ၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး၊ ၸုမ်းၶႅၵ်ႇလီပၢင်ၸႃႉ ၼမ်ႉၶူင်း တူၼ်ႈတီး ႁူမ်ႈၵၼ်သေ ဢွၼ်ႁူဝ်ၸတ်းႁဵတ်း ပၢင်ယွင်ႈၵုၼ်းမုၼ် လုၵ်ႈႁဵၼ်း ဢၼ်ဢွင်ႇပူၼ်ႉၸၼ်ႉသိပ်း ၼႂ်းပီ2015 ၊ ၼင်ႇႁိုဝ် လုၵ်ႈဢွၼ်ႇ ပေႃးတေမီးႁႅင်းၸႂ် ၶတ်းၸႂ်ၵႂႃႇတၢင်းၼႃႈထႅင်ႈ။

ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း

ပေႃးထိုင်မႃး ဝၼ်းတီႈ 23/07/2015 တႄႇၶၢဝ်းယၢမ်း 13.00 မူင်း  တေမီးၵၢၼ်ၸတ်းႁဵတ်း ပၢင်ယွင်ႈၵုၼ်းမုၼ် လုၵ်ႈႁဵၼ်း ဢၼ်ဢွင်ႇပူၼ်ႉၸၼ်ႉသိပ်း ပီ 2015 တီႈႁူင်းႁေႃၵေႃလိၵ်ႈလႄႈၾိင်ႈငႄႈတႆး တူၼ်ႈတီး ပွၵ်ႉၸေးသူႉ ၸိုင်ႈတႆး ပွတ်းၸၢၼ်း။ ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီးလႄႈ ၸုမ်းၶႅၵ်ႇလီပၢင်ၸႃႉ ၼမ်ႉၶူင်း ႁူမ်ႈၵၼ်ၸတ်းႁဵတ်း၊ ယိူင်းဢၢၼ်းယုၵ်ႉယွင်ႈ ႁႂ်ႈလုၵ်ႈဢွၼ်ႇတႆး ပေႃးတေမီးႁႅင်းၸႂ် ၼင်ႇႁိုဝ် ပေႃးတေၶႂ်ႈၶို်ၼ်ႈႁဵၼ်း ၶဝ်ႈပၢင်တွပ်ႇလိၵ်ႈ ႁဵၼ်းလိၵ်ႈၼမ်ၼမ်၊ ၸိူဝ်းဢၼ်တေမႃးတင်းလင် (ႁုၼ်ႈသႅၼ်းမႂ်ႇ)၊ လိူဝ်သေၼၼ်ႉ ၼင်ႇႁိုဝ်လုၵ်ႈဢွၼ်ႇ ပေႃးတေမေႃၵပ်းသိုပ်ႇၶဝ်ႈႁႃ ၸွႆႈၵၢၼ်ၼႂ်းတူင်ႇဝူင်းတႆး ၵႂႃႇ -ၼႆယဝ်ႉ။

ၼၢင်းၼူၼ်းမူဝ် ၽူႈၶဝ်ႈႁူမ်ႈပွင်ၵၢၼ်ၵေႃႉၼိုင်ႈ လၢတ်ႈဝႃႈ လုၵ်ႈဢွၼ်ႇဢၼ်တေမႃးႁပ်ႉသူး (ရၢင်းဝလ်း) ၼႆႉ တေပဵၼ်လုၵ်ႈလၢၼ် ပီႈၼွင်ႉ ၸိူဝ်းပေႃႈ/မႄႈၶဝ် ဢၼ်တူင်ႉၼိုင် ၼႂ်းတူင်ႇဝူင်းတႆးႁဝ်းၶိုၼ်း ဝႃႈၼႆ။

ပၢင်ယွင်ႈၵုၼ်းမုၼ်ၼႆႉ တေမီးၶပ်ႉမၢႆ 1. ဝွၵ်ႇၸိူၼ်းၽူႈၼင်ႇၸိုင်ႈ မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႂႃႇ၊ 2. ဝွၵ်ႇၸိူၼ်း ႁူဝ်ပဝ်ႈ ၸုမ်းၶႅၵ်ႇလီပၢင်ၸႃႉ ၼမ်းၶူင်း လႄႈ ပဵၼ်ၽူႈဢွၼ်ႁူဝ်ၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီႈ လုင်းထုၼ်းမျႅတ်ႈ မွၵ်ႇလၢတ်ႈၶေႃႈၵႂၢမ်း၊ 3. ဝွၵ်ႇၸိူၼ်း ႁူဝ်ပဝ်ႈ ၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး လုင်းၸၢႆးဢွင်ႇသႃႇ ၶိုၼ်ႈမွၵ်ႇလၢတ်ႈၶေႃႈၵႂၢမ်း၊ 4. လုၵ်းႁဵၼ်းတေလမ်ႁူဝ် (ၵၼ်ႇတေႃး)ပေႃႈမႄႈ ဢၼ်လႆႈလူလွမ်ၸွႆႈၶဝ်မႃး၊ 5. တွၼ်ႈသူး (ရၢင်းဝလ်း) လုၵ်ႈႁဵၼ်းဢၼ်ဢွင်ႇပူၼ်ႉၸၼ်ႉသိပ်း ၼႂ်းပီ 2015၊ 6. တၢင်တူဝ်လုၵ်ႈႁဵၼ်ၵေႃႉၼိုင်ႈ မွၵ်ႇလၢတ်ႈၶေႃႈၵႂၢမ်း ယိၼ်းၸူမ်းၶွပ်ႈၸႂ် ဢၼ်လႆႈၸတ်းႁဵတ်းပၢင်ပွႆးၼႆႉမႃး၊ 7. ၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး ႁူမ်ႈပႃး ၸုမ်းၶႅၵ်ႇလီပၢင်ၸႃႇ ၼမ်ႉၶူင်း ၸွႆႈငိုၼ်းၵမ်ႉထႅမ် လုၵ်ႈႁဵၼ်းဢၼ်လုၵ်ႉတၢင်ႇဝဵင်းမႃး ယူႇတီႈလုမ်းၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီးသေ ၶိုၼ်ႈႁူင်းႁဵၼ်းၸၼ်ႉၸွမ်ဝႆႉ၊ 8. ၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး ႁူမ်ႈပႃးၸုမ်းၶႅၵ်ႇလီပၢင်ၸႃႇ ၼမ်ႉၶူင်း တေၸွႆႈငိုၼ်းၵမ်ႉထႅမ် ၸုမ်းလုၵ်ႈႁဵၼ်းၸၼ်ႉၸွမ်တင်းလူင် တူၼ်ႈတီး ၸဵမ်ၸိူဝ်းၼႆႉ။

လုၵ်ႈႁဵၼ်းဢၼ်တေမႃးႁပ်ႉသူး (ရၢင်းဝလ်း) တင်းမူတ်းမီး 42 ၵေႃႉ။ လုၵ်ႈႁဵၼ်းဢၼ်လႆႈလၢဝ်ၸွင်ႈ 6 လုၵ်ႈ တေတွၼ်ႈပၼ် 20,0000 (သွင်သႅၼ်ပျႃး)၊ 5 လုၵ်ႈ 20,0000 (သွင်သႅၼ်ပျႃး)၊ 4 လုၵ်ႈ 14,0000 (ၼိုင်ႈသႅၼ်သီႇမိုၼ်ႇပျႃး)၊ 3 လုၵ်ႈ 10,0000 (ၼိုင်ႈသႅၼ်ပျႃး)၊ 2 လုၵ်ႈ 80,000 (ပႅတ်ႇမိုၼ်ႇပျႃး)၊ 1 လုၵ်ႈ 60,000 (ႁူၵ်းမိုၼ်ႇပျႃး)၊ ဢၼ်ဢမ်ႇလႆႈလၢဝ်ၸွင်ႈသေလုၵ်ႈ 40,000 (သီႇမိုၼ်ႇပျႃး)၊ လုၵ်ႈႁဵၼ်းဢၼ်လႆႈလၢဝ်ၸွင်ႈ 6 လုၵ်ႈ (5) ၵေႃႉ၊ 5 လုၵ်ႈ(3) ၵေႃႉ၊ 4 လုၵ်ႈ (4) ၵေႃႉ၊ 3 လုၵ်ႈ (2) ၵေႃႉ၊ 1 လုၵ်ႈ (5) ၵေႃႉ လႄႈဢၼ်ဢမ်ႇလႆႈသေလုၵ်ႈ (19) ၵေႃႉ- ၼႆယဝ်ႉ။

ပၢင်ယွင်ႈၵုၼ်းမုၼ်ၼႆႉ တေဝွၵ်ႇၸိူၼ်းၸုမ်းသိုဝ်ႇၶၢဝ်ႇမႃးၶဝ်ႈႁူမ်ႈ မိူၼ် ၸုမ်းၶၢဝ်ႇၽူႈတွႆႇႁွၵ်ႈ၊ ၸုမ်းၶၢဝ်ႇ Sky Net (MRTV)လႄႈ ၸုမ်းၵမ်ႇပေႃးၸတႆး ႁူမ်ႈပႃးၸုမ်းၵၢပ်းသၢၼ်လွင်ႈၼၢင်းယိင်းတႆး သမ်ႉတေၶဝ်ႈႁူမ်ႈတူင်ႉၼိုင်ၸွမ်း ၼႆယဝ်ႉ။