သိုၵ်းမၢၼ်ႈၸၼ်ႉပိဝ်ႇႁႃႇမူး လၢင်းၶိူဝ်းဢွၼ်ႁူဝ် လူင်းပိုၼ်ႉတီႈ ၼႂ်းၸႄႈဝဵင်းမွၵ်ႇမႆႇ၊ ယူတ်းယႃပၼ် တၢင်းပဵၼ်ၵူၼ်းဝၢၼ်ႈ။ ၵူၼ်းၼႂ်းပိုၼ်ႉတီႈ ဝႃႈ သိုၵ်းမၢၼ်ႈၵိူဝ်းမၢင်ႇ ႁႂ်ႈဢမ်းၼၢၸ်ႈမၢၼ်ႈ သုမ်ႇငမ်းလႆႈၼိူဝ် ၵူၼ်းဝၢၼ်ႈ။

ႁၢင်ႈသိုၵ်းမၢၼ်ႈၼေႇပျီႇတေႃႇ Photo: internet

မိူဝ်ႈဝၼ်းတီႈ 15/06/2015 ယၢမ်းၵၢင်ဝၼ်း၊ ၽူႈၵွၼ်းၽႅၼ်ၵၢၼ်လၢႆးတိုၵ်းမၢၼ်ႈ (ပိဝ်ႇႁႃႇမူး) ဢၼ်ပၵ်းတီႈလၢင်းၶိူဝ်း လုၵ်ႉတၢင်းမိူင်းၼၢႆးသေ ဢွၵ်ႇၶၢဝ်းတၢင်းမႃးတီႈမွၵ်ႇမႆႇ၊ ဢဝ်ပီႇတုၸိတ်ႉၼႂ်းပိုၼ်ႉတီႈၸွမ်းသူင်ႇသေ လူင်းပိုၼ်ႉတီႈ ၵႂႃႇတၢင်းဝၢၼ်ႈမႆႉၼိဝ်ႉၸႅၼ်ႇ၊ ဝၢၼ်ႈၵွင်းလိၼ်မူတ်ႉ ၸိူဝ်းၼႆႉယဝ်ႉ ၵႂႃႇၵူတ်ႇပၼ်ပၢႆးယူႇလီ၊ ယူတ်းယႃပၼ်တၢင်းပဵၼ်ၵူၼ်းဝၢၼ်ႈ ပွတ်းၼၼ်ႉ- ၸၢႆးၼီႉ ၵူၼ်းယူႇမွၵ်ႇမႆႇလၢတ်ႈ။

သိုပ်ႇလၢတ်ႈဝႃႈ- ပွတ်းဝၢၼ်ႈမႆႉၼိဝ်ႇၸႅၼ်ႇၼႆႉ ၵူၼ်းၵမ်ႈၼမ် ႁူႉၵၼ်ဝႃႈ ပဵၼ်ပွတ်းတွၼ်ႈဢၼ်သိုၵ်းတႆး ယၢမ်ႈတူင်ႉၼိုင်ၵႂႃႇမႃး။ သိုၵ်းမၢၼ်ႈၼႆႉ လူင်းၵႂႃႇၼႂ်းပိုၼ်ႉတီႈသေ ပိူဝ်ႈတႃႇႁႂ်ႈဢမ်းၼၢၸ်ႈ (ဢႃႇၼႃႇ)ၶဝ် သုမ်ႇငမ်းထိုင်လႆႈ ၼႂ်းဝၢၼ်ႈၼႂ်းဢိူင်ႇ။ ၶဝ်ၵူတ်ႇထတ်းပၼ်ပၢႆးယူႇလီၵူၼ်းဝၢၼ်ႈ မိူၼ်ၼင်ႇၵူတ်ႇထတ်းလိူတ်ႈ၊ ၸႅၵ်ႇပၼ်ယႃႈႁူဝ်ၶႆႈ၊ မီးႁွႆးၸဵပ်းသႅပ်ႇၵေႃႈယူတ်းယႃပၼ်၊ မီးႁဝ်ႈမီးယဵၼ်းၸိူဝ်းၼႆႉၵေႃႈ ယူတ်းယႃပၼ်- ဝႃႈၼႆ။

လွင်ႈၼႆႉ ၵူၼ်းယူႇၼႂ်းပိုၼ်ႉတီႈၵေႃႈလၢတ်ႈဝႃႈ- ၾၢႆႇသိုၵ်းမၢၼ်ႈၼႆႉ ၶဝ်ၶတ်းၸႂ်ဢဝ်ၸႂ် ၵူၼ်းဝၢၼ်ႈၵူၼ်းမိူင်း။ လွင်ႈၼႆႉ မၼ်းပႅၵ်ႇပိူင်ႈၵၼ်တင်း လၢႆးသိုၵ်းတႆးႁဵတ်းယူႇ။ လၢႆးသိုၵ်းတႆးႁဵတ်းသမ်ႉ ဢမ်ႇမိူၼ်ၸိူင်ႉၼႆ၊ ဢမ်ႇမေႃဢဝ်ၸႂ်ၵူၼ်းဝၢၼ်ႈ၊ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း လူတ်းယွမ်းလွင်ႈယုမ်ႇယမ်ၼိူဝ်သိုၵ်းတႆး- ၵူၼ်းမွၵ်ႇမႆႇ သိုပ်ႇလၢတ်ႈ။

ၾၢႆႇၼိုင်ႈၵေႃႈ ၼႂ်းၸႄႈဝဵင်းမွၵ်ႇမႆႇၼႆႉ  ဢၼ်ၵူၼ်းဝၢၼ်ႈၵူၼ်းမိူင်း ႁူပ်ႉတၢင်းယၢပ်ႇၽိုတ်ႇသေ ပၢႆႈၵႂႃႇႁႃႁဵတ်းၵၢၼ် တၢင်ႇဝၢၼ်ႈတၢင်ႇမိူင်း ၵေႃႈမီးၼမ်။ မိူင်းမွၵ်ႇမႆႇၼႆႉ ပဵၼ်မိူင်းဢၼ်ႁဵတ်းၵၢၼ် ၶုတ်းဢဝ်မၢၵ်ႇႁိၼ်ၼေႃႇ မႃးၶႅၵ်းလေႃႇႁဵတ်းၽြႃး၊ မိူဝ်ႈၵူႈပွၵ်ႈပဵၼ်တႆးႁဝ်းႁဵတ်း။ မိူဝ်ႈလဵဝ် ၶွမ်ႊပၼီႊၶဝ်သမ်ႉ မႃးႁပ်ႉမဝ်ဢဝ်တင်းမူတ်းသေ ဢမ်ႇၸၢင်ႈၵူၼ်းတႆးႁဵတ်းၵၢၼ်၊ ဢဝ်ၵူၼ်းမၢၼ်ႈမႃးႁဵတ်းၵၢၼ်။

ၵွပ်ႈၼၼ်လႄႈ ၾၢႆႇၼိုင်ႈၵေႃႈ ၵူၼ်းမၢၼ်ႈမႃးပုတ်ႈဢဝ်တီႈယူႇ ၵူၼ်းဝၢၼ်ႈၵူၼ်းသူၼ်ၼႂ်းပိုၼ်ႉတီႈ။ ထႅင်ႈၾၢႆႇၼိုင်ႈ လွင်ႈတူင်ႉၼိုင်ၵၢၼ်သိုၵ်းၵေႃႈ သိုၵ်းမၢၼ်ႈမႃး ၶတ်းၸႂ်ဢဝ်ၸႂ်ၵူၼ်းဝၢၼ်ႈၵူၼ်းမိူင်းလႄႈမီးတၢင်းၸမ်ၸႂ်တင်းၵူၼ်းမိူင်းၸိူဝ်းၼႆႉ ၸၢင်ႈပဵၼ်ပိူဝ်ႈတႃႇဢမ်းၼၢၸ်ႈၶဝ်တေသုမ်ႇငမ်းၼိူဝ် ၼႂ်းဝၢၼ်ႈၼႂ်းဢိူင်ႇ - ၵူၼ်းၼႂ်းပိုၼ်ႉတီႈမွၵ်ႇမႆႇ သိုပ်ႇလၢတ်ႈထႅင်ႈၼင်ႇၼႆ။