ပႃႊတီႊသိူဝ်ၽိူၵ်ႇ ၸတ်းပၢင်ၵုမ်ၶွမ်ႊမတီႊ ငဝ်ႈငုၼ်း ဢွၵ်ႇၶေႃႈၵိၼ်ၵႅၼ်ႇ



ပႃႊတီႊသိူဝ်ၽိူၵ်ႇ ၸတ်းႁဵတ်းပၢင်ၵုမ် ၶွမ်ႊမတီႊငဝ်ႈငုၼ်း ဢၼ်ယဝ်ႉတူဝ်ႈၵႂႃႇၼၼ်ႉ ႁဵတ်းလိၵ်ႈၵိၼ်ၵႅၼ်ႇ ၵႅတ်ႇၵင်ႈဝႆႉ ၼင်ႇႁိုဝ်ၽွင်းတႅၼ်းလႄႈ ၽူႈတႅၼ်းၶဝ် တေဢမ်ႇမီးလွင်ႈလႅၵ်ႈလၢႆႈၶၢႆႉဢွၵ်ႇပႃႊတီႊ။



ပၢင်ၵုမ်လူင် ၶွမ်ႊမတီႊငဝ်ႈငုၼ်း ပႃႊတီႊသိူဝ်ၽိူၵ်ႇ ႁိုဝ် ၻီႊမူဝ်ႊၶရႅတ်ႊတိၵ်ႉၶ် ပႃႊတီႊၸၢဝ်းၶိူဝ်းတႆး (SNDP) ၼႆႉ ၸတ်းႁဵတ်းၵႂႃႇမိူဝ်ႈဝၼ်းတီႈ 24/07/2015 တီႈဝတ်ႉဝေလုဝၼ် ပွၵ်ႉၵျွင်းၵျီးသု ဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ၵေႃပွင်ၵၢၼ်ငဝ်ႈငုၼ်း တင်းၽွင်းတႅၼ်းလႄႈၽူႈတႅၼ်းၶဝ် လႆႈႁူပ်ႉထူပ်းဢုပ်ႇၵုမ် ၵၼ်သေ ႁဵတ်းဢွၵ်ႇမႃးလိၵ်ႈၵိၼ်ၵႅၼ်ႇ ၼႂ်းၵႄႈၵၢင်ပႃႊတီႊလႄႈၽူႈတႅၼ်း။ လိၵ်ႈၵိၼ်ၵႅၼ်ႇၼႆႉ မီး 6 ၶေႃႈ။ ၽူႈတႅၼ်းၶဝ်လႄႈၶွမ်ႊမတီႊၾၢႆႇပၵ်းပိူင်မၢႆမီႈပႃႊတီႊ ၼႂ်းၸုမ်းၶွမ်ႊမတီႊငဝ်ႈငုၼ်း သွင်ပႃႈသွင်ၾၢႆႇ လႆႈဢွၼ်ၵၼ်လူင်းလၢႆးမိုဝ်း တီႈလိၵ်ႈၵိၼ်ၵႅၼ်ႇၼၼ်ႉ- ၼႆယဝ်ႉ။

ၸၢႆးလႃႉၵျေႃႇ ၽူႈၼမ်းၼႂ်းၵူႈလွင်ႈလွင်ႈ ပႃႊတီႊသိူဝ်ၽိူၵ်ႇ လၢတ်ႈဝႃႈ- ပႃႊတီႊႁဝ်းၶႃႈၼႆႉ ဢဝ်ၸိူဝ်ႉၸၢတ်ႈပဵၼ်ပိူင်လူင်၊ ပေႃးဝႃႈ လုၵ်ႈၸုမ်းၶဝ် ဢွၼ်ၵၼ်ၶဝ်ႈမႃးၼႂ်းပႃႊတီႊႁဝ်းသေ ဢမ်ႇႁိုင်သင် သမ်ႉ ၶၢႆႉထွၼ်တူဝ်ဢွၵ်ႇၵႂႃႇ၊ ၶၢႆႉလႅၵ်ႈလၢႆႈပႃႊတီႊၵႂႃႇၸိူဝ်းၼႆႉ မၼ်းပဵၼ်ဢၼ်လမ်ႇလွင်ႈလူင် တႃႇပႃႊတီႊဢၼ်ၼိုင်ႈ။ ၵွပ်ႈၼၼ် ႁဝ်းၶႃႈၵေႃႈလႆႈႁဵတ်းလိၵ်ႈၵိၼ်ၵႅၼ်ႇၼႆႉမႃး ပိူဝ်ႈတႃႇၵႅတ်ႇၶႄၸုမ်းႁဝ်း ပႃႊတီႊႁဝ်းၵူၺ်း၊ ၼင်ႇႁိုဝ်တေႁႄႉၵင်ႈလႆႈ လုၵ်ႈၸုမ်းဢၼ်ၶၢႆႉၵႂႃႇၶၢႆႉၶိုၼ်းၼၼ်ႉယဝ်ႉ- ဝႃႈၼႆ။

ၼႂ်းလိၵ်ႈၵိၼ်ၵႅၼ်ႇၼၼ်ႉ မီး 6 ၶေႃႈ။ မိူၼ်ၼင်ႇ လုၵ်ႈၸုမ်းပႃႊတီႊၶဝ်ၼႆႉ ပေႃးဝႃႈဝၢႆးလင်ၵၢၼ်လိူၵ်ႈတင်ႈ ထုၵ်ႇလိူၵ်ႈပဵၼ်ၽူႈတႅၼ်းယဝ်ႉလႄႈသင်၊ ဢမ်ႇၼၼ်ၵေႃႈ ထုၵ်ႇလိူၵ်ႈတင်ႈၶဝ်ႈပႃးၼႂ်းၸုမ်းလူင်ပွင်ၸိုင်ႈ လႄႈသင်၊ တေလႆႈၸွမ်းၶေႃႈၵိၼ်ၵႅၼ်ႇ ပၵ်းပိူင်မၢႆမီႈပႃႊတီႊ ဢၼ်မီးဝႆႉ။ သင်ၸိူဝ်ႉဝႃႈ ဢမ်ႇၸွမ်း ၶေႃႈၵိၼ်ၵႅၼ်ႇ ပၵ်းပိူင်ၼၼ်ႉသေ ယႃႉၶေႃႈတူၵ်းလူင်း ၶေႃႈၵိၼ်ၵႅၼ်ႇၵၼ်ၸိုင် ယူႇတီႈၽူႈတႅၼ်းၵေႃႉၼၼ်ႉ ဢမ်ႇၼၼ် လုၵ်ႈၸုမ်းပႃႊတီႊၵေႃႉၼၼ်ႉ တေလႆႈယွမ်းထွၼ်တူဝ်ဢွၵ်ႇပႃႊတီႊ ၸွမ်းလူၺ်ႈၵၢင်ၸႂ်ၸဝ်ႈၵဝ်ႇ (ဢမ်ႇၸႂ်ႈပႃႊတီႊသူၼ်းဢီးဢွၵ်ႇ)သေ တေလႆႈလူင်းလၢႆးမိုဝ်းဝႆႉ။

ပေႃးဝႃႈ ဢမ်ႇၸွမ်းပၵ်းပိူင်မၢႆမီႈၼႆၸိုင် ၾၢႆႇၶွမ်ႊမတီႊၵုမ်းၵမ်မၢႆမီႈ ၼႂ်းပႃႊတီႊ တေဢဝ်တၢင်ႇလုမ်းသေ ၵၢဝ်ႇႁႃ (ၸွႆးတြႃး) ၊ လွင်ႈၼႆႉၵေႃႈ ၾၢႆႇၽူႈပူၼ်ႉပႅၼ် လုၵ်ႈၸုမ်းပႃႊတီႊၼႆႉ တေလႆႈႁပ်ႉ ၶေႃႈၵၢဝ်ႇႁႃ ၼႆႉ။ လိူဝ်သေၼၼ်ႉ ပေႃးဝႃႈပူၼ်ႉပႅၼ်မၢႆမီႈပႃႊတီႊၸိုင် ဢၼ်ပႃႊတီႊၸွႆႈပၼ်ငိုၼ်းၸႂ်ႉၸၢႆႇၼၼ်ႉ   တေလႆႈသၢႆႈတႅၼ်းၶိုၼ်း 50 ပုၼ်ႈ။ ၼွၵ်ႈသေၼၼ်ႉ မိူၼ်ၼင်ႇဢၼ်ၵႂႃႇပဵၼ်ၽူႈတႅၼ်းၽသႃးၵူၼ်းမိူင်း၊ သၽႃးၸိူဝ်ႉၸၢတ်ႈ၊ သၽႃးၸႄႈမိူင်း၊ သၽႃးၸႄႈတိူင်းၶဝ်ၸိူဝ်းၼၼ်ႉလႄႈသင်၊ ဢၼ်ၶဝ်ႈပႃးပဵၼ်ၼႂ်း ၽွင်းလူင်မိူင်းႁူမ်ႈတုမ်၊ ၵႅမ်ၽွင်းလူင်ၶဝ်ၸိူဝ်းၼႆႉလႄႈသင်၊ ဢၼ်လႆႈၶဝ်ႈပဵၼ်ၽွင်းလူင် ၼႂ်းၸႄႈတိူင်းလႄႈတင်းၸႄႈမိူင်းလႄႈသင်၊ ဢၼ်ၶဝ်ပႃးၼႂ်းလုၵ်ႈၸုမ်း ၽွင်းလူင်ၵဵဝ်ႇလူၺ်ႈၸုမ်းၸၢဝ်းၶိူဝ်း ၸိူဝ်းၼၼ်ႉလႄႈသင်၊ ၶဝ်ၸိူဝ်းၼႆႉ ပေႃးဝႃႈၶဝ်လႆႈ ငိုၼ်းရၢင်းဝလ်း (ငိုၼ်းသူး) တီႈလူင်ပွင်ၸိုင်ႈ/ ဢၼ်လူင်ပွင်ၸိုင်ႈယိုၼ်ႈမႅင်ႇ (ၵူႈလိူၼ်)ၼၼ်ႉ တႃႇ 2% ၶွင် ငိုၼ်းရၢင်းဝလ်း တေလႆႈဢဝ်မႃးသႂ်ႇပဵၼ်ငိုၼ်းၵွင်ၵၢင် ပႃႊတီႊၶိုၼ်း၊ ပႃးဝႆႉၸိူင်ႉၼၼ်- ဝႃႈၼႆ။

ပႃႊတီႊသိူဝ်ၽိူၵ်ႇၼႆႉ မိူဝ်ႈပီ 2010 ၶဝ်ႈၶေႉၶႅင်ႇလိူၵ်ႈတင်ႈ လႄႈ လႆႈၽူႈတႅၼ်းၼႂ်းသၽႃး 58 ။ ၼႂ်းပၢင်လိူၵ်ႈတင်ႈပီ 2015 ၼႆႉ တေသူင်ႇလုၵ်ႈၸုမ်းၶဝ်ႈၶႄႉၶႅင်ႇလူင်းလိူၵ်ႈပဵၼ်ၽူႈတႅၼ်း 200 ၊ ၼႂ်းၼၼ်ႉ မီးၼၢင်းယိင်း 30 ၵေႃႉ။




 
© 2012 All Rights Reserved | Asean Celebrity | Fonts @ AtFonts | Free Templates