ပီႈၼွင်ႉၵၢင်ႉမေႃႇ ၶုတ်းဢွင်ႈတီႈလိၼ် ပိူဝ်ႈတႃႇသၢင်ႈဝတ်ႉ ၵျွင်းၽြႃးလူင်၊ ၶုတ်းၺႃး ႁုၼ်ႇႁၢင်ႈပုတ်ႉထၸဝ်ႈ ၵဝ်ႇၵႄႇ ၼပ်ႉႁူဝ်ပၢၵ်ႇသူႇ။

မိူဝ်ႈဝၼ်းတီႈ 23/07/2015 (မိူဝ်ႈဝႃး) ယၢမ်းဝၢႆးဝၼ်း၊ ပီႈၼွင်ႉမိူင်းၵၢင်ႉမေႃႇ (သီႇပေႃႉ) ၶုတ်းၺႃး ႁုၼ်ႇႁၢင်ႈပုတ်ႉထ / ၽြႃးပဵၼ်ၸဝ်ႈ ၵဝ်ႇၵႄႇ တီႈၸေႇၻီႇ/ၵွင်းမူးၵဝ်ႇ တီႈၵၢင်ႉမေႃႇ၊ ႁုၼ်ႇႁၢင်ႈ ၽြႃးသူႇဢၼ်လီမၼ်း မီး 226 သူႇ၊ သူႇဢၼ်ၵွႆမၼ်းသမ်ႉ မီး 60 ပၢႆ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၸဝ်ႈၶူးၽူႈၵွၼ်းဝတ်ႉၵၢင်ႉမေႃႇ ၽတ်ႉတၼ်တ တေဝိၼ်တ လၢတ်ႈဝႃႈ- ၶႂ်ႈႁႂ်ႈပေႃႈမႄႈၵူၼ်းမိူင်းတႆး တၵ်ႉၵႃႇသတ်ႉထႃးႁဝ်းႁူႉႁၼ်ထိုင်၊ ႁႂ်ႈလႆႈမႃးလူႇမႃးဝႆႈၸွမ်း- ဝႃႈၼႆ။


လွင်ႈတၢင်းဢၼ်လႆႈၶုတ်းၺႃးၽြႃးၼႆႉ မိူဝ်ႈတႄႇမၼ်း ဢၢၼ်းႁဵတ်းဝိႁၢရ် ၵျွင်းၽြႃးလူင် ပိူဝ်ႈတႃႇဝႆႉၽြႃးၵဝ်ႇၵႄႇ မိူဝ်ႈမိုၼ်ႉမိူဝ်ႈၵွၼ်ႇ၊ ၽိူဝ်ႇမႃးၶုတ်းသမ်ႉ ၶုတ်းၺႃးႁွႆးၵွင်းမူးၵဝ်ႇမိူဝ်ႈၵွၼ်ႇၵွၼ်ႇသေ ၶုတ်းၺႃးၽြႃးၼႆႉ။ ၼႆႉပဵၼ်ၽြႃးပဵၼ်ၸဝ်ႈ ဢၼ်ထႃပၼႃဝႆႉၼႂ်းၵွင်းမူး ၸဵမ်မိူဝ်ႈၵွၼ်ႇမိူဝ်ႈမိုၼ်ႉ၊ ၼႆႉၵေႃႈပေႃးၵျွင်းၽြႃးလူင်ၵေႃႇသၢင်ႈယဝ်ႉ တေဝႆႉၼႂ်းၵျွင်းၽြႃးလူင်ၵူၺ်းၼင်ႇၵဝ်ႇ- လုၵ်ႈၸုမ်း ၵေႃၵပ်းသၢၼ်ၵူၼ်းၼုမ်ႇတႆး (SYN) ၵေႃႉၼိုင်ႈလၢတ်ႈ။


သိုပ်ႇလၢတ်ႈထႅင်ႈဝႃႈ- ဝၢႆးသေၶုတ်းလႆႈယဝ်ႉ မီးတၵ်ႉၵႃႇသတ်ႉထႃး မႃးလူႇတၢၼ်းမႃးဝႆႈသႃယူႇ ၶိူဝ်းၶိူဝ်းယႂ်းယႂ်း။ ၼႂ်းၼႆႉ ၸုမ်းလုၵ်ႈႁဵၼ်း ၵေႃၵပ်းသၢၼ်ၵူၼ်းၼုမ်ႇတႆးၵေႃႈ ဢွၼ်ၵၼ်ပႆတၢင်းၵႂႃႇ လမ်ႁူဝ် (ၵၼ်ႇတေႃး) တၢင်ႇသွမ်းတၢင်ႇပၢၼ်း၊ ဝၢႆးၼၼ်ႉၵေႃႈ ဢွၼ်ၵၼ်ႁဵတ်းလွင်ႈမူတ်းသႂ် ၸွမ်းဝိႁၢရ်ၵၢၼ်ႇၵျွင်းၸိူဝ်းၼၼ်ႉ- ဝႃႈၼႆ။