သိုၵ်းဝႃႉ (ပွတ်းတႂ်ႈ) တင်းသိုၵ်းမၢၼ်ႈ တူၵ်းလူင်း လႆႈၸႂ်ၵၼ်ယဝ်ႉ လီၵၼ်ၶိုၼ်းယဝ်ႉ၊ မီးၶၢဝ်ႇဢွၵ်ႇမႃး ဝႃႈၼႆသေတႃႉ ၵၢၼ်သိုၵ်းယင်းပႆႇထွၼ်တႄႉတႄႉ။ သိုၵ်းဝႃႉ တင်းတပ်ႉပႂ်ႉလႅၼ်လိၼ် ယင်းတိုၵ်ႉပၵ်းပႂ်ႉ တေႃႇၼႃႈၵၼ်ယူႇ တီႈပုင်ႇပႃႇၶႅမ်။

သိုၵ်းဝႃႉ ပၵ်းပႂ်ႉၸွမ်းသဵၼ်ႈတၢင်း ႁိမ်းပုင်ႇပႃႇၶႅမ်တီႈၼိုင်ႈ ၽွင်းၶဵင်ႈၶႅင်ၵၢၼ်သိုၵ်းတေႃႇၵၼ် တင်းသိုၵ်းမၢၼ်ႈ

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 16/06/2016 ၸၼ်ႉၽူႈၼမ်းၼႂ်း တႅၼ်းတူဝ်ၽူႈၵွၼ်းတိူင်းသိုၵ်း သၢမ်ၸဵင်ႇ (ၵဵင်းတုင်) ဢွၵ်ႇတၢင်း မႃးႁူပ်ႉထူပ်းဢုပ်ႇဢူဝ်းၵၼ်တင်း ၸၼ်ႉၽူႈၼမ်းဝႃႉ (ၼႃႈလိၼ်သိုၵ်း 171) တီႈပုင်ႇပႃႇၶႅမ် ၸႄႈဝဵင်းမိူင်းတူၼ် ၸိုင်ႈတႆးပွတ်းဢွၵ်ႇ။ သွင်ၾၢႆႇ လႆႈဢုပ်ႇဢူဝ်းၵႄႈလိတ်ႈပၼ်ႁႃ ဢၼ်ၶဵင်ႈၶႅင်ၵၢၼ်သိုၵ်း တေႃႇၵၼ်မႃး။

ၵူၼ်းၸမ်ၸႂ်တပ်ႉသိုၵ်းမၢၼ်ႈၵေႃႈ ယိုၼ်ယၼ်လၢတ်ႈဝႃႈ- ၶေႃႈလႆႈၸႂ်တူၵ်းလူင်းၵၼ်ၼၼ်ႉ ၾၢႆႇၸုမ်းဝႃႉ ယွမ်းႁပ်ႉဝႃႈ ဢၼ်ၸုမ်းဝႃႉ ၵႂႃႇတႅပ်းပႃႇမႆႉၼႂ်းႁူၺ်ႈၼမ်ႉသႂ် ဢၼ်ဝႃႈပဵၼ်ပႃႇထိူၼ်ႇမႆႉ လူင်ပွင်ၸိုင်ႈ ၵုမ်းၵမ်ပႂ်ႉပႃးဝႆႉၼၼ်ႉ ၾၢႆႇဝႃႉယွမ်းၽိတ်း၊ ယွမ်းပၼ် လူင်ပွင်ၸိုင်ႈမၢၼ်ႈမႂ်ငိုၼ်း။ လိူဝ်သေၼၼ်ႉ မႆႉဢၼ်တႅပ်းဝႆႉတင်းသဵင်ႈၼၼ်ႉ ယွမ်းသိုဝ်ႉဢဝ်ၶိုၼ်းတင်းမူတ်း။ ၾၢႆႇမၢၼ်ႈၸင်ႇယွမ်းပွႆႇပၼ်ၵူၼ်းၸၢဝ်းၶႄႇ 6 ၵေႃႉၼၼ်ႉ။ လိူဝ်သေၼၼ်ႉၵေႃႈ တေၸတ်းၵၢၼ် လွင်ႈပၼ်ႈတူတ်ႈ(တၢမ်ႇ)ၵူၼ်းၸိူဝ်း ပူၼ်ႉပႅၼ်ၶဝ်ႈတႅပ်းမႆႉ ၼႂ်းပႃႇမႆႉလူင်ပွင်ၸိုင်ႈၵုမ်းဝႆႉ။ သွင်ၾၢႆႇမီးလွင်ႈတူၵ်းလူင်း လႆႈၸႂ်ၵၼ်ၸိူင်ႉၼႆသေ လီၵၼ်ၵႂႃႇ၊ ထွၼ်သိုၵ်းၵႂႃႇယဝ်ႉ- ဝႃႈၼႆ။

ၸွမ်းၼင်ႇလူင်ပွင်ၸိုင်ႈ တႅမ်ႈဝႆႉလိၵ်ႈပၵ်း/ၼဵပ်း/ ပႃႉဝႆႉၸွမ်းထိူၼ်ႇပႃႇမႆႉ ဢၼ်လူင်ပွင်ၸိုင်ႈ ၵုမ်းၵမ်ဝႆႉ ၵူႈတီႈၼၼ်ႉ ဝႃႈ ပေႃးတႅပ်းမႆႉၼိုင်ႈတူၼ်ႈ တူတ်ႈ(တၢမ်ႇ)ၶွၵ်ႈ 3 ပီ။ ၵူၺ်းၵႃႈ ပေႃးဢမ်ႇၺႃး တူတ်ႈ(တၢမ်ႇ)ၶွၵ်ႈၸိုင် တေထုၵ်ႇမၢပ်ႇမႂ်ငိုၼ်းၵႃႈႁိုဝ်ၼၼ်ႉ ဢမ်ႇလၢတ်ႈဝႆႉ။

လွင်ႈသွင်ၾၢႆႇလီၵၼ်ၶိုၼ်းၼႆႉ ၽူႈယႂ်ႇၵူၼ်းလူင် ဢၼ်မိုတ်ႈၵိုဝ်းၽူႈၼမ်းဝႃႉ ၵေႃႉၼိုင်ႈၵေႃႈလၢတ်ႈဝႃႈ- ၾၢႆႇဝႃႉလၢတ်ႈဝႃႈ ပၼ်ႁႃဢၼ်ပဵၼ်ယူႇၼႂ်းၸႄႈဝဵင်းမိူင်းတူၼ်ၼႆႉ ဢမ်ႇမီးယဝ်ႉ၊ ၵႄႈလိတ်ႈပၼ်ႁႃ ၵၼ်ယဝ်ႉၵေႃႈ သွင်ၾၢႆႇၵေႃႈထွၼ်သိုၵ်းၼင်ႇၵၼ်ယဝ်ႉ- ဝႃႈၼႆ။

ၵူၺ်းၵႃႈ ၵူၼ်းပုင်ႇပႃႇၶႅမ်ၵေႃႉၼိုင်ႈလၢတ်ႈဝႃႈ- မိူဝ်ႈဝႃးႁူဝ်ၶမ်ႈမွၵ်ႈ 6 မူင်းၼႆႉ ၵႃးသိုၵ်းဝႃႉတႃႇ 5 လမ်း ယင်းတိုၵ်ႉမႃးထႅမ်ႁႅင်းသိုၵ်းယူႇ တီႈဝၢၼ်ႈတႃႈၵႂၢင်ႈ ႁူဝ်ဝဵင်းပုင်ႇပႃႇၶႅမ်။ တီႈဢၼ်သိုၵ်းဝႃႉမႃးပၵ်းပႂ်ႉလႄႈ ထႅမ်ႁႅင်းသိုၵ်းၼႆႉ တေႃႇၼႃႈၵၼ်တင်း တပ်ႉပႂ်ႉလႅၼ်လိၼ် (BGF) လႃးႁူႇမႃးပၵ်းပႂ်ႉယူႇဝႆႉ။ မိူဝ်ႈသိုၵ်းဝႃႉ တင်းသိုၵ်းမၢၼ်ႈပႆႇၶဵင်ႈၶႅင်ၵၢၼ်သိုၵ်းတေႃႇၵၼ်ၼၼ်ႉ တီႈၼႆႈ ဢမ်ႇယၢမ်ႈမီးသိုၵ်းၸုမ်းလႂ်မႃးပၵ်း။ ၵမ်းၼႆႉ သိုၵ်းဝႃႉၵေႃႈမႃးပၵ်း၊ တပ်ႉပႂ်ႉလႅၼ်လိၼ်ၵေႃႈ မႃးပၵ်း၊ ပွင်ႇဝႃႈသွင်ၾၢႆႇ ယင်းတိုၵ်ႉၶဵင်ႈၶႅင်ၵၼ်ယူႇ- ဝႃႈၼႆ။

ၵူၼ်းဢၼ်လဵပ်ႈႁဵၼ်းၵၢၼ်မိူင်း ၼႂ်းပိုၼ်ႉတီႈၵေႃႉၼိုင်ႈ လၢတ်ႈဝႃႈ- ဢၼ်ဝႃႉမႃးၼႄႁႅင်းသိုၵ်းလႄႈသင်၊ ယိုတ်းသဵၼ်ႈတႃႈသၢႆတၢင်းလႄႈသင်၊ ၵူတ်ႇထတ်းၵူၼ်းၵႂႃႇမႃးၸိူဝ်းၼႆႉ ၾၢႆႇမၢၼ်ႈထိုဝ်ဝႃႈ မၼ်းပဵၼ်ၵၢၼ်လူလၢႆၵုၼ်းမုၼ်(သရေႇ)ၼႃႈတႃ လူင်ပွင်ၸိုင်ႈ။ ၵွပ်ႈၼၼ် မၢၼ်ႈတိုၼ်းၶႂ်ႈႁၢင်ႈသိုၵ်း တေႃႇဝႃႉယူႇ။ ပေႃးလဵပ်ႈႁဵၼ်းတူၺ်းၸိုင် ၾၢႆႇမၢၼ်ႈတေဢမ်ႇမီးၵေႊ (Gear) ထွႆလင်ယဝ်ႉ။ ဢၼ်ၸုမ်းဝႃႉႁဵတ်းၸိူင်ႉၼႆၼႆႉ တေၸၢင်ႈႁဵတ်းႁႂ်ႈသွင်ၾၢႆႇပဵၼ်သိုၵ်းတေႃႇၵၼ်- ဝႃႈၼႆ။

ၵူၼ်းယူႇၼႂ်းပိုၼ်ႉတီႈၵေႃႉၼိုင်ႈ ၵေႃႈလၢတ်ႈဝႃႈ- သွင်ၾၢႆႇဝႃႈတူၵ်းလူင်းလႆႈၸႂ်ၵၼ်ယဝ်ႉ၊ ထွၼ်ႁႅင်းသိုၵ်းယဝ်ႉ၊ လူတ်းယွၼ်ႇၵၢၼ်သိုၵ်းယဝ်ႉ ဝႃႈၼႆသေတႃႉၵေႃႈ ၵၢၼ်ပုတ်ႈပၵ်းထႅမ်ႁႅင်းသိုၵ်းၸိူဝ်းၼႆႉ ယင်းပႆႇလူတ်းယွမ်းတႄႉ။ လွင်ႈၼႆႉ ၵူဝ်ပဵၼ်ပၼ်ႁႃ တပ်ႉပႂ်ႉလႅၼ်လိၼ် လႄႈ သိုၵ်းဝႃႉယိုဝ်းၵၼ်ၶိုၼ်း။ ပေႃးၸိူင်ႉၼၼ် တပ်ႉပႂ်ႉလႅၼ်လိၼ် (BGF) ၵေႃႈ သမ်ႉပဵၼ်မၢၼ်ႈယူႇၾၢႆႇလင်ၵူၺ်း- ဝႃႈၼႆ။