ၽူႈလူင်ႉလႅၼ်ႇလွင်ႈတႆးလၢႆၸဝ်ႈ တေၶဝ်ႈဢုပ်ႇလၢတ်ႈ တၢၼ်ၶႆႈ တီႈဝဵင်းၸႄႈလၢၼ်ႉ



ၵေႃႁူမ်ႈသၢင်ႈၵူၼ်းၼုမ်ႇတႆး ဢွၼ်ႁူဝ်ၸတ်းႁဵတ်း ပၢင်တၢၼ်ႈၶႆႈ ပိုၼ်းတႆး တီႈဝဵင်းၸေႈလၢၼ်ႉ ၸႄႈဝဵင်းမူႇၸႄႈ ၸိုင်ႈတႆးပွတ်းႁွင်ႇ၊ မွၵ်ႇထိုင်ၽူႈလူင်ႉလႅၼ်ႇ လွင်ႈတႆး လၢႆၸဝ်ႈ ၶဝ်ႈႁူမ်ႈ ဢုပ်ႇလၢတ်ႈတၢၼ်ႈၶႆႈ ပၼ်တၢင်းႁူႉတၢင်းႁၼ်။



ဝၼ်းတီႈ 26/4/2015 တေမႃးၼႆႉ တင်ႈတႄႇၵၢင်ၼႂ် 8 မူင်းတေႃႇ ဝၢႆးဝၼ်း 4 မူင်း၊ တေၸတ်းႁဵတ်းပၢင်တၢၼ်ႈၶႆႈ တီႈၵျွင်းလူင်ဝတ်ႉႁွင်ႇ ဝဵင်းၸႄႈလၢၼ်ႉ။ တီႈပၢင်ၼၼ်ႉ ၽူႈလူင်ႉလႅၼ်ႇပိုၼ်းတႆး ၶိူဝ်းတႆး၊ လိၵ်ႈလၢႆးပၢႆပေႇတႆး မိူၼ်ၼင်ႇ ၸဝ်ႈတူၼ်ၶူးတိုၼ်းတႆး (ၸဝ်ႈတူၼ်ၶူး  ဢၼ်ဢွၼ်ႁူဝ် ၵေႃႇသၢင်ႈ ႁူင်းၼႄပိုၼ်း ႁၢင်ႈႁေႃၸဝ်ႈသိူဝ်ၶၢၼ်ႇၾႃႉ ၵွင်းႁေႃ ဝဵင်းမိူင်းမၢဝ်း) ၊ ၶူးႁိုၼ်း ၵႃယၢင်း ၊ တွၵ်ႊတိူဝ်ႊၸၢႆးသၢင်ႇဢၢႆႈ၊ ၶုၼ်ယုင်းၶဵဝ်၊ မေႃလိၵ်ႈၸၢႆးၵေႃႇမိူင်း ( ၸရေးၵေႃႇမိူင်း ၼမ်ႉလၼ်ႈ) တင်း ၶူးၶိူဝ်းသႅၼ် ၸိူဝ်းၼႆႉ မႃးပၼ်တၢင်းႁူႉတၢင်းႁၼ် ၵူၼ်းၼုမ်ႇတႆး။

ၶူးႁိူၼ်း ၵႃယၢင်း လၢတ်ႈဝႃႈ- “ ၶႃႈတႄႉလိူၵ်ႈဝႆႉႁူဝ်ၶေႃႈဢၼ်ဝႃႈ ‘သိူဝ်ႈၵၢပ်ႇလဵၵ်းလူင်သၢမ်ၽိုၼ်၊ ၼႆႉတႄႉၶႂ်ႈယိူင်းဝႃႈ ပၵ်းပိူင်လၵ်းမိူင်း (ပိူင်ငဝ်ႈပိုင်းမိူင်း) 1947 ၊ 1974 တင်း လၵ်းမိူင်း 2008 ။ မိူဝ်ႈႁဝ်းၶႃႈ တႄႇႁူမ်ႈသၢၼ်ၵၼ်သေ ၶဵၼ်ႇတႅမ်ႈတႄႉၵေႃႈ မၼ်းတေပဵၼ် “ သိူဝ်ႈၵုၺ်လၢႆႈလူင်။ ဝၢႆးမႃး ထုၵ်ႇၸုမ်းသိုၵ်းၶဝ် ႁုပ်ႈယိုတ်းပႅတ်ႈသေ လႆႈပဵၼ်ၵႂႃႇသိူဝ်ႈၵၢပ်ႇလဵၵ်းလူင် ႁေႃႇဢႃႇၼႃႇ ၶွင်ၸုမ်းသိုၵ်း ၸုမ်းသိူဝ်ၶဝ်ပႅတ်ႈ၊ ဢၼ်ၼႆႉလုၵ်ႉတီႈလႂ်မႃး၊ ထုၵ်ႇလီမႄးၸိူင်ႉႁိုဝ်၊ တေႁဵတ်းႁို်ဝ်ပူတ်းပွႆႇပႅတ်ႈ ႁႂ်ႈပေႃးပဵၼ် ၶွင်ၸဝ်ႈၵဝ်ႇ ၶွင်ၵူၼ်းမိူင်းၶိုၼ်းၼၼ်ႉၼႆ မီးယိူင်းဢၢၼ်းၶႆႈၵႂႃႇတၢၼ်ႈၶႆႈ ပၼ်တၢင်းႁူႉ ၸိူင်ႉၼႆဢေႃႈ” - ဝႃႈၼႆ။


ၸၢႆးလွႆၶမ်းပၢင်ႇ ၽူႈၶဝ်ႈၵေႃပွင်ပဵၼ်ၵၢၼ်ႁူမ်ႈႁႅင်း ၶိုၼ်ႈလွႆ လႄႈ တႃႇတေပဵၼ်ပၢင်တၢၼ်ႈၶႆႈ လၢတ်ႈဝႃႈ- “ ၶိုၼ်ႈလွႆပွၵ်ႈၼႆႉ မီးပႃးပၢင်တၢၼ်ႈၶႆႈ လွင်ႈပိုၼ်း ၸဝ်ႈသိူဝ်ၶၢၼ်ႇၾႃႉ။  ၵူၼ်းၼုမ်ႇ ၸႄႈလၢၼ်ႉ လႄႈ ၵူၼ်းလူင်ပိုၼ်ႉတီႈ ဢိူင်ႇထုင်ႉမၢဝ်း မီးလွင်ႈႁူမ်ႈမိုဝ်းၵၼ်တင်း Tai Youth Network ။ လိူဝ်ၼၼ်ႉ ၵမ်ႉၸွႆႈၶဝ်ႈသၢၼ် ငိုၼ်းတွင်း ၶူဝ်းၶွင် ၵူႈလွင်ႈလွင်ႈပႃး ၊ ၽူႈလူင်ႉလႅၼ်ႇ ၵဵဝ်ႇၵပ်းလွင်ႈတႆး ဢၼ်ၸိုဝ်ႈသဵင်ယႂ်ႇၵေႃႈ တေမႃးပၼ်ပိုၼ်ႉႁူႉ။ ၵွပ်ႈၼၼ်ၵၢၼ်ၶိုၼ်ႈလွႆပွၵ်ႈၼႆႉ မီးၼမ်ႉတွၼ်းၽွၼ်းလီၼမ်လိူဝ် ၵူႈပွၵ်ႈ” - ဝႃႈၼႆ။

ၸႄႈလၢၼ်ႉၼႆႉ ပဵၼ်ဢိူင်ႇဢၼ်ၼိုင်ႈ ၼႂ်းၸႄႈဝဵင်းမူႇၸႄႊ။ ပဵၼ်ဝဵင်းၵဝ်ႇ ႁေႃၶမ်းတႆးလႄႈ ၸပ်းသူပ်းတႆးဝႃႈ ဝဵင်းၸေႈလၢၼ်ႉ။ ၵႆဝဵင်းမူႇၸႄႈ 6 လၵ်း ။ မီးၼိူဝ်သဵၼ်ႈတၢင်း မူႇၸႄႈ - ၼမ်ႉၶမ်း။ ပဵၼ်ပိုၼ်ႉတီႈ ၵိုၵ်းၵပ်းပိုၼ်းမိူင်းတႆး၊ ၶိူဝ်းတႆး။ တီႈဢၼ်ဝူင်ႉႁေႃသႅင် ၸဝ်ႈသိူဝ်ၶၢၼ်ႇၾႃႉ သၢင်ႈႁၢင်ႈႁေႃ ၵေႃႇတႅၼ်ႈတဵင်တေး ဝၢၼ်ႈမိူင်း။




 
© 2012 All Rights Reserved | Asean Celebrity | Fonts @ AtFonts | Free Templates