ႁူင်းပွႆႇသဵင်တႆး Mapradio FM 99.0 MHz ၸတ်းႁဵတ်း ပၢင်ၵုမ် ၽူႈၸတ်းလၢႆးၵၢၼ် ပိူဝ်ႈတႃႇဝၢင်းၽႅၼ် လႄႈႁႂ်ႈ DJ ၽူႈၸတ်းလၢႆးၵၢၼ် ၶိုၼ်းမႃးပွႆႇသဵင် ႁူမ်ႈပႃး တေၸတ်းႁဵတ်း ပၢင်ပွႆးဝၼ်းၶွပ်ႈၶူပ်ႇ 11 ပီတဵမ် ၼႂ်းဝၼ်းတီႈ 12 လိူၼ်ၵျုၼ်ႊ။

ဝၼ်းတီႈ 07 လိူၼ်ၵျုၼ်ႊ 2015 ႁူင်းပွႆႇသဵင်တႆး Map radio FM 99.0 MHz ၸတ်းႁဵတ်းပၢင်ၵုမ် DJ ၽူႈၸတ်းလၢႆးၵၢၼ် ၽူႈၶဝ်ႈႁူမ်ႈ 20 ၵေႃႉ ဢွင်ႈတီႈ လုမ်း MAP ၸႄႈဝဵင်းမိူင်း ၸႄႈတွၼ်ႈၵဵင်းမႆႇ ၸိုင်ႈထႆး။

ၼႂ်းပၢင်ၵႅဝ်ႈၼႆႉ ဢုပ်ႇဢူဝ်းလွင်ႈတမ်းဝၢင်းၵၢၼ်ၸတ်းလၢႆးၵၢၼ် သပ်းၸႅင်ႈလွင်ႈ Mapradio FM 99.0 MHz လႆႈၵိုတ်ၵၢၼ်ပွႆႇသဵင်တၢင်းရေႊၻီႊဢူဝ်ႊ ၸမ်ၼိုင်ႈပီ လႄႈလွင်ႈတေႁဵတ်းပၢင်ပွႆးၶွပ်ႈ ၶူပ်ႇ Mapradio FM 99.0 MHz 11 ပီတဵမ်။
ၸၢႆးတုမ်ႇမွၵ်ႇႁၢၼ် ၽူႈၵွၼ်ႁွင်ႈၵၢၼ်ၾၢႆႇသိုဝ်ႇ ၶူင်းၵၢၼ်ပၢႆးယူႇလီလႄႈ ပၼ်တၢင်းႁူႉႁႅင်းၵၢၼ် ၸၢဝ်းၶိူဝ်း လၢတ်ႈဝႃႈ - “ႁူင်းပွႆသဵင် Map radio ႁဝ်းလႆႈၵိုတ်းၵႂႃႇ ပေႃးႁူမ်ႈၵၼ်တင်းမူတ်ႈၵေႃႈ ၸမ်ပီယဝ်ႉ၊ ဢၼ်လႆႈၵိုတ်းၵႂႃႇၼႆႉၵေႃႈ ဢမ်ႇၸႂ်ႈႁူင်းပွႆႇသဵင်ႁဝ်းတီႈလဵဝ်ၵူၺ်း၊ ႁူင်းပွႆႇသဵင်တူဝ်ႈမိူင်းထႆးတင်းသဵင်ႈယဝ်ႉ ယွၼ်ႉပိူဝ်ႈဝႃႈ တေလႆႈၶိုၼ်းတၢင်ႇသၢႆမၢႆမႂ်ႇ ၶိူင်ႈၸၢၵ်ႈၸိူဝ်းၼႆႉၵေႃႈ တေလႆႈဢဝ်ၵႂႃႇႁဵတ်းႁႂ်ႈမၼ်းပဵၼ် 500 ဝတ်ႊ ပဵင်းၵၼ်မူတ်း  ႁွင်ႈသူင်ႇၸိူဝ်းၼႆႉၵေႃႈ တေလႆႈႁဵတ်းၸွမ်းၼင်ႇဢၼ်ပိူၼ်ႈတမ်းဝၢင်းဝႆႉ။

မိူဝ်းလဵဝ်ၼႆႉႁဝ်းၶႃႈ လႆႈႁၢင်ႈႁႅၼ်းၽိုၼ်လိၵ်ႈၽိုၼ်လၢႆး ႁဵတ်းၸွမ်းၼင်ႇၶၵ်ႉတွၼ်ႈဢၼ်ပိူၼ်ႈ တမ်းဝၢင်းဝႆႉသေ သူင်ႇၵႂႃႇတီႈၽူႈမီးပုၼ်ႈၽွၼ်း တၢင်းလူင်ပွင်ၸိုင်ႈထႆးၶဝ်ယဝ်ႉ။
ယုမ်ႇယမ်ဝႃႈပၢႆလိူၼ်ၼႆႉ တေၶိုၼ်းပိုတ်ႇပွႆႇသဵင်တၢင်းရေႊၻီႊဢူဝ်ႊ FM 99.0 MHz လႆႈယဝ်ႉ။ ယၢမ်းလဵဝ်တီႈၼိူဝ်ဢွၼ်ႊလၢႆႊ www.mapradio.org ထွမ်ႇလႆႈယူႇတႃႇသေႇ” ဝႃႈၼႆ ။

ႁူင်းပွႆႇသဵင် Mapradio FM 99.0 MHz ၼႆႉ မီးလၢႆးၵၢၼ်လၢၵ်ႇလၢႆးၶိုၵ်ႉတွၼ်း မိူၼ်ၼင်ႇလၢႆးၵၢၼ် ပၢႆးယူႇလီ ၊ လွင်ႈဝတ်းဝႂ် ၊ သုၼ်ႇလႆႈႁႅင်းၵၢၼ် ၊ သုၼ်ႇလႆႈမႄႈဝၢၼ်ႈ ၊ ၶၢဝ်ႇၶိုတ်းတၼ်း ၸဵမ်ၸိူဝ်းၼႆႉ ပွႆႇသဵင်ပၼ် 3 ၽႃသႃ ၊ တႆး ၊ ထႆး ၊ မၢၼ်ႈ ။

လိူဝ်ၼၼ်ႉပေႃးထိုင်မႃးဝၼ်းတီႈ 12 လိူၼ်ၵျူၼ်ႊ 2015 ပဵၼ်ဝၼ်းၶွပ်ႈၶူပ်ႇ 11 ပီတဵမ်ႁူင်းပွႆႇသဵင်ၼႆလႄႈ တၢင်းႁူင်းပွႆသဵင်တေၸတ်းႁဵတ်းပၢင်ဢုပ်ႇဢူဝ်းလႅၵ်ႈလၢႆး တေမီးၽူႈယႂ်ႇၵူၼ်းလူင်း မိူၼ်ၼင်ႇ ၽူႈၵေႃႇတင်ႈ ႁူင်းပွႆႇသဵင် FM 99.0 MHz  ဢႃႊၸၢၼ်ႊ ဢူႊထႆႊဝၼ်ႊ ၊ ၶူးသွၼ်ၼႂ်းၸၼ်ႉၸွမ်ၵဵင်းမႆႇ ဢႃႊၸၢၼ်ဢမ်ႊၽွၼ်ႊ  ဢိၵ်ႇပႃးၽူႈယႂ်ႇၵူၼ်းလူင်လၢႆလၢႆၸဝ်ႈ မႃးၵၢဝ်ႇလၢတ်ႈၶေႃႈၵႂၢမ်း ပိၼ်ႇပၢႆႇလႅၵ်ႈလၢႆႈလွင်ႈ ႁူင်းပွႆႇသဵင် တူဝ်တႅၼ်းႁႅင်းၵၢၼ်ၵၢဝ်ႇလၢတ်ႈၶေႃႈၵႂၢမ်း ၊ ပၢင်လဝ်ႇမူၼ်ႈႁွင်ႉၵႂၢမ်း၊ တၢင်းၵႃႈ လိူဝ်ၼၼ်ႉ တေတွၼ်ႈပၼ်သိူဝ်ႈမၢႆတွင်း ၶွပ်ႈၶူပ်ႇ 11 ပီ ပပ်ႉဝွၵ်း ႁႅင်းၵၢၼ် ၽွင်းယၢၼ်ႁိူၼ်း ၸိူဝ်းၼႆႉ ပဵၼ်တီႈမၢႆတွင်းၽူႈမႃးၶဝ်ႈႁူမ်ႈ။

ႁူင်းပွႆႇသဵင် Mapradio FM 99.0 MHz ၼႆႉၵေႃႇတင်ႈမႃးမိူဝ်ႈ ဝၼ်းတီႈ 23 လိူၼ် ၾႅပ်ႊၿိဝ်ႊရီႊ 2004 ၽူႈၸတ်းလၢႆးၵၢၼ် ပဵၼ် ၸၢႆးသႅင်မိူင်း မင်းၵွၼ်း ၊ ၸၢႆးတုမ်ႇမွၵ်ႇႁၢၼ် ၊ ၼၢင်းၶမ်းဢိင်ႇ လႆႈၵႂႃႇႁူမ်ႈၸတ်းတီႈ FM 99.0 MHz ဢၼ်ဢႃးၸၢၼ် ဢူႊထႆႊဝၼ်ႊ ပဵၼ်ၸဝ်ႈၶွင်ဝႆႉ။

ထိုင်မႃး ပီ 2007 လႆႈသိုဝ်ႉဢဝ် ႁူင်းပွႆႇသဵင်သေ ပဵၼ်မႃးႁူင်းပွႆႇသဵင် Mapradio ၵမ်းသိုဝ်ႈ ၸႂ်ႉတိုဝ်းၸိုဝ်ႈဝႃႈ သဵင်ထႅမ်ႁႅင်းမႂ်ႇၼႆ တေႃႇထိုင်ယၢမ်းလဵဝ်။