ဢိင်ၼိူဝ် ၼႃႈလိၼ်သိုၵ်း 171 တပ်ႉသိုၵ်းဝႃႉ UWSA ၵုမ်းၵမ် ပွတ်းတႂ်ႈ၊ မီးလွင်ႈၶဵင်ႈၶႅင်ၵၢၼ်သိုၵ်းၵၼ် တင်းသိုၵ်းမၢၼ်ႈသေ ၸုမ်းဝႃႉပွတ်းၼိူဝ် ပၢင်သၢင်း တင်းၸုမ်းမိူင်းလႃးၵေႃႈ မီးၶေႃႈၸီႉသင်ႇ ႁၢင်ႈႁႅၼ်းၵၢၼ်သိုၵ်း။

တပ်ႉဝႃႉ ၼႃႈလိၼ်သိုၵ်း 171 ႁၢင်ႈႁႅၼ်းၵၢၼ်သိုၵ်း Photo: Facebook

တင်ႈတႄႇဝၼ်းတီႈ 13/06/2015 မႃး တေႃႇထိုင်မိူဝ်ႈၼႆႉ ဝၼ်းတီႈ 16/06/2015 (ၶၢဝ်းတၢင်း 4 ဝၼ်း) ၼႂ်းၼႃႈလိၼ်ဝႃႉပွတ်းၼိူဝ် (ပၢင်သၢင်း) မီးၶေႃႈၸီႉသင်ႇလူင်း ထိုင်ၵူႈတပ်ႉၸုမ်း ၵူႈတပ်ႉၵွင် ႁႂ်ႈႁၢင်ႈႁႅၼ်းၵၢၼ်သိုၵ်း တူဝ်ႈတၼ်း၊ ႁႂ်ႈသိုၵ်းၸိူဝ်းဢၼ် ၵႂႃႇယူႇသဝ်းၸွမ်းၵူၼ်းဝၢၼ်ႈၸိူဝ်းၼႆႉ ပွၵ်ႈမႃးႁၢပ်ႇၵိုတ်ႉၵၢၼ်သိုၵ်း၊ ပွၵ်ႈမႃးယိပ်းၵွင်ႈၵူႈၵေႃႉၵူႈၵူၼ်း။

ၼႃႈလိၼ်ၽွင်းငမ်းတူဝ်ၵဝ်ႇဝႃႉ ၸိုင်ႈတႆးပွတ်းႁွင်ႇ (ၸိုင်ႈမိူင်းႁူမ်ႈတုမ်မၢၼ်ႈ) ၼႆႉ ဢဵၼ်ႁႅင်းတပ်ႉသိုၵ်း မိူင်းဝႃႉၽွမ်ႉႁူမ်ႈ (UWSA) တီး 4 တပ်ႉၸုမ်း၊ တပ်ႉၸုမ်း 468, 318, 418 လႄႈ တပ်ႉႁူမ်ႇလူမ်ႈ ငဝ်ႈငုၼ်း တပ်ႉၸုမ်း 618 ၸိူဝ်းၼႆႉ။

ဢၼ်ႁၢင်ႈႁႅၼ်းၵၢၼ်သိုၵ်းၼႆႉ ဢမ်ႇၵွမ်ႉၵႃးၼႂ်းၼႃႈလိၼ်ဝႃႉၵူၺ်း၊ တၢင်းၼႃႈလိၼ်မိူင်းလႃး (ၼႃႈလိၼ်ၶိုၵ်ႉတွၼ်းမၢႆ 4)ၵေႃႈ ပဵၼ်ၼၼ်ၼင်ႇၵဝ်ႇ။ မီးၵၢၼ်ၸီႉသင်ႇလူင်းထိုင် တပ်ႉၸုမ်း 369 (သိုဝ်လိုဝ်း) တင်း တပ်ႉၸုမ်း 911 (ၼမ်ႉပၢၼ်း) ဝႃႈ ႁႂ်ႈတူဝ်ႈတၼ်းၵၢၼ်သိုၵ်း။ ပွတ်းၼႃႈလိၼ်မိူင်းလႃး၊ ဢၼ်တေႃႇၼႃႈမိူင်းလႃး မိူၼ်ၼင်ႇမိူင်းၶၢၵ်ႇ မိူင်းယၢင်းၸိူဝ်းၼႆႉ ဢမ်ႇမီးလွင်ႈတူင်ႉၼိုင်သိုၵ်းမၢၼ်ႈ လၢၵ်ႇလၢႆးသင်သေတႃႉ ဢိင်ၼိူဝ်ၶေႃႈၸီႉသင်ႇတၢင်းၼိူဝ်သေ 2 တပ်ႉၸုမ်းၼႆႉ လႆႈႁၢင်ႈႁႅင်းတူဝ်ႈတၼ်းၵၢၼ်သိုၵ်းၵၼ်ယဝ်ႉ- ဝႃႈၼႆ။

တပ်ႉဝႃႉ ၼႃႈလိၼ်သိုၵ်း 171 ႁၢင်ႈႁႅၼ်းၵၢၼ်သိုၵ်း Photo: Facebook

ၸိူင်ႉႁိုဝ်ၵေႃႈလီ ဢိင်ၼိူဝ်တပ်ႉသိုၵ်းဝႃႉ ပွတ်းတႂ်ႈ (ၼႃႈလိၼ်သိုၵ်း 171) တင်းတပ်ႉသိုၵ်းမၢၼ်ႈ ၶဵင်ႈၶႅင်ၵၢၼ်သိုၵ်း တေႃႇၵၼ်သေ ၸုမ်းဝႃႉပွတ်းၼိူဝ်တင်း ၸုမ်းမိူင်းလႃးၵေႃႈမႆႈၸႂ်သေ လႆႈႁၢင်ႈႁႅၼ်းသိုၵ်းဝႆႉ- ၵမ်ႈၽွင်ႈထတ်းသၢင်ၼင်ႇၼႆ။ 

ၼႃႈလိၼ်သိုၵ်း 171 ပွတ်းတႂ်ႈၼႆႉ မီးႁႅင်းသိုၵ်း 5 တပ်ႉၸုမ်း၊ ပဵၼ်တပ်ႉၸုမ်း 772, 775, 778, 518, 248 ၸိူဝ်းၼႆႉ။

ၾၢႆႇၼိုင်ႈတၢင်းၼိုင်ႈၵေႃႈ ၼႃႈလိၼ်ဝႃႉပွတ်းၼိူဝ် မီးလွင်ႈႁၢင်ႈႁႅင်းသိုၵ်းသေတႃႉ ပွတ်းတႂ်ႈ ၼႃႈလိၼ်ဝၼ်းဢွၵ်ႇၶူင်း ၼႂ်းၸႄႈဝဵင်းမိူင်းတူၼ်ၼႆႉ ငဝ်းလၢႆးၶဵင်ႈၶႅင်ၵၢၼ်သိုၵ်း ယွၼ်ႇယၢၼ်းမႃးၽွင်ႈယဝ်ႉ။

ဝၼ်းတီႈ 15/06/2015 (မိူဝ်ႈဝႃး)ၼႆႉပွတ်းမိူင်းတူၼ်- ၼႃးၵွင်းမူး- ပုင်ႇပႃႇၶႅမ်ၼႆႉ ဢၼ်သိုၵ်းမၢၼ်ႈ တင်းသိုၵ်းဝႃႉဢိုတ်းၵုမ်းဝႆႉသဵၼ်ႈတၢင်းလူင် ဢမ်ႇပၼ်ၵူၼ်းမိူင်းၵႂႃႇမႃးၼၼ်ႉ ပၼ်ၵူၼ်းမိူင်းၵႂႃႇမႃးၶိုၼ်းယဝ်ႉ။ ၵူၺ်းၵႃႈ သၢႆမိူင်းသၢတ်ႇ- မိူင်းတူၼ်တႄႉ သိုၵ်းမၢၼ်ႈတိုၵ်ႉၵုမ်းသဵၼ်ႈတၢင်းဝႆႉသေ ယင်းပႆႇပၼ်ၵူၼ်းမိူင်းၵႂႃႇမႃး- ၼႆယဝ်ႉ။