ၸဝ်ႈၼႃႈတီႈပလိၵ်ႈၵဵင်းမႆႇ ႁူမ်ႈၵၼ် ၵူတ်ႇထတ်းတီႉၺွပ်း ၵူၼ်းၵႃႉၶၢႆယႃႈမဝ်းၵမ် ယိုတ်းလႆႈၼႂ်းၵဵင်းမႆႇ ။ တီႉလႆႈယႃႈတင်းၼမ်။ ႁူမ်ႈပႃးယႃႈမႃႉ ဢၼ်မူၵ်းသႂ်ႇၼႂ်း ႁေႃႇၶႅပ်းထူဝ်ႇၼဝ်ႈ။

ဝၼ်းတီႈ 22 လိူၼ်ၵျူႊလၢႆႊ ၼႆႉၸဝ်ႈၼႃႈတီႈပလိၵ်ႈထႆး ဢိၵ်ႇၸဝ်ႈၼႃႈတီႈၽူႈၵဵဝ်ႇၶွင်ႈလၢႆၾၢႆႇႁူမ်ႈၵၼ်  ၵူတ်ႇထတ်း  ၸၢႆးဢႃႊလူဝ်ႊ ၶျဵတ်ႊၶျူႊဝလ်ႊလူပ်း (ၸၢႆးၶျူၼ်ႊၻႅၼ်ႊ ) ဢႃယု 30 ပီ  ယိပ်းဝတ်းဝႂ်ၵပ်းတူဝ်ထႆး  ၵူၼ်းပဵင်းလူင် ၸႄႈဝဵင်းမိူင်းႁႅင် ၸႄႈတွၼ်ႈၵဵင်းမႆႇ ၸိုင်ႈထႆး။

ၶၢဝ်ႇထႆး Cm108 ႁၢႆးငၢၼ်းဝႆႉဝႃႈ ပလိၵ်ႈထႆး ၽၢမ်းတူဝ်ၶဝ်ႈသိုဝ်ႉယႃႈမႃႉ ဢွင်ႈတီႈမၼ်းၸၢႆးၶၢတ်ႈယူႇ ဢိူင်ႇသီရီႊၽုမ်ႊ ၸႄႈဝဵင်းၵဵင်းမႆႇ၊ တီႉလႆႈယႃႈမႃႉ 4000 မဵတ်ႉ  ၼႂ်းႁွင်ႈမၼ်းၸၢႆး။
ယႃႈမႃႉၸိူဝ်းၼၼ်ႉ မၼ်းၸၢႆး မူၵ်းသိူင်ႇဝႆႉ ၼႂ်းႁွင်ႈၼၼ်ႉ တီႈဢိတ်းဢိတ်း။


တႃႇ 800  မဵတ်ႉၼၼ်ႉ မၼ်းၸၢႆး ၸေႃႇၼႂ်းၵၢင်ၸွၵ်းထူဝ်ႇၼဝ်ႈၶႅပ်းသေ ဢဝ်ယႃႈမႃႉယဵတ်ႈမူၵ်းသႂ်ႇဝႆႉ တၢင်းၼႂ်းၵၢင်မၼ်း ပိူဝ်ႈပဵၼ်ၵၢၼ်ၽၢမ်းတႃ ၸဝ်ႈၼႃႈတီႈ။

ယၢမ်းလဵဝ် ပလိၵ်ႈထႆး  တီႉၺွပ်းဢဝ်ၵူၼ်းၵႃႉယႃႈၼႆႉ သူင်ႇၵႂႃႇၶင်ဝႆႉတီႈႁူင်းပလိၵ်ႈ ၸၢင်ႉၽိူၵ်ႇ ပိူဝ်ႈဢဝ်ၶိုၼ်ႈသၢၼ်တတ်းသိၼ်ပၼ်တူတ်ႈ (တၢမ်ႇ) ၸွမ်းၼင်ႇပၵ်းပိူင်ၵူတ်းမၢႆ။