ဝၼ်းၵူၼ်းႁဵတ်းၵၢၼ်ႁိူၼ်း (မႄႈဝၢၼ်ႈ) ၶွပ်ႈၶူပ်ႇတဵမ် 5 ပီ၊ တူဝ်တႅၼ်း ၵူၼ်းႁဵတ်းၵၢၼ်ႁိူၼ်း (မႄႈဝၢၼ်ႈ)လႄႈ ၸုမ်းမူလၼိထိမႅပ်ႊ ဢိၵ်ႇႁွင်ႈၵၢၼ်ဢၼ်ၵဵဝ်ႇၶွင်ႈ ႁႅင်းၵၢၼ် လႆႈၵႂႃႇတုၵ်းယွၼ်း သုၼ်ႇလႆႈသုၼ်ႇပဵၼ် တွၼ်ႈတႃႇၵူၼ်းႁဵတ်းၵၢၼ်ႁိူၼ်း (မႄႈဝၢၼ်ႈ) တီႈၽူႈၵွၼ်းၸႄႈတွၼ်ႈ ၵဵင်းမႆႇ ။

ဝၼ်းတီႈ 16/06/2015 ပဵၼ်ဝၼ်းၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ) ၶွပ်ႈၶူပ်ႇတဵမ် 5 ပီ၊ တူဝ်တႅၼ်း ၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ)လႄႈၸုမ်းမူလၼိထိမႅပ်ႊ သုၼ်ႇႁွင်ႈၵၢၼ်ဢၼ်ၵဵဝ်ႇၶွင်ႈႁႅင်းၵၢၼ် လႆႈၵႂႃႇတၢင်ႇယိုၼ်ႈလိၵ်ႈတုၵ်းယွၼ်း ၽူႈၵွၼ်းၸႄႈတွၼ်ႈၵဵင်းမႆႇ တီႈႁၢင်ႈၵၢၼ်လူင်ၸႄႈတွၼ်ႈ(သႃလႃးၵၢင်) ဝဵင်းၵဵင်းမႆႇ ၸိုင်ႈထႆး၊ ၼင်ႇႁိုဝ် ၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ) ပေႃးတေလႆႈမီးသုၼ်ႇလႆႈသုၼ်ႇပဵၼ် လွင်ႈၽဵင်ႇပဵင်း၊ ၸင်ႇလႆႈတၢင်ႇယိုၼ်ႈလိၵ်ႈတုၵ်းယွၼ်း တီႈၽူႈၵွၼ်းၸႄႈတွၼ်ႈၵဵင်းမႆႇ 5 ၶေႃႈ ။

ၼႂ်းၶေႃႈတိုၵ်းယွၼ်း 5 ၶေႃႈၼၼ်ႉ-
1. တိုၵ်းယွၼ်း ႁႂ်ႈလူင်ပွင်ၸိုင်ႈမီးပၵ်းပိူင်(ပေႃႊလႃႊသီႊ) ႁႂ်ႈတူၺ်းထိုင် လူလွမ် ၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ) သေလႆႈႁပ်ႉၵႃႈႁႅင်းၸၼ်ႉတႅမ်ႇသုတ်း ၸွမ်းၼင်ႇပၵ်းပိူင်(ပေႃႊလႃႊသီႊ)လူင်ပွင်ၸိုင်ႈတမ်းဝႆႉ။
2. တိုၵ်းယွၼ်းထိုင် ႁႂ်ႈလူင်ပွင်ၸိုင်ႈမီးပိူင်ၾၢင် ပေႃႈလဵင်ႉ/မႄႈလဵင်ႉ ၵူႈၵေႃႉ ဢၼ်လုၵ်ႈလဵင်ႉၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ) ႁႂ်ႈမီးၸွမ်းပၵ်းပိူင်မၢႆမီးႁႅင်းၵၢၼ်လႄႈ ဢမ်ႇမီးၶေႃႈၸႅၵ်ႇၽႄ။
3. တိုၵ်းယွၼ်းထိုင် ႁႂ်ႈလူင်ပွင်ၸိုင်ႈမီးပိူင်ၾၢင် ၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ) မီးသုၼ်ႇလႆႈႁဵတ်းဝႂ်ႁပ်ႉႁွင်းပၢႆးယူႇလီ(ပရႃႊၵၼ်ႊသင်ၶူမ်း)။

4. တုၵ်းယွၼ်း ႁႂ်ႈလူင်ပွင်ၸိုင်ႈ ၵူတ်းမၢႆ(မၢႆမီႈ) တွၼ်ႈတႃႇၵူၼ်းပႃးတွင်ႉ (တင်ႈၶၼ်ႊထေႊ) ဢၼ်ၵူၼ်းႁဵတ်းၵၢၼ်ႁိူၼ်းလိုဝ်ႈ ၵိူတ်ႇလုၵ်ႈ တႃႇ 90 ဝၼ်းၼၼ်ႉ ပေႃႈလဵင်ႉ/မႄႈလဵင်ႉ တေဢမ်ႇ ႁၢၵ်းငိုၼ်းလိူၼ်၊ လိူဝ်ၼၼ်ႉ တေလႆႈႁႃၵၢၼ်ပၼ် ၵူၼ်းႁဵတ်းၵၢၼ်ႁိူၼ်း ဢၼ်ပႃးတွင်ႉၼၼ်ႉ ပဵၼ်ၵၢၼ်ဢၼ်ၵိုင်ႇငၢမ်ႇတွၼ်ႈတႃႇၵူၼ်းပႃးတွင်ႉ ႁဵတ်းၵၢၼ်ၵႂႃႇလႆႈ။

5. တုၵ်းယွၼ်းထိုင် ႁႂ်ႈလူင်ပွင်ၸိုင်ႈ လူင်းလၢႆးမိုဝ်းႁပ်ႉႁွင်းၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ) ၶဝ်ႈၼႂ်းမၢႆမီႈ ILO  ၸိူဝ်းၼႆႉ။

တူဝ်တႅၼ်းၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ) ၵေႃႉၼိုင်ႈလၢတ်ႈဝႃႈ ဢၼ်ႁဝ်းၶႃႈလႆႈမႃးတုၵ်းယွၼ်းၼႆႉ ၼင်ႇႁိုဝ်ၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ) ပေႃးတေမီးလွင်ႈၽဵင်ႇပဵင်း မိူၼ်ၵူၼ်းႁဵတ်းၵၢၼ်တၢင်ႇသႅၼ်း ဢၼ်ၶဝ်ႈၼႂ်းၵူတ်းမၢႆ(မၢႆမီႈ)လူင်ပွင်ၸိုင်ႈ။ ၼိုင်ႈဝူင်ႈ ႁႂ်ႈမီးဝၼ်းယုတ်းပၼ် 1 ဝၼ်း၊ ပေႃးပဵၼ်ဝၼ်းယုတ်း ၼႂ်းၶႃႈႁၢပ်ႇၵၢၼ်ၶုၼ်လူင်ပွင်ၸိုင်ႈ မိူၼ်ဝၼ်းမႄႈ/ပေႃႈ ၸဵမ်ၸိူဝ်ႉၼၼ်ႉ ႁႂ်ႈလႆႈယုတ်းပၼ်မိူၼ်ပိူၼ်ႈ။ ပေႃးယုတ်းၼႆၸိုင် တေဢမ်ႇလႆႈႁၵ်းၵႃႈႁႅင်း လၢႆးဝၼ်း။
သိုပ်ႇလၢတ်ႈထႅင်ႈဝႃႈ ၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ)ၼႆႉ ႁႂ်ႈလႆႈႁဵတ်းၵၢၼ်ၼိုင်ႈဝၼ်းလႂ် 8 ၸူဝ်ႈမူင်း၊ သင်ႁဵတ်း ပူၼ်ႉၶၢဝ်းယၢမ်း 8 ၸူဝ်ႈမူင်းၼႆၸိုင် ပေႃးၵူၼ်းႁဵတ်းၵၢၼ်ႁိူၼ်းတိုၵ်ႉလႆႈသိုပ်ႇႁဵတ်းထႅင်ႈၵေႃႈ ႁႂ်ႈလႆႈပဵၼ်ၼွၵ်ႈၶၢဝ်းယၢမ်း(ဢူဝ်ႊဝိူဝ်ႊထီႊ) ဝႃႈၼႆ။

ဝၼ်းၵူၼ်းႁဵတ်းၵၢၼ်ႁိူၼ်း(မႄႈဝၢၼ်ႈ)ၼႆႉ ဢဵၼ်ႁႅင်းၵူၼ်းမွၵ်ႈ 10 ၵေႃႉပၢႆသေ လႆႈၵႂႃႇတၢင်ႇယိုၼ်ႈလိၵ်ႈတုၵ်းယွၼ်း ၽူႈၵွၼ်းၸႄႈတွၼ်ႈၵဵင်းမႆႇ ၶၢဝ်းယၢမ်း 10.00 မူင်းၵၢင်ၼႂ် ထိုင် 10.30 မူင်း ။

ဝၼ်းၵူၼ်းႁဵတ်းၵၢၼ်ႁိူၼ်း (မႄႈဝၢၼ်ႈ)ၼႆႉ လႆႈၵေႃႇတင်ႈမႃးမိူဝ်ႈဝၼ်းတီႈ 16/6/2011 တေႃႇထိုင် 16/06/2015 ၵေႃႇတင်ႈမႃး မီး 5 ပီယဝ်ႉ။