ၶၢဝ်းတၢင်းၸွမ်ၸိုင်ႈ မိူင်းႁူမ်ႈတုမ်မိူင်းမၢၼ်ႈ ဢူးတဵင်းၸဵင်ႇ ႁူပ်ႉထူပ်းၵူၼ်းလႄႈ ၵူႈႁွင်ႈၵၢၼ် ၼႂ်းလူင်ပွင်ၸိုင်ႈ တီႈႁူင်းႁေႃးတူၼ်ႈတီး ဝဵင်းတူၼ်ႈတီး ၸိုင်ႈတႆးပွတ်းၸၢၼ်း ၶႃႈႁၢပ်ႇၵၢၼ်ၼႂ်းလူင်ပွင်ၸိုင်ႈ လႄႈၽူႈၵွၼ်းဢိူင်ႇ ဢိၵ်ႇပႃးၵူၼ်းမိူင်း ၶဝ်ႈႁူမ်ႈ။

ပူၼ်ႉမႃးမိူဝ်ႈဝၼ်းတီႈ 10/06/2015 တႄႇၶၢဝ်းယၢမ်း 08:45 မူင်း ၵၢင်ၼႂ် ထိုင် 11:0 မူင်း ၵၢင်ဝၼ်း ၸွမ်ၸိုင်ႈတဵင်းၸဵင်ႇႁွတ်ႈဢႅဝ်ႇယဵမ်ႉၵူၼ်းမိူင်းလႄႈ ၶႃႈႁၢပ်ႇၵၢၼ်ၶုၼ်လူင်ပွင်ၸိုင်ႈ၊ တီႈၸတ်းႁဵတ်းပၢင်ႁူပ်ႉထူပ်း ႁူင်းႁေႃႊ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း၊ တူဝ်ၸွမ်ၸိုင်ႈ ၵၢဝ်ႇလၢတ်ႈၶေႃႈၵႂၢမ်း တီႈၼႂ်းပၢင်ႁူပ်ႉထူပ်းဝႃႈ ၵဵဝ်ႇၵပ်းလွင်ႈပၢင်လိူၵ်ႈတင်ႈဢၼ်တေထိုင်မႃး ၼႂ်းပီ 2015 ၼႆႉႁႂ်ႈၵူၼ်းမိူင်းမေႃတႅပ်းတတ်းႁၢင်းၵူၺ်း၊ မေႃလိူၵ်ႈတွတ်ႈၶႅပ်းၵၢင်ၸႂ်ႁၢင်းၵူၺ်း၊ ႁႂ်ႈလႆႈၽူႈဢွၼ်ႁူဝ်လီတႃႇႁဝ်း ၸဵမ်ၸိူဝ်ႉၼႆ။ ၾၢႆႇၶႃႈႁၢပ်ႇၵၢၼ်ၶုၼ်ၶဝ် ၵူႈႁွင်ႈၵၢၼ်ၵေႃႈ တၢင်ႇႁၢႆးငၢၼ်ၼႄၼႃႈၵၢၼ်ႁွင်ႈၵၢၼ်ၽႂ်မၼ်း ။

ၽူႈၶိုၼ်ႈႁွတ်ႈၵေႃႉၼိုင်ႈဢမ်ႇဢွၵ်ႇၸိုဝ်ႈလၢတ်ႈဝႃႈ မိူဝ်ႈပႆႇတႄႇပၢင်ႁူပ်ႉထူပ်းၼၼ်ႉ ၽူႈမီးပုၼ်ႈၽွၼ်းၶဝ်သင်ႇလၢတ်ႈဝႆႉဝႃႈ တီႈၵူၼ်းမိူင်း ပေႃးမီးၶေႃႈထၢမ်ထိုင်ၸွမ်ၸိုင်ႈၼႆၸိုင် ၵဵဝ်ႇလူၺ်ႈၸွမ်ၸိုင်ႈၵူၺ်းတေလႆႈထၢမ် ဢၼ်ဢမ်ႇၵဵဝ်ႇၸွမ်ၸိုင်ႈၼၼ်ႉ ယႃႇပေႁႂ်ႈထၢမ် ႁၢမ်ႈဝႆႉ ၼင်ႇၼႆ။

သိုပ်ႇလၢတ်ႈထႅင်ႈဝႃႈ ၽွင်းလူင်ၾၢႆႇႁွင်ႈၵၢၼ်ၶဝ် ဢၼ်မႃးၶိုၼ်ႈႁွတ်ႈ ၵၢဝ်ႇလၢတ်ႈတင်ႇၼႄ ၵႂႃႇသမ်ႉ မီးၽွင်းလူင်ၾၢႆႇၾႆးၾႃႉ မႃးၵၢဝ်ႇလၢတ်ႈဝႃႈၶႂ်ႈႁဵတ်းၾၢႆထႅင်ႈတီႈၼိူဝ်မႄႈၼမ်ႉၶူင်း၊ ၽွင်းလူင်ၾၢႆႇပၢႆးပၺ်ၺႃသမ်ႉ လၢတ်ႈဝႃႈ တေႃႈလဵဝ်ၼႆႉ လႆႈပိုတ်ႇႁူင်းႁဵၼ်းၸၼ်ႉၸွမ်ပၢႆးၶိူင်ႈၸၢၵ်ႈ (Teachnology) ၵႂႃႇ 19 ႁူင်းႁဵၼ်းယဝ်ႉ တေဢၢၼ်းပိုတ်ႇၵႂႃႇထႅင်ႈ 30 ႁူင်းႁဵၼ်း။ ယဝ်ႉၵေႃႈ ၶႂ်ႈႁႂ်ႈလုၵ်ႈႁဵၼ်းၶတ်းၸႂ်လိၵ်ႈ၊ တီႈတူၼ်ႈတီးၼႆႉ တေမႃးပိုတ်ႇပၼ် ႁူင်းႁဵၼ်းၸၼ်ႉၸွမ်ၾၢႆႇမေႃယႃၼႆယဝ်ႉ။ ၽွင်းလူင်ၾၢႆႇပႃႇမႆႈလႄႈသိင်ႇဝႅတ်ႉလွမ်၊ ၽွင်းလူင်ပၢႆးပၺ်ၺႃ၊ ၽွင်းလူင်ၾၢႆႇၵႃႉၶၢႆ၊ ၽွင်းလူင်ၾၢႆႇပၢႆးယူႇလီ၊ ၽွင်းလူင်ၾၢႆႇပၢႆးသၢႆႊ ၸဵမ်ၸိူဝ်ႉၼႆႉ လႆႈၵၢဝ်ႇလၢတ်ႈတၢင်ႇၼႄ ၵူၼ်းမိူင်းၵႂႃႇဝႃႈၼႆယဝ်ႉ။

ပၢင်ႁူပ်ႉထူပ်းၵူၼ်းမိူင်းလႄႈၶႃႈႁၢပ်ႇၵၢၼ်ၶုၼ်လူင်ပွင်ၸိုင်ႈ ဢၼ်လႆႈဝွၵ်ႇၸိူၼ်းမႃးၶိုၼ်ႈၼၼ်ႉ မီးၸႄႈတွၼ်ႈလၢင်းၶိူဝ်း၊ ၸႄႈတွၼ်ႈတူၼ်ႈတီး၊ ၸႄႈတွၼ်ႈလွႆလႅမ်၊ ၽူႈၵွၼ်းဢိူင်ႇ/ပွၵ်ႉ၊ ၽူႈၵွၼ်းၸႄႈဝဵင်း ဢိၵ်ႇပႃး ၵူၼ်းမိူင်းလႄႈၾၢႆႇၾိင်ႈငႄႈၸၢဝ်းၶိူဝ်း ၼိုင်ႈၸုမ်းလႂ်မၵ်းမၼ်ႈဝႆႉ 15 ၵေႃႉ ၊ ၸိူင်ႉၼင်ႇၾၢႆႇၾိင်ႇငႄႈသမ်ႉ ၵေႃလိၵ်ႈလၢႆးလႄႈၾိင်ႈငႄႈတႆး၊ ထၼု၊ ပဢူဝ်း၊ တွင်ႇလိုဝ်းလႄႈဢိၼ်းတႃး တင်းမူတ်း ၵူၼ်းၶဝ်ႈႁူမ်ႈ မီးမွၵ်ႈ 300 ၵေႃႉပၢႆ၊  ပႃႊတီႊၵၢၼ်မင်းတႄႉဢမ်ႇလႆႈႁၼ်ၶဝ်ႈႁူမ်ႈ ၼႆယဝ်ႉ။

မိူဝ်ႈဝၼ်းတီႈ 09/06/2015 ဝၼ်းဢင်းၵၢၼ်းၼၼ်ႉ ၸွမ်ၸိုင်ႈလႄႈၽွင်းလူင်ၼႂ်းမိူင်းမၢၼ်ႈ လႆႈၵႂႃႇဢႅဝ်ႇယဵမ်ႉ ၼႃႈလိၼ်ၽွင်းငၢမ်းတူဝ်ၵဝ်ႇပဢူဝ်းယဝ်ႉၵေႃႈ ၵႂႃႇဢႅဝ်ႇယဵမ်ႉပႃးႁိူၼ်းလုင်းဢွင်ႇၶမ်းထီႇ တီႈဝဵင်းၵျွၵ်ႉတလူင်း ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း သိုပ်ႇၵႂႃႇဝႆႈၵွင်းမူး ပထမၼိၵ်ႉမိတ်ႉသပိတ်ႈ လႄႈၵွင်းမူးၵၢတ်ႇၵူႇသေ ၸင်ႇပွၵ်ႇမိူဝ်းၶိုၼ်းတူၼ်ႈတီး ၶၢဝ်းယၢမ်း ႁူဝ်ၶမ်ႈ 17.00 မူင်း ၼႆယဝ်ႉ။