ယွၼ်ႉၾူၼ်တူၵ်းႁႅင်းသေ ၵိူတ်ႇၼမ်ႉၼွင်း ယႂ်ႇလူင် တီႈဝဵင်းသီႇပေႃႉ၊ ႁဵတ်းႁႂ်ႈၶူဝ်လူင် ၼမ်ႉပေႃႉ ၼႂ်းၵၢင်ဝဵင်းလႆႈၵူၼ်ႇပင်းလႄႈ ၵူၼ်းၵႂႃႇတူၺ်းၼမ်ႉၼွင်း ထၢႆႇႁၢင်ႈ လွင်ႈလႆပႃးၵႂႃႇၸွမ်းၼမ်ႉၼွင်း ဝၢတ်ႇၸဵပ်းလူႉတၢႆၽွင်ႈ။

မိူဝ်ႈဝၼ်းတီႈ 25/07/2015 ဢိင်ၼိူဝ်ၾူၼ်တူၵ်းႁႅင်းသေ မႄႈၼမ်ႉပေႃႉ ဢၼ်လႆလတ်းၽၢၼ်ႇ ၵၢင်ဝဵင်းသီႇပေႃႉ ၸိုင်ႈတႆးပွတ်းႁွင်ႇ ၼွင်းမႃးႁႅင်းလႄႈၵူၼ်းဝၢၼ်ႈၵူၼ်းမိူင်း ဢွၼ်ၵၼ်ၵႂႃႇတူၺ်းၼမ်ႉၼွင်း၊ ၵမ်ႈၽွင်ႈၵႂႃႇယူႇ ၼိူဝ်ၶူဝ်သေတူၺ်း၊ ၽွင်းၼၼ်ႉၶူဝ်သမ်ႉဢမ်ႇတၢၼ်ႈၶႂၢင်ႁႅင်းၼမ်ႉလႄႈၵူၼ်ႇပင်းၵွႆ ႁဵတ်းႁႂ်ႈၵူၼ်းလွင်ႈပႃးၵႂႃႇၸွမ်းၼမ်ႉ မွၵ်ႈ 20 ၵေႃႉ တင်းလူတ်ႉၶိူင်ႈၵမ်ႈၽွင်ႈ - ၵူၼ်းၼုမ်ႇ ယူႇသီႇပေႃႉ ၵေႃႉၼိုင်ႈလၢတ်ႈၼင်ႇၼႆ။


လိုၼ်းသုတ်းလႆႈႁူႉထႅင်ႈဝႃႈ - ၵဵဝ်ႇၵပ်းၶူဝ်လူင်ၵူၼ်ႇပင်း ယွၼ်ႉၼမ်ႉတွင်ႈသႂ်ႇႁႅင်းလႄႈ ႁဵတ်းႁႂ်ႈၵူၼ်းၸိူဝ်းယူႇၼိူဝ်ၶူဝ်တူၺ်း/ထၢႆႇႁၢင်ႈ လွင်ႈလႆၵႂႃႇၸွမ်းၼမ်ႉ 20 ၵေႃႉၼၼ်ႉ ၶူၼ်ႉသွၵ်ႈၶႆႈႁႃႁၼ်ၶၢပ်ႈတူဝ်တၢႆ 3 ၵေႃႉ၊ 2 ၵေႃႉ ဝၢတ်ႇၸဵပ်းလိူဝၸႂ်သေ သူင်ႇၶဝ်ႈယူတ်းယႃ တီႈႁူင်းယႃ၊ တႃႇ 15 ၵေႃႉ တိုၵ်ႉႁၢႆလၢႆဝႆႉ။


ၵဵဝ်ႇၵပ်းလူၺ်ႈ မႄႈၼမ်ႉပေႃႉၼွင်းၼႆႉ ႁိူၼ်းၸၢဝ်းမၢၼ်ႈၶဝ် ဢၼ်ယူႇၸွမ်းသၢပ်ႇၾင်ႇၼမ်ႉၼၼ်ႉ ပႃးၵႂႃႇတင်းၼမ်။ ၵူၺ်းၵႃႈ လၢႆလင်ၼႆတႄႉ ပႆႇၸၢင်ႈလၢတ်ႈ၊ ၵွပ်ႈဝႃႈ မၼ်းပဵၼ်ႁိူၼ်းသုမ်ႉဢွပ်း သုမ်ႉဢႅပ်းဢွၼ်ႇ ဢၼ်တိုၵ်ႉၸင်ႇႁႃမႃးႁဵတ်းယူႇၸွမ်းၾင်ႇၼမ်ႉၼၼ်ႉၵူၺ်း- ၵူၼ်းသီႇပေႃႉ ၵေႃႉၼိုင်ႈလၢတ်ႈ။


ၼမ်ႉပေႃႉၼႆႉ ပဵၼ်ၼမ်ႉဢၼ်လႆႈလတ်းၽႃႇၵၢင်ဝဵင်းသီႇပေႃႉသေ ၵႂႃႇႁူမ်ႈၵၼ်တင်းၼမ်ႉတူႈ။ ၶူဝ်လင်ဢၼ်ၵူၼ်ႇပင်းၼႆႉ ပဵၼ်ၶူဝ်ဢၼ်သၢင်ႈၸဵမ်မိူဝ်ႈပၢၼ်ၸဝ်ႈၾႃႉ၊ ယၢမ်းလဵဝ် ဢႃယုလႆႈ 126 ပီ။ ပူၼ်ႉမႃးမိူဝ်ႈပီၵၢႆ ၼၼ်ႉ ၵူၼ်းမိူင်းၼႂ်းပိုၼ်ႉတီႈ တၢင်ႇထိုင် Budget တီႈလူင်ပွင်ၸိုင်ႈသေ လူင်းမႃးယဝ်ႉၵေႃႈ ၾၢႆႇၵေႃႇသၢင်ႈဝဵင်းသီႇပေႃႉၶဝ် သမ်ႉဢမ်ႇၶိုၼ်းမႄးၵုမ်းၵေႃႇသၢင်ႈလႄႈ ၸင်ႇလႆႈၵူၼ်ႇပင်းၵႂႃႇ- ၼႆယဝ်ႉ။