ၵူၼ်းမိူင်းၸိုင်ႈမိူင်းႁူမ်ႈတုမ်မၢၼ်ႈ ပႃးၸဵမ် ၸုမ်းတူင်ႉၼိုင် တူင်ႇဝူင်းၵူၼ်း ႁူပ်ႉထူပ်းဢုပ်ႇဢူဝ်း ၵၼ်တီႈ ဝဵင်းတူၼ်ႈတီး။ ဢဝ်ၶေႃႈလႆႈၸႂ်ၵူၼ်းမိူင်း ပိူဝ်ႈတႃႇ တုၵ်းယွၼ်းတီႈ လူင်ပွင်ၸိုင်ႈ ၵဵဝ်ႇၵပ်းလွင်ႈငမ်းယဵၼ်။

တင်ႈတႄႇဝၼ်းတီႈ 12-14/06/2015 (ၶၢဝ်းတၢင်း 3 ဝၼ်း) မီးၵၢၼ်ၸတ်းပၢင်ႁူပ်ႉထူပ်းဢုပ်ႇဢူဝ်း ၵူၼ်းမိူင်းတႆးပွတ်းၸၢၼ်း (Southern Shan State local people forum)  တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း။ ပၢင်ႁူပ်ႉထူပ်းဢုပ်ႇဢူဝ်းၼႆႉ ပဵၼ်မူႇၸုမ်း ၸိုင်ႈမိူင်းၵျိူဝ်ႊမၼ်ႊၼီႊ (Hanns Seidel Foundation) တင်း ၸုမ်းၵူၼ်းမိူင်း-မိူင်းမၢၼ်ႈ ႁူမ်ႈၵၼ်ဢွၼ်ႁူဝ်ၸတ်းႁဵတ်း တီႈလုမ်းႁူင်းႁေႃၵၢင်ဝဵင်း (မျူဝ်ႉတေႃႇၶၢၼ်းမ) တီႈဝဵင်းတူၼ်ႈတီး။  မီးၵူၼ်းၶဝ်ႈႁူမ်ႈလၢႆမူႇလၢႆၸုမ်း၊ ၽူႈႁၢပ်ႇၵၢၼ်ၶုၼ်ၵူႈႁွင်ႈၵၢၼ်၊ ၸုမ်းတူင်ႇဝူင်းၵူၼ်းၸိူဝ်းၼႆႉ ႁူမ်ႈၵၼ်တင်းမူတ်း 150 ၸုမ်း၊ ၵူၼ်းၶဝ်ႈႁူမ်ႈတင်းမူတ်းမီး 280 ၵေႃႉ- ၼႆယဝ်ႉ။

ပၢင်ႁူပ်ႉထူပ်းၼႆႉ ဢုပ်ႇၵုမ်ၵၼ်မီး 4 ႁူဝ်ၶေႃႈ- 1.လွင်ႈငမ်းယဵၼ်။ 2.လွင်ႈႁုၼ်ႈမုၼ်းမႂ်ႇသုင်။ 3.လွင်ႈသုၼ်ႇလႆႈၵူၼ်း လႄႈလွင်ႈၽဵင်ႇပဵင်း။ 4.လွင်ႈလႅၵ်ႈလၢႆႈယၢင်ႈၸူး လွၵ်းပိူင်ၻီႊမူဝ်ႊၶရေႊၸီႊ။ ၼႂ်းပၢင်ဢုပ်ႇဢူဝ်းၼၼ်ႉ ႁဵတ်းထႅင်ႈပၢင်ဢုပ်ႇဢူဝ်းယွႆႈ Workshop မီး 14 ဢၼ်- ၼႆယဝ်ႉ။

ဢူးၼေႇမဵဝ်း ၾၢႆႇပွင်ပဵၼ်ပၢင်ဢုပ်ႇၵုမ်/ ၾေႃႊလမ်ႊ ၸိုင်ႈတႆးပွတ်းၸၢၼ်း လၢတ်ႈဝႃႈ- တီႈၼႂ်းႁူဝ်ၶေႃႈ 4 ဢၼ်ၼႆႉ ဢုပ်ႇၵုမ်ၵၼ်သေ ယွၼ်းတၢင်းၶႆႈၸႂ်တီႈၵူၼ်းမိူင်း၊  ၵဵပ်းဢဝ်ၵၢင်ၸႂ်တီႈၵူၼ်းမိူင်း ဢၼ်ၵူၼ်းမိူင်းပၼ်တၢင်းၶႆႈၸႂ်မႃးၼၼ်ႉ ၸိူဝ်းၼႆႉ။ ၶေႃႈပၼ်တၢင်းၶႆႈၸႂ်ၵူၼ်းမိူင်းလႄႈ ၵၢင်ၸႂ်ၵူၼ်းမိူင်း ဢၼ်ၵဵပ်းလႆႈမႃးၸိူဝ်းၼႆႉ ပေႃးဢဝ်ၵႂႃႇတၢင်ႇတီႈလူင်ပွင်ၸိုင်ႈၸိုင် ယုမ်ႇယမ်ဝႃႈ လူင်ပွင်ၸိုင်ႈ တေႁပ်ႉလႆႈ ႁဵတ်းပၼ်လႆႈၼႄႉၼွၼ်း။

ၵူၺ်းၵႃႈ မၢင်ၶေႃႈၼႆႉ ပေႃးယွၼ်းတီႈလူင်ပွင်ၸိုင်ႈၵေႃႈ  ဢမ်ႇၸႂ်ႈတူဝ်လူင်ပွင်ၸိုင်ႈ တေလႆႈႁဵတ်းပၼ်ႁဝ်း၊ တူဝ်ႁဝ်း ထုၵ်ႇလႆႈလုၵ်ႉႁဵတ်းႁင်းၵူၺ်း ၸိူဝ်းၼႆႉၵေႃႈၵႆႉမီးမႃး။ ပေႃးႁဝ်းမီးတိုဝ်ႉတၢင်းယူႇၼႆႉ ပေႃးႁဝ်းဢမ်ႇဢဝ်ၶေႃႈတုၵ်းယွၼ်းႁဝ်း တၢင်ႇထိုင် တုၵ်းယွၼ်းတီႈလူင်ပွင်ၸိုင်ႈၼႆၵေႃႈ ႁဝ်းတေၸၢင်ႈ လူႉသုမ်းသုၼ်ႇလႆႈႁဝ်း။ ၵွပ်ႈၼၼ်လႄႈ တၢင်းဢဝ်တၢင်းႁၼ်ထိုင်တီႈၵူၼ်းမိူင်း တေၵဵပ်းၵၢင်ၸႂ်တီႈၵူၼ်းမိူင်းသေ တုၵ်းယွၼ်းတီႈလူင်ပွင်ၸိုင်ႈ- ၼႆယဝ်ႉ။

ဢဵၼ်းဢၢၼ်းပိူင်လူင် ဢၼ်လႆႈၸတ်းပၢင်ႁူပ်ႉထူပ်း ၵူၼ်းမိူင်းၼႆႉ ပိူဝ်ႈတႃႇယုၵ်ႉမုၼ်းပၼ် သဵင်ၵၢင်ၸႂ်ၵူၼ်းမိူင်း၊ ႁႂ်ႈၸုမ်းတူင်ႇဝူင်းၵူၼ်း ၼႂ်းၸႄႈတွၼ်ႈ လႄႈၵူၼ်းဝၢၼ်ႈၵူၼ်းမိူင်းတင်းသဵင်ႈ ပၼ်သဵင်ၵၢင်ၸႂ်သေ တုၵ်းယွၼ်းဢွၵ်ႇမႃး။ မိူဝ်ႈဢုပ်ႇၵုမ်ၵၼ်ယဝ်ႉသေ တႅပ်းတတ်းၶၵ်ႉၵၢၼ် ပိူဝ်ႈတႃႇႁဵတ်းသၢင်ႈၵၢၼ်ငၢၼ်းၼၼ်ႉၵေႃႈ ထုၵ်ႇလႆႈသူၼ်းႁူၺ်းၵူၼ်းမိူင်းၶဝ်ႈပႃးၸွမ်း။ ထႅင်ႈၾၢႆႇၼိုင်ႈၵေႃႈ လူင်ပွင်ၸိုင်ႈၸႄႈမိူင်းလႄႈသင်၊ လူင်ပွင်ၸိုင်ႈတိူင်းလႄႈသင်၊ လူင်ပွင်ၸိုင်ႈမိူင်းႁူမ်ႈတုမ်လႄႈသင် ႁႂ်ႈၵမ်ႉၸွႆႈပၼ် ၵၢင်ၸႂ်ၵူၼ်းမိူင်း လႄႈ  ႁႂ်ႈဝႆႉၼၵ်းၼိူဝ်ၵၢင်ၸႂ်ၵူၼ်းမိူင်း ဢၼ်တုၵ်းယွၼ်းဢွၵ်ႇမႃးၸိူဝ်းၼၼ်ႉ - ၼႆယဝ်ႉ။

ၶေႃႈယိူင်းဢၢၼ်း ထႅင်ႈပိူင်ၼိုင်ႈ ႁႂ်ႈၵူၼ်းမိူင်း တင်းၾၢႆႇၽွင်းငမ်းၼႂ်းၸႄႈတွၼ်ႈၶဝ် ၵႆႉလႆႈႁူပ်ႉထူပ်းၵၼ်ၵႂႃႇၶိူဝ်းယႂ်း၊ ၼင်ႇႁိုဝ်တေမိုတ်ႈၵိုဝ်းၵၼ်လႄႈ သၢင်ႈလွင်ႈၸႂ်ၸမ်ၸႂ်ၵၼ်ၵႂႃႇ- ၼႆယဝ်ႉ။