မုၵ်ႉၸုမ်းၸၢဝ်းၶိူဝ်းတႆး ၵဵင်းမႆႇ လႄႈ တပ်ႉၼႃႈလိၼ် တပ်ႉၸုမ်းမၢႆ 7 ၶွင်ထႆး တေႁူမ်ႈၵၼ်ၸတ်းပွႆး ဝၼ်းမႄႈ တီႈဝတ်ႉၻွၼ်ႊၸၼ် ဝဵင်းၵဵင်းမႆႇ ၸိုင်ႈထႆး ။ ႁူမ်ႈၵၼ်ႁႃငိုၼ်းၵွင်ၵၢင် တႃႇၵေႃႇသၢင်ႈႁုၼ်ႇႁၢင်ႈ သူမ်ၻဵၸ်ၽရႃႉၼရေႊသူၼ် မႁႃရႃးၸႃး လႄႈပဵၼ်တီႈမၢႆတွင်း ပီႈၼွင်ႉၵူၼ်းတႆးလႄႈ ၵူၼ်းထႆး။

ဝၼ်းတီႈ 11-12/08/2015 ၼႆႉ မုၵ်ႉၸုမ်းၸၢဝ်းၶိူဝ်းတႆး ၵဵင်းမႆႇလႄႈ တပ်ႉၼႃႈလိၼ်ၶွင်တပ်ႉၸုမ်းလူင် မၢႆ 7 ၶွင်ထႆး တေႁူမ်ႈၵၼ်ၸတ်းႁဵတ်း ပွႆးဝၼ်းမႄႈ တီႈဝတ်ႉၻွၼ်ႉၸၼ် ဝဵင်းၵဵင်းမႆႇ ၸိုင်ႈထႆး။ ယိူင်းဢၢၼ်း ၼင်ႇႁိုဝ် ႁႂ်ႈပဵၼ်တၢင်းလီတႃႇႁူမ်ႈသၢင်ႈႁုၼ်ႁၢင်ႈ သူမ်ၻဵၸ်ၽရႃႉၼရေႊသူၼ်မႁႃရႃးၸႃး  ဝႆႉတီႈၼႃႈတပ်ႉၼႃႈလိၼ် တပ်ႉၸုမ်းလူင်မၢႆ 7 တီႈထုင်ႉယၢင်းထပ်ႉ ၸႄႈဝဵင်းမႄႈလိမ်း ၵဵင်းမႆႇ။ ပိူဝ်ႈပဵၼ်တီႈၵႃရဝ ၼပ်ႉယမ် ၵၢဝ်ႇဝၢၼ်းထိုင်ဢူမုၼ်ၶႂၼ်ငဝ်းၸဝ်ႈ ႁိူဝ်ႈႁိူင်းပိူင်းသႂ်လႄႈ သိုပ်ႇႁူမ်ႈငမ်းပႂ်ႉပႃး။

လိူဝ်သေၼၼ်ႉၵေႃႈ ႁႂ်ႈပဵၼ်တႃႇၼတၢင်းလီ ၽရႃႉၼၢင်းၸဝ်ႈႁေႃၶမ်း ၽရႃႉပရူမ်ႊရႃၶျိၼီးၼၢတ်ႉ ဢႃယုၸူဝ်ႈၶူပ်ႇၸဝ်ႈထူၼ်ႈတဵမ် 83 ပီ ၼႆယဝ်ႉ။


ၸၢႆးၽူင်း ၽူႈပွင်ၵၢၼ် ၼႂ်းမုၵ်ႉၸုမ်းၸၢဝ်းၶိူဝ်းတႆးလၢတ်ႈဝႃႈ ယိူင်းဢၢၼ်း တေႁူမ်ႈသၢင်ႈ ႁုၼ်ႁၢင်ႈ သူမ်ၻဵၸ်ႇၽရႃႉၼရေႊသူၼ်မႁႃရႃးၸႃး။  ဢၼ်တေသၢင်ႈၼႆႉ တေသဵင်ႈငိုၼ်းမွၵ်ႈ 80 လၢၼ်ႉ (ငိုၼ်းထႆး) ၸုမ်းႁဝ်းၶႃႈၵေႃႈ ႁႃငိုၼ်းၵွင်ၵၢင်ၸွႆႈ ၼင်ႇႁိုဝ် ပေႃးတေမီးပုၼ်ႈသုၼ်ႇတၢင်းလီၸိုဝ်ႈသဵင်တႆး ၵိုၵ်းပိုၼ်းၵႂႃႇမိူဝ်းၼႃႈ- ဝႃႈၼႆ။

ပွႆးဝၼ်းမႄႈ ဢၼ်တေၸတ်းႁဵတ်းတီႈဝတ်ႉၻွၼ်းၸၼ်ၼႆႉ ပဵၼ်ပွၵ်းၵမ်းတီႈ(2) ယဝ်ႉ။ ပီၼႆႉ ၸဝ်ႈၼႃႈတီႈ ပလိၵ်ႈထႆးလႄႈ တပ်ႉသိုၵ်းထႆးတေၸွႆႈဢဝ်ႁူမ်ႇလူမ်ႈပၼ်ၼႂ်းပၢင်ပွႆး၊ လိူဝ်သေၼၼ်ႉၵေႃႈ တေမီးၽူႈယႂ်ႇၵူၼ်းလူင် ၼႂ်းၶွင်ႊသီႊဢဝ်ၶိုၼ်းၸိုင်းတႆး/တပ်ႉသိုၵ်းၸို်င်ႈတႆး မႃးလၢတ်ႈၼႄ လွင်ႈဝႂ်ၵပ်းတူဝ်ၼႂ်းမိူင်းမၢၼ်ႈလႄႈ လွင်ႈပၢင်လိူၵ်ႈတင်ႈ ၼႂ်းမိူင်းမၢၼ်ႈ ၼႂ်းဝၼ်းတီႈ 11/08/2015 ။ ဝၼ်းတီႈ 12/08/2015 ၵေႃႈ ၸဝ်ႈၼႃႈတီႈ ထႆးလႄႈ ၽူႈယႂ်ႇၵူၼ်းလူင်တႆးတေၵၢဝ်ႇလၢတ်ႈၶေႃႈၵႂၢမ်း။

ၼႂ်းပွႆးဝၼ်းမႄႈၼႆႉ တေမီးပၢင်မူၼ်ႈသိူဝ်းတၢင်းၵႃႈၼူၵ်ႉ/တူဝ်း - ၾိင်ႈငႄႈ တၢင်းၵႃႈယိူင်း/ၵႃႈၸိူင်း လႄႈပၢင်လဝ်ႇမူၼ်ႈ တူၼ်ႈၸႂ် ဢိၵ်ႇတင်း ၽူႈႁွင်ႉၵႂၢမ်းၸိုဝ်ႈသဵင်းယႂ်ႇလၢႆၵေႃႉ။ ၼွၵ်ႇသေၼၼ်ႉ မုၵ်ႉၸုမ်းၸၢဝ်းၶိူဝ်းတႆး ဢၼ်မီးတီႈဝဵင်းမိူင်းၵွၵ်ႇ၊ မိူင်းထႆးပွတ်းၵၢင်လႄႈ တၢင်းရယွင်း ပွတ်းတႂ်ႈ ၸိူဝ်းၼၼ်ႉၵေႃႈ တေၸတ်းႁဵတ်း လႆႈႁူႉၼင်ႇၼႆ။


မုၵ်ႉၸုမ်းၸၢဝ်းၶိူဝ်းတႆး ၵဵင်းမႆႇၼႆႉ ၵေႃႇတင်းမႃးလႆႈ 3 ပီ၊ ယိူင်းဢၢၼ်း- ပိူဝ်ႈတႃႇၵူၼ်းမိူင်းတႆး ဢၼ်မီးယူႇ ၼႂ်းမိူင်းထႆးလႄႈသင် ဢၼ်မီးယူႇတီႈၼႂ်းမိူင်းတႆး ဢိၵ်ႇပႃးၸၢဝ်းၶိူဝ်းၼႂ်းမိူင်းတႆး ၵူႈၸၢဝ်းၶိူဝ်း ပေႃးတေၽွမ်ႉသဵင်ပဵင်းပၢၵ်ႇၵၼ်၊ မေႃၸွႆႈထႅမ်ၵၼ်၊ မေႃဢုပ်ႇဢူဝ်းၶဝ်ႈဢွၵ်ႇႁႃၵၼ် ၼႆယဝ်ႉ။

ႁူဝ်ပဝ်ႈ မုၵ်ႉၸုမ်းၸၢဝ်းၶိူဝ်းတႆးယၢမ်းလဵဝ် ပဵၼ် ၸၢႆးသၢမ်လေႃး၊ ၵႅမ်ႁူဝ်ပဝ်ႈ ၸၢႆးၶျိတ်ႉ (ႁၵ်ႉၶိူဝ်း)၊ ၽူႈၼမ်းၼႂ်း ၸၢႆးၵွၼ်းလၢဝ်၊ ၵႅမ်ၽူႈၼမ်းၼႂ်း ယိင်းမူၺ်ၽူး၊ ၾၢႆႇသၢႆမၢႆသမ်ႉ ၸၢႆးဢုမ်ႇၶိူဝ်း။