သမႃႊၶူမ်ႊပၢႆးပၺ်ၺႃ လႄႈ ၾိင်ႈငႄႈတႆး ၵဵင်းမႆႇ တေၶဝ်ႈႁူမ်ႈၸုတ်ႇ တဵၼ်းၸႆး ၼႂ်းတိုဝ်ႉတၢင်း ဝၼ်းၵိူတ်ႇ ၾႃႉၼၢင်းၸဝ်ႈႁေႃၶမ်း ၶွပ်ႈထူၼ်ႈ 83 ပီ။

ဝၼ်းတီႈ 12/08/2015 ၶၢဝ်းယၢမ်း ႁူဝ်ၶမ်ႈ 18.00 မူင်းၼၼ်ႉ သမႃႊၶူမ်ႊပၢႆးပၺ်ၺႃလႄႈၾိင်ႈငႄႈတႆး ႁူမ်ႈပႃးၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႆႇ ဢိၵ်ႇတင်း ၵူႈမူႇၵူႈၸုမ်း လႄႈပီႈၼွင်ႉတႆး ၸိူဝ်းယူႇသဝ်း ၼႂ်းၸႄႈဝဵင်းၵဵင်းမႆႇ ၸႄႈတွၼ်ႈၵဵင်းမႆႇ ၸိုင်ႈထႆး တေၶဝ်ႈႁူမ်ႈၸုတ်ႇတဵၼ်းၸႆး ယိုၼ်ႈယွၼ်းပွလ်း ဝၼ်းၶွပ်ႈၶူပ်ႇထူၼ်ႈ 83 ပီ ၼႂ်းဝၼ်းပုတ်ႉတီႈ 12 လိူၼ်ဢေႃႊၷိူတ်ႉသ်ၼႆႉ ဢွင်ႈတီႈၽၵ်းတူတႃႈပႄး ၸႄႈဝဵင်းမိူင်း ၸႄႈတွၼ်ႈၵဵင်းမႆႇ ပိူဝ်ႈပဵၼ်တိုဝ်ႉတၢင်းဢၼ်လီငၢမ်း တွၼ်ႈတႃႇပီႈၼွင်ႉတႆးႁဝ်း ၸိူဝ်းမီးယူႇၼႂ်းမိူင်းၵဵင်းမႆႇ ၸိုင်ႈထႆး လႄႈမီးသုၼ်ႇလႆႈၶဝ်ႈႁူမ်ႈၸုတ်ႇတႆႈတဵၼ်းၸႆး ယုၵ်ႉယွင်ႈၵုၼ်းငၢမ်း တၢင်းလီမွပ်ႈတၢၼ်းပွလ်း - ၼႆယဝ်ႉ။
လူၺ်ႈတိုဝ်ႉတၢင်းၼႆႉသေ ပေႃးၶိုၼ်းတူၺ်းသၢႆၸိူဝ်ႉႁိူဝ်ႇၶႆးပီႈၼွင်ႉၸိူဝ်ႉၶိူဝ်းတႆး ႁဝ်းၼႂ်းလူၵ်ႈ (လူဝ်းၵ) ၼႆႉယၢမ်းလဵဝ် ဢၼ်ပဵၼ်မိူင်းလွတ်ႈလႅဝ်းၵွၼ်းၶေႃလႄႈမီးႁေႃၶမ်းပၵ်းၼႅၼ်ႈၵႅၼ်ႇယူႇထိုင်ႁၢၼ်ႉၼႆႉၵေႃႈ ၵိုတ်းမီးပီႈၼွင်ႉထႆးၵူၺ်း။ ၵႂၢမ်းဢၼ်ဝႃႈ (ထႆးၼွႆႉထႆးယႆႇ) ၼၼ်ႉ ပဵၵ်ႉသမ်ႉတေဝႆႉၼၵ်းၶိုၵ်ႉ ဢမ်ႇၼၵ်းၶိုၵ်ႉၵေႃႈလီ။

ယွၼ်ႉၼႆႉ တၢင်းသမႃႊၶူမ်ႊပၢႆးပၺ်ၺႃလႄႈၾိင်ႈငႄႈတႆး ယင်းလႆႈဝွၵ်ႇၸိူၼ်း(ၽိတ်ႈမွၵ်ႇ)ပီႈၼွင်ႉတႆး ၼႂ်းဝဵင်းၵဵင်းမႆႇ  ၶဝ်ႈႁူမ်ႈၸုတ်ႇတဵၼ်းၸႆး ၼႂ်းဝၼ်းၶွပ်ႈၶူပ်ႇ 83 ထူၼ်ႈတဵမ်ဢႃယု ၾႃႉၼၢင်းၸဝ်ႈႁေႃၶမ်း ၽရႃႉပရူမ်ႊရႃၶျိၼီးၼၢတ်ႉ ၼႆယဝ်ႉ။

ၽူႈၼမ်းၼႂ်း သမႃႊၶူမ်ႊ ၼၢင်းသႅင် မိူင်းလီ လၢတ်ႈဝႃႈ သမႃႊၶူမ်ႊပၢႆးပၺ်ၺႃလႄႈၾိင်ႈငႄႈတႆး ႁဝ်းၶႃႈၼႆႉ ယွၼ်ႉႁဝ်းၶႃႈယူႇၼႂ်းမိူင်းထႆးလႄႈ ပေႃးထိုင်မႃးဝၼ်းယႂ်ႇလူင်ဝၼ်းၶိုၵ်ႉၶမ်ႇလမ်ႇလွင်ႈၼႂ်းမိူင်းထႆး မိူၼ်ၼင်ႇဝၼ်းပေႃး၊ ဝၼ်းမႄႈ ၸိုင် ႁဝ်းတိုၼ်းဢွၼ်ပီႈၼွင်ႉတႆးႁဝ်း ၸိူဝ်းယူႇၼႂ်းမိူင်းထႆးၼႆႉ ၶဝ်ႈႁူမ်ႈ ၸွမ်းပီႈၼွင်ႉၵူၼ်းမိူင်းထႆးၶဝ် ၸုတ်ႇတဵၼ်းၸႆးယွၼ်းပွလ်းၽွၼ်းလီ ဢမ်ႇဝႃႈ ၼႂ်းၵဵင်းမႆႇ ႁိုဝ် မိူင်းၵွၵ်ႇၵေႃႈ တေႃႈၼင်ႇၼႆ တိုၼ်းၶဝ်ႈႁူမ်ႈမႃးၵူႈပီ ဢမ်ႇႁၢင်ႉဢမ်ႇၵၢတ်ႈ - ဝႃႈၼႆ။

သမႃႊၶူမ်ႊပၢႆးပၺ်ၺႃလႄႈၾိင်ႈငႄႈတႆး ၶဝ်ႈႁူမ်ႈဝၼ်းမႄႈ မိူဝ်ႈပီပူၼ်ႉမႃး

ထႅင်ႈလွင်ႈၼိုင်ႈၵေႃႈ သမႃႊၶူမ်ႊပၢႆးပၺ်ၺႃလႄႈၾိင်ႈငႄႈတႆး ယွၼ်းဝွၵ်ႇၸိူၼ်းပီႈၼွင်ႉတႆးႁဝ်း ၸိူဝ်းယူႇသဝ်းၼႂ်းၵဵင်းမႆႇ ၵူႈမူႇၵူႈၸုမ်း ၵူႈၵေႃႉၶိင်းၵူၼ်း  ပေႃးထိုင်မႃး ဝၼ်းတီႈ 12/08/2015 ၶၢဝ်းယၢမ်း 16.00 မူင်း(ႁူဝ်ၶမ်ႈ) ႁႂ်ႈဢွၼ်ၵၼ် ၼုင်ႈၶူဝ်းတႆးသေ မႃးၶွၼ်ႈတုမ်ၵၼ် တီႈသမႃႊၶူမ်ႊပၢႆးပၺ်ၺႃလႄႈ ၾိင်ႈငႄႈတႆး ၼႂ်းဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး ဢမ်ႇၼၼ် ၵေႃႈ 18.00 မူင်းမႃးတီႈၽၵ်းတူတႃႈပႄးၵမ်းလဵဝ်ၵေႃႈလႆႈ ၼႆယဝ်ႉ။


သမႃႊၶူမ်ႊပၢႆးပၺ်ၺႃလႄႈၾိင်ႈငႄႈတႆး ၼႆႉ လႆႈယိုၼ်ႈယွၼ်းၸတ်းတင်ႈပဵၼ် သမႃႊၶူမ်ႊပၢႆးပၺ်ၺႃ လႄႈၾိင်ႈငႄႈတႆး ပဵၼ်တၢင်းၵၢၼ်လႄႈ လႆႈႁပ်ႉဢၼုၺၢတ်ႈ ထုၵ်ႇၸွမ်းၵူတ်းမၢႆဝၢၼ်ႈမိူင်းယဝ်ႉ ပိုတ်ႇႁွင်ႈၵၢၼ်(လုမ်း) မိူဝ်ႈဝၼ်းတီႈ 30/03/2012 တီႈၼႂ်းဝတ်ႉၵူႇတဝ်ႈဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆးမႃး 3 ပီပၢႆ ၼႂ်းၼၢမ်း ၼၢႆႊယူၵ်ႉ(ၼႃယၵ) သမႃႊၶူမ်ႊ ၸၢႆးသႅင်မိူင်း မင်းၵွၼ်း၊ ၼၢႆႊယူၵ်ႉ(ၼႃယၵ)  1 ၸဝ်ႈသိုၵ်းပလိၵ်ႈ သူၼ်ထယႃႊ ၶမ်းမူင်းၶူလ်ႊ ၼၢႆႊယူၵ်ႉ (ၼႃယၵ) 2 ဢႃးၸၢၼ်ၶၼိတ်း ဝၼၵမူလ်ႊ လႄႈ ၽူႈၼမ်းၼႂ်း ၼၢင်းသႅင် မိူင်းလီ  ဢိၵ်ႇတင်း ၽူႈၶဝ်ႈပႃး ပေႃႈၵမ်ၼၼ်း ၵုၼ်ယူမ်း မႄႈႁွင်ႈသွၼ် ၶႃႈႁၢပ်ႇၵၢၼ်ၶုၼ် မႄႈႁွင်ႈသွၼ် ပေႃႈလူင်ဝၢၼ်ႈလၢၼ်းမိူင်းၾၢင် လႄႈလၢႆလၢႆၵေႃႉ ၸိူဝ်းၼႆႉ ပဵၼ်ၵေႃၵမ်ၵၢၼ်ယိုၼ်ႈယွၼ်းၸတ်းတင်ႈမႃး။ ဝၢႆးသေၼႆႉၵေႃႈ တေလႆႈၶိုၼ်း မႄးၶွတ်ႇၽွတ်ႈၵေႃၵမ်ၵၢၼ် ၸုမ်းႁဵတ်းၵၢၼ်ၵႂႃႇ - ဝႃႈၼႆ။