သွင်ၵေႃႉမႄႈလုၵ်ႈ ၵူၼ်းတႃႈၶီႈလဵၵ်း ၽၢတ်ႇၵၼ်ႁိုင် 20 ပီ လုၵ်ႈၸွမ်းၶႆႈႁႃမႄႈၶိုၼ်းလႄႈ လႆႈထူပ်းၵၼ်ၶိုၼ်းတီႈ တီႈမႄႈသၢႆ။

ၵေႃႉပဵၼ်လုၵ်ႈၸိုဝ်ႈ ၼၢင်းဢႃးမိုဝ်း ဢႃယု 55 ပီ ယူႇတီႈ ဝဵင်းတႃႈၶီႈလဵၵ်းလႆႈ မႃးၸႅင်ႈတီႈ ၸဝ်ႈၼႃႈတီႈ ပလိၵ်ႈထႆးမႄႈသၢႆဝႃႈၵေႃႉပဵၼ်မႄႈ ၸိုဝ်ႈ ၼၢင်းမီယိူဝ် မႃးယိူဝ်း ဢႃယု 71 ပီ လႆႈႁၢႆၵႂႃႇႁိုင် 20 ပီ။

မိူဝ်ႈဝၼ်းတီႈ 16 လိူၼ်ၵျႃၼ်ႊ 2015 ၼၼ်ႉ ၸဝ်ႈၼႃႈတီႈၾၢႆႇၵူတ်ႇၵူၼ်းၶဝ်ႈမိူင်း ၸႄႈ တွၼ်ႈၵဵင်းႁၢႆး လႆႈႁပ်ႉၵၢၼ်ၵပ်းသၢၼ်တင်း  သုၼ်ၶႅတ်ႉထူဝ်ႊလိတ်ႊ ၽရႃႉဝိသုတ်ႊထိဝူင်း (ศูนย์คาทอลิกพระวิสุทธิวงศ์ ) မၢႆ 107 မူႇ 7 ဢိူင်ႇပူင်ႇငၢမ်း ၸႄႈဝဵင်းမႄႈသၢႆ ၸႄႈတွၼ်ႈ ၵဵင်းႁၢႆး သေၸင်ႇလႆႈထူပ်းႁၼ်ၶိုၼ်း  ပႃႈၼၢင်းမီယိူဝ် မႃးယိူဝ်း ဢႃယု 71 ပီ  ယူႇသဝ်းတီႈ သုၼ်ၶႅတ်ႉထူဝ်ႊလိတ်ႊ ၽရႃႉဝိသုတ်ႊထိဝူင် ။

ၼၢင်းမီယိူဝ် လၢတ်ႈဝႃႈ “မၼ်းၼၢင်းမီးလုၵ်ႈ 6 ၵေႃႉ လႆႈလုတၢႆၵႂႃႇ 5 ၵေႃႉ ၵိုတ်းလုၵ်ႈ ယိင်းၵေႃႉလဵဝ်ၵူၺ်းသေ လႆႈဢွၵ်ႇမႃးႁႃၵိၼ်လဵင်ႉတွင်ႉၸွမ်းလႅၼ်လိၼ်ထႆး။ ဝၢႆးၼၼ်ႉလႆႈ ၶၢမ်ႈမႃးႁႃၵိၼ်တၢင်းၾင်ႇမႄႈသၢႆသေ   ဢမ်ႇယူႇလီပဵၼ်ၵိၼ်းၵႂႃႇၼွၼ်း ယူႇၼႃႈ သုၼ် ၶႅတ်ႉထူဝ်ႊလိတ်ႊၽရႃႉဝိသုတ်ႊထိဝူင်း။ ၸဝ်ႈၼႃႈတီႈၼႂ်းသုၼ် ၵေႃႈမႃးၸွႆႈထႅမ် ဢဝ်ၵႂႃႇယူႇတီႈၼႂ်းသုၼ်တူၺ်းလွမ်လုမ်းလႃးမႃးတေႃႇထိုင်လုၵ်ႈယိင်း ပေႃးမႃးၸွမ်းၶႆႈ ”။

ဝၢႆးၼၼ်ႉၸဝ်ႈၼႃႈတီႈၵေႃႈဢဝ်ၼၢင်းမီယိူဝ်း ဢၢပ်ႈပၼ်ပီႈၼွင်ႉၼိူဝ်ၶူဝ်ၶၢမ်ႈလႅၼ်လိၼ် ထႆး - မၢၼ်ႈ မႄႈသၢႆ တႃႈၶီႈလဵၵ်း။ (ဢိင်ၶေႃႈမုလ်း တီႈ ASTV)