ဝၼ်းတီႈ 20/4/2015 တီႈဝတ်ႉၵျွင်း ဝေလုဝၼ် ဝဵင်းၵႃႇလိၼၼ်ႉ လုင်းၸၢႆးဢၢႆႈပဝ်း ႁူပ်ႉထူပ်း ပေႃႈ မႄႈ ၵူၼ်းမိူင်း မွၵ်ႇလၢတ်ႈၶေႃႈၵႂၢမ်းဝႃႈ - “ပေႃႈမႄႈၵူၼ်းမိူင်း တင်းလၢႆ ထုၵ်ႇလႆႈတွတ်ႈၶႅပ်း ပၼ်သိူဝ်ၽိူၵ်ႇႁဝ်းၶႃႈ။ ပေႃးႁဝ်းၶႃႈပေႉၵွၼ်ႇ ပႃႊတီႊသိူဝ်ႇၽိူၵ်ႇ ၸင်ႇတေပဵၼ်လူင်ပွင်ၸိုင်ႈ မိူင်းတႆး။ ပေႃးဢမ်ႇပဵၼ်လူင်ပွင်ၸိုင်ႈမိူင်းတႆး ဢမ်ႇၸၢင်ႈႁဵတ်းၵၢၼ်ပၼ်သင် တႃႇပေႃႈမႄႈၵူၼ်းမိူင်း” - ဝႃႈၼႆ။

ဝၢႆးၼၼ်ႉ လုင်းၸၢႆးဢၢႆႈပဝ်း ၵႂႃႇႁူပ်ႉ လုင်းၸၢႆးလၢဝ်ၵွၼ်း ၽူႈၵွၼ်းတပ်ႉပီႇတုၸိတ်ႉ လွႆၽႃ ၵႃလိ။

ၼွင်ႉၶမ်း ဢၼ်ၵႂႃႇၶဝ်ႈႁူမ်ႈ ပၢင်ႁူပ်ႉထူပ်း ႁူဝ်ပဝ်ႈပႃႊတီႊသိူဝ်ၽိူၵ်ႇ တီႈၵုၼ်ႁဵင် ၼၼ်ႉလၢတ်ႈ ဝႃႈ - “ၽႂ် လၢတ်ႈ ၵေႃႈၸႂ်ႈယူႇႁင်းၽႂ်ႁင်းမၼ်း။ ပႃႊတီႊသိူဝ်ၽိူၵ်ႇသမ်ႉဝႃႈ ၶႂ်ႈလႆႈပဵၼ် လူင်ပွင်ၸိုင်ႈ ယူႇတိၵ်းတိၵ်း၊ မိူဝ်ႈ ပႃႊတီႊ ႁူဝ်သိူဝ်မႃးၼၼ်ႉသမ်ႉဝႃႈ ၵႃႈဢမ်ႇပဵၼ် မိူင်းႁူမ်ႈတုမ်ၸိုၼ်ႈၸၢင်ႇ တေသၢၼ်ၶတ်းယူႇတိၵ်းတိၵ်း ဝႃႈၼႆ။ ႁဝ်းၶႃႈၵူၼ်းမိူင်းတႄႉၵႂင်မူတ်းယဝ်ႉ။ ဢၼ်တၢင်း ယၢပ်ႇၽိုတ်ႇၵူၼ်းမိူင်း ယွၼ်ႉၾၢႆၼမ်ႉၶူင်း၊ ဢၼ်တေၺႃးၽေးၼမ်ႉထူမ်ႈ ၼၼ်ႉ ၽႂ်ၵေႃႈဢမ်ႇ တူၵ်ႇလၢတ်ႈ။ တႃႇတေၵႅတ်ႇၵင်ႈ ထိူၼ်ႇၶိူဝ်းပႃႇမႆႉ ႁိၼ်ႁႄႈၶူဝ်းတိုၼ်း ၶႅၼ်းဝႆႉၵႆၵႆ ယဝ်ႉ” - ဝႃႈၼႆ။

လုင်းၸၢႆးဢၢႆႈပဝ်းတႄႉ ယၢမ်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ - “ I don’t want to be a king , I want to make a king” ႁဝ်းဢမ်ႇၶႂ်ႈႁဵတ်းၶုၼ် တေသၢင်ႈႁႂ်ႈတၢင်ႇၵေႃႉ ပဵၼ်ၶုၼ်ၵူၺ်း ဝႃႈၼႆ။
ၼႂ်းမိူင်းတႆးယၢမ်းလဵဝ် ပႃႊတီႊမၢၼ်ႈ ဢၼ်ယႂ်ႇမီးသၢမ်ဢၼ် ပႃႊတီႊသၢင်ႇသီႈ၊ ပႃႇတီႈၼူၵ်ႉယုင်း ဢၼ် တေႃႇဢွင်ႇသၢၼ်းသုၵျီႇဢွၼ်ႁူဝ်၊ ပႃႊတီႊႁူင်းၶဝ်ႈ ဢၼ်ဢူးၼေႇဝိၼ်းတင်ႈဝႆႉ။ ပႃႊတီႊ ၸၢဝ်းၶိူဝ်းတႄႉ မီးဝႃႉ 2 ဢၼ်၊ ပဢူဝ်း 2 ဢၼ်၊ လႃးႁူႇ၊ ဢႃးၶႃႇ ၊ လွႆ(တဢၢင်း) ၸဵမ်ၸိူဝ်းၼႆႉ ၵေႃႈမီး ပႃႊတီႊၽႂ်မၼ်း။