ်းၶႃႈႁဵတ်းပၢင်ၵုမ်လူင် ၶွမ်ႊမတီႊငဝ်ႈငုၼ်းသေတႅပ်းတတ်း တႃႇတေၶဝ်ႈလိူၵ်ႈတင်ႈ။ ၵူၺ်းၵႃႈ ၽွင်းၼင်ႇၼၼ် တီႈဝဵင်းၼမ်ႉၶမ်းၼႆႉ ၶွမ်ႊမတီႊၸႄႈဝဵင်းသမ်ႉ တႅပ်းတတ်းဝႆႉဝႃႈ တေဢမ်ႇၶဝ်ႈလိူၵ်ႈတင်ႈ။ ဢၼ်ၶွမ်ႊမတီႊၸႄႈဝဵင်းၼမ်ႉၶမ်း တႅပ်းတတ်းၼႆႉ မၼ်းဢမ်ႇသုမ်ႇငမ်းလႆႈၼိူဝ် ၶွမ်ႊမတီႊငဝ်ႈငုၼ်း တႅပ်းတတ်း။ ၵွပ်ႈၼၼ်လႄႈ ၶွမ်ႊမတီႊငဝ်ႈငုၼ်း သမ်ႉလႆႈတႅပ်းတတ်းဝႃႈ တေၶဝ်ႈလိူၵ်ႈတင်ႈၼႆလႄႈ လႆႈတႅပ်းတတ်းဝႃႈ တေၶဝ်ႈလိူၵ်ႈတင်ႈပႃး တီႈဝဵင်းၼမ်ႉၶမ်း။ ဢၼ်တေၶဝ်ႈလိူၵ်ႈတင်ႈပႃး ဝဵင်းၼမ်ႉၶမ်းၼႆႉ ပဵၼ်သဵင်ၵူၼ်းတင်းၼမ် ၼႂ်းၶွမ်ႊမတီႊငဝ်ႈငုၼ်း လူၺ်ႈလၢႆးပၵ်းပိူင် ၻီႊမူဝ်ႊၶရေႊၸီႊသေ တႅပ်းတတ်းၵႂႃႇ။ ဢမ်ႇယူႇတီႈသုၼ်ႇတူဝ်ၵူၼ်းၵေႃႉလႂ်သေ တႅပ်းတတ်း- ဝႃႈၼႆ။

ၸၢႆးၼုတ်း သိုပ်ႇလၢတ်ႈထႅင်ႈဝႃႈ- ႁဝ်းၶႃႈၼႆႉ ပေႃးဢဝ်လွင်ႈမိုတ်ႈၵိုဝ်းၵၼ်၊ ႁဝ်းၶႃႈမိုတ်ႈၵိုဝ်းၵၼ် လိူဝ်ပီႈၼွင်ႉႁူမ်ႈတွင်ႉလဵဝ်ၵၼ်ၵွၼ်ႇ။ ၵူၺ်းၵႃႈ လွင်ႈၼႆႉမၼ်းပဵၼ်ၵၢၼ်မိူင်း၊ မၼ်းၵဵဝ်ႇၶွင်ႈၵၢၼ်ၸိူဝ်ႉၸၢတ်ႈ တင်းဝၢၼ်ႈတင်းမိူင်းလႄႈ ပိူဝ်ႈတႃႇတေၶဝ်ႈလိူၵ်ႈတင်ႈ ၸႄႈဝဵင်းၼမ်ႉၶမ်းၼႆႉ ႁဝ်းၶႃႈၸင်ႇလႆႈပိုၼ်ၽၢဝ်ႇ သင်ႇၵိုတ်းပႅတ်ႈၶွမ်ႊမတီႊ ၸႄႈဝဵင်းၼမ်ႉၶမ်း။  ဢၼ်သင်ႇၶွမ်ႊမတီႊ ၸႄႈဝဵင်းၼမ်ႉၶမ်း ၵိုတ်းၵၢၼ်ၼႆႉ ၼပ်ႉယမ်သဵင် ပေႃႈမႄႈၵူၼ်းမိူင်း ဢၼ်ယူႇၼႂ်းၸႄႈဝဵင်းၼမ်ႉၶမ်း၊ ဢၼ်တေမႃးတွတ်ႈၶႅပ်းၵၢင်ၸႂ်ပၼ် ၼၼ်ႉသေ တေဢၢၼ်းမိူဝ်းတင်ႈပၼ် တိူၵ်ႈတွတ်ႈၶႅပ်းၵၢင်ၸႂ် တီႈဝဵင်းၼမ်ႉၶမ်း- ဝႃႈၼႆ။

သိုပ်ႇလၢတ်ႈဝႃႈ- ဢၼ်လႆႈပဵၼ်မႃးၸိူင်ႉၼႆၼႆႉ မိူဝ်ႈပၢင်ၵုမ် ၶွမ်ႊမတီႊငဝ်ႈငုၼ်းၼၼ်ႉ ႁဝ်းၶႃႈယွၼ်းၶေႃႈၵႄႈလိတ်ႈ တီႈၶွမ်ႊမတီႊၸႄႈဝဵင်းၼမ်ႉၶမ်း၊ ၶဝ်ၵေႃႈဢမ်ႇလၢတ်ႈသင်မႃးၶိုတ်းတၼ်း၊ ၶၢဝ်းယၢမ်း ဢၼ်တေလႆႈယိုၼ်ႈသၢႆမၢႆၸိုဝ်ႈလူင်းလိူၵ်ႈၽူႈတႅၼ်း ၼႆႉသမ်ႉဝၼ်းတီႈ 20/07/2015 တေႃႇထိုင်ဝၼ်းတီႈ 08/08/2015 ၼႆႉ တေဢိုတ်းယဝ်ႉ။ ၵွပ်ႈတေလႆႈႁဵတ်းၵၢၼ်ဝႆးဝႆး၊ လွင်ႈၼႆႉၶဝ်ၵေႃႈ ဢမ်ႇပွင်ႇလၢတ်ႈမႃးၶိုတ်းတၼ်းလႄႈ ဢမ်ႇၸၢင်ႈႁဵတ်းႁိုဝ်ၶိုင်- ဝႃႈၼႆ။

ႁူဝ်ပဝ်ႈ ၶွမ်ႊမတီႊၸႄႈဝဵင်းၼမ်ႉၶမ်း ၸၢႆးလိူၼ်မျၢတ်ႈ ၵေႃႈလၢတ်ႈဝႃႈ- ယူႇတီႈၶွမ်ႊမတီႊ ငဝ်ႈငုၼ်းသေ တႅပ်းတတ်းႁဵတ်းသၢင်ႈမႃးၼၼ်ႉ ႁဝ်းၶႃႈဢမ်ႇၸၢင်ႈလၢတ်ႈသင်၊ မၼ်းပဵၼ်လိူင်ႈၵၢၼ်ပႃႊတီႊ။ ၵူၺ်းၵႃႈ ၵၢင်ၸႂ်ႁဝ်းၶႃႈ ၶွမ်ႊမတီႊၸႄႈဝဵင်းလႄႈ ၵၢင်ၸႂ်ၶွမ်ႊမတီႊငဝ်ႈငုၼ်းၼႆႉ  မၼ်းဢမ်ႇမိူၼ်ၵၼ်။ လွင်ႈဢၼ်ပဵၼ်ယူႇ ၼႂ်းၸႄႈဝဵင်းၼမ်ႉၶမ်း တင်း ပေႃႊလသီႊတၢင်းၼိူဝ်ၼႆႉ မၼ်းဢမ်ႇမိူၼ်ၵၼ်ၼႆ ႁဝ်းၶႃႈပွင်ႇၸႂ်ၸိူင်ႉၼႆ။

မိူဝ်ႈၽွင်းပႃႊတီႊႁူဝ်သိူဝ် ဢမ်ႇႁဵတ်းၵၢၼ်လႆႈၼၼ်ႉၵေႃႈ ႁဝ်းၶႃႈၵူၼ်းႁူဝ်သိူဝ်ၵဝ်ႇၼႆႉ လႆႈသႂ်ႇဢဵၼ်သႂ်ႇႁႅင်းသေ ၵေႃႇတင်ႈမႃးပႃႊတီႊသိူဝ်ၽိူၵ်ႇ၊ ၸွႆႈထႅမ်ၵၢၼ်သိူဝ်ၽိူၵ်ႇမႃး။ ၵွပ်ႈၼၼ်လႄႈ ဝဵင်းၼမ်ႉၶမ်းႁဝ်းၶႃႈ တေဢဝ်ပႃႊတီႊ 2 ဢၼ် ယႅၵ်ႈၵၼ်သေႁဵတ်းၵၢၼ်ၼႆ မၼ်းဢမ်ႇလႆႈ၊ ပေႃးဝႃႈပႃႊတီႊတႅၵ်ႇၵၼ်ၵေႃႈ ၵူၼ်းမိူင်းၵေႃႈတႅၵ်ႇၵၼ်ယဝ်ႉ၊ ပေႃးၵူၼ်းမိူင်းတႅၵ်ႇၵၼ်ၵေႃႈ ပၼ်ႁႃဢီႈသင်ၵေႃႈယဝ်ႉ ႁဝ်းၶႃႈတေၵႄႈလိတ်ႈယၢပ်ႇ၊ တေတေႃႇသူႈယၢပ်ႇ- လုင်းၸၢႆးလိူၼ်မျၢတ်ႈ ၵေႃႉထုၵ်ႇသင်ႇၵိုတ်းၵၢၼ် လၢတ်ႈ။

သုၼ်ႇတူဝ် လုင်းၸၢႆးလိူၼ်မျၢတ်ႈ ၵေႃႈလၢတ်ႈဝႃႈ- ၶွမ်ႊမတီႊၸႄႈဝဵင်းၼမ်ႉၶမ်း ႁဝ်းၶႃႈၼႆႉ ႁူမ်ႈဝႃႈလႆႈထုၵ်ႇ ၶွမ်ႊမတီႊငဝ်ႈငုၼ်း သင်ႇၵိုတ်းၵၢၼ်ယဝ်ႉသေတႃႉၵေႃႈ ႁဝ်းၶႃႈတေဢမ်ႇၶဝ်ႈၸူး ပႃႊတီႊဢၼ်လႂ်၊ တေႁႃလွၵ်းလၢႆးမၼ်းသေ ၵႄႈလိတ်ႈၵႂႃႇ- လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

ဢိင်ၼိူဝ်ပဵၼ်မႃးၸိူင်ႉၼႆသေ ၵူၼ်းၼုမ်ႇ ၼႂ်းၸႄႈဝဵင်းၼမ်ႉၶမ်း ၵမ်ႈၽွင်ႈၵေႃႈ ဢွၼ်ၵၼ်တူင်ႉတိုၼ်ႇၸူး ပေႃႈမႄႈၵူၼ်းမိူင်းသေ ႁႃသဵင်ၵၢင်ၸႂ် လူၺ်ႈလၢႆးၵဵပ်းသဵၼ်ႈမၢႆ။ လွင်ႈၼႆႉ ၵူၼ်းၼုမ်ႇသၢမ်ႁဵင်ပၢႆ လႆႈတုၵ်းယွၼ်းသေ လူင်းလၢႆးမိုဝ်းဝႃႈ- 1.ႁႂ်ႈပႃႊတီႊႁူဝ်သိူဝ်မွပ်ႈပၼ်ၶိုၼ်း ၼႃႈၵၢၼ်လႄႈတၼ်းႁဵင်း ၶွမ်ႊမတီႊၸႄႈဝဵင်း ၼမ်ႉၶမ်း။ 2.ႁႂ်ႈပႃႊတီႊႁူဝ်သိူဝ် ငိူင်ႉဝႄႈပၼ်ပၢင်လိူၵ်ႈတင်ႈ ၼႂ်းၸႄႈဝဵင်းၼမ်ႉၶမ်း ၸိူဝ်းၼႆႉ။