ပႃႊတီႊႁူဝ်သိူဝ် ၸတ်းႁဵတ်းပၢင်ၽိုၵ်းၾွၼ်ႉ ပၼ်လုၵ်ႈၸုမ်းၼႂ်းပႃႊတီႊႁူဝ်သိူဝ် တီႈဝဵင်း တူၼ်ႈတီး ၸိုင်ႈတႆးပွတ်းၸၢၼ်း ၵဵဝ်ႇၵပ်းလူၺ်ႈ ပၢင်သွၼ် တႃႇၵၢၼ်လိူၵ်ႈတင်ႈ ၼႂ်းပီ 2015 ။

ပူၼ်ႉမႃးမိူဝ်ႈဝၼ်းတီႈ 13-14/06/2015ပႃႊတီႊႁူဝ်သိူဝ် ၸတ်းႁဵတ်းပၢင်ၽိုၵ်းၾွၼ်ႉ တႄႇၶၢဝ်းယၢမ်း 09.00 မူင်း ၵၢင်ၼႂ် ထိုင် 16.30 မူင်း ၵၢင်ၶမ်ႈ တီႈလုမ်းပႃႊတီႊႁူဝ်သိူဝ် မၢႆ 328 ယူႇၾၢႆႇၸၢၼ်းတႃႈရူတ်ႉယူဝ်းမသျေႇလီႇ ၼိူဝ်သဵၼ်ႈတၢင်းၸဝ်ႈၸၢမ်ထုၼ်း ပွၵ်ႉမဵဝ်းမ ဝဵင်းတူၼ်ႈတီး ၸိုင်ႈတႆးပွတ်းၸၢၼ်း။

ပၢင်သွၼ်ၼႆႉၸတ်းႁဵတ်းပိူဝ်ႈတႃႇလုၵ်ႈၸုမ်းၼႂ်းပႃႊတီႊ ၵဵဝ်ႇၵၢပ်းလူၺ်ႈလွင်ႈတွတ်ႈၶႅပ်းလိူၵ်ႈတင်ႈ ၼႂ်းပီ 2015 ၼႆႉ တေလႆႈတွတ်ႈၶႅပ်းလိူၵ်ႈၸိူင်ႉႁိုဝ် တေႁဵတ်းႁိုဝ်တွတ်ႈၶႅပ်းလိူၵ်ႈတင်ႈလႂ်ၸိူဝ်းၼႆႉလႆႈၸီႉၸႅင်ႈ လၢတ်ႈၼႄ ပိူင်တွတ်ႈၶႅပ်းလိူၵ်ႈ။ ယဝ်ႉၵေႃႈ ပိူင်ငဝ်ႈပိုၼ်းမိူင်း 2008၊ လွင်ႈၸုၵ်းမၼ်ႈၼိူဝ်ပႃႊတီႊမီးၸိူင်ႉႁိုဝ်၊ ၶေႃႈယိူင်းဢၢၼ်းမီးၸိူင်ႉႁိုဝ်၊ ၶေႃႈယိူင်းမၢႆမီးၸိူင်ႉႁိုဝ်၊ ၵၢၼ်ပဵၼ်ၽူႈဢွၼ်ႁူဝ် ၸဵမ်ၸိူဝ်ၼႆႉ။

ၸၢႆးလိၼ်းမျၢတ်ႈၽူႈၼမ်းၼႂ်း ပႃႊတီႊႁူဝ်သိူဝ် မိူင်းတႆးပွတ်းၸၢၼ်း လႄႈၼၢင်းမျႃႉဢူး ၽူႈၼမ်းၼႂ်း ပႃႊတီႊႁူဝ်သိူဝ် ဝဵင်းတူၼ်ႈတီး တင်းမူတ်း မီးၽူႈၶိုၼ်ႈႁွတ်ႈ 35 ၵေႃႉ၊ ၸိူင်ႉၼင်ႇ လၢင်းၶိူဝ်း 1 ၵေႃႉ၊  ပၢင်လွင်း 3 ၵေႃႉ၊ ၼႂ်းထုင်ႉၼွင်ႁၢႆးယႃႈ၊ ဝၢၼ်ႈၼွင်ၸၢင်ႉ၊ ဝၢၼ်ႈတူၼ်ႈမူင်ႈ၊ ဝၢၼ်ႈသၢႆလေး၊ ဝၢၼ်ႈသီႇသူင်ႇ၊ ဝၢၼ်ႈတိုဝ်ႉႁိူဝ်း၊ ႁၢႆးၵႆႇ ၼႂ်းဝဵင်းတူၼ်ႈတီး ၸိူဝ်းၼႆႉ။

ၼၢင်းမျႃႉဢူး လၢတ်ႈဝႃႈ ဢၼ်ၶႃႈႁဝ်းလႆႈပၼ်ပၢင်သွၼ်ၼႆႉ ၵဵဝ်ႇၵၢပ်းလွင်ႈ တႃႇတေပဵၼ်ၽူႈဢွၼ်ႁူဝ်၊  တႃႇတေပဵၼ်လူင်ပွင်ၸိုင်ႈလီ လၢတ်ႈၼႄႁူဝ်ႁုပ်ႈမၼ်း ၸိူင်ႉၼင်ႇ ပိူင်ငဝ်ႈပိုင်းမိူင်း 2008 ၼၼ်ႉ ၵမ်ႈၽွင်ႈၵေႃႈတိုၼ်းဢမ်ႇႁူႉလႃးလႃးလူး၊ တေဝႃႈ ႁဵတ်းသင်လႄႈမၼ်းၵဵဝ်ႇလွင်ႈၼႆႉ။ ၸိူဝ်းၼႆႉ ၵွပ်ႈမၼ်းပႃးၼႂ်းၶေႃႈယိူင်းဢၢၼ်းၼၼ်ႉယဝ်ႉ၊ ႁဵတ်းသင်ႁဝ်းသမ်ႉၶႂ်ႈမႄးလႃႇ ႁဵတ်းသင်ပိူၼ်ႈ တႅမ်ႈဝႆႉၸိူင်ႉႁိုဝ်လႃႇၼႆၵေႃႈ လႆႈၸီႈၸႅင်ႈသပ်းလႅင်းၼႄ။

သိုပ်ႇလၢတ်ႈထႅင်ႈဝႃႈ ပေႃးထိုင်မႃးဝၼ်းလိူၵ်ႈတင်ႈၼႆ ၽွင်းတႅၼ်းတၵ်းလီလႆႈပႂ်ႉလူလွမ်ထတ်းပႃးၸွမ်း၊ ပေႃးႁဝ်းပႂ်ႉလူလွမ်ၸွမ်း၊ မိူဝ်ႈၼပ်ႉၶႅပ်းၵၢင်ၸႂ်ဝႂ်လူၵ်ႈတင်ႈသမ်ႉ တေလႆႈမပ်ႉၸိူင်ႉႁိုဝ် ၸဵမ်ၸိူဝ်ႉၼၼ်ႉ ။

ၽူႈပၼ်ပၢင်သွၼ်ၸၢႆးလိၼ်းမျၢတ်ႉ လၢတ်ႈဝႃႈ ၶႃႈႁဝ်းလႄႈၼၢင်းမျႃႉဢူး လႆႈၵႂႃႇလဵပ်ႈႁဵၼ်းတီႈ ငဝ်ႈငုၼ်းပႃႊတီႊႁဝ်းတီႈတႃႈၵုင်းသေ ၸွင်ႇမႃးပိုၼ်ၽႄႈပၼ်ၼႂ်းလုၵ်ႈၸုမ်းပႃႊတီႊႁဝ်း။

သိုပ်ႇလၢတ်ႈထႅင်ႈဝႃႈ ၼႂ်းမိူင်းတႆးႁဝ်းၶႃႈၼႆႉ ၵဵဝ်ႇၵၢပ်းလွင်ႈပၢင်သွၼ်ၵၢၼ်လိူၵ်ႈတင်ႈၼႆႉ ႁဝ်းၶႃႈယုပ်ႈယွမ်းတႄႉတႄႉ ဢၼ်တၵ်းလႆႈႁဵတ်းမီးထႅင်ႈတင်းၼမ် တေႃႈၼင်ႇတူဝ်ၸဝ်ႈၵဝ်ႇ တေတွၵ်ႈၶႅပ်းၵၢင်ၸႂ်လိူၵ်ႈပၼ် ယင်းဢမ်ႇႁူႉၵေႃႈမီးတင်းၼမ်၊ ဢၼ်တူဝ်ၸဝ်ႈၵဝ်ႇႁဵတ်းဝႆႉ ဢၼ်လူင်ပွင်ၸိုင်ႈ ပိုၼ်ၽၢဝ်ႇ ႁဝ်းတေလႆႈလိူၵ်ႈဢၼ်လႂ် ၼႆၵေႃႈ လိူၵ်ႈၽိတ်းလိူၵ်ႈထုၵ်ႇၵေႃႈမီးတင်းၼမ် ဝႃႈၼႆ။

ပၢင်သွၼ်ၵၢၼ်လိူၵ်တင်ႈၼႆႉ ၸတ်းႁဵတ်းယဝ်ႉၵႂႃႇၼႂ်းဝၼ်းတီႈ 14/06/2015 ႁူဝ်ပဝ်ႈပႃႊတီႊႁူဝ်သိူဝ် ၸိုင်ႈတႆးပွတ်းၸၢၼ်း ၸၢႆးၶမ်းပိူင်ႇၾႃႉ မႃးမွပ်ႈပၼ်ဝႂ် လူင်းပၢင်သွၼ် ဢၼ်ၵူၼ်းမႃးၶိုၼ်ႈပၢင်ၽိုၵ်းၾွၼ်ႉ။