ၸုမ်း RCSS/SSA  လူင်းႁူပ်ႉထူပ်းၵူၼ်းမိူင်း တီႈဝဵင်းၵဵင်းတုင် သပ်းလႅင်းလၢတ်ႈၼႄၵူၼ်းမိူင်း ၵပ်းၵၢႆႇလူၺ်ႈ လွင်ႈယႃႈမဝ်းၵမ်၊ လွင်ႈလၵ်းၼမ်းၶွင် RCSS/SSA လႄႈၶၵ်ႉၵၢၼ်လွင်ႈငမ်းယဵၼ် တင်ႇတႄႇလႆႈလူင်းလၢႆးမိုဝ်း ၸွမ်းလူင်ပွင်ၸိုင်ႈမႃး ထိုင်ၶၵ်ႉတွၼ်ႈလႂ်  ၼင်ႇႁိုဝ်ၵူၼ်းမိူင်း ပေႃးတေလႆႈႁူႉ။

ပူၼ်ႉမႃး မိူဝ်ႈဝၼ်းတီႈ 18/07/2015 ၶၢဝ်းယၢမ်း 13.00 ထိုင် 15.00 မူင်း RCSS/SSA  လူင်းႁူပ်ႉထူပ်းၵူၼ်းမိူင်းၵဵင်းတုင် တီႈႁူင်းႁေႃတႆးလိုဝ်ႉ ဝၢၼ်ႈၼွင်ၶမ်း ပွၵ်ႉ 3 ဝဵင်းၵဵင်းတုင် ၸိုင်ႈတႆး ပွတ်းဢွၵ်ႇ သေသပ်းလႅင်းၼႄ ၵဵဝ်ႇလူၺ်ႈယႃႈမဝ်းၵမ် ၽွၼ်းလီ/ႁၢႆႉ တေႁဵတ်းႁိုဝ်ၵႄႈလိတ်ႈ၊ ႁူမ်ႈၵၼ်ၽဵဝ်မူၺ်ႉ၊ လၵ်းၼမ်းၶွင် RCSS/SSA  လႄႈၶၵ်ႉၵၢၼ်လွင်ႈငမ်းယဵၼ် ဢၼ်လႆႈလူင်းလၢႆးမိုဝ်းၸွမ်းလူင်ပွင်ၸိုင်ႈ ထိုင်ၶၵ်ႉၵၢၼ်တွၼ်ႈလႂ်ယဝ်ႉၸိူဝႅးၼႆႉ ႁႂ်ႈၵူၼ်းမိူင်းပေႃးလႆႈႁူႉၼႆယဝ်ႉ။


ၸၢႆးလူင်ဝုၼ်း ႁူဝ်ပဝ်ႈၵူၼ်းၼုမ်ႇ ၸိုင်ႈတႆး လၢတ်ႈဝႃႈ ၸုမ်း RCSS/SSA  လႆႈလူင်းႁူပ်ႉထူပ်းၵူၼ်းမိူင်း သပ်းလႅင်းလၢတ်ႈၼႄမီး 3 ၶေႃႈ- 1. လွင်ႈၵၢၼ်ငမ်းယဵၼ်၊ 2. လွင်ႈလၵ်းၼမ်း(ပေႃႇလသီႇ)ၶွင် RCSS/SSA ၊ 3. လွင်ႈယႃႈမဝ်းၵမ် ၵမ်ႈၼမ် ပဵၼ်လွင်ႈယႃႈမဝ်းၵမ် လႄႈတေႁဵတ်းႁိုဝ်ႁူမ်ႈမိုဝ်းၵၼ်ၽဵဝ်ႈ ဝႃႈၼႆ။

ပၢင်ႁူပ်ႉထူပ်းၵူၼ်းမိူင်း တီႈဝဵင်းၵဵင်းတုင်ၵမ်းၼႆႉ မီးၽူႈၶဝ်ႈႁူမ်ႈ မိူၼ်ၼင်ႇ ပႃႊတီႊၵၢၼ်မိူင်း ပီႈၼွင်ႉၸၢဝ်းၶိူဝ်း ဢၼ်ယူႇတီႈၼႂ်းၸႄႈဝဵင်းၵဵင်းတုင် တင်းမူတ်းတေမီးမွၵ်ႈ 300 ၵေႃႉၼႆယဝ်ႉ။


ၸဝ်ႈၼႃႈတီႈ ဢၼ်ဢဝ်ပုၼ်ႈၽွၼ်ႈ ၼႂ်းၸုမ်း RCSS/SSA  လူင်းႁူပ်ႉထူပ်းၵူၼ်းမိူင်းၼၼ်ႉ လႆႈၸႅၵ်ႇၼႃႈတီႈၵၼ်ဝႆႉ မီး 3 ၸုမ်း၊ ၸၢႆးသႅင်ႁၢၼ် ဢွၼ်ႁူဝ်ၸုမ်းၼိုင်ႈ၊ ၸၢႆးၶမ်းၸၢမ်ႇ ၸုမ်းၼိုင်ႈ လႄႈၸၢႆးၵျေႃႇ ၸုမ်းၼိုင်ႈ 1 ၸုမ်းလႂ် 10 ၵေႃႉ ၼႆယဝ်ႉ။