ပႃႊတီႊႁူဝ်သိူဝ် SNLD ပိုတ်ႇလုမ်းတီႈတိူင်းလူင် ဝဵင်းလိူဝ်ႇထႅင်ႈ မီးၽူႈယႂ်ႇၵူၼ်းလူင် ၼႂ်းပႃႊတီႊႁူဝ်သိူဝ်လႄႈ တၢင်ႇပႃႊတီႊ မႃးၶဝ်ႈႁူမ်ႈ။

ၸဝ်ႈၶုၼ်ထုၼ်းဢူး ၵၢဝ်ႇလၢတ်ႈၶေႃႈၵႂၢမ်း

မိူဝ်ႈၼႆႉ ဝၼ်းတီႈ 17/06/2015 ပႃႊတီႊႁူဝ်သိူဝ် SNLD ပိုတ်ႇလုမ်း တီႈၶွင်ႉ (6)၊ ႁူင်းမၢႆ (5)၊ တိူၵ်ႈသူၺ်ႇပီႇမၢၼ်ႇတလႃႇ (ၼွင်ၵႂၢႆး)၊ ၼႂ်းၵႄႈသဵၼ်ႈတၢင်း 77-78၊ ၼႂ်းၵိဝ်ႇ 9-10 ၼွင်ၵႂၢႆး၊ ၶျၢၼ်းမျႃႉတႃႇယႃႇ၊ ၸႄႈဝဵင်းၶျၢၼ်းမျႃႉတႃႇၸီႇ၊ ဝဵင်းလိူဝ်ႇသေ ပူၵ်ႉပၢႆႉပႃႊတီႊႁူဝ်သိူဝ်လႄႈ ပူၵ်းတုင်းၸိူဝ်ႉၸၢတ်ႈၸိုင်ႈတႆး။

ႁူဝ်ပဝ်ႈလူင် ၸဝ်ႈၶုၼ်ထုၼ်းဢူး ၵၢဝ်ႇလၢတ်ႈဝႃႈ  ႁဝ်းပိုတ်ႇလုမ်းမႃးၵူႈၸႄႈဝဵင်း တေႃႇထိုင်ယၢမ်းလဵဝ်ၼႆႉ မီး 62 တီႈယဝ်ႉ ဢၼ်ႁဝ်းလႆႈႁဵတ်းၵၢၼ် ငဝ်ႈငုၼ်းၻီႊမူဝ်ႊၶရေႊၸီႊၸိူဝ်ႉၶိူဝ်းတႆး ႁဝ်းၼႆႉ ဢၼ်ႁဝ်းယုမ်ႇယမ်ပဵၼ် မိူင်းႁူမ်ႈတုမ်ၸိုၼ်ႈၸၢင်ႇ တႃႇတေမီးသုၼ်ႇလႆႈၽဵင်ႇပဵင်းၵၼ် တႃႇတေလႆႈၽွင်းငမ်းႁင်းၵွႆး ၵွပ်ႈပိူဝ်ႈယုမ်ႇယမ်ၸိူင်ႉၼႆလႄႈ ႁဝ်းၸွင်ႇႁဵတ်းၵၢၼ်မိူင်းမႃး။ မိူဝ်ႈပူၼ်ႉမႃး လွင်ႈဢၼ်တပ်ႉသိုၵ်းမၢၼ်ႈ တဵၵ်းတဵင်ႁဝ်းၼၼ်ႉၵေႃႈ ႁဝ်းၺႃးမႃးယဝ်ႉ ၵူၺ်းၵႃႈဝႃႈ ႁဝ်းဢမ်ႇႁူၼ်။ တေႃႈလဵဝ်ပေႃးဝႃႈတေလိူၵ်ႈတင်ႈ 2015 ၼႆႉ ပုၼ်ႈၽွၼ်းမၼ်းမီးၼိူဝ်ၵူၼ်းမိူင်းတႄႉတႄႉဝႃႈဝႃႈဢိူဝ်ႈ ဝႃႈၼႆ။

ပၢင်ပိုတ်ႇလုမ်းႁူဝ်သိူဝ် SNLD မီးၽူႈယႂ်ႇၵူၼ်းလူင်ၶဝ်ႈႁူမ်ႈ ႁူဝ်ပဝ်ႈလူင်ၸဝ်ႈၶုၼ်ထုၼ်းဢူး၊ ၵႅမ်ႁူဝ်ပဝ်ႈၸၢႆးလဵၵ်ႉ၊ ၽူႈၼမ်းၼႂ်းၵူႈလွင်ႈလွင်ႈ ၸၢႆးၼုတ်း ( ၸၢႆးၺုၼ်ႉလုၼ်ႇ)၊  ၽူႈဢွၼ်ၵေႃႇတင်ႇပႃႊတီႊ(ၼႃယၵ) လုင်းၶမ်းလႅင် (လုင်းသူၺ်ႇမူဝ်း)၊ ၸၢႆးဢႅၵ်ႉၵ၊ လုင်းၶမ်းပိူင်ႇၾႃႉ၊ ၽွင်းတႅၼ်းသႃၽႃး ၵူၼ်းမိူင်း ၸၢႆးၸိုၼ်ႈသႂ်၊ ႁူဝ်ၼႃႈပႃႊတီႊတၢင်ႇၸုမ်းၵေႃႈ မႃးၶဝ်ႈႁူမ်ႈပၢင်ပိုတ်ႇလုမ်းၸွမ်းမိူၼ် ပႃႊတီႊၻီႊမူဝ်ႊၶရေႊတိၵ်ႉၶ် တူင်ႇဝူင်းၵူၼ်းမႂ်ႇ၊ ပႃႊတီႊတႆးလႅင်၊ ပႃႊတီႊၼူၵ်ႉယုင်း၊ ပႃႊတီႊႁူင်းၶဝ်ႈ ၸဵမ်ၸိူဝ်ႉၼႆႉ။

ၽူႈၵေႃႇတင်ႈပႃႊတီႊႁူဝ်သိူဝ် (ၼႃယၵ) လုင်းၶမ်းလႅင်(လုင်းသူၺ်ႇမူဝ်း) ပိုတ်ႇလၢတ်ႈၶေႃႈၵႂၢမ်းဝႃႈ ပႃႊတီႊႁဝ်းၼႆႉလႆႈတင်ႈမႃး မိူဝ်ႈပီ 1989 တေႃႇထိုင်ယၢမ်းလဵဝ် ထုၵ်ႇလႆႈဢဝ်ႁႅင်းၸိူဝ်း ၸဝ်ႈၶုၼ်ထုၼ်းဢူးၶဝ်ၸိူဝ်ႉၼႆႉ သိုပ်ႇဢွၼ်ႁူဝ်ၵႂႃႇ ၵဝ်တႄႉဢႃယုယႂ်ႇယဝ်ႉ တေၸၢင်ႈပၼ်ႁႅင်းၸႂ်လႆႈၵူၺ်းယဝ်ႉ ဝႃႈၼႆ။


သိုပ်ႇလၢတ်ႈထႅင်ႈဝႃႈ ၼႂ်းမိုဝ်းပေႃႈမႄႈပီႈၼွင်ႉၵူၼ်းမိူင်းၼႆႉ မီးဝႆႉသုၼ်ႇတႅပ်းတတ်းလိူၵ်ႈၽူႈတႅၼ်း ဢၼ်တေမႃးတႅၼ်းတၢင်တူဝ်ႁဝ်းသေလၢတ်ႈပၼ်ႁဝ်းၼႂ်းသၽႃး ၵႄႈလိတ်ႈပၼ်ႁႃပၼ်ႁဝ်းၵူၼ်းမိူင်း ၵွပ်ႈၼႆမၼ်းလမ်ႇလွင်ႈၶိုၵ်ႉတွၼ်းၵၢၼ်တႅပ်းတတ်းၵၢင်ၸႂ်ႁဝ်းၵမ်းၼႆႉတႄႉတႄႉ ဝႃႈၼႆ။

ၽူႈၼမ်းၼႂ်းၵူႈလွင်ႈလွင်ႈ ၸၢႆးၼုတ်း (ၸၢႆးၺုၼ်ႉလုၼ်ႇ) လၢတ်ႈဝႃႈ ၶေႃႈယိူင်းဢၢၼ်းႁဝ်းဢမ်ႇပိူင်ႈ၊ ႁဝ်းဢမ်ႇလႅၵ်ႈလၢႆႈသင် ၵူၺ်းၵႃႈပၢႆးတိုၵ်း(ၸိတ်ႉပိဝ်ႇႁႃႇ)တေႉႁဝ်းလႅၵ်ႈလၢႆႈယူႇ၊ ၼႂ်းပီ 2015 ၼႆႉ ပၢင်လိူၵ်ႈတင်ႈ ႁဝ်းတေၶဝ်ႈလိူၵ်ႈ ဢမ်ႇၶဝ်ႈလိူၵ်ႈၼႆၼၼ်ႉ ႁဝ်းဢမ်ႇပႆႇဝႃႈသင်။ ၵူၺ်းၵႃႈဝႃႈ ငဝ်းလၢႆးမၼ်းပၼ်မႃး တႃႇတေၶဝ်ႈလႆႈၵမ်းသိုဝ်ႈၼၼ်ႉ ႁဝ်းတေလႆႈတူဝ်ႈတၢၼ်းဝႆႉ ယွၼ်ႉၼႆ ႁဝ်းၸွင်ႇလႆႈမႃးပိုတ်ႇလုမ်း ဝႃႈၼႆ။

ႁူဝ်ပဝ်ႈပႃႊတီႊၻီႊမူဝ်ႊၶရေႊတိၵ်ႉၶ် တူင်ႇဝူင်းၵူၼ်းမႂ်ႇ(လူႉပေါင်သစ် တစ်မိုခရေတီ) လုင်းဢွင်ႇမဵဝ်ႇၵျေႃႇ လၢတ်ႈဝႃႈ ပႃႊတီႊၻီႊမူဝ်ႊၶရေႊတိၵ်ႉၶ်ၼႆႉ တႄႇတင်ႈမႃးမိူဝ်ႈ 1988။ ၵူၺ်းၵႃႈဝႃႈ ၶဝ်လႆႈလပ်းလပ်းသေႁဵတ်းၵၢၼ်မိူင်းမႃး တေႃႈလဵဝ်ၼႆႉ လႆႈတင်ႈပႃႊတီႊမႂ်ႇသေတႃႉၵေႃႈ မၼ်းပဵၼ်ဢၼ်ၵဝ်ႇမိူဝ်ႈဢွၼ်တၢင်းၵူၺ်းၼင်ႇၵဝ်ႇ။ တေႃႇယၢမ်းလဵဝ် ဢၼ်ႁဝ်းၶႃႈလႆႈမႃး ပိုတ်ႇပႃႊတီႊၸိူဝ်ႉၼႆႉၵေႃႈ လႆႈဝႃႈၸဝ်ႈၶုၼ်ထုၼ်းဢူးၶဝ် ပၼ်ႁႅင်းၶဝ်မႃးတႄႉတႄႉဝႃႈဝႃႈ ၵွပ်ႈၼႆလႆႈၶွပ်ႈၸႂ်ယွင်ႈၵုၼ်းမုၼ်ငဝ်းတႄႉ။ ထႅင်ႈလွင်ႈၼိုင်ႈၵေႃႈ မၼ်းဢမ်ႇထၢင်ႇဝႃႈ SNLD ၼႆႉႁဵတ်းတႃႇတႆးဢၼ်လဵဝ်ၵူၺ်းဢမ်ႇၸႂ်ႈ ၶႃႈႁဝ်းႁၼ်ထိုင်ၼႆႉတႄႉ မၼ်းႁဵတ်းတႃႇၵူႈၸၢဝ်းၶိူဝ်း၊ တႃႇတေလႆႈလွင်ႈၸိုၼ်ႈၸၢင်ႈမိူင်းႁူမ်ႈတုမ် ၸဵမ်ၸိူဝ်ႉၼႆႉ ဝႃႈၼႆ။

ႁူဝ်ပဝ်ႈလုမ်းပႃႊတီႊႁူဝ်သိူဝ် ဝဵင်းလိူဝ်ႇ တွၵ်ႊတိူဝ်ႊၸၢႆးၼေႃႇၶိူဝ်း ၵၢဝ်ႇလၢတ်ႈၶေႃႈၵႂၢမ်းဝႃႈ ဢၼ်ပႃႊတီႊႁဝ်း တေလႆႈဢိင်ပိုင်ႈၵူၼ်းမိူင်းဝဵင်းလိူဝ်ႇႁဝ်း ပၼ်ဢဵၼ်ပၼ်ႁႅင်း၊ ယဝ်ႉၵေႃႈ ဢၼ်တင်ႇပႃႊတီႊ မႃးၶဝ်ႈႁူမ်ႈၸိူဝ်းၼႆႉၵေႃႈယိၼ်းၸူမ်းတႄႉတႄႉ ၼႆယဝ်ႉ။

ၽူႈယႂ်ႇၵူၼ်းလူင်ၵၢဝ်ႇလၢတ်ႈၶေႃႈၵႂၢမ်းယဝ်ႉဢိုတ်းႁပ်းပၢင်သေ ၵိၼ်ၶဝ်ႈႁူမ်ႈမူႇၵၼ် ။

ပႃႊတီႊႁူဝ်သိူဝ်ပိုတ်ႇလုမ်းတီႈဝဵင်းလိူဝ်ႇ တင်ႈတႄႇၶၢဝ်းယၢမ်း 09.00 မူင်း ၵၢင်ၼႂ် ထိုင် 10.00 မူင်း ၵၢင်ၼႂ်  တင်းမူတ်းၽူႈၶဝ်ႈႁူမ်ႈ တေမီးမွၵ်ႈ 100 ၵေႃႉပၢႆ ၼႆယဝ်ႉ။

ပႃႊတီႊႁူဝ်သိူဝ် တေသိုပ်ႇပိုတ်ႇလုမ်းၵႂႃႇထႅင်ႈ ၼႂ်းၶၢဝ်းတၢင်း 2-3 ဝၼ်းၼႆႉ၊ ဝၼ်းတီႈ 18/06/2015 သမ်ႉ တေပိုတ်ႇထႅင်ႈသွင်တီႈ ပဵၼ်မိူင်းၵုတ်ႈလႄႈမိူင်းလူင်၊ ဝၼ်းတီႈ 19/06/2015 သမ်ႉတေပိုတ်ႇတီႈ မိူင်မိတ်ႈ ၼႆယဝ်ႉ။ ပႃႊတီႊႁူဝ်သိူဝ်ဢၼ်ပိုတ်ႇလုမ်းၵႂႃႇ ၼႂ်းၸႄႈဝဵင်းၼႆႉ တင်းမူတ်းမီး 62 တီႈ ပႃးတီႈဝဵင်းလိူဝ်ႇ ။