ပႃႊတီႊငဝ်ႈငုၼ်းၻီႊမူဝ်ႊၶရႅတ်ႉၻိၵ်ႉၶ် ၸၢဝ်းၶိူဝ်းတႆး SNDP ပိုတ်ႇလုမ်းတီႈ ဝၢၼ်ႈၼွင်ၼူၼ်း သဵၼ်ႈတၢင်း တႃႈၶီႈလဵၵ်း ဢိူင်ႇမိူင်းၸဵမ်း ၸိုင်ႈတႆးပွတ်းဢွၵ်ႇ လႆႈပိုတ်ႇလုမ်းပူၵ်းတုင်း ၸိူဝ်ႉၸၢတ်ႈၸိုင်ႈတႆးလႄႈ ပူၵ်းပၢႆႉသိူဝ်ၽိူၵ်ႇ၊ မီးၽူႈၶဝ်ႈႁူမ်ႈ တင်းၼမ် ။

ပူၼ်ႉမႃးမိူဝ်ႈဝၼ်းတီႈ 13/06/2015 ဝၼ်းသဝ် ၶၢဝ်းယၢမ်း08.30 မူင်းၵၢင်ၼႂ်ထိုင် 09.30 မူင်း ပႃႊတီႊသိူဝ်ၽိူၵ်ႇ လႆႈပိုတ်ႇလုမ်း တီႈဝၢၼ်ႈၼွင်ၼူၼ်း ဢိူင်ႇမိူင်းၸဵမ်း ယူႇႁၢင်ႇၵႆဝဵင်းၵဵင်းတုင်                 2 လၵ်း။  ၽူႈဢွၼ်ႁူဝ်ၼမ်းၼႃးပိုတ်ႇလုမ်းၵႂႃႇ ပဵၼ်ႁူဝ်ပဝ်ႈပႃႊၻီႊသိူဝ်ၽိူၵ်ႇ ၵဵင်းတုင် လုင်းယွတ်ႈႁွင်၊ ႁူဝ်ပဝ်ႈပႃႊတီႊသိူဝ်ၽိူၵ်ႇ မိူင်းယၢင်း လုင်းၸၢႆးလူင်လႄႈ ၶွမ်ႊမတီႊငဝ်ႈငုၼ်းသိူဝ်ၽိူၵ်ႇ ၸၢႆးတွင်းသဵင်ႇ (ၶ) သိူဝ်ႁၢၼ်၊ မီးၽူႈၵွၼ်းဢိူင်ႇ၊ ၽူႈၵွၼ်းဝၢၼ်ႈပူႇၵၢင်ႉ/ၵႄႇ ၼႂ်းဢိူင်ႇမိူင်းၸဵမ်း 17 ဝၢၼ်ႈ ဢိၵ်ႇပႃးၵူၼ်းမိူင်းၼႂ်းပိုၼ်ႉတီႈ ၶဝ်ႈႁူမ်ႈတင်းမူတ်း 50 ၵေႃႉပၢႆ။

ႁူဝ်ပဝ်ႈပႃႊတီႊသိူဝ်ၽိူၵ်ႇ ၵဵင်းတုင် လုင်းယွတ်ႈႁွင်ႈလႄႈ ႁူဝ်ပဝ်ႈပႃႊတီႊသိူဝ်ၽိူၵ်ႇ မိူင်းယၢင်း လုင်းၸၢႆး လူင်ၵၢဝ်ႇလၢတ်ႈၶေႃႈၵႂၢမ်းပၼ်ပေႃႈမႄႈၵူၼ်းမိူင်း ဢၼ်မႃးၶိုၼ်ႈႁွတ်ႈပိုတ်ႇလုမ်း။

ၽူႈပွင်ၵၢၼ်ငဝ်ႈငုၼ်းသိူဝ်ၽိူၵ်ႇ ၸၢႆးတွင်းသဵင်ႇ (ၶ) သိူဝ်ႁၢၼ် ပိုတ်ႇလၢတ်ႈၶေႃႈၵႂၢမ်းသပ်းလႅင်း ပၼ်ၵူၼ်းမိူင်း ပႃႊတီႊသိူဝ်ၽိူၵ်ႇ လႆႈမီးမႃး ၵူၼ်းမိူင်းလိူၵ်ႈတင်ႈမႃး တႃႇတေႁဵတ်းၵၢၼ်ဝၢၼ်ႈမိူင်း တႅၼ်းၵူၼ်းမိူင်း ယွၼ်ႉၵွပ်ႈဝၢၼ်ႈမိူင်းၶဝ်ႈသူႇပၢၼ်ၻီႊမူဝ်ႊၶရေႊၸီႊ ။ ၵွပ်ႈၼႆလႄႈ ငဝ်ႈႁၢၵ်ႈႁူဝ်တီးမၼ်းၵေႃႈ ပဵၼ်ၵူၼ်းဝၢၼ်ႈၵူၼ်းမိူင်းႁဝ်းတင်းသဵင်ႈယဝ်ႉ - သပ်းလႅင်းၼႄၵူၼ်းမႃး ၶဝ်ႈႁူမ်ႈပၢင်ၼင်ႇၼႆ။

ၸၢႆးဝုၼ်းတိပ်ႉ ၽူႈပွင်ၵၢၼ်ၼႂ်းၸုမ်းပႃႊတီႊသိူဝ်ၽိူၵ်ႇ ၵဵင်းတုင် လၢတ်ႈဝႃႈ- ယိူင်းဢၢၼ်းတႄႉ ပႃႊတီႊသိူဝ်ၽိူၵ်ႇ တေဢၢၼ်းပိုတ်ႇလုမ်းၵႂႃႇၵူႈတီႈတီႈ တွၼ်ႈတႃႇၼႂ်းဢိူင်ႇၵဵင်းတုင်၊ ပေႃးႁဝ်းဢမ်ႇပိုတ်ႇလုမ်းဝႆႉၼႆ ပီႈၼွင်ႉႁဝ်းဢမ်ႇၸၢင်ႈ ၵႂႃႇတုမ်ၵၼ်တီႈလႂ်၊ ပေႃးႁဝ်းပိုတ်ႇလုမ်းဝႆႉၼႆ ပီႈၼွင်ႉႁဝ်းတေမႃးၶွၼ်ႈတုမ်ၵၼ်ပဵၼ်ၸွမ်းပၵ်းပိူင်၊ မီးပၼ်ႁႃလွင်ႈသင်ၼႂ်းဢိူင်ႇၼႂ်းဝၢၼ်ႈၼႆၵေႃႈ မႃးဢုပ်ႇၵိူဝ်းၵုမ် ၸွႆႈၵၼ်ၵႄႈပၼ်ႁႃ တႃႇတေၶဝ်ႈၸွမ်းပၵ်းပိူင်သေ ဢဝ်တၢင်ႇၼႄ လူင်ပွင်ၸိုင်ႈ။

ၽူႈပွင်ၵၢၼ်ငဝ်းငုၼ်းသိူဝ်ၽိူၵ်ႇ ၸၢႆးတွင်းသဵင်ႇ (ၶ) သိူဝ်ႁၢၼ် လႆႈဢွၼ်ၵူၼ်းမိူင်း ဢၼ်မႃးၶိုၼ်ႈႁွတ်ႈ ဢွၼ်ၵၼ်ပူၵ်းတုင်းၸိူဝ်ႉၸၢတ်ႈ ၸိုင်ႈတႆး၊ ပူၵ်းပၢႆႉပႃႊတီႊသိူဝ်ၽိူၵ်ႇ ယဝ်ႉၵေႃႈတၵ်ႉယမ်တုင်းၸိူဝ်ႉၸၢတ်ႈၸိုင်ႈတႆးသေ ပိုတ်ႇလုမ်းၵႂႃႇ။

လုမ်းပႃႊတီႊသိူဝ်ၽိူၵ်ႇၼႆႉ ဢၼ်လႆႈပိုတ်ႇၵႂႃႇၼႂ်းတူင်ႇဝဵင်းၵဵင်းတုင် မီးၵႂႃႇ 10 တီႈ၊ ၼႂ်းဝဵင်းၵဵင်းတုင်ပိုတ်ႇဝႆႉ ပွၵ်ႉသၢမ် (1) တီႈ၊ ၼႂ်းဢိူင်ႇသမ်ႉ 9 တီႈ၊ တီႈဢိူင်ႇ 1. ဢိူင်ႇမိူင်းပၵ်ႉ၊ 2. ဢိူင်ႇမိူင်းၶွၼ်၊ 3. ဢိူင်ႇလွႆလူင်၊ 4. ဢိူင်ႇယၢင်းလေႃး၊ 5. ဢိူင်ႇမိူင်းလင်း၊ 6. ဢိူင်ႇမိူင်းၸဵမ်း၊ 7. ဢိူင်ႇမိူင်းလၢပ်ႈ ၊ 8. ဢိူင်ႇယၢင်းၵဵင် ၵိုတ်းထႅင်ႈ 1 ဢိူင်ႇ ၼႆယဝ်ႉ။

တေႃႈလဵဝ် ၼႂ်းဝဵင်းၵဵင်းတုင်ၸိုင်ႈတႆးပွတ်းဢွၵ်ႇၼႆႉ ပႃႊတီႊတႆး မီးဝႆႉ ပႃႊတီႊႁူဝ်သိူဝ်၊ ပႃႊတီႊသိူဝ်ၽိူၵ်ႇလႄႈ ပႃႊတီႊမႂ်ႇသုင်ၻီႊမူဝ်ၶရႅတ်ႉၻိၵ်ႉၶ် 3  ပႃႊတီႊ။