ရူတ်ႉၵႃးသိုၵ်းမၢၼ်ႈ ထႅမ်ႁႅင်းသိုၵ်း ထုၵ်ႇၸုမ်းၵူဝ်းၵၢင်ႉ လူမ်ႇတိုၵ်းယိုဝ်းသႂ်ႇ၊ ၾႆးမႆႈၵႃးတင်းလမ်း၊ ၵူၼ်းသိုၵ်းလူႉသုမ်း တၢႆဝၢတ်ႇၼမ်။ ၾၢႆႇၼိုင်ႈ သိုၵ်းမၢၼ်ႈႁၢင်ႈႁႅၼ်း ၵၢၼ်သိုၵ်း ၸွမ်းတၢင်း ၼႂ်းၵႄႈၵၢင်လႃႈသဵဝ်ႈ- သႅၼ်ဝီ။

ၵႃးသိုၵ်းမၢၼ်ႈ လုၵ်ႉမိူင်းတႆးပွတ်းႁွင်ႇ မုင်ႈၼႃႈၸူးၼႃႈလိၼ်ၵူဝ်းၵၢင်ႉ မိူဝ်ႈပူၼ်ႉမႃး

ပူၼ်ႉမႃးမိူဝ်ႈဝၼ်းတီႈ 19/04/2015 မွၵ်ႈယၢမ်းဝၢႆးဝၼ်း 3 မူင်းၶိုင်ႈ ရူတ်ႉၵႃးသိုၵ်းမၢၼ်ႈလမ်းၼိုင်ႈ ဢၼ်လုၵ်ႉတၢင်းမိူင်းတႆးပွတ်းႁွင်ႇ ၵႂႃႇထႅမ်ႁႅင်းသိုၵ်း ၼႂ်းၼႃႈလိၼ်ၵူဝ်းၵၢင်ႉ ထုၵ်ႇတပ်ႉသိုၵ်းၵူဝ်းၵၢင်ႉ (MNDAA) လူမ်ႇမူၵ်းယိုဝ်း မိူဝ်ႈပူၼ်ႉၶျိၼ်းသူၺ်ႇႁိူဝ် ၵႂႃႇလၢဝ်ႇၵၢႆး၊ ၼႂ်းၼႃႈလိၼ်ၽွင်းငမ်းတူဝ်ၵဝ်ႇ ၵူဝ်းၵၢင်ႉ ၸိုင်ႈတႆးပွတ်းႁွင်ႇ။ ၵူၼ်းသိုၵ်းၼိူဝ်ၵႃးၼၼ်ႉ ဝၢတ်ႇၸဵပ်းလူႉတၢႆတင်းၼမ်၊ ၵႃးၵေႃႈၾႆးမႆႈတင်းလမ်း။ တပ်ႉသိုၵ်းမၢၼ်ႈ ဢၼ်ၶိုၼ်ႈၵႂႃႇထႅမ်ႁႅင်းသိုၵ်းသေ ၺႃးလူမ်ႇယိုဝ်းၼႆႉ ပဵၼ်တပ်ႉၾၢႆႇၵမ်ႉၸွႆႈ မၢႆ 626 လႃႈသဵဝ်ႈ- ၼႆယဝ်ႉ။

ၵႃးသိုၵ်းမၢၼ်ႈ လမ်းဢၼ်ၺႃးလူမ်ႇယိုဝ်းၼႆႉ မိူဝ်ႈၽွင်းၶဝ်တိုၵ်ႉၶိုၼ်ႈၵႂႃႇထႅမ်ႁႅင်းသိုၵ်း ႁွတ်ႈၽႅဝ်ၸွမ်းတၢင်း တီႈမိူင်းလီ ၼႂ်းၵႄႈၵၢင်လႃႈသဵဝ်ႈ-သႅၼ်ဝီ မွၵ်ႈ 9 မူင်းၵၢင်ၼႂ်ၼၼ်ႉ မီးၵႃးတၢင်ႇၵူၼ်းမိူင်း လုၵ်ႉတၢင်းလႃႈသဵဝ်ႈၵႂႃႇသႅၼ်ဝီးၼၼ်ႉ ၶိုင်ႁႃသႅင်းပူၼ်ႉၶဝ်။ ၽွင်းၼၼ်ႉ မၢၵ်ႇတႅၵ်ႇဢၼ်ၸုမ်းဢမ်ႇႁူႉၾၢႆႇႁၢင်ႈၵၢင်ဝႆႉၸွမ်းတၢင်း တႅၵ်ႇထပ်းၵၼ် 3 လုၵ်ႈ။ ၵႃးၵူၼ်းမိူင်း လမ်းဢၼ်ၶိုင်ႁေႃႈပူၼ်ႉ ၵႃးသိုၵ်းမၢၼ်ႈၼၼ်ႉၵေႃႈတိူဝ်ႉၺႃး၊ ၵူၼ်းၼိူဝ်ၵႃးဝၢတ်ႇၸဵပ်း 3 ၵေႃႉ။ ရူတ်ႉၶိူင်ႈလမ်းၼိုင်ႈ ဢၼ်ၶီႇသွၼ်ႉၵၼ်မႃးသွင်ၵေႃႉၽူဝ်မေးၼၼ်ႉ တၢႆၵေႃႉၼိုင်ႈ ဝၢတ်ႇၸဵပ်းၵေႃႉၼိုင်ႈ။

လွင်ႈမၢၵ်ႇတႅၵ်ႇတိူဝ်ႉၵႃးၵူၼ်းမိူင်းၼႆႉ ၾၢႆႇသိုၵ်းမၢၼ်ႈလၢတ်ႈဝႃႈ- ပဵၼ်တပ်ႉသိုၵ်းၸိုင်ႈတႆး (SSPP/SSA) ပႂ်ႉမူၵ်းယိုဝ်းၵႃးသိုၵ်းမၢၼ်ႈ လႄႈ တိူဝ်ႉမႅၼ်ႈၵႃးၵူၼ်းမိူင်း။ ၵူၺ်းၵႃႈ ၵူၼ်းဢွၵ်ႇတၢင်းၵေႃႉၼိုင်ႈတႄႉဝႃႈ ႁၼ်မၢၵ်ႇတႅၵ်ႇၼၼ်ႉ လုၵ်ႉၼိူဝ်ၵႃးသိုၵ်းမၢၼ်ႈသေဝိုတ်ႉလူင်းမႃး။

ဝၢႆးမၢၵ်ႇတႅၵ်ႇ တီႈမိူင်းလီလႄႈ ၵႃးသိုၵ်းမၢၼ်ႈထုၵ်ႇမူၵ်းယိုဝ်း ၼႂ်းၼႃႈလိၼ်ၵူဝ်းၵၢင်ႉယဝ်ႉ ၾၢႆႇသိုၵ်းမၢၼ်ႈၶဝ် ဢဝ်ႁူမ်ႇလူမ်ႈၶဵင်ႈၶႅင် ၼိူဝ်သဵၼ်ႈတၢင်း လႃႈသဵဝ်ႈ- သႅၼ်ဝီ။ တင်ႈတႄႇဢဝ်ပၢင်ၽၢတ်ႇ တေႃႇထိုင်ၼမ်ႉဢုၼ်ႇ (ၸၢမ်လဝ်း) ၼႆႉ မီးသိုၵ်းမၢၼ်ႈမွၵ်ႈ 200 ပၢႆ ပၵ်းယူႇဝႆႉၸွမ်းတၢင်း၊ ၵမ်ႈၽွင်ႈၵၢၼ်းဝႆႉ၊ ၵမ်ႈၽွင်ႈမူပ်ႇဝႆႉ၊ ၵမ်ႈၽွင်ႈပႅပ်ႉတူၼ်ႈမႆႉဝႆႉသေ  ဢဝ်ၵွင်ႈငႃၸွမ်းတၢင်းဝႆႉ၊ လွင်ႈၼႆႉ ႁဵတ်းႁႂ်ႈၵူၼ်းဢွၵ်ႇတၢင်းၵႂႃႇမႃးတူၵ်းၸႂ်၊ ႁဵတ်းမိူၼ်ၼင်ႇ ၶဝ်ႁၢင်ႈႁႅၼ်းဝႆႉ ပႂ်ႉယိုဝ်းၵူၼ်းသေၵေႃႉၵေႃႉ။ ပေႃးဢမ်ႇသၢင်ႇထုၵ်ႇ ၵူၼ်းမိူင်းဢွၵ်ႇတႃႈဢွၵ်ႇတၢင်းၵေႃႈ ၸၢင်ႈၺႃးယိုဝ်း- ၵူၼ်းဢွၵ်ႇတၢင်းၵေႃႉၼိုင်ႈ ဢၼ်ႁၼ်သိုဝ်ႈၼႃႈ လၢတ်ႈ။

ဢွၼ်ၼႃႈလိူၼ်ႁႃႈသွၼ်းၼမ်ႉ / သၢင်းၵျၢၼ်ႇၼၼ်ႉ ၾၢႆႇလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဝႃႈ ၾၢႆႇတပ်ႉသိုၵ်းမၢၼ်ႈယိုတ်းလႆႈ တပ်ႉပၢင်သဝ်း ၶွင်ၸုမ်းၵူဝ်းၵၢင်ႉ လၢႆလၢႆတီႈ၊ မၢၵ်ႇမိုဝ်ႈၸိုၼ်းယၢမ်း ၵွင်ႈၵၢင်ႇလၢႆလၢႆလဝ်း။ ၼွၵ်ႈသေၼၼ်ႉ ႁၢင်ႈႁႅၼ်းဝႆႉ ပိူဝ်ႈတႃႇဢဝ်ၵူၼ်းပၢႆႈၽေး ၸိူဝ်းပၢႆႈမႃးယူႇတၢင်းလႃႈသဵဝ်ႈ လႄႈ ၸိူဝ်းပၢႆႈၶဝ်ႈၵႂႃႇၼႂ်းမိူင်းၶႄႇ ႁႂ်ႈပွၵ်ႈမႃးယူႇၶိုၼ်းၼႂ်းလၢဝ်ႇၵၢႆး ၼႃႈလိၼ်ၵူဝ်းၵၢင်ႉ။ ၵူၺ်းၵႃႈ ၾၢႆႇၼိုင်ႈၵေႃႈ တိုၵ်ႉသိုပ်ႇပဵၼ်ပၢင်တိုၵ်းယူႇ၊ ၾၢႆႇသိုၵ်းမၢၼ်ႈ ယင်းပႆႇၵုမ်းလႆႈလွင်ႈႁူမ်ႇလူမ်ႈ တင်းပိုၵ်း။

ဝၢႆးသွၼ်းၼမ်ႉမႃးၼႆႉၵေႃႈ တပ်ႉသိုၵ်းမၢၼ်ႈ တင်း တပ်ႉသိုၵ်းၵူဝ်းၵၢင်ႉ [တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊၵူႈၸၢဝ်းၶိူဝ်းမိူင်းမၢၼ်ႈ (MNDAA)] ဢၼ်ၽိူင်ၵျႃးသိူင်းဢွၼ်ႁူဝ် တိုၵ်ႉသိုပ်ႇပဵၼ်ပၢင်တိုၵ်းၵၼ်ႁၢဝ်ႈႁႅင်း၊ ၾၢႆႇသိုၵ်းမၢၼ်ႈၵေႃႈ တိုၵ်ႉၶိုၼ်ႈၵႂႃႇထႅမ်ႁႅင်းသိုၵ်း ပွတ်းတွၼ်ႈၼႃႈလိၼ်ၽွင်းငမ်းတူဝ်ၵဝ်ႇ ၵူဝ်းၵၢင်ႉ ၸိုင်ႈတႆးပွတ်းႁွင်ႇ ဢမ်ႇထၢတ်ႇဢမ်ႇယင်ႉ။