ငဝ်ႈငုၼ်းဝၢၼ်ႈႁႆး  SSPP ၸတ်းႁဵတ်းပၢင်သွၼ် ၵဵဝ်ႇလူၺ်ႈ ပၢင်ၽိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆး  ပွၵ်ႈၵမ်းတီႈ 10 ။

မိူဝ်ႈဝၼ်းတီႈ 12/06/2015 ၼၼ်ႉ လႆႈတႄႇပိုတ်ႇပၢင်သွၼ် ပၢင်ၽိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆး ဢၼ်ယၢမ်ႈႁဵတ်းမႃးၵူႈပီ ထူၼ်ႈထိုင် ပွၵ်ႈၵမ်း 10  ၊ ဢၼ်လုင်းၸၢႆးၾႃႈ လႆႈဢွၼ်ႁူဝ်သေ ပူင်သွၼ်မႃး။

ဝၼ်းတင်ႈတႄႇပိုတ်ႇပၢင်သွၼ်ၼၼ်ႉ မေႃသွၼ် ၼႂ်းပိုၼ်ႉတီႈ ၼႃႈလိၼ် SSPP ၵုမ်းၵမ် တႄႇဢဝ် ပွတ်းတွၼ်ႈတၢင်း ၵျွၵ်းမႄး တေႃႇထိုင် ပွတ်းတွၼ်ႈတၢင်းမူႇၸႄႈ မႃးၶိုၼ်ႈႁွတ်ႈလဵပ်ႈႁဵၼ်း မီး 354 ၵေႃႉ၊ ၸၢႆး မီး 119 ၊ ယိင်း မီး 235  ၵေႃႉ၊ မေႃသွၼ်မီး 12 ၊ ၸၢႆး 7 ၵေႃႉ၊ ယိင်း 5 ၵေႃႉ -ဝႃႈၼႆ။


ႁူဝ်ၶေႃႈလၢႆးပူင်သွၼ် ပၢင်ၽိုၵ်းၽွၼ်ႉၼႆႉ 1. ပိုၼ်းလိၵ်ႈလၢႆးတႆးလႄႈ ၶိူဝ်းၶုၼ်တႆး၊  2. လၢႆးလိၵ်ႈ၊ 3. ၼမ်ႉၵတ်ႉမေႃသွၼ်၊ 4.ပၢႆးၸၼ်ႁၢင်ႈ၊ 5. လွင်ႈတူၼ်တူဝ်ၵူၼ်း၊ 6.ပပ်ႉတင်ႈႁဵၼ်း၊ 7. သိုၵ်ႈပိုၼ်း ဢွၼ်ႇလုမ်ႈၾႃႉ၊  8 . ပၢႆးၼပ်ႉ ၸိူဝ်းၼႆႉ။ ၶူးပူင်သွၼ် လုင်းၸၢႆးၾႃႈ ၊ ၸၢႆးၸွမ်မိူင်း ၊ ၸၢႆးၸၢမ်ႇထုၼ်း ၊ ၸၢႆးၶုၼ်မိူင်း ၊ ၼၢင်းယွတ်ႈသႅင် ၊ ၼၢင်းမုၼ်းသႅင်လၢဝ် ၊ ၼၢင်းမူဝ်ၼူၼ်း ၊ ၼၢင်းတဵင်းၶမ်း ၸိူဝ်းၼႆႉ။


ပၢင်သွၼ်ၼႆႉ တင်ႈတႄႇပိုတ်ႇ မိူဝ်ႈဝၼ်းတီႈ 12/06/2015 သေ တေပူင်သွၼ်ၵႂႃႇ တေႃႇပေႃးထိုင်ဝၼ်းတီႈ 27/06/2015  ၶၢဝ်းတၢင်း 15 ဝၼ်း- ၼႆယဝ်ႉ။

ပၢင်သွၼ်ၼႆႉ ယိူင်းဢၢၼ်းပုၼ်ႈတႃႇ ႁႂ်ႈၵူၼ်းၼုမ်ႇတႆး မေႃၶွၼ်ႈႁႅင်းၵၼ်၊ မေႃပူင်သွၼ်လိၵ်ႈလၢႆးတႆး၊ ၼင်ႇႁိုဝ်လိၵ်ႈလၢႆးတႆး ပေႃးတေၶိုၼ်ႈယႂ်ႇမႂ်ႇသုင် ၶိုၼ်ႈၸၼ်ႉၶိုၼ်ႈသုင် ပုၼ်ႈမိူဝ်းၼႃႈသေ ၸင်ႇလႆႈၶတ်းၸႂ် ပိုတ်ႇပၢင်သွၼ်မႃး- ဝႃႈၼႆ။