ပၢင်ပွႆးယၢတ်ႇၼမ်ႉႁူင်းထမ်းမႂ်ႇ ဝတ်ႉဝိသုတ်ႉထိ ဝဵင်းႁူဝ်မိူင်း လႄႈပွႆးသၢင်ႇလွင်း ၸၢင်းလွင်း ပီသႃသၼႃ 2558 ၼႆႉ ၸတ်းပႃးဝႂ်ၸုၵ်ႈလီ၊ သင်ၶတႆးၸိုဝ်ႈယႂ်ႇ ယေႃးႁွတ်ႈႁေႃးထမ်း/တြႃး။

ႁူင်းထမ်းမႂ်ႇ ဝတ်ႉဝိသုတ်ႉထိ ဝဵင်းႁူဝ်မိူင်း

ပၢင်ပွႆးယၢတ်ႇၼမ်ႉ ႁူင်းထမ်းမႂ်ႇ ဝတ်ႉဝိသုတ်ႉထိႁူဝ်မိူင်း လႄႈ ပွႆးသၢင်ႇလွင်း ၸၢင်းလွင်း ဝဵင်းႁူဝ်မိူင်းပွၵ်ႈၵမ်းၼႆႉ ၸတ်းတင်ႈတႄႇဝၼ်းတီႈ 23-25/04/2015 ။ သၢင်ႇလွင်းမီး 105 တူၼ်၊ ၸၢင်ႈလွင်းမီး 3 တူၼ်၊ ႁူမ်ႈ 108 တူၼ်။ ဝၼ်းတီႈ 23 (လိူၼ်ႁူၵ်းမႂ်ႇ 6 ၶမ်ႈ) ဢဝ်သၢင်ႇလွင်း။ ဝၼ်းတီႈ 24 (လိူၼ်ႁူၵ်းမႂ်ႇ 7 ၶမ်ႈ) ႁပ်ႉၶႅၵ်ႇ။ ဝၼ်းတီႈ 25 (လိူၼ်ႁူၵ်းမႂ်ႇ 8 ၶမ်ႈ) ၼုင်ႈသၢင်ႇၼုင်ႈၸၢင်း၊ လူႇတၢၼ်းယၢတ်ႇၼမ်ႉ ႁူင်းထမ်းမႂ်ႇ- ၼႆယဝ်ႉ။

ပၢင်ပွႆးၼႆႉ သင်ၶၸဝ်ႈၸိုဝ်ႈယႂ်ႇ ၼႂ်းၵၢၼ်ႁေႃးထမ်း/ တြႃး ၸဝ်ႈသုၶမ်း (တၢင်ႉယၢၼ်း) ၵေႃႈ ယေႃးတူဝ်ႁွတ်ႈထိုင်သေ ၶိုၼ်းဝၼ်းတီႈ 24/04/2015 ၼႆႉႁေႃးထမ်းတြႃးပၼ် တၵ်ႉၵႃႇသတ်ႉထႃးတင်းလၢႆ- ၼႆယဝ်ႉ။

ၼွၵ်ႈသေၼၼ်ႉ ၼႂ်းပၢင်ပွႆးယင်းပိုတ်ႇပၼ် ဝႂ်ၸုၵ်ႈလၢပ်ႈ ၸူၵ်းဢဝ်ရၢင်းဝလ်း (သူး) တီႈ 1, 2, 3 ထႅင်ႈ။ ရၢင်းဝလ်းတီႈၼိုင်ႈ ရူတ်ႉၵႃးဝီႊၵူဝ်ႊ (Vigo) ၼိုင်ႈလမ်း၊ တီႈသွင် ရူတ်ႉၶိူင်ႈ 2 လမ်း၊ တီႈသၢမ် ပဵၼ်ထီႊဝီႊ (TV) ၼိုင်ႈၶိူင်ႈ/လုၵ်ႈ၊ ၵႃႈၶၼ်ဝႂ်ၸုၵ်ႈ 300 ဝၢတ်ႇငိုၼ်းထႆး- ၼႆယဝ်ႉ။

ပၢင်မူၼ်ႈသိူဝ်းပၢၼ်မႂ်ႇ မီးဝူင်းၸိူင်းလႅဝ်း၊ ဝူင်းႁိူဝ်းမႂ်ႇ (ၵဵင်းမႆႇ)၊ မေႃႁွင်ႉၵႂၢမ်းၸိုဝ်ႈသဵင်ယႂ်ႇ ၼႂ်းမိူင်းတႆးၸိူဝ်းမႃးၶဝ်ႈႁူမ်ႈပၢင်ပွႆး ႁွင်ႉၵႂၢမ်းလဝ်ႇမူၼ်ႈတူၼ်ႈၸႂ်ပၼ် မီးၸၢႆးတႃႇဢူး၊ ၸၢႆးၸိူင်းမႂ်ႇ (လုၵ်ႈၸၢႆးမူး)၊ ၼၢင်းမွၵ်ႇၸၢမ်ၶမ်း၊ ၸၢႆးဢူးလၢႆး၊ ၼၢင်းၸၼ်ႁွမ်၊ ၼၢင်းႁွမ်ၼူၼ်း၊ ၸၢႆးလွမ်ႉဝုၼ်း၊ ၸၢႆးထႅၼ်ႈလႅဝ်း၊ ၸၢႆးလႅင်းပၢင်ႇ၊ ၸၢႆးငဝ်းလိူၼ် ၸိူဝ်းၼႆႉ။ ၼွၵ်ႈသေၼၼ်ႉ ယင်းမီးထႅင်ႈမေႃႁွင်ႉၵႂၢမ်း သႅၼ်းႁုၼ်ႈမႂ်ႇထႅင်ႈလၢႆလၢႆၵေႃႉ။ ပၢင်မူၼ်ႈသိူဝ်းပၢၼ်ၵဝ်ႇ မီးၸၢတ်ႈတႆး ဝၢၼ်ႈၶႃးႁွမ် ၸႄႈဝဵင်းမႄႈႁွင်ႈသွၼ် ၸိုင်ႈထႆး- ၼႆယဝ်ႉ။

ၶူင်ႇ (ဝေးထီး) ပၢင်ၵႂၢမ်းပၢၼ်မႂ်ႇ

ပၢင်ပွႆးၼႆႉ မူႇၸုမ်း ၵေႃလိၵ်ႈလၢႆးလႄႈၾိင်ႈငႄႈတႆး ၼႂ်းမိူင်း ၼွၵ်ႈမိူင်းၵေႃႈမႃးၶဝ်ႈႁူမ်ႈ။ ၼႂ်းမိူင်း မီးမိူၼ်ၼင်ႇၵေႃလိၵ်ႈလၢႆး လၢင်းၶိူဝ်း၊ မိူင်းပၼ်ႇ၊ မိူင်းၼၢႆး၊ ၼမ်ႉၸၢင်၊ ပၢင်ႇလႅင်းသႂ်၊ ပၢင်လူင် ၸိူဝ်းၼႆႉ။ ၼွၵ်ႈမိူင်း ၼႂ်းမိူင်းထႆး မီးမိူၼ်ၼင်ႇၵေႃလိၵ်ႈလၢႆး လႄႈၾိင်ႈငႄႈတႆး ၵဵင်းမႆႇ၊ တင်းမူတ်းမီးၵေႃလိၵ်ႈလၢႆးမႃးၶဝ်ႈႁူမ်ႈ 8 ၸုမ်း- ၸုမ်းၶၢဝ်ႇၽူႈတွႆႇႁွၵ်ႈ ၵေႃႉဢၼ်ၵႂႃႇၶဝ်ႈႁူမ်ႈပၢင်ပွႆး တီႈဝဵင်းႁူဝ်မိူင်း ႁၢႆးငၢၼ်းမႃးၼင်ႇၼႆ။

သုမ်ႉသၢင်ႇလွင်း ၸၢင်းလွင်း