လိူၼ် 8 မူၼ်း ဝၼ်းၶဝ်ႈဝႃႇသႃၼႆႉ ၵေႃလိၵ်ႈလၢႆး လႄႈ ၾိင်ႈငႄႈတႆး ၵဵင်းမႆႇ လႆႈလူင်းၾွၼ်ႉလိၵ်ႈတႆး ယူႊၼီႊၶူတ်ႊ ၼႂ်းၶိူင်ႈၾူၼ်ႊ (မိုဝ်းထိုဝ်) လႄႈ ၶိူင်ႈၶွမ်ႊၽိဝ်ႊတိူဝ်ႊ၊ မီးပီႈၼွင်ႉတႆး မႃးၸူးလူင်းၾွၼ်ႉ ၼႂ်းၶိူင်ႈၾူၼ်ႊ တင်းၼမ် ။

ဝၼ်းၽတ်းတီႈ 30/07/2015 ၊ တင်ႈတႄႇၶၢဝ်းယၢမ်း 7  မူင်းၶိုင်ႈၵၢင်ၼႂ် ထိုင်ႁူဝ်ၶမ်ႈ 6 မူင်း၊ ၵေႃလိၵ်ႈလၢႆးလႄႈ ၾိင်ႈငႄႈတႆး (ၵဵင်းမႆႇ) ဢွၼ်ႁူဝ် ႁွင်ႈၵၢၼ်ၾၢႆႇ IT ၼႂ်းၵေႃလိၵ်ႈလၢႆးသေ လႆႈၸတ်းႁဵတ်း ပၢင်လူင်းၾွၼ်ႉလိၵ်ႈတႆး (Unicode) ၼႂ်းၶိူင်ႈၾူၼ်ႊ (မိုဝ်းထိုဝ်) လႄႈၶိူင်ႈၶွမ်ႊၽိဝ်ႊတိူဝ်ႊ (Notebook) ပၼ်ပီႈၼွင်ႉတႆး၊ ႁႅင်းၵၢၼ်တႆး ၸိူဝ်းတူၵ်းႁွတ်ႈထိုင်မိူင်းၸိုင်ႈထႆး တီႈလုမ်းၵေႃလိၵ်ႈလၢႆးလႄႈ ၾိင်ႈငႄႈတႆး (ၵဵင်းမႆႇ) ဢၼ်ပၵ်းဝႆႉယူႇတီႈ ၼႂ်းဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး။


ပၢင်လူင်းၾွၼ်ႉတႆး (Unicode) ၼႆႉ ႁွင်ႈၵၢၼ်ၾၢႆႇ IT ၼႂ်းၵေႃလိၵ်ႈလၢႆးလႄႈၾိင်ႈငႄႈတႆး (ၵဵင်းမႆႇ) ၸိူဝ်းႁပ်ႉလူင်းပၼ် မီး 9 ၵေႃႉ။ ၼႂ်းၼၼ်ႉ ၸၢႆးပိယၽူင်း ဢွၼ်ႁူဝ်သေ မီးၸၢႆးၶိူဝ်းလွႆ၊ ၸၢႆးဢွၼ်ႇလႅင်း လႄႈ ထႅင်ႈလၢႆလၢႆၵေႃႉ။

ၸၢႆးၶိူဝ်းလွႆ လၢတ်ႈဝႃႈ- ယိူင်းဢၢၼ်း ၶႂ်ႈႁႂ်ႈလိၵ်ႈတႆး ၶိုၼ်ႈယႂ်ႇမႂ်ႇသုင်၊ ၼႂ်းတႆးႁဝ်းၼႆႉ ဢၼ်ပိူၼ်ႈဢမ်ႇႁဵတ်း ၵေႃႈ ႁဝ်းတေႁဵတ်း၊ ၼင်ႇႁိုဝ်သႅၼ်းႁုၼ်ႈမႂ်ႇၶဝ် ပေႃးတေႁူႉလွင်ႈ IT ။ ၾူၼ်ႊၶိူင်ႈသႅၼ်း ဢၼ်လူင်းၾွၼ်ႊတႆး Unicode ယၢပ်ႇၼၼ်ႉ ပဵၼ်သႅၼ်း HUAWEI, Acer, Vivo, OPPO ၸိူဝ်းၼႆႉ ယွၼ်ႉဝႃႈ မၼ်းပႃးၾွၼ်ႉ ၸေႃႇၵျီႇ (Zawggyi) မႃး။ ၾူၼ်ႊမၢင်ၶိူင်ႈၵေႃႈ ႁဝ်းပႆႇမီးတူဝ်ထူပ်းလႄႈ တိုၵ်ႉပဵၼ်လွင်ႈယၢပ်ႇ။ ၼင်ႇႁိုဝ်သဵၼ်ႈတၢင်း ပေႃးတေဢမ်ႇယၢပ်ႇၼၼ်ႉ ႁဝ်းထုၵ်ႇလႆႈဢွၼ်ၵၼ်မႃးၸႂ်ႉ လွၵ်းပိူင်ယူႊၼီႊၶူတ်ႉ(Unicode) ဢၼ်ၸိုၼ်ႈၸၢင်ႇမၼ်း - ဝႃႈၼႆ။


တီႈပၢင်လူင်းၾွၼ်ႉလိၵ်ႈတႆး Unicode ၼႆႉ ၶိူင်ႈၾူၼ်ႊၸိူဝ်းမႃးပၼ်လူင်းၾွၼ်ႉလိၵ်ႈတႆးၼၼ်ႉ တင်းမူတ်းမီး 125 ၶိူင်ႈ။ ၵမ်ႈၼမ်ပဵၼ်သႅၼ်း သမ်ႊသုင်ႊ (SAMSUNG) ။ လိူဝ်သေၼၼ်ႉ မီးၶိူင်ႈသႅၼ်း LG 2 ၶိူင်ႈ၊ AIS 12 ၶိူင်ႈ၊ IQ 3 ၶိူင်ႈ၊ NOKIA 1 ၶိူင်ႈ၊ i-STYLE 2 ၶိူင်ႈ၊ ZTE 1 ၶိူင်ႈ၊ Vivo 4 ၶိူင်ႈ၊ HUAWEI 1 ၶိူင်ႈ၊ iPhone 3 ၶိူင်ႈ၊ OPPO 3 ၶိူင်ႈ၊ DTAC 4 ၶိူင်ႈ ၸိူဝ်းၼႆႉ။ ၶိူင်ႈၶွမ်ႊၽိဝ်ႊတိူဝ်ႊ (Notebook) တင်းမူတ်းမီး 8 ၶိူင်ႈ  ။

ၵႃႈပူၼ်ႉမႃး ဢၼ်သႂ်ႇလိၵ်ႈတႆးသေ မီးပၼ်ႁႃၼၼ်ႉ ၾၢႆႇ IT လၢတ်ႈဝႃႈ ၵမ်ႈၼမ်ပဵၼ်ၶိူင်ႈၾူၼ်ႊ မိူင်းၶႄႇ- ၼႆယဝ်ႉ။


ၵဵဝ်ႇၵပ်းလွင်ႈ IT ၼႆႉ ႁူဝ်ပဝ်ႈၵေႃလိၵ်ႈလၢႆးလႄႈ ၾိင်ႈငႄႈတႆး ၵဵင်းမႆႇ ၸၢႆးသႅင်ယႃႉ ၵေႃႈယၢမ်ႈလၢတ်ႈဝႃႈ- ယိူင်းဢၢၼ်း ဢၼ်လႆႈလူင်းၾွၼ်ႉတႆး ၼႂ်းၶိူင်ႈၶွမ်ႊၽိဝ်ႊတိူဝ်ႊ လႄႈ ၼႂ်းၶိူင်ႈၾူၼ်ႊမိုဝ်းထိုဝ်ၼႆႉ ပိူဝ်ႈတႃႇပူၵ်းပွင်/ယုၵ်ႉမုၼ်း လိၵ်ႈလၢႆးတႆး၊ ႁႂ်ႈလိၵ်ႈတႆးယူႊၼီႊၶူတ်ႊ (Unicode) ၽႄႈတိူၼ်းၼမ်လၢႆ လႄႈ ႁႂ်ႈပီႈၼွင်ႉတႆး လႆႈၸႂ်ႉလိၵ်ႈတႆးငၢႆႈလူမ်လႄႈ ပွင်ႇပိုင်ႈလူင်ႉလႅင်းၵၼ်၊ လႆႈၸႂ်ႉလိၵ်ႈတႆးၵၼ်တူဝ်ႈလူၵ်ႈ၊ ႁႂ်ႈၽႃသႃလိၵ်ႈလၢႆး ၵႂၢမ်းလၢတ်ႈတႆး ၶိုၼ်ႈယႂ်ႇမႂ်ႇသုင်ၵႂႃႇ ဝၼ်းတႃမိူဝ်းၼႃႈ ၶိုတ်းတၼ်းၵၢပ်ႈပၢၼ် IT - ၼႆယူႇ။


ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇၼႆႉ တင်ႈတႄႇပီၵၢႆ (2014) မႃး လႆႈၸတ်းပၢင်လူင်းၾွၼ်ႉလိၵ်ႈတႆး ယူႊၼီႊၶူတ်ႊ မႃးယဝ်ႉ ပႃးပွၵ်ႈၵမ်းၼႆႉ ပွၵ်ႈၵမ်းထူၼ်ႈ 5 ။ ပွၵ်ႈၵမ်း 1 ပူၼ်ႉမႃးမိူဝ်ႈဝၼ်းတီႈ 08/10/2014 ဝၼ်းဢွၵ်ႇဝႃႇသႃ လိူၼ် 11 မူၼ်း တီႈဝတ်ႉၵူႇတဝ်ႈ။ ပွၵ်ႈၵမ်း 2 မိူဝ်ႈပၢင်ပွႆးႁပ်ႉတွၼ်ႈ ပီမႂ်ႇတႆး 2109 တီႈဝတ်ႉၵူႇတဝ်ႈ။ ပွၵ်ႈၵမ်း 3 မိူဝ်ႈပၢင်ပွႆးသၢင်ႇလွင်း ဝတ်ႉၵူႇတဝ်ႈ ဝၼ်းတီႈ 28-30/03/2015 ။ ပွၵ်ႈၵမ်း 4 မိူဝ်ႈဝၼ်းတီႈ 28/06/2015 ဢၼ်လႆႈၸတ်းႁဵတ်း ပၢင်သွၼ်လၢႆးလူင်းလိၵ်ႈတႆး (Unicode) ၼႂ်းၶိူင်ႈၾူၼ်ႊ (မိုဝ်းထိုဝ်)လႄႈ ၶိူင်ႈၶွမ်ႊၽိဝ်ႊတိူဝ်ႊ တီႈလုမ်းၵေႃလိၵ်ႈလၢႆးလႄႈ ၾိင်ႈငႄႈတႆး (ၵဵင်းမႆႇ) ဝတ်ႉၵူႇတဝ်ႈ။ ပွၵ်ႈၵမ်းတီႈ 5 ဝၼ်းတီႈ 30/07/2015 ဝၼ်းၶဝ်ႈဝႃႇသႃ လိူၼ်ပႅတ်ႇမူၼ်း ပွၵ်ႈၵမ်းၼႆႉ တီႈလုမ်းၵေႃလိၵ်ႈလၢႆးလႄႈ ၾိင်ႈငႄႈတႆး တီႈၼႂ်းဝတ်ႉၵူႇတဝ်ႈ ၼင်ႇၵဝ်ႇ။