ပႃႊတီႊႁူဝ်သိူဝ် SNLD သိုပ်ႇပိုတ်ႇလုမ်းထႅင်ႈ တင်းပွတ်းမိူင်းယွင်း ၸိုင်ႈတႆးပွတ်းဢွၵ်ႇၶူင်း ၼႂ်းဢိူင်ႇမိူင်းယွင်းလႄႈၵိင်ႇၸႄႇဝဵင်းမိူင်းယွင်း 7 တီႈၼႂ်းၶၢဝ်းတၢင်း 3 ဝၼ်း။

ဝၼ်းတီႈ 04/6/2015 တႄႇၶၢဝ်းယၢမ်း 09.00 မူင်းၵၢင်ၼႂ်ထိုင် 15.30 မူင်းဝၢႆးဝၼ်း ငဝ်ႈငုၼ်းလုမ်းပႃႊတီႊႁူဝ်သိူဝ်ဝဵင်းတႃႈၶီႈလဵၵ်းဢွၼ်ႁူဝ်ၼမ်းၼႃႈ ၵူၼ်း 30 ၵေႃႉၵႂႃႇပိုတ်ႇ တီႈၼႂ်းၸႄႈဝဵင်းမိူင်းယွင်း။ လွင်ႈလႆႈသိုပ်ႇပိုတ်ႇလုမ်းႁူဝ်သိူဝ်ၼၼ်ႉ လၢတ်ႈသပ်းလႅင်းၼႄလွင်ႈယိူင်းဢၢၼ်း ပႃႊတီႊႁူဝ်သိူဝ်လႄႈ လွင်ႈၽွမ်ႉႁူမ်ႈ။

လုမ်း 3 တီႈၼၼ်ႉ တွၼ်ႈၵၢင်ၼႂ်ၸဝ်ႉလႆႈပိုတ်ႇတီႈၵိင်ႇၸႄႈဝဵင်းမိူင်းယု ၸႄႈဝဵင်းမိူင်းယွင်း ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း မီးၽူႈၵွၼ်းဢိူင်ႇလႄႈပူႇၵၢင်ႉ/ၵႄႇ ၽူႈယႂ်ႇၵူၼ်းလူင် ၼႂ်းဝၢၼ်းၼႂ်းဢိူင်ႇလႄႈ ၵူၼ်းၼႂ်းပိုၼ်ႉတီႈ လႆႈၶိုၼ်ႈႁွတ်ႈၶဝ်ႈႁူမ်ႈတၢင်းၼမ်လၢႆ။

ၽူႈၼမ်းၼႂ်းၵူႈလွင်ႈလွင်ႈ ပႃႊတီႊႁူဝ်သိူဝ်ဝဵင်းတႃႈၶီႈလဵၵ်း ၸၢႆးၼုမ်ႇတုၺ်ႈလၢတ်ႈဝႃႈ ႁဝ်းၶႃႈလႆႈမႃး သပ်းလႅင်းလၢတ်ႈၼႄ ပေႃႈမႄႈၵူၼ်းမိူင်း လွင်ႈပဵၼ်မႃးပႃႊတီႊႁူဝ်သိူဝ် လႄႈလႆႈၵေႃႇတင်ႈမႃးပီလႂ်၊ လႆႈပေႉၵၢၼ်လိူၵ်ႈတင်ႈ မႃးၼႂ်းပီလႂ်။ လိူဝ်ၼၼ်ႉယင်းသိုပ်ႇလၢတ်ႈၼႄလွင်ႈသွင်ပႃႊတီႊ ႁူဝ်သိူဝ်လႄႈပႃႊတီႊသိူဝ်ၽိူၵ်ႇ လႆႈပႅၵ်ႇပိူင်ႈၵၼ်ၸိူင်ႉႁိုဝ်၊ ႁူဝ်သိူဝ်ယွမ်းႁပ်ႉ 8 ၸႄႈမိူင်း၊ ပႃႊတီႊသိူဝ်ၽိူၵ်ႇသမ်ႉ ယွမ်းႁပ်ႉ 14 ၸႄႈမိူင်း။

ၸၢႆးၼုမ်ႇတုၺ်ႈ သိုပ်ႇလၢတ်ႈထႅင်ႈဝႃႈ ပီ 2015 ၼႆႉပႃႊတီႊသိူဝ်ၽိူၵ်ႇ လုင်းၸၢႆးဢၢႆႈပဝ်း တေဢၢၼ်းပဵၼ်ၸွမ်ၽွင်းလူင်မိူင်းတႆး၊ ပႃႊတီႊႁူဝ်သိူဝ်သမ်ႉ ႁူဝ်ပဝ်ႈ တေဢၢၼ်းမုၼ်ႉမႄးပိူင်ငဝ်ႈပိုၼ်းမိူင်း 2008 ။


လုမ်းပႃႊတီႊႁူဝ်သိူဝ် SNLD ဝဵင်းတႃႈၶီႈလဵၵ်း ပွတ်းဢွၵ်ႇၶူင်း ႁူဝ်ပဝ်ႈပႃႊတီႊႁူဝ်သိူဝ် ဝဵင်းတႃႈၶီႈလဵၵ်း လုင်းၸၢႆးတီ၊ ၵႅမ်ႁူဝ်ပဝ်ႈ 1 လုင်းၸိင်ႇၼ၊ ၵႅမ်ႁူဝ်ပဝ်ႈ 2 လုင်းၶုၼ်မျႅတ်ႈ၊ ၽူႈၼမ်းၼႂ်း ၵူႈလွင်ႈလွင်ႈ(ဝဵင်းတႃႈၶီႈလဵၵ်း) ၸၢႆးၼုမ်ႇတုၺ်ႈ၊ ၽူႈသူၼ်းတုမ် မိူင်းတႆးပွတ်းဢွၵ်ႇ ၸၢႆးၺုၼ်ႉ၊ ၽူႈသူၼ်းတုမ် ဝဵင်းတႃႈၶီႈလဵၵ်း ၸၢႆးဢေး၊ ၽူႈၼင်ႈလုမ်းဝဵင်းတႃႈၶီႈလဵၵ်း လုင်းတေႇၸ၊ ႁူဝ်ၼႃႈၵူၼ်းၼုမ်ႇတႃႈၶီႈလဵၵ်း တွၵ်ႊတိူဝ်ႊ ၸၢႆးဝူဝ်းလဵဝ်း ဢိၵ်ႇပႃးၵေႃၵမ်ၵၢၼ် ၼႂ်းပႃႊတီႊလႄႈလုၵ်ႈၸုမ်း။

ၸိူင်ႉႁိုဝ်ၵေႃႈလီ လုမ်းၵိင်ႇၽႄဢၼ်လႆႈၵႂႃႇပိုတ်ႇၵမ်းၼႆႉ 1. ၵိင်ႇၸႄႈဝဵင်းမိူင်းယု ၸႄႈဝဵင်းမိူင်းယွင်း၊ 2. ဢိူင်ႇၼွင်မူဝ်၊ 3. ဢိူင်ႇႁူဝ်ယၢင်း။ ၼႂ်းဝၼ်းတီႈ 05/06/2015 သမ်ႉ လႆႈပိုတ်ႇၵႂႃႇထႅင်ႈ 3 တီႈ၊ 1. ဝၢၼ်ႈၵွမ်း၊ 2. ဝၢၼ်ႈႁူၺ်ႈ၊ 3. ဝၢၼ်ႈပုင်ႇ ဢိူင်ႇဝၢၼ်ႈဝူဝ်း၊ ဝၼ်းတီႈ 06/06/2015 ဝၢၼ်ႈလႅမ်း ၸိူဝ်ႉၼႆႉ။